The Comprehensive Aramaic Lexicon

08:01 [ai]	ܘܰܗܘܳܐ ܡܶܢ ܒܳܬܼܰܪ ܗܳܠܶܝܢ܂ ܡܶܬܼܟܿܪܶܟܼ ܗ̱ܘܳܐ ܝܶܫܽܘܥ ܒܰܡܕܼܺܝܢܳܬܼܳܐ̈ ܘܰܒܩܽܘܪ̈ܝܳܐ܃ ܘܡܰܟܼܪܶܙ ܗ̱ܘܳܐ ܘܰܡܣܰܒܰܪ ܡܰܠܟܿܽܘܬܼܳܐ ܕܰܐܠܳܗܳܐ܂ ܘܰܬܼܪܶܥܣܰܪܬܿܶܗ ܥܰܡܶܗ܂
08:02 [ai]	ܘܢܶܫܶܐ̈ ܗܳܠܶܝܢ ܕܶܐܬܼܰܐܣܺܝ ܡܶܢ ܟܿܽܘܪ̈ܗܳܢܶܐ܂ ܘܡܶܢ ܪ̈ܽܘܚܶܐ ܒܺܝܫܳܬܼܳܐ̈܂ ܡܰܪܝܰܡ ܕܡܶܬܼܩܰܪܝܳܐ ܡܰܓܼܕܿܠܳܝܬܳܐ܂ ܗܳܝ ܕܫܰܒܼܥܳܐ ܫܺܐܕܼܺܝܢ̈ ܢܦܼܰܩܘ ܡܶܢܳܗ܂
08:03 [ai]	ܘܝܽܘܚܰܢ ܐܰܢ̱ܬܿܰܬܼ ܟܿܽܘܙܰܐ ܪܰܒܰܝܬܿܶܗ ܕܗܶܪܳܘܕܼܶܣ܂ ܘܫܽܘܫܰܢ܃ ܘܰܐ̱ܚܪ̈ܳܢܝܳܬܼܳܐ ܣܰܓܿܺܝܳܐܬܼܳܐ̈܂ ܐܰܝܠܶܝܢ ܕܰܡܫܰܡܫܳܢ̈ ܗ̱ܘܰܝ̈ ܠܗܽܘܢ ܡܶܢ ܩܶܢܝܳܢܰܝܗܶܝܢ̈ ܿ܀ܿ܀ܿ
08:04 [ai]	ܘܟܼܰܕܼ ܟܶܢܫܳܐ ܣܰܓܿܺܝܳܐܐ ܟܢܰܫ ܗ̱ܘܳܐ܃ ܘܡܶܢ ܟܽܠ ܡܕܼܺܝܢܳܢ̈ ܐܳܬܼܶܝܢ ܗ̱ܘܰܘ ܠܘܳܬܼܶܗ܃ ܐܶܡܰܪ ܒܡܰܬܼܠܶܐ̈܂
08:05 [ai]	ܢܦܼܰܩ ܙܳܪܽܘܥܳܐ ܠܡܶܙܪܰܥ ܙܰܪܥܶܗ܂ ܘܟܼܰܕܼ ܙܪܰܥ܃ ܐܺܝܬܼ ܕܰܢܦܼܰܠ ܥܰܠ ܝܰܕܼ ܐܽܘܪܚܳܐ܂ ܘܶܐܬܿܕܼܺܝܫ܂ ܘܶܐܟܼܰܠܬܼܶܗ ܦܳܪܰܚܬܼܳܐ܂
08:06 [ai]	ܘܰܐ̱ܚܪܺܢܳܐ ܢܦܼܰܠ ܥܰܠ ܫܽܘܥܳܐ܂ ܘܒܼܰܪ ܫܳܥܬܼܶܗ ܺܝܥܳܐ܂ ܘܰܕܼܠܰܝܬܿ ܗ̱ܘܳܐ ܠܶܗ ܬܰܠܺܝܠܽܘܬܼܳܐ܂ ܺܝܒܼܶܫ܂
08:07 [ai]	ܘܰܐ̱ܚܪܺܢܳܐ ܢܦܼܰܠ ܒܶܝܬܼ ܟܽܘܒܿܶܐ̈܂ ܘܺܝܥܰܘ ܥܰܡܶܗ ܟܽܘܒܿܶܐ̈܂ ܘܚܰܢܩܽܘܗ̱ܝ܂
08:08 [ai]	ܘܰܐ̱ܚܪܺܢܳܐ ܢܦܼܰܠ ܒܰܐܪܥܳܐ ܛܳܒܼܬܼܳܐ ܘܫܰܦܿܺܝܪܬܳܐ܂ ܘܺܝܥܳܐ܂ ܘܰܥܒܼܰܕܼ ܦܿܺܐܪ̈ܶܐ܂ ܚܰܕܼ ܒܰܡܳܐܐ܂ ܗܳܠܶܝܢ ܟܰܕܼ ܐܳܡܰܪ܂ ܩܳܥܶܐ ܗ̱ܘܳܐ܂ ܕܡܰܢ ܕܺܐܝܬܼ ܠܶܗ ܐܶܕܼܢܶܐ̈ ܕܢܶܫܡܰܥ܂ ܢܶܫܡܰܥ܀܀
08:09 [ai]	ܘܫܰܐܠܽܘܗ̱ܝ ܬܰܠܡܺܝܕܼܰܘܗ̱ܝ̈܂ ܕܡܳܢܰܘ ܡܰܬܼܠܳܐ ܗܳܢܳܐ܂
08:10 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܠܟܼܽܘܢ ܗ̱ܽܘ ܺܝܗܺܝܒܼ ܠܡܶܕܿܰܥ ܐ̱ܪܳܙܳܐ ܕܡܰܠܟܿܽܘܬܼܶܗ ܕܰܐܠܳܗܳܐ܂ ܠܗܳܢܽܘܢ ܕܶܝܢ ܫܰܪܟܿܳܐ܂ ܒܦܶܠܳܐܬܼܳܐ̈ ܡܶܬܼܶܐܡܰܪ܂ ܕܟܰܕܼ ܚܳܙܶܝܢ܂ ܠܳܐ ܢܶܚܙܽܘܢ܂ ܘܟܼܰܕܼ ܫܳܡܥܺܝܢ܂ ܠܳܐ ܢܶܣܬܿܰܟܠܽܘܢ܀
08:11 [ai]	ܗܳܢܰܘ ܕܶܝܢ ܡܰܬܼܠܳܐ܂ ܙܰܪܥܳܐ ܐܺܝܬܼܰܘܗ̱ܝ܂ ܡܶܠܬܼܳܐ ܕܰܐܠܳܗܳܐ܂
08:12 [ai]	ܗܳܢܽܘܢ ܕܶܝܢ ܕܥܰܠ ܝܰܕܼ ܐܽܘܪܚܳܐ܃ ܐܺܝܬܼܰܝܗܽܘܢ ܗܳܢܽܘܢ ܕܫܳܡܥܺܝܢ ܡܶܠܬܼܳܐ܃ ܘܳܐܬܼܶܐ ܒܥܶܠܕܿܒܼܳܒܼܳܐ ܫܳܩܶܠ ܡܶܠܬܼܳܐ ܡܶܢ ܠܶܒܗܽܘܢ܃ ܕܠܳܐ ܢܗܰܝܡܢܽܘܢ ܘܢܺܚܽܘܢ܂
08:13 [ai]	ܗܳܠܶܝܢ ܕܶܝܢ ܕܥܰܠ ܫܽܘܥܳܐ܃ ܗܳܠܶܝܢ ܐܶܢܽܘܢ ܕܡܳܐ ܕܰܫܡܰܥܘ܂ ܒܚܰܕܼܽܘܬܼܳܐ ܡܩܰܒܿܠܺܝܢ ܠܳܗ ܠܡܶܠܬܼܳܐ܃ ܘܥܶܩܳܪܳܐ ܠܰܝܬܿ ܠܗܽܘܢ܂ ܐܶܠܳܐ ܕܙܰܒܼܢܳܐ ܗ̱ܝ ܗܰܝܡܳܢܽܘܬܼܗܽܘܢ܂ ܘܒܼܰܙܒܼܰܢ ܢܶܣܝܽܘܢܳܐ܂ ܡܶܬܼܟܿܰܫܠܺܝܢ܂
08:14 [ai]	ܗܰܘ ܕܶܝܢ ܕܰܢܦܼܰܠ ܒܶܝܬܼ ܟܽܘܒܿܶܐ̈܃ ܗܳܠܶܝܢ ܐܶܢܽܘܢ܂ ܐܰܝܠܶܝܢ ܕܫܳܡܥܺܝܢ ܡܶܠܬܼܳܐ܃ ܘܰܒܨܶܦܼܬܼܳܐ ܘܰܒܥܽܘܬܼܪܳܐ ܘܒܼܰܪ̈ܓܼܺܝܓܼܳܬܼܶܗ ܕܥܳܠܡܳܐ ܡܶܬܼܚܰܢܩܺܝܢ܃ ܘܦܼܺܐܪ̈ܶܐ ܠܳܐ ܝܳܗܒܺܝܢ܂
08:15 [ai]	ܗܰܘ ܕܶܝܢ ܕܒܰܐܪܥܳܐ ܛܳܒܼܬܼܳܐ܃ ܗܳܠܶܝܢ ܐܶܢܽܘܢ܂ ܐܰܝܠܶܝܢ ܕܰܒܼܠܶܒܿܳܐ ܫܰܦܼܝܳܐ ܘܛܳܒܼܳܐ ܫܳܡܥܺܝܢ ܡܶܠܬܼܳܐ܃ ܘܳܐܚܕܺܝܢ܂ ܘܝܳܗܒܺܝܢ ܦܿܺܐܪ̈ܶܐ ܒܰܡܣܰܝܒܿܪܳܢܽܘܬܼܳܐ܀
08:16 [ai]	ܠܳܐ ܐ̱ܢܳܫ ܡܰܢܗܰܪ ܫܪܳܓܼܳܐ܂ ܘܰܡܚܰܦܿܶܐ ܠܶܗ ܒܡܳܐܢܳܐ܃ ܐܰܘ ܣܳܐܶܡ ܠܶܗ ܬܚܶܝܬܼ ܥܰܪܣܳܐ܂ ܐܶܠܳܐ ܣܳܐܶܡ ܠܶܗ ܠܥܶܠ ܡܶܢ ܡܢܳܪܬܳܐ܂ ܕܟܽܠ ܕܥܳܐܶܠ܂ ܢܶܚܙܶܐ ܢܽܘܗܪܶܗ܂
08:17 [ai]	ܠܰܝܬܿ ܓܶܝܪ ܡܶܕܶܡ ܕܰܟܼܣܶܐ܂ ܕܠܳܐ ܢܶܬܼܓܠܶܐ܂ ܘܠܳܐ ܕܰܡܛܰܫܰܝ܂ ܕܠܳܐ ܢܶܬܼܺܝܕܼܰܥ܂ ܘܢܺܐܬܼܶܐ ܠܓܼܶܠܝܳܐ܂
08:18 [ai]	ܚܙܰܘ ܐܰܝܟܿܰܢܳܐ ܫܡܰܥܬܿܽܘܢ܂ ܡܰܢ ܕܺܐܝܬܼ ܠܶܗ ܓܶܝܪ܂ ܢܶܬܼܺܝܗܶܒܼ ܠܶܗ܂ ܘܡܰܢ ܕܠܰܝܬܿ ܠܶܗ܃ ܐܳܦܼ ܗܰܘ ܕܣܳܒܼܰܪ ܕܺܐܝܬܼ ܠܶܗ܂ ܢܶܫܬܿܩܶܠ ܡܶܢܶܗ܀
08:19 [ai]	ܐܶܬܼܰܘ ܕܶܝܢ ܠܘܳܬܼܶܗ ܐܶܡܶܗ ܘܰܐܚܰܘܗ̱ܝ̈܃ ܘܠܳܐ ܡܶܫܟܿܚܺܝܢ ܗ̱ܘܰܘ ܕܰܢܡܰܠܠܽܘܢ ܥܰܡܶܗ܂ ܡܶܛܽܠ ܟܶܢܫܳܐ܂
08:20 [ai]	ܘܶܐܡܰܪܘ ܠܶܗ܂ ܐܶܡܳܟܼ ܘܰܐܚܰܝܟܿ̈ ܩܳܝܡܺܝܢ ܠܒܼܰܪ܂ ܘܨܳܒܼܶܝܢ ܠܡܶܚܙܝܳܟܼ܂
08:21 [ai]	ܗܽܘ ܕܶܝܢ ܥܢܳܐ܂ ܘܶܐܡܰܪ ܠܗܽܘܢ܂ ܗܳܠܶܝܢ ܐܶܢܽܘܢ ܐܶܡܝ ܘܰܐܚܰܝ̈܃ ܐܰܝܠܶܝܢ ܕܫܳܡܥܺܝܢ ܡܶܠܬܼܳܐ ܕܰܐܠܳܗܳܐ܂ ܘܥܳܒܼܕܺܝܢ ܠܳܗ܀܀
08:22 [ai]	ܗܘܳܐ ܕܶܝܢ ܒܚܰܕܼ ܡܶܢ ܝܰܘܡܳܬܼܳܐ̈܃ ܣܠܶܩ ܝܶܫܽܘܥ ܺܝܬܼܶܒܼ ܒܰܣܦܼܺܝܢ̱ܬܳܐ܂ ܗܽܘ ܘܬܼܰܠܡܺܝܕܼܰܘܗ̱ܝ̈܂ ܘܶܐܡܰܪ ܠܗܽܘܢ܂ ܢܶܥܒܰܪ ܠܗܰܘ ܥܶܒܼܪܳܐ ܕܝܰܡܬܼܳܐ܀
08:23 [ai]	ܘܟܼܰܕܼ ܪܳܕܼܶܝܢ܂ ܕܡܶܟܼ ܠܶܗ ܗܽܘ ܝܶܫܽܘܥ܂ ܘܰܗܘܳܬܼ ܥܰܠܥܳܠܳܐ ܕܪܽܘܚܳܐ ܒܝܰܡܬܼܳܐ܂ ܘܩܰܪܺܝܒܼܳܐ ܗ̱ܘܳܬܼ ܣܦܼܺܝܢ̱ܬܳܐ ܠܡܶܛܒܿܰܥ܂
08:24 [ai]	ܘܰܩܪܶܒܼܘ ܐܰܥܺܝܪܽܘܗ̱ܝ܂ ܘܳܐܡܪܺܝܢ ܠܶܗ܂ ܪܰܒܰܢ܂ ܪܰܒܰܢ܂ ܐܳܒܼܕܺܝܢܰܢ܂ ܗܽܘ ܕܶܝܢ܂ ܩܳܡ ܘܰܟܼܐܳܐ ܒܪ̈ܽܘܚܶܐ ܘܰܒܡܰܚܫܽܘܠܶܐ̈ ܕܝܰܡܳܐ܂ ܘܢܳܚܘ܂ ܘܰܗܘܳܐ ܫܶܠܝܳܐ܂
08:25 [ai]	ܘܶܐܡܰܪ ܠܗܽܘܢ܂ ܐܰܝܟܿܳܐ ܗ̱ܝ ܗܰܝܡܳܢܽܘܬܼܟܼܽܘܢ܂ ܗܶܢܽܘܢ ܕܶܝܢ ܟܰܕܼ ܕܰܚܺܝܠܺܝܢ܃ ܡܶܬܿܕܰܡܪܺܝܢ ܗ̱ܘܰܘ ܘܳܐܡܪܺܝܢ ܚܰܕܼ ܠܚܰܕܼ܂ ܡܰܢܽܘ ܟܰܝ ܗܳܢܳܐ܂ ܕܳܐܦܼ ܠܪ̈ܽܘܚܶܐ ܦܳܩܶܕܼ܂ ܘܰܠܡܰܚܫܽܘܠܶܐ̈ ܘܰܠܝܰܡܳܐ܃ ܘܡܶܫܬܿܰܡܥܺܝܢ ܠܶܗ܀
08:26 [ai]	ܘܰܪܕܼܰܘ ܘܶܐܬܼܰܘ ܠܰܐܬܼܪܳܐ ܕܿܓܼܳܕܼܪ̈ܳܝܶܐ܃ ܕܺܐܝܬܼܰܘܗ̱ܝ ܒܥܶܒܼܪܳܐ܂ ܠܽܘܩܒܼܰܠ ܓܠܺܝܠܳܐ܂
08:27 [ai]	ܘܟܼܰܕܼ ܢܦܼܰܩ ܠܰܐܪܥܳܐ܃ ܦܓܼܰܥ ܒܶܗ ܓܰܒܼܪܳܐ ܚܰܕܼ ܡܶܢ ܡܕܼܺܝܢ̱ܬܳܐ܃ ܕܺܐܝܬܼ ܒܶܗ ܕܰܝܘܳܐ܂ ܡܶܢ ܙܰܒܼܢܳܐ ܣܰܓܿܺܝܳܐܐ܂ ܘܡܳܐܢܶܐ̈ ܠܳܐ ܠܳܒܼܶܫ ܗ̱ܘܳܐ܂ ܘܰܒܒܼܰܝܬܳܐ ܠܳܐ ܥܳܡܰܪ ܗ̱ܘܳܐ܂ ܐܶܠܳܐ ܒܒܼܶܝܬܼ ܩܒܼܽܘܪ̈ܶܐ܂
08:28 [ai]	ܟܰܕܼ ܚܙܳܐ ܕܶܝܢ ܠܝܶܫܽܘܥ܃ ܩܥܳܐ܂ ܘܰܢܦܼܰܠ ܩܕܼܳܡܰܘܗ̱ܝ܂ ܘܰܒܩܳܠܳܐ ܪܳܡܳܐ ܐܶܡܰܪ܂ ܡܳܐ ܠܰܢ ܘܠܳܟܼ܂ ܝܶܫܽܘܥ܃ ܒܪܶܗ ܕܰܐܠܳܗܳܐ ܡܪܰܝܡܳܐ܂ ܒܿܳܥܶܐ ܐ̱ܢܳܐ ܡܶܢܳܟܼ܂ ܠܳܐ ܬܫܰܢܩܰܢܝ܂
08:29 [ai]	ܦܳܩܶܕܼ ܗ̱ܘܳܐ ܠܶܗ ܓܶܝܪ ܝܶܫܽܘܥ ܠܪܽܘܚܳܐ ܛܰܢܦܼܳܐ܂ ܠܡܶܦܿܰܩ ܡܶܢ ܒܰܪܢܳܫܳܐ܂ ܣܰܓܿܺܝ ܗ̱ܘܳܐ ܓܶܝܪ ܙܰܒܼܢܳܐ܂ ܡܶܢ ܕܰܫܒܼܶܐ ܗ̱ܘܳܐ ܠܶܗ܂ ܘܡܶܬܼܶܐܣܰܪ ܗ̱ܘܳܐ ܒܫܺܫܠܳܬܼܳܐ̈܃ ܘܰܒܟܼܶܒܼܠܶܐ̈ ܡܶܬܼܢܛܰܪ ܗ̱ܘܳܐ܂ ܘܰܡܦܼܰܣܶܩ ܗ̱ܘܳܐ ܐܰܣܽܘܪ̈ܰܘܗ̱ܝ܃ ܘܡܶܬܿܕܒܰܪ ܗ̱ܘܳܐ ܡܶܢ ܫܺܐܕܼܳܐ ܠܚܽܘܪܒܿܳܐ܂
08:30 [ai]	ܫܰܐܠܶܗ ܕܶܝܢ ܝܶܫܽܘܥ܂ ܡܰܢ ܫܡܳܟܼ܂ ܐܳܡܰܪ ܠܶܗ܂ ܠܶܓܼܝܽܘܢ܃ ܡܶܛܽܠ ܕܕܼܰܝܘܶܐ̈ ܣܰܓܿܺܝܶܐܐ̈ ܥܰܠܺܝܠܺܝܢ ܗ̱ܘܰܘ ܒܶܗ܂
08:31 [ai]	ܘܒܼܳܥܶܝܢ ܗ̱ܘܰܘ ܡܶܢܶܗ܃ ܕܠܳܐ ܢܶܦܼܩܽܘܕܼ ܠܗܽܘܢ ܠܡܺܐܙܰܠ ܠܰܬܼܗܽܘܡܳܐ܂
08:32 [ai]	ܐܺܝܬܼ ܗ̱ܘܳܐ ܕܶܝܢ ܬܰܡܳܢ܂ ܒܰܩܪܳܐ ܕܰܚܙܺܝܪ̈ܶܐ ܣܰܓܿܺܝܶܐܐ̈܂ ܕܪܳܥܝܳܐ ܒܛܽܘܪܳܐ܂ ܘܒܼܳܥܶܝܢ ܗ̱ܘܰܘ ܡܶܢܶܗ܃ ܕܢܰܦܿܶܣ ܠܗܽܘܢ܂ ܕܒܰܚܙܺܝܪ̈ܶܐ ܢܶܥܠܽܘܢ܂ ܘܰܐܦܿܶܣ ܠܗܽܘܢ܂
08:33 [ai]	ܘܰܢܦܼܰܩܘ ܫܺܐܕܼܶܐ̈ ܡܶܢ ܓܰܒܼܪܳܐ܂ ܘܥܰܠܘ ܒܰܚܙܺܝܪ̈ܶܐ܂ ܘܬܼܶܪܨܰܬܼ ܒܰܩܪܳܐ ܗܳܝ ܟܽܠܳܗ ܠܰܫܩܺܝܦܼܳܐ܃ ܘܰܢܦܼܰܠܘ ܒܝܰܡܬܼܳܐ܂ ܘܶܐܬܼܚܰܢܰܩܘ܂
08:34 [ai]	ܟܰܕܼ ܚܙܰܘ ܕܶܝܢ ܪ̈ܳܥܰܘܳܬܼܳܐ ܡܶܕܶܡ ܕܰܗܘܳܐ܃ ܥܪܰܩܘ܂ ܘܶܐܫܬܿܰܥܺܝܘ ܒܰܡܕܼܺܝܢܳܬܼܳܐ̈܂ ܘܰܒܩܽܘܪ̈ܝܳܐ܂
08:35 [ai]	ܘܰܢܦܼܰܩܘ ܐ̱ܢܳܫܳܐ ܕܢܶܚܙܽܘܢ ܡܶܕܶܡ ܕܰܗܘܳܐ܃ ܘܶܐܬܼܰܘ ܠܘܳܬܼ ܝܶܫܽܘܥ܂ ܘܶܐܫܟܿܚܽܘܗ̱ܝ ܠܓܼܰܒܼܪܳܐ ܗܰܘ ܕܰܢܦܼܰܩܘ ܫܺܐܕܼܰܘܗ̱ܝ̈܃ ܟܰܕܼ ܠܒܼܺܝܫ ܘܰܡܢܰܟܿܰܦܼ܂ ܘܝܳܬܼܶܒܼ ܠܘܳܬܼ ܪ̈ܶܓܼܠܰܘܗ̱ܝ ܕܝܶܫܽܘܥ܂ ܘܰܕܼܚܶܠܘ܂
08:36 [ai]	ܘܶܐܫܬܿܰܥܺܝܘ ܠܗܽܘܢ ܐܰܝܠܶܝܢ ܕܰܚܙܰܘ܃ ܐܰܝܟܿܰܢܳܐ ܐܶܬܼܰܐܣܺܝ ܓܰܒܼܪܳܐ ܗܰܘ ܕܰܝܘܳܢܳܐ܂
08:37 [ai]	ܘܒܼܳܥܶܝܢ ܗ̱ܘܰܘ ܡܶܢܶܗ ܟܽܠܶܗ ܟܶܢܫܳܐ ܕܿܓܼܳܕܼܪ̈ܳܝܶܐ܂ ܕܢܺܐܙܰܠ ܠܶܗ ܡܶܢ ܠܘܳܬܼܗܽܘܢ܂ ܡܶܛܽܠ ܕܕܼܶܚܠܬܼܳܐ ܪܰܒܿܬܼܳܐ ܐܶܚܕܿܰܬܼ ܐܶܢܽܘܢ܂ ܗܽܘ ܕܶܝܢ ܝܶܫܽܘܥ ܣܠܶܩ ܠܰܣܦܼܺܝܢ̱ܬܳܐ܂ ܘܰܗܦܼܰܟܼ ܡܶܢ ܠܘܳܬܼܗܽܘܢ܀
08:38 [ai]	ܗܰܘ ܕܶܝܢ ܓܰܒܼܪܳܐ ܕܰܢܦܼܰܩܘ ܡܶܢܶܗ ܫܺܐܕܼܶܐ̈܃ ܒܿܳܥܶܐ ܗ̱ܘܳܐ ܡܶܢܶܗ܂ ܕܰܠܘܳܬܼܶܗ ܢܶܗܘܶܐ܂ ܘܰܫܪܳܝܗ̱ܝ ܝܶܫܽܘܥ܂ ܘܶܐܡܰܪ ܠܶܗ܂
08:39 [ai]	ܗܦܼܽܘܟܼ ܠܒܼܰܝܬܿܳܟܼ܃ ܘܶܐܫܬܿܰܥܳܐ ܡܶܕܶܡ ܕܰܥܒܼܰܕܼ ܠܳܟܼ ܐܰܠܳܗܳܐ܂ ܘܶܐܙܰܠ܂ ܘܡܰܟܼܪܶܙ ܗ̱ܘܳܐ ܒܟܽܠܳܗ ܡܕܼܺܝܢ̱ܬܳܐ܂ ܡܶܕܶܡ ܕܰܥܒܼܰܕܼ ܠܶܗ ܝܶܫܽܘܥ܀
08:40 [ai]	ܟܰܕܼ ܗܦܼܰܟܼ ܕܶܝܢ ܝܶܫܽܘܥ܃ ܩܰܒܿܠܶܗ ܟܶܢܫܳܐ ܣܰܓܿܺܝܳܐܐ܂ ܟܽܠܗܽܘܢ ܓܶܝܪ ܠܶܗ ܚܳܝܪܺܝܢ ܗ̱ܘܰܘ܂
08:41 [ai]	ܘܓܼܰܒܼܪܳܐ ܚܰܕܼ ܕܰܫܡܶܗ ܝܽܘܐܳܪܳܫ܂ ܪܺܝܫ ܟܢܽܘܫܬܳܐ܃ ܢܦܼܰܠ ܩܕܼܳܡ ܪ̈ܶܓܼܠܰܘܗ̱ܝ ܕܝܶܫܽܘܥ܃ ܘܒܼܳܥܶܐ ܗ̱ܘܳܐ ܡܶܢܶܗ ܕܢܶܥܽܘܠ ܠܒܼܰܝܬܿܶܗ܂
08:42 [ai]	ܒܰܪܬܼܳܐ ܓܶܝܪ ܺܝܚܺܝܕܼܳܝܬܳܐ ܐܺܝܬܼ ܗ̱ܘܳܬܼ ܠܶܗ܂ ܐܰܝܟܼ ܒܰܪ̱ܬܼ ܫܢܺܝܢ̈ ܬܿܰܪ̈ܬܿܰܥܶܣܪܶܐ܂ ܘܩܰܪܺܝܒܼܳܐ ܗ̱ܘܳܬܼ ܠܰܡܡܳܬܼ܂ ܘܟܼܰܕܼ ܐܳܙܶܠ ܥܰܡܶܗ ܗܽܘ ܝܶܫܽܘܥ܂ ܟܶܢܫܳܐ ܣܰܓܿܺܝܳܐܐ ܚܳܒܼܶܨ ܗ̱ܘܳܐ ܠܶܗ܀
08:43 [ai]	ܐܰܢ̱ܬܿܬܼܳܐ ܕܶܝܢ ܚܕܼܳܐ܂ ܕܰܬܼܪܺܝܥ ܗ̱ܘܳܐ ܕܡܳܗ ܫܢܺܝܢ̈ ܬܿܰܪ̈ܬܿܰܥܶܣܪܶܐ܃ ܗܳܝ ܕܒܶܝܬܼ ܐܳܣܰܘܳܬܼܳܐ̈ ܟܽܠܶܗ ܩܶܢܝܳܢܳܗ ܐܰܦܿܩܰܬܼ܃ ܘܠܳܐ ܐܶܫܟܿܚܰܬܼ ܕܡܶܢ ܐ̱ܢܳܫ ܬܶܬܼܰܐܣܶܐ܃
08:44 [ai]	ܐܶܬܼܩܰܪܒܼܰܬܼ ܡܶܢ ܒܶܣܬܿܪܶܗ܂ ܘܩܶܪܒܿܰܬܼ ܠܟܼܶܢܦܼܳܐ ܕܡܳܐܢܶܗ܂ ܘܡܶܚܕܼܳܐ܂ ܩܳܡܰܬܼ ܡܰܪܕܿܺܝܬܼܳܐ ܕܰܕܼܡܳܗ܂
08:45 [ai]	ܘܶܐܡܰܪ ܝܶܫܽܘܥ܂ ܡܰܢܽܘ ܩܪܶܒܼ ܠܺܝ܂ ܘܟܼܰܕܼ ܟܽܠܗܽܘܢ ܟܳܦܼܪܺܝܢ܃ ܐܳܡܰܪ ܠܶܗ ܫܶܡܥܽܘܢ ܟܺܐܦܼܳܐ܂ ܘܰܕܼܥܰܡܶܗ܂ ܪܰܒܰܢ܂ ܟܶܢܫܶܐ̈ ܐܳܠܨܺܝܢ ܠܳܟܼ ܘܚܳܒܼܨܺܝܢ܃ ܘܳܐܡܰܪ ܐܰܢ̱ܬܿ܃ ܡܰܢܽܘ ܩܪܶܒܼ ܠܺܝ܃
08:46 [ai]	ܗܽܘ ܕܶܝܢ ܐܶܡܰܪ܂ ܐ̱ܢܳܫ ܩܪܶܒܼ ܠܺܝ܂ ܐܶܢܳܐ ܓܶܝܪ ܝܶܕܼܥܶܬܼ ܕܚܰܝܠܳܐ ܢܦܼܰܩ ܡܶܢܝ܂
08:47 [ai]	ܗܳܝ ܕܶܝܢ ܐܰܢ̱ܬܿܬܼܳܐ܂ ܟܰܕܼ ܚܙܳܬܼ ܕܠܳܐ ܛܥܳܬܼܶܗ܃ ܐܶܬܼܳܬܼ ܟܰܕܼ ܪܰܬܿܺܝܬܼܳܐ܂ ܘܢܶܦܼܠܰܬܼ ܣܶܓܼܕܿܰܬܼ ܠܶܗ܂ ܘܶܐܡܪܰܬܼ ܠܥܺܝܢ ܥܰܡܳܐ ܟܽܠܶܗ܃ ܡܶܛܽܠ ܐܰܝܕܼܳܐ ܥܶܠܬܼܳܐ ܩܶܪܒܿܰܬܼ܃ ܘܰܐܝܟܿܰܢܳܐ ܡܶܚܕܼܳܐ ܐܶܬܼܰܐܣܝܰܬܼ܂
08:48 [ai]	ܗܽܘ ܕܶܝܢ ܝܶܫܽܘܥ܂ ܐܶܡܰܪ ܠܳܗ܂ ܐܶܬܼܠܰܒ̱ܿܒܼܝ ܒܪܰܬܼܝ܃ ܗܰܝܡܳܢܽܘܬܼܶܟܼܝ ܐܰܚܝܰܬܼܶܟܼܝ܂ ܙܶܠܝ ܒܰܫܠܳܡܳܐ ܿ܀ܿ܀ܿ
08:49 [ai]	ܘܥܰܕܼ ܗܽܘ ܡܡܰܠܶܠ܃ ܐܶܬܼܳܐ ܐ̱ܢܳܫ ܡܶܢ ܕܒܶܝܬܼ ܪܰܒܿ ܟܢܽܘܫܬܳܐ܂ ܘܶܐܡܰܪ ܠܶܗ܂ ܡܺܝܬܼܰܬܼ ܠܳܗ ܒܰܪܬܼܳܟܼ܂ ܠܳܐ ܬܰܥܡܶܠ ܠܡܰܠܦܼܳܢܳܐ܂
08:50 [ai]	ܝܶܫܽܘܥ ܕܶܝܢ ܫܡܰܥ܂ ܘܶܐܡܰܪ ܠܰܐܒܼܽܘܗ ܕܰܛܠܺܝܬܼܳܐ܂ ܠܳܐ ܬܶܕܼܚܰܠ܂ ܒܰܠܚܽܘܕܼ ܗܰܝܡܶܢ܂ ܘܚܳܝܳܐ܂
08:51 [ai]	ܐܶܬܼܳܐ ܕܶܝܢ ܝܶܫܽܘܥ ܠܒܼܰܝܬܳܐ܃ ܘܠܳܐ ܫܒܼܰܩ ܠܐ̱ܢܳܫ ܕܢܶܥܽܘܠ ܥܰܡܶܗ܃ ܐܶܠܳܐ ܠܫܶܡܥܽܘܢ܂ ܘܰܠܝܰܥܩܽܘܒܼ܂ ܘܰܠܝܽܘܚܰܢܳܢ܂ ܘܠܰܐܒܼܽܘܗ ܕܰܛܠܺܝܬܼܳܐ܂ ܘܠܶܐܡܳܗ܂
08:52 [ai]	ܟܽܠܗܽܘܢ ܕܶܝܢ܂ ܒܳܟܼܶܝܢ ܗ̱ܘܰܘ܂ ܘܡܰܪܩܕܼܺܝܢ ܥܠܶܝܗ܂ ܝܶܫܽܘܥ ܕܶܝܢ ܐܶܡܰܪ܂ ܠܳܐ ܬܶܒܼܟܿܽܘܢ܂ ܠܳܐ ܓܶܝܪ ܡܺܝܬܼܰܬܼ܂ ܐܶܠܳܐ ܕܰܡܟܿܳܐ ܗ̱ܝ܂
08:53 [ai]	ܘܓܼܳܚܟܿܺܝܢ ܗ̱ܘܰܘ ܥܠܰܘܗ̱ܝ܂ ܕܝܳܕܼܥܺܝܢ ܕܡܺܝܬܼܰܬܼ ܠܳܗ܂
08:54 [ai]	ܗܽܘ ܕܶܝܢ ܐܰܦܿܶܩ ܠܟܼܽܠܢܳܫ ܠܒܼܰܪ܂ ܘܰܐܚܕܿܳܗ ܒܺܐܝܕܼܳܗ܂ ܘܰܩܪܳܗ܂ ܘܶܐܡܰܪ܂ ܛܠܺܝܬܼܳܐ܂ ܩܽܘܡܝ܂
08:55 [ai]	ܘܗܶܦܼܟܿܰܬܼ ܪܽܘܚܳܗ܂ ܘܡܶܚܕܼܳܐ ܩܳܡܰܬܼ܂ ܘܰܦܼܩܰܕܼ ܕܢܶܬܿܠܽܘܢ ܠܳܗ ܠܡܶܐܟܼܰܠ܂
08:56 [ai]	ܘܰܬܼܡܰܗܘ ܐܰܒܼܳܗܶܝܗ̈܂ ܗܽܘ ܕܶܝܢ ܙܰܗܰܪ ܐܶܢܽܘܢ܃ ܕܰܠܐ̱ܢܳܫ܂ ܠܳܐ ܢܺܐܡܪܽܘܢ ܡܳܐ ܕܰܗܘܳܐ܀

next chapter