← Back
The Comprehensive Aramaic Lexicon
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

01:01 [ai]ܒܪܺܫܺܝܬܼ ܐܺܝܬܼܰܘܗ̱ܝ ܗ̱ܘܳܐ ܡܶܠܬܼܳܐ܂ ܘܗܽܘ ܡܶܠܬܼܳܐ܂ ܐܺܝܬܼܰܘܗ̱ܝ ܗ̱ܘܳܐ ܠܘܳܬܼ ܐܰܠܳܗܳܐ܂ ܘܰܐܠܳܗܳܐ ܐܺܝܬܼܰܘܗ̱ܝ ܗ̱ܘܳܐ ܗܽܘ ܡܶܠܬܼܳܐ܂
01:02 [ai]ܗܳܢܳܐ܂ ܐܺܝܬܼܰܘܗ̱ܝ ܗ̱ܘܳܐ ܒܪܺܫܺܝܬܼ ܠܘܳܬܼ ܐܰܠܳܗܳܐ܂
01:03 [ai]ܟܽܠ ܒܺܐܝܕܼܶܗ ܗܘܳܐ܂ ܘܒܼܶܠܥܳܕܼܰܘܗ̱ܝ̈ ܐܳܦܼܠܳܐ ܚܕܼܳܐ ܗܘܳܬܼ ܡܶܕܶܡ ܕܰܗܘܳܐ܂
01:04 [ai]ܒܶܗ ܚܰܝ̈ܶܐ ܗܘܳܐ܂ ܘܚܰܝ̈ܶܐ ܐܺܝܬܼܰܝܗܽܘܢ܂ ܢܽܘܗܪܳܐ ܕܿܰܒܼܢܰܝܢܳܫܳܐ܂
01:05 [ai]ܘܗܽܘ ܢܽܘܗܪܳܐ ܒܚܶܫܽܘܟܼܳܐ ܡܰܢܗܰܪ܂ ܘܚܶܫܽܘܟܼܳܐ ܠܳܐ ܐܰܕܼܪܟܼܶܗ܀
01:06 [ai]ܗܘܳܐ ܒܰܪܢܳܫܳܐ ܕܶܐܫܬܿܰܕܿܰܪ ܡܶܢ ܐܰܠܳܗܳܐ܂ ܫܡܶܗ ܝܽܘܚܰܢܳܢ܂
01:07 [ai]ܗܳܢܳܐ ܐܶܬܼܳܐ ܠܣܳܗܕܿܽܘܬܼܳܐ܂ ܕܢܶܣܗܰܕܼ ܥܰܠ ܢܽܘܗܪܳܐ܂ ܕܟܽܠܢܳܫ ܢܗܰܝܡܶܢ ܒܺܐܝܕܼܶܗ܂
01:08 [ai]ܠܳܐ ܗܽܘ ܗܘܳܐ ܢܽܘܗܪܳܐ܂ ܐܶܠܳܐ ܕܢܶܣܗܰܕܼ ܥܰܠ ܢܽܘܗܪܳܐ܂
01:09 [ai]ܐܺܝܬܼܰܘܗ̱ܝ ܗ̱ܘܳܐ ܓܶܝܪ ܢܽܘܗܪܳܐ ܕܰܫܪܳܪܳܐ܃ ܕܡܰܢܗܰܪ ܠܟܼܽܠܢܳܫ ܕܳܐܬܼܶܐ ܠܥܳܠܡܳܐ܂
01:10 [ai]ܒܥܳܠܡܳܐ ܗ̱ܘܳܐ܂ ܘܥܳܠܡܳܐ ܒܺܐܝܕܼܶܗ ܗܘܳܐ܂ ܘܥܳܠܡܳܐ ܠܳܐ ܝܰܕܼܥܶܗ܂
01:11 [ai]ܠܕܼܺܝܠܶܗ ܐܶܬܼܳܐ܂ ܘܕܼܺܝܠܶܗ ܠܳܐ ܩܰܒܿܠܽܘܗ̱ܝ܂
01:12 [ai]ܐܰܝܠܶܝܢ ܕܶܝܢ ܕܩܰܒܿܠܽܘܗ̱ܝ܂ ܝܰܗ̱ܒܼ ܠܗܽܘܢ ܫܽܘܠܛܳܢܳܐ܂ ܕܿܰܒܼܢܰܝܳܐ ܕܰܐܠܳܗܳܐ ܢܶܗܘܽܘܢ܂ ܠܰܐܝܠܶܝܢ ܕܰܡܗܰܝܡܢܺܝܢ ܒܰܫܡܶܗ܂
01:13 [ai]ܐܰܝܠܶܝܢ ܕܠܰܘ ܡܶܢ ܕܡܳܐ܂ ܘܠܳܐ ܡܶܢ ܨܶܒܼܝܳܢܳܐ ܕܒܶܣܪܳܐ܂ ܘܠܳܐ ܡܶܢ ܨܶܒܼܝܳܢܳܐ ܕܓܰܒܼܪܳܐ܂ ܐܶܠܳܐ܂ ܡܶܢ ܐܰܠܳܗܳܐ ܐܶܬܼܺܝܠܶܕܼܘ܀
01:14 [ai]ܘܡܶܠܬܼܳܐ ܒܶܣܪܳܐ ܗܘܳܐ܂ ܘܰܐܓܿܶܢ ܒܰܢ܂ ܘܰܚܙܰܝܢ ܫܽܘܒܼܚܶܗ܂ ܫܽܘܒܼܚܳܐ ܐܰܝܟܼ ܕܺܝܚܺܝܕܼܳܝܳܐ ܕܡܶܢ ܐܰܒܼܳܐ܃ ܕܰܡܠܶܐ ܛܰܝܒܿܽܘܬܼܳܐ ܘܩܽܘܫܬܳܐ܀
01:15 [ai]ܝܽܘܚܰܢܳܢ ܣܗܶܕܼ ܥܠܰܘܗ̱ܝ܂ ܘܰܩܥܳܐ ܘܶܐܡܰܪ܂ ܗܳܢܰܘ ܗܰܘ ܕܶܐܡܪܶܬܼ ܕܒܳܬܼܰܪܝ ܐܳܬܼܶܐ܂ ܘܰܗܘܳܐ ܠܶܗ ܩܕܼܳܡܰܝ܂ ܡܶܛܽܠ ܕܩܰܕܼܡܳܝ ܗ̱ܽܘ ܡܶܢܝ܀
01:16 [ai]ܘܡܶܢ ܡܰܠܝܽܘܬܼܶܗ ܚܢܰܢ ܟܽܠܰܢ ܢܣܰܒܼܢ܂ ܘܛܰܝܒܿܽܘܬܼܳܐ܂ ܚܠܳܦܼ ܛܰܝܒܿܽܘܬܼܳܐ܂
01:17 [ai]ܡܶܛܽܠ ܕܢܳܡܽܘܣܳܐ ܒܝܰܕܼ ܡܽܘܫܶܐ ܐܶܬܼܺܝܗܶܒܼ܂ ܫܪܳܪܳܐ ܕܶܝܢ ܘܛܰܝܒܿܽܘܬܼܳܐ܂ ܒܝܰܕܼ ܝܶܫܽܘܥ ܡܫܺܝܚܳܐ ܗܘܳܐ܀
01:18 [ai]ܐܰܠܳܗܳܐ ܠܳܐ ܚܙܳܐ ܐ̱ܢܳܫ ܡܶܡܬܼܽܘܡ܂ ܺܝܚܺܝܕܼܳܝܳܐ ܐܰܠܳܗܳܐ܂ ܗܰܘ ܕܺܐܝܬܼܰܘܗ̱ܝ ܒܥܽܘܒܿܳܐ ܕܰܐܒܼܽܘܗ̱ܝ܂ ܗܽܘ ܐܶܫܬܿܰܥܺܝ܀
01:19 [ai]ܘܗܳܕܼܶܐ ܗܺܝ ܣܳܗܕܿܽܘܬܼܶܗ ܕܝܽܘܚܰܢܳܢ܃ ܟܰܕܼ ܫܰܕܿܰܪܘ ܠܘܳܬܼܶܗ ܺܝܗܽܘܕܼܳܝܶܐ̈ ܡܶܢ ܐܽܘܪܺܫܠܶܡ܂ ܟܳܗܢܶܐ̈ ܘܠܶܘܳܝܶܐ̈ ܕܰܢܫܰܐܠܽܘܢܳܝܗ̱ܝ܂ ܐܰܢ̱ܬܿ ܡܰܢ ܐܰܢ̱ܬܿ܂
01:20 [ai]ܘܰܐܘܕܿܺܝ܂ ܘܠܳܐ ܟܦܼܰܪ܂ ܘܰܐܘܕܿܺܝ܂ ܕܠܰܘ ܐܶܢܳܐ ܐ̱ܢܳܐ ܡܫܺܝܚܳܐ܂
01:21 [ai]ܘܫܰܐܠܽܘܗ̱ܝ ܬܽܘܒܼ܂ ܡܳܢܳܐ ܗܳܟܼܺܝܠ܂ ܐܺܠܺܝܳܐ ܐܰܢ̱ܬܿ܃ ܘܶܐܡܰܪ ܠܳܐ ܐܺܝܬܼܰܝ܂ ܢܒܼܺܝܳܐ ܐܰܢ̱ܬܿ܃ ܘܶܐܡܰܪ ܠܳܐ܂
01:22 [ai]ܘܶܐܡܰܪܘ ܠܶܗ܂ ܘܡܰܢܽܘ ܐܰܢ̱ܬܿ ܕܢܶܬܿܶܠ ܦܶܬܼܓܼܳܡܳܐ ܠܰܐܝܠܶܝܢ ܕܫܰܕܿܪܽܘܢ܂ ܡܳܢܳܐ ܐܳܡܰܪ ܐܰܢ̱ܬܿ ܥܰܠ ܢܰܦܼܫܳܟܼ܀
01:23 [ai]ܐܶܡܰܪ܃ ܐܶܢܳܐ ܩܳܠܳܐ ܕܩܳܪܶܐ ܒܡܰܕܼܒܪܳܐ܃ ܕܰܐܫܘܰܘ ܐܽܘܪܚܶܗ ܕܡܳܪܝܳܐ܃ ܐܰܝܟܿܰܢܳܐ ܕܶܐܡܰܪ ܐܶܫܰܥܝܳܐ ܢܒܼܺܝܳܐ܀
01:24 [ai]ܗܳܢܽܘܢ ܕܶܝܢ ܕܶܐܫܬܿܰܕܿܰܪܘ܂ ܡܶܢ ܦܿܪ̈ܺܝܫܶܐ ܗ̱ܘܰܘ܂
01:25 [ai]ܘܫܰܐܠܽܘܗ̱ܝ܂ ܘܶܐܡܰܪܘ ܠܶܗ܂ ܡܳܢܳܐ ܗܳܟܼܺܝܠ ܡܰܥܡܶܕܼ ܐܰܢ̱ܬܿ܃ ܐܶܢ ܐܰܢ̱ܬܿ ܠܳܐ ܐܺܝܬܼܰܝܟܿ ܡܫܺܝܚܳܐ܂ ܘܠܳܐ ܐܺܠܺܝܳܐ܂ ܘܠܳܐ ܢܒܼܺܝܳܐ܀
01:26 [ai]ܥܢܳܐ ܝܽܘܚܰܢܳܢ܂ ܘܶܐܡܰܪ ܠܗܽܘܢ܂ ܐܶܢܳܐ ܡܰܥܡܶܕܼ ܐ̱ܢܳܐ ܒܡܰܝܳܐ̈܂ ܒܰܝܢܳܬܼܟܼܽܘܢ ܕܶܝܢ ܩܳܐܶܡ܃ ܗܰܘ ܕܰܐܢ̱ܬܿܽܘܢ ܠܳܐ ܝܳܕܼܥܺܝܢ ܐܢ̱ܬܿܽܘܢ ܠܶܗ܂
01:27 [ai]ܗܳܢܰܘ ܗܰܘ ܕܒܳܬܼܰܪܝ ܐܳܬܼܶܐ܃ ܘܰܗܘܳܐ ܠܶܗ ܩܕܼܳܡܰܝ܃ ܗܰܘ ܕܶܐܢܳܐ܂ ܠܳܐ ܫܳܘܶܐ ܐ̱ܢܳܐ ܕܶܐܫܪܶܐ ܥܰܪ̈ܩܶܐ ܕܰܡܣܳܢܰܘܗ̱ܝ̈܀
01:28 [ai]ܗܳܠܶܝܢ ܒܒܼܶܝܬܼ ܥܰܢܝܳܐ ܗܘܰܝ̈܂ ܒܥܶܒܼܪܳܐ ܕܝܽܘܪܕܿܢܳܢ܂ ܐܰܝܟܿܳܐ ܕܡܰܥܡܶܕܼ ܗ̱ܘܳܐ ܝܽܘܚܰܢܳܢ܀
01:29 [ai]ܘܰܠܝܰܘܡܳܐ ܕܒܳܬܼܪܶܗ܂ ܚܙܳܐ ܝܽܘܚܰܢܳܢ ܠܝܶܫܽܘܥ ܕܳܐܬܼܶܐ ܠܘܳܬܼܶܗ܂ ܘܶܐܡܰܪ܂ ܗܳܐ ܐܶܡܪܶܗ ܕܰܐܠܳܗܳܐ܃ ܗܰܘ ܕܫܳܩܶܠ ܚܛܺܝܬܼܶܗ ܕܥܳܠܡܳܐ܀
01:30 [ai]ܗܳܢܰܘ ܕܶܐܢܳܐ ܐܶܡܪܶܬܼ ܥܠܰܘܗ̱ܝ܃ ܕܒܳܬܼܰܪܝ ܐܳܬܼܶܐ ܓܰܒܼܪܳܐ܂ ܘܰܗܘܳܐ ܠܶܗ ܩܕܼܳܡܰܝ܂ ܡܶܛܽܠ ܕܩܰܕܼܡܳܝ ܗ̱ܽܘ ܡܶܢܝ܂
01:31 [ai]ܘܶܐܢܳܐ ܠܳܐ ܝܳܕܼܰܥ ܗ̱ܘܺܝܬܼ ܠܶܗ܂ ܐܶܠܳܐ ܕܢܶܬܼܺܝܕܼܰܥ ܠܺܐܝܣܪܳܝܶܠ܂ ܡܶܛܽܠ ܗܳܢܳܐ ܐܶܬܼܺܝܬܼ ܐܶܢܳܐ܂ ܕܰܒܼܡܰܝܳܐ̈ ܐܰܥܡܶܕܼ܀
01:32 [ai]ܘܰܐܣܗܶܕܼ ܝܽܘܚܰܢܳܢ܂ ܘܶܐܡܰܪ܂ ܕܰܚܙܺܝܬܼ ܠܪܽܘܚܳܐ ܕܢܳܚܬܳܐ ܡܶܢ ܫܡܰܝܳܐ܂ ܐܰܝܟܼ ܝܰܘܢܳܐ܂ ܘܩܰܘܝܰܬܼ ܥܠܰܘܗ̱ܝ܂
01:33 [ai]ܘܶܐܢܳܐ ܠܳܐ ܝܳܕܼܰܥ ܗ̱ܘܺܝܬܼ ܠܶܗ܂ ܐܶܠܳܐ ܡܰܢ ܕܫܰܕܿܪܰܢܝ ܕܰܐܥܡܶܕܼ ܒܡܰܝܳܐ̈܂ ܗܽܘ ܐܶܡܰܪ ܠܺܝ܂ ܕܰܐܝܢܳܐ ܕܚܳܙܶܐ ܐܰܢ̱ܬܿ ܕܢܳܚܬܳܐ ܪܽܘܚܳܐ܂ ܘܰܡܩܰܘܝܳܐ ܥܠܰܘܗ̱ܝ܃ ܗܳܢܰܘ ܡܰܥܡܶܕܼ ܒܪܽܘܚܳܐ ܕܩܽܘܕܼܫܳܐ܀
01:34 [ai]ܘܶܐܢܳܐ ܚܙܺܝܬܼ ܘܰܐܣܗܕܼܶܬܼ܂ ܕܗܳܢܰܘ ܒܪܶܗ ܕܰܐܠܳܗܳܐ܀
01:35 [ai]ܘܰܠܝܰܘܡܳܐ ܐ̱ܚܪܺܢܳܐ܃ ܩܳܐܶܡ ܗ̱ܘܳܐ ܝܽܘܚܰܢܳܢ ܘܰܬܼܪ̈ܶܝܢ ܡܶܢ ܬܰܠܡܺܝܕܼܰܘܗ̱ܝ̈܂
01:36 [ai]ܘܚܳܪ ܒܝܶܫܽܘܥ܂ ܟܰܕܼ ܡܗܰܠܶܟܼ܂ ܘܶܐܡܰܪ܂ ܗܳܐ ܐܶܡܪܶܗ ܕܰܐܠܳܗܳܐ܂
01:37 [ai]ܘܰܫܡܰܥܘ ܬܿܪ̈ܰܝܗܽܘܢ ܬܰܠܡܺܝܕܼܰܘܗ̱ܝ̈ ܟܰܕܼ ܐܶܡܰܪ܃ ܘܶܐܙܰܠܘ ܠܗܽܘܢ ܒܳܬܼܪܶܗ ܕܝܶܫܽܘܥ܂
01:38 [ai]ܘܶܐܬܼܦܿܢܺܝ ܝܶܫܽܘܥ܂ ܘܰܚܙܳܐ ܐܶܢܽܘܢ ܕܳܐܬܼܶܝܢ ܒܳܬܼܪܶܗ܃ ܘܶܐܡܰܪ ܠܗܽܘܢ܂ ܡܳܢܳܐ ܒܿܳܥܶܝܢ ܐܢ̱ܬܿܽܘܢ܂ ܐܳܡܪܺܝܢ ܠܶܗ܂ ܪܰܒܰܢ܂ ܐܰܝܟܿܳܐ ܗܳܘܶܐ ܐܰܢ̱ܬܿ܂
01:39 [ai]ܐܳܡܰܪ ܠܗܽܘܢ ܬܰܘ܂ ܘܬܼܶܚܙܽܘܢ܂ ܗܶܢܽܘܢ ܕܶܝܢ ܐܶܬܼܰܘ܂ ܘܰܚܙܰܘ ܐܰܝܟܿܳܐ ܕܗܳܘܶܐ܂ ܘܰܠܘܳܬܼܶܗ ܗܘܰܘ ܝܰܘܡܳܐ ܗܰܘ܂ ܘܺܐܝܬܼ ܗ̱ܘܰܝ̈ ܐܰܝܟܼ ܫܳܥܶܐ̈ ܥܣܰܪ܀
01:40 [ai]ܚܰܕܼ ܕܶܝܢ ܡܶܢ ܗܳܢܽܘܢ ܕܰܫܡܰܥܘ ܡܶܢ ܝܽܘܚܰܢܳܢ܂ ܘܶܐܙܰܠܘ ܒܳܬܼܪܶܗ ܕܝܶܫܽܘܥ܂ ܐܺܝܬܼܰܘܗ̱ܝ ܗ̱ܘܳܐ ܐܰܢܕܿܪܶܐܘܳܣ ܐܰܚܽܘܗ̱ܝ ܕܫܶܡܥܽܘܢ܂
01:41 [ai]ܗܳܢܳܐ ܚܙܳܐ ܠܽܘܩܕܼܰܡ ܠܫܶܡܥܽܘܢ ܐܰܚܽܘܗ̱ܝ܂ ܘܶܐܡܰܪ ܠܶܗ܂ ܐܶܫܟܿܰܚܢܳܝܗ̱ܝ ܠܰܡܫܺܝܚܳܐ܂
01:42 [ai]ܘܰܐܝܬܿܝܶܗ ܠܘܳܬܼ ܝܶܫܽܘܥ܀ ܘܚܳܪ ܒܶܗ ܝܶܫܽܘܥ܂ ܘܶܐܡܰܪ܂ ܐܰܢ̱ܬܿ ܗ̱ܽܘ ܫܶܡܥܽܘܢ ܒܪܶܗ ܕܝܰܘܢܳܐ܃ ܐܰܢ̱ܬܿ ܬܶܬܼܩܪܶܐ ܟܺܐܦܼܳܐ܀
01:43 [ai]ܘܰܠܝܰܘܡܳܐ ܐ̱ܚܪܺܢܳܐ܃ ܨܒܼܳܐ ܝܶܫܽܘܥ ܠܡܶܦܿܰܩ ܠܰܓܼܠܺܝܠܳܐ܂ ܘܶܐܫܟܿܰܚ ܠܦܼܺܝܠܺܝܦܿܳܘܣ܂ ܘܶܐܡܰܪ ܠܶܗ܂ ܬܳܐ ܒܳܬܼܰܪܝ܂
01:44 [ai]ܗܽܘ ܕܶܝܢ ܦܼܺܝܠܺܝܦܿܳܘܣ ܐܺܝܬܼܰܘܗ̱ܝ ܗ̱ܘܳܐ ܡܶܢ ܒܶܝܬܼ ܨܰܝܳܕܼܳܐ܂ ܡܶܢ ܡܕܼܺܝܢ̱ܬܿܶܗ ܕܰܐܢܕܿܪܶܐܘܳܣ ܘܰܕܼܫܶܡܥܽܘܢ܂
01:45 [ai]ܘܦܼܺܝܠܺܝܦܿܳܘܣ ܐܶܫܟܿܰܚ ܠܢܰܬܼܰܢܰܺܝܐܝܠ܂ ܘܶܐܡܰܪ ܠܶܗ܂ ܗܰܘ ܕܰܟܼܬܼܰܒܼ ܥܠܰܘܗ̱ܝ ܡܽܘܫܶܐ ܒܢܳܡܽܘܣܳܐ ܘܒܼܰܢܒܼܺܝܶܐ̈܃ ܐܶܫܟܿܰܚܢܳܝܗ̱ܝ܂ ܕܝܶܫܽܘܥ ܗ̱ܽܘ ܒܰܪ ܝܰܘܣܶܦܼ ܡܶܢ ܢܳܨܪܰܬܼ܂
01:46 [ai]ܐܳܡܰܪ ܠܶܗ ܢܰܬܼܰܢܰܺܝܐܝܠ܂ ܡܶܢ ܢܳܨܪܰܬܼ܃ ܡܶܫܟܿܰܚ ܡܶܕܶܡ ܕܛܳܒܼ ܢܶܗܘܶܐ܃ ܐܳܡܰܪ ܠܶܗ ܦܼܺܝܠܺܝܦܿܳܘܣ܂ ܬܳܐ܂ ܘܬܼܶܚܙܶܐ܂
01:47 [ai]ܘܰܚܙܳܝܗ̱ܝ ܝܶܫܽܘܥ ܠܢܰܬܼܰܢܰܺܝܐܝܠ ܟܰܕܼ ܐܳܬܼܶܐ ܠܘܳܬܼܶܗ܂ ܘܶܐܡܰܪ ܥܠܰܘܗ̱ܝ܂ ܗܳܐ ܫܰܪܺܝܪܳܐܺܝܬܼ ܒܰܪ ܐܺܝܣܪܳܝܶܠ܂ ܕܢܶܟܼܠܳܐ ܠܰܝܬܿ ܒܶܗ܂
01:48 [ai]ܐܳܡܰܪ ܠܶܗ ܢܰܬܼܰܢܰܺܝܐܝܠ܂ ܡܶܢ ܐܰܝܡܶܟܿܳܐ ܝܳܕܼܰܥ ܐܰܢ̱ܬܿ ܠܺܝ܂ ܐܳܡܰܪ ܠܶܗ ܝܶܫܽܘܥ܂ ܥܰܕܼܠܳܐ ܢܶܩܪܶܝܟܼ ܦܼܺܝܠܺܝܦܿܳܘܣ ܟܰܕܼ ܬܚܶܝܬܼ ܬܿܺܬܳܐ ܐܰܢ̱ܬܿ ܚܙܺܝܬܼܳܟܼ܀
01:49 [ai]ܥܢܳܐ ܢܰܬܼܰܢܰܺܝܐܝܠ܂ ܘܶܐܡܰܪ ܠܶܗ܂ ܪܰܒܺܝ܃ ܐܰܢ̱ܬܿ ܗ̱ܽܘ ܒܪܶܗ ܕܰܐܠܳܗܳܐ܂ ܐܰܢ̱ܬܿ ܗ̱ܽܘ ܡܰܠܟܿܶܗ ܕܺܐܝܣܪܳܝܶܠ܂
01:50 [ai]ܐܳܡܰܪ ܠܶܗ ܝܶܫܽܘܥ܂ ܥܰܠ ܕܶܐܡܪܶܬܼ ܠܳܟܼ ܕܰܚܙܺܝܬܼܳܟܼ ܬܚܶܝܬܼ ܬܿܺܬܳܐ ܡܗܰܝܡܶܢ ܐܰܢ̱ܬܿ܂ ܕܿܪ̈ܰܘܪܒܼܳܢ ܡܶܢ ܗܳܠܶܝܢ ܬܶܚܙܶܐ܂
01:51 [ai]ܐܳܡܰܪ ܠܶܗ܂ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܡܶܢ ܗܳܫܳܐ ܬܶܚܙܽܘܢ ܫܡܰܝܳܐ ܕܰܦܼܬܼܺܝܚܺܝܢ܃ ܘܡܰܠܰܐܟܼܰܘܗ̱ܝ̈ ܕܰܐܠܳܗܳܐ ܟܰܕܼ ܣܳܠܩܺܝܢ ܘܢܳܚܬܿܺܝܢ ܠܘܳܬܼ ܒܪܶܗ ܕܐ̱ܢܳܫܳܐ ܿ܀ܿ܀ܿ

next chapter