← Back
The Comprehensive Aramaic Lexicon
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

previous chapter


05:01 [ai]ܒܳܬܼܰܪ ܗܳܠܶܝܢ܃ ܗܘܳܐ ܥܰܕܼܥܺܕܼܳܐ ܕܺܝܗܽܘܕܼܳܝܶܐ̈܂ ܘܰܣܠܶܩ ܝܶܫܽܘܥ ܠܽܐܘܪܺܫܠܶܡ܂
05:02 [ai]ܐܺܝܬܼ ܗ̱ܘܳܐ ܕܶܝܢ ܬܰܡܳܢ ܒܽܐܘܪܺܫܠܶܡ ܕܽܘܟܿܬܼܳܐ ܚܕܼܳܐ ܕܡܰܥܡܽܘܕܼܺܝܬܼܳܐ܃ ܕܡܶܬܼܩܰܪܝܳܐ ܥܶܒܼܪܳܐܺܝܬܼ܂ ܒܶܝܬܼ ܚܶܣܕܿܳܐ܂ ܘܺܐܝܬܼ ܗ̱ܘܳܐ ܒܿܳܗ ܚܰܡܫܳܐ ܐܶܣܛܘܺܝܢ̈܂
05:03 [ai]ܘܰܒܗܳܠܶܝܢ ܪܡܶܝܢ ܗ̱ܘܰܘ ܥܰܡܳܐ ܣܰܓܿܺܝܳܐܐ ܕܿܰܟܼܪ̈ܺܝܗܶܐ܃ ܘܰܣܡܰܝܳܐ̈ ܘܰܚܓܼܺܝܣܶܐ̈ ܘܝܰܒܺܝܫܶܐ̈܂ ܘܰܡܣܰܟܿܶܝܢ ܗ̱ܘܰܘ ܠܙܽܘܥܳܐ ܕܡܰܝܳܐ̈܂
05:04 [ai]ܡܰܠܰܐܟܼܳܐ ܓܶܝܪ ܒܰܙܒܼܰܢ ܙܒܼܰܢ ܢܳܚܶܬܼ ܗ̱ܘܳܐ ܠܳܗ ܠܡܰܥܡܽܘܕܼܺܝܬܼܳܐ܃ ܘܰܡܙܺܝܥ ܗ̱ܘܳܐ ܠܗܽܘܢ ܠܡܰܝܳܐ̈܂ ܘܰܐܝܢܳܐ ܕܩܰܕܼܡܳܝܳܐ ܢܳܚܶܬܼ ܗ̱ܘܳܐ ܡܶܢ ܒܳܬܼܰܪ ܙܰܘܥܳܐ ܕܡܰܝܳܐ̈܃ ܡܶܬܼܚܠܶܡ ܗ̱ܘܳܐ ܟܽܠ ܟܺܐܒܼܳܐ ܐܰܝܢܳܐ ܕܺܐܝܬܼ ܗ̱ܘܳܐ ܠܶܗ܀
05:05 [ai]ܐܺܝܬܼ ܗ̱ܘܳܐ ܕܶܝܢ ܬܰܡܳܢ ܓܰܒܼܪܳܐ ܚܰܕܼ܃ ܕܰܬܼܠܳܬܼܺܝܢ ܘܰܬܼܡܳܢܶܐ ܫܢܺܝܢ̈ ܐܺܝܬܼܰܘܗ̱ܝ ܗ̱ܘܳܐ ܒܟܽܘܪܗܳܢܳܐ܂
05:06 [ai]ܠܗܳܢܳܐ ܚܙܳܐ ܝܶܫܽܘܥ ܕܰܪܡܶܐ܃ ܘܺܝܕܼܰܥ ܕܙܰܒܼܢܳܐ ܣܰܓܿܺܝܳܐܐ ܐܺܝܬܼ ܠܶܗ܂ ܘܶܐܡܰܪ ܠܶܗ܂ ܨܳܒܼܶܐ ܐܰܢ̱ܬܿ ܕܬܶܬܼܚܠܶܡ܃
05:07 [ai]ܥܢܳܐ ܗܰܘ ܟܪܺܝܗܳܐ܂ ܘܶܐܡܰܪ܂ ܐܺܝܢ ܡܳܪܝ܂ ܠܰܝܬܿ ܠܺܝ ܕܶܝܢ ܐ̱ܢܳܫ܂ ܕܡܳܐ ܕܶܐܬܿܬܿܙܺܝܥܘ ܡܰܝܳܐ̈ ܢܰܪܡܶܝܢܝ ܒܡܰܥܡܽܘܕܼܺܝܬܼܳܐ܂ ܐܶܠܳܐ ܥܰܕܼ ܐܶܢܳܐ ܐܳܬܼܶܐ ܐ̱ܢܳܐ܃ ܐ̱ܚܪܺܝܢ ܡܶܢ ܩܕܼܳܡܰܝ ܢܳܚܶܬܼ܂
05:08 [ai]ܐܳܡܰܪ ܠܶܗ ܝܶܫܽܘܥ܂ ܩܽܘܡ ܫܩܽܘܠ ܥܰܪܣܳܟܼ܂ ܘܗܰܠܶܟܼ܂
05:09 [ai]ܘܒܼܰܪ ܫܳܥܬܼܶܗ ܐܶܬܼܚܠܶܡ ܓܰܒܼܪܳܐ ܗܰܘ܂ ܘܩܳܡ ܫܩܰܠ ܥܰܪܣܶܗ܂ ܘܗܰܠܶܟܼ܀ ܘܗܽܘ ܗܰܘ ܝܰܘܡܳܐ ܫܰܒܿܬܼܳܐ ܗ̱ܘܳܬܼ܂
05:10 [ai]ܘܳܐܡܪܺܝܢ ܠܶܗ ܺܝܗܽܘܕܼܳܝܶܐ̈ ܠܗܰܘ ܕܶܐܬܼܰܐܣܺܝ܂ ܫܰܒܿܬܼܳܐ ܗ̱ܝ܂ ܠܳܐ ܫܰܠܺܝܛ ܠܳܟܼ ܕܬܶܫܩܽܘܠ ܥܰܪܣܳܟܼ܂
05:11 [ai]ܗܽܘ ܕܶܝܢ ܥܢܳܐ ܘܶܐܡܰܪ ܠܗܽܘܢ܂ ܗܰܘ ܕܥܰܒܼܕܿܰܢܝ ܚܠܺܝܡܳܐ܃ ܗܽܘ ܐܶܡܰܪ ܠܺܝ ܕܰܫܩܽܘܠ ܥܰܪܣܳܟܼ܂ ܘܗܰܠܶܟܼ܂
05:12 [ai]ܘܫܰܐܠܽܘܗ̱ܝ ܡܰܢܽܘ ܗܳܢܳܐ ܓܰܒܼܪܳܐ ܕܶܐܡܰܪ ܠܳܟܼ܂ ܕܰܫܩܽܘܠ ܥܰܪܣܳܟܼ ܘܗܰܠܶܟܼ܂
05:13 [ai]ܗܰܘ ܕܶܝܢ ܕܶܐܬܼܰܐܣܺܝ܂ ܠܳܐ ܝܳܕܼܰܥ ܗ̱ܘܳܐ ܡܰܢܽܘ܂ ܝܶܫܽܘܥ ܓܶܝܪ ܐܶܬܼܓܿܢܺܝ ܗ̱ܘܳܐ ܠܶܗ ܒܟܶܢܫܳܐ ܣܰܓܿܺܝܳܐܐ ܕܺܐܝܬܼ ܗ̱ܘܳܐ ܒܕܽܘܟܿܬܼܳܐ ܗܳܝ܂
05:14 [ai]ܒܳܬܼܰܪ ܙܒܼܰܢ܃ ܐܶܫܟܿܚܶܗ ܝܶܫܽܘܥ ܒܗܰܝܟܠܳܐ܂ ܘܶܐܡܰܪ ܠܶܗ܂ ܗܳܐ ܚܠܺܝܡ ܐܰܢ̱ܬܿ܂ ܬܽܘܒܼ ܠܳܐ ܬܶܚܛܶܐ܂ ܕܰܠܡܳܐ ܢܶܗܘܶܐ ܠܳܟܼ ܡܶܕܶܡ ܕܒܺܝܫ ܡܶܢ ܩܰܕܼܡܳܝܳܐ܂
05:15 [ai]ܘܶܐܙܰܠ ܗܰܘ ܓܰܒܼܪܳܐ܂ ܘܶܐܡܰܪ ܠܺܝܗܽܘܕܼܳܝܶܐ̈܂ ܕܝܶܫܽܘܥ ܗ̱ܽܘ ܗܰܘ ܕܰܐܚܠܡܶܗ܂
05:16 [ai]ܘܡܶܛܽܠ ܗܳܕܼܶܐ ܪܳܕܼܦܿܺܝܢ ܗ̱ܘܰܘ ܺܝܗܽܘܕܼܳܝܶܐ̈ ܠܝܶܫܽܘܥ܂ ܘܒܼܳܥܶܝܢ ܗ̱ܘܰܘ ܠܡܶܩܛܠܶܗ܃ ܕܗܳܠܶܝܢ ܥܳܒܼܶܕܼ ܗ̱ܘܳܐ ܒܫܰܒܿܬܼܳܐ܂
05:17 [ai]ܗܽܘ ܕܶܝܢ ܝܶܫܽܘܥ ܐܶܡܰܪ ܠܗܽܘܢ܂ ܐܳܒܼܝ ܥܕܼܰܡܳܐ ܠܗܳܫܳܐ ܥܳܒܼܶܕܼ܃ ܐܳܦܼ ܐܶܢܳܐ ܥܳܒܼܶܕܼ ܐ̱ܢܳܐ܂
05:18 [ai]ܘܡܶܛܽܠ ܗܳܕܼܶܐ ܝܰܬܿܺܝܪܳܐܺܝܬܼ ܒܿܳܥܶܝܢ ܗ̱ܘܰܘ ܺܝܗܽܘܕܼܳܝܶܐ̈ ܠܡܶܩܛܠܶܗ܂ ܠܳܐ ܒܰܠܚܽܘܕܼ ܕܫܳܪܶܐ ܗ̱ܘܳܐ ܫܰܒܿܬܼܳܐ܃ ܐܶܠܳܐ ܐܳܦܼ ܕܥܰܠ ܐܰܠܳܗܳܐ ܕܰܐܒܼܽܘܗ̱ܝ ܐܺܝܬܼܰܘܗ̱ܝ܂ ܐܳܡܰܪ ܗ̱ܘܳܐ܂ ܘܡܰܫܘܶܐ ܗ̱ܘܳܐ ܢܰܦܼܫܶܗ ܥܰܡ ܐܰܠܳܗܳܐ ܿ܀ܿ܀ܿ
05:19 [ai]ܥܢܳܐ ܕܶܝܢ ܝܶܫܽܘܥ܂ ܘܶܐܡܰܪ ܠܗܽܘܢ܂ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܳܐ ܡܶܫܟܿܰܚ ܒܪܳܐ ܥܳܒܼܶܕܼ ܡܶܕܶܡ ܡܶܢ ܨܒܼܽܘܬܼ ܢܰܦܼܫܶܗ܂ ܐܶܠܳܐ ܡܶܕܶܡ ܕܚܳܙܶܐ ܠܰܐܒܼܳܐ ܕܥܳܒܼܶܕܼ܂ ܐܰܝܠܶܝܢ ܓܶܝܪ ܕܰܐܒܼܳܐ ܥܳܒܼܶܕܼ܃ ܗܳܠܶܝܢ ܐܳܦܼ ܒܪܳܐ ܐܰܟܼܘܳܬܼܶܗ ܥܳܒܼܶܕܼ܂
05:20 [ai]ܐܰܒܼܳܐ ܓܶܝܪ ܪܳܚܶܡ ܠܰܒܼܪܶܗ܂ ܘܟܼܽܠܡܶܕܶܡ ܕܥܳܒܼܶܕܼ ܡܚܰܘܶܐ ܠܶܗ܂ ܘܰܕܼܝܰܬܿܺܝܪܺܝܢ ܡܶܢ ܗܳܠܶܝܢ ܥܒܼܳܕܼܶܐ̈ ܡܚܰܘܶܐ ܠܶܗ܂ ܕܰܐܢ̱ܬܿܽܘܢ ܬܿܶܬܿܕܰܡܪܽܘܢ܂
05:21 [ai]ܐܰܝܟܿܰܢܳܐ ܓܶܝܪ ܕܰܐܒܼܳܐ ܡܩܺܝܡ ܡܺܝܬܼܶܐ̈ ܘܡܰܚܶܐ ܠܗܽܘܢ܃ ܗܳܟܼܰܢܳܐ ܐܳܦܼ ܒܪܳܐ ܠܰܐܝܠܶܝܢ ܕܨܳܒܼܶܐ ܡܰܚܶܐ܂
05:22 [ai]ܠܳܐ ܗ̱ܘܳܐ ܓܶܝܪ ܐܰܒܼܳܐ ܕܳܐܶܢ ܠܐ̱ܢܳܫ܂ ܐܶܠܳܐ ܟܽܠܶܗ ܕܺܝܢܳܐ ܝܰܗܒܶܗ ܠܰܒܼܪܳܐ܂
05:23 [ai]ܕܟܽܠܢܳܫ ܢܝܰܩܰܪ ܠܰܒܼܪܳܐ܃ ܐܰܝܟܼ ܕܰܡܝܰܩܰܪ ܠܰܐܒܼܳܐ܂ ܗܰܘ ܕܠܳܐ ܡܝܰܩܰܪ ܠܰܒܼܪܳܐ܃ ܠܳܐ ܡܝܰܩܰܪ ܠܰܐܒܼܳܐ ܕܫܰܕܿܪܶܗ܀
05:24 [ai]ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܡܰܢ ܕܫܳܡܰܥ ܡܶܠܰܬܼܝ܂ ܘܰܡܗܰܝܡܶܢ ܠܡܰܢ ܕܫܰܕܿܪܰܢܝ܂ ܐܺܝܬܼ ܠܶܗ ܚܰܝ̈ܶܐ ܕܰܠܥܳܠܰܡ܂ ܘܰܠܕܼܺܝܢܳܐ ܠܳܐ ܐܳܬܼܶܐ܂ ܐܶܠܳܐ ܫܰܢܺܝ ܠܶܗ ܡܶܢ ܡܰܘܬܳܐ ܠܚܰܝ̈ܶܐ܂
05:25 [ai]ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܳܐܬܼܝܳܐ ܫܳܥܬܼܳܐ܂ ܐܳܦܼ ܗܳܫܳܐ ܐܺܝܬܼܶܝܗ܂ ܐܶܡܰܬܼܝ ܕܡܺܝܬܼܶܐ̈ ܢܶܫܡܥܽܘܢ ܩܳܠܶܗ ܕܰܒܼܪܶܗ ܕܰܐܠܳܗܳܐ܂ ܘܗܳܢܽܘܢ ܕܫܳܡܥܺܝܢ ܢܺܚܽܘܢ܂
05:26 [ai]ܐܰܝܟܿܰܢܳܐ ܓܶܝܪ ܕܠܰܐܒܼܳܐ ܐܺܝܬܼ ܚܰܝ̈ܶܐ ܒܰܩܢܽܘܡܶܗ܃ ܗܳܟܼܰܢܳܐ ܝܰܗ̱ܒܼ ܐܳܦܼ ܠܰܒܼܪܳܐ܂ ܕܢܶܗܘܽܘܢ ܚܰܝ̈ܶܐ ܒܰܩܢܽܘܡܶܗ܂
05:27 [ai]ܘܰܐܫܠܛܶܗ ܕܢܶܗܘܶܐ ܥܳܒܼܶܕܼ ܐܳܦܼ ܕܺܝܢܳܐ܂
05:28 [ai]ܕܰܒܼܪܶܗ ܗܽܘ ܕܶܝܢ ܕܐ̱ܢܳܫܳܐ܃ ܠܳܐ ܬܿܶܬܿܕܰܡܪܽܘܢ ܒܗܳܕܼܶܐ ܕܳܐܬܼܝܳܐ ܫܳܥܬܼܳܐ܃ ܐܶܡܰܬܼܝ ܕܟܽܠܗܽܘܢ ܐܰܝܠܶܝܢ ܕܿܰܒܼܩܰܒܼܪ̈ܶܐ ܐܶܢܽܘܢ ܢܶܫܡܥܽܘܢ ܩܳܠܶܗ܂
05:29 [ai]ܘܢܶܦܿܩܽܘܢ܃ ܐܰܝܠܶܝܢ ܕܰܥܒܼܰܕܼܘ ܛܳܒܼܳܬܼܳܐ̈ ܠܰܩܝܳܡܬܳܐ ܕܚܰܝ̈ܶܐ܃ ܘܰܐܝܠܶܝܢ ܕܰܥܒܼܰܕܼܘ ܒܺܝܫܳܬܼܳܐ̈ ܠܰܩܝܳܡܬܳܐ ܕܕܼܺܝܢܳܐ܂
05:30 [ai]ܠܳܐ ܡܶܫܟܿܰܚ ܐ̱ܢܳܐ ܡܶܕܶܡ ܡܶܢ ܨܒܼܽܘܬܼ ܢܰܦܼܫܝ ܠܡܶܥܒܿܰܕܼ܂ ܐܶܠܳܐ ܐܰܝܟܿܰܢܳܐ ܕܫܳܡܰܥ ܐ̱ܢܳܐ ܕܳܐܶܢ ܐ̱ܢܳܐ܂ ܘܕܼܺܝܢܝ ܟܺܐܝܢ ܗ̱ܽܘ܂ ܠܳܐ ܓܶܝܪ ܒܿܳܥܶܐ ܐ̱ܢܳܐ ܨܶܒܼܝܳܢܝ܂ ܐܶܠܳܐ ܨܶܒܼܝܳܢܶܗ ܕܡܰܢ ܕܫܰܕܿܪܰܢܝ܀
05:31 [ai]ܐܶܢ ܐܶܢܳܐ ܡܰܣܗܶܕܼ ܐ̱ܢܳܐ ܥܰܠ ܢܰܦܼܫܝ܃ ܣܳܗܕܿܽܘܬܼܝ ܠܳܐ ܗܘܳܬܼ ܫܰܪܺܝܪܳܐ܂
05:32 [ai]ܐ̱ܚܪܺܝܢ ܗ̱ܽܘ ܗܰܘ ܕܡܰܣܗܶܕܼ ܥܠܰܝ܂ ܘܝܳܕܼܰܥ ܐ̱ܢܳܐ܂ ܕܫܰܪܺܝܪܳܐ ܗ̱ܝ ܣܳܗܕܿܽܘܬܼܶܗ ܕܡܰܣܗܶܕܼ ܥܠܰܝ܂
05:33 [ai]ܐܰܢ̱ܬܿܽܘܢ ܫܰܕܿܰܪܬܿܽܘܢ ܠܘܳܬܼ ܝܽܘܚܰܢܳܢ܂ ܘܰܐܣܗܶܕܼ ܥܰܠ ܫܪܳܪܳܐ܂
05:34 [ai]ܐܶܢܳܐ ܕܶܝܢ ܠܳܐ ܗ̱ܘܳܐ ܡܶܢ ܒܰܪܢܳܫܳܐ ܢܳܣܶܒܼ ܐ̱ܢܳܐ ܣܳܗܕܿܽܘܬܼܳܐ܂ ܐܶܠܳܐ ܗܳܠܶܝܢ ܐܳܡܰܪ ܐ̱ܢܳܐ܂ ܕܰܐܢ̱ܬܿܽܘܢ ܬܺܚܽܘܢ܂
05:35 [ai]ܗܰܘ ܫܪܳܓܼܳܐ ܗ̱ܘܳܐ ܕܕܼܳܠܶܩ܂ ܘܡܰܢܗܰܪ܂ ܘܰܐܢ̱ܬܿܽܘܢ ܨܒܼܰܝܬܿܽܘܢ܂ ܕܬܶܫܬܿܰܒܼܗܪܽܘܢ ܕܫܳܥܬܼܳܐ ܒܢܽܘܗܪܶܗ܂
05:36 [ai]ܠܺܝ ܕܶܝܢ ܐܺܝܬܼ ܠܺܝ܂ ܣܳܗܕܿܽܘܬܼܳܐ ܕܪܰܒܿܳܐ ܡܶܢ ܕܝܽܘܚܰܢܳܢ܂ ܥܒܼܳܕܼܶܐ̈ ܓܶܝܪ ܕܝܰܗ̱ܒܼ ܠܺܝ ܐܳܒܼܝ܂ ܕܶܐܫܰܠܶܡ ܐܶܢܽܘܢ܃ ܗܶܢܽܘܢ ܥܒܼܳܕܼܶܐ̈ ܕܥܳܒܼܶܕܼ ܐ̱ܢܳܐ ܣܳܗܕܺܝܢ ܥܠܰܝ܂ ܕܰܐܒܼܳܐ ܫܰܠܚܰܢܝ܂
05:37 [ai]ܘܰܐܒܼܳܐ ܕܫܰܠܚܰܢܝ܂ ܗܽܘ ܣܳܗܶܕܼ ܥܠܰܝ܂ ܠܳܐ ܩܳܠܶܗ ܡܶܡܬܼܽܘܡ ܫܡܰܥܬܿܽܘܢ܃ ܘܠܳܐ ܚܶܙܘܶܗ ܚܙܰܝܬܿܽܘܢ܂
05:38 [ai]ܘܡܶܠܬܼܶܗ ܠܳܐ ܡܩܰܘܝܳܐ ܒܟܽܘܢ܂ ܡܶܛܽܠ ܕܰܒܼܗܰܘ ܕܗܽܘ ܫܰܕܿܰܪ܂ ܐܰܢ̱ܬܿܽܘܢ ܠܳܐ ܡܗܰܝܡܢܺܝܢ ܐܢ̱ܬܿܽܘܢ܂
05:39 [ai]ܒܨܰܘ ܟܬܼܳܒܼܶܐ̈ ܕܰܒܼܗܽܘܢ ܡܰܣܒܿܪܺܝܢ ܐܢ̱ܬܿܽܘܢ܂ ܕܚܰܝ̈ܶܐ ܕܰܠܥܳܠܰܡ ܐܺܝܬܼ ܠܟܼܽܘܢ܂ ܘܗܶܢܽܘܢ ܣܳܗܕܺܝܢ ܥܠܰܝ܂
05:40 [ai]ܘܠܳܐ ܨܳܒܼܶܝܢ ܐܢ̱ܬܿܽܘܢ ܕܬܺܐܬܼܽܘܢ ܠܘܳܬܼܝ܃ ܕܚܰܝ̈ܶܐ ܕܰܠܥܳܠܰܡ ܢܶܗܘܽܘܢ ܠܟܼܽܘܢ܂
05:41 [ai]ܫܽܘܒܼܚܳܐ ܡܶܢ ܒܢܰܝ ܐ̱ܢܳܫܳܐ ܠܳܐ ܢܳܣܶܒܼ ܐ̱ܢܳܐ܂
05:42 [ai]ܐܶܠܳܐ ܺܝܕܼܰܥܬܿܟܼܽܘܢ܂ ܕܿܚܽܘܒܶܗ ܕܰܐܠܳܗܳܐ ܠܰܝܬܿ ܒܟܽܘܢ܂
05:43 [ai]ܐܶܢܳܐ ܐܶܬܼܺܝܬܼ ܒܰܫܡܶܗ ܕܳܐܒܼܝ܂ ܘܠܳܐ ܡܩܰܒܿܠܺܝܢ ܐܢ̱ܬܿܽܘܢ ܠܺܝ܂ ܘܶܐܢ ܐ̱ܚܪܺܝܢ ܢܺܐܬܼܶܐ ܒܫܶܡ ܢܰܦܼܫܶܗ܂ ܠܗܰܘ ܬܩܰܒܿܠܽܘܢ܂
05:44 [ai]ܐܰܝܟܿܰܢܳܐ ܡܶܫܟܿܚܺܝܢ ܐܢ̱ܬܿܽܘܢ ܠܰܡܗܰܝܡܳܢܽܘ܃ ܕܫܽܘܒܼܚܳܐ ܚܰܕܼ ܡܶܢ ܚܰܕܼ ܡܩܰܒܿܠܺܝܢ ܐܢ̱ܬܿܽܘܢ܃ ܘܫܽܘܒܼܚܳܐ ܕܡܶܢ ܚܰܕܼ ܐܰܠܳܗܳܐ܂ ܠܳܐ ܒܿܳܥܶܝܢ ܐܢ̱ܬܿܽܘܢ܂
05:45 [ai]ܠܡܳܐ ܣܳܒܼܪܺܝܢ ܐܢ̱ܬܿܽܘܢ܃ ܕܶܐܢܳܐ ܐܳܟܼܶܠ ܐ̱ܢܳܐ ܩܰܪ̈ܨܝܰܟܿܽܘܢ ܩܕܼܳܡ ܐܰܒܼܳܐ܃ ܐܺܝܬܼܰܘܗ̱ܝ ܡܰܢ ܕܳܐܟܼܶܠ ܩܰܪ̈ܨܝܰܟܿܽܘܢ܃ ܡܽܘܫܶܐ ܗܰܘ ܕܒܶܗ ܣܰܒܰܪܬܿܽܘܢ܂
05:46 [ai]ܐܶܠܽܘ ܓܶܝܪ ܒܡܽܘܫܶܐ ܗܰܝܡܶܢܬܿܽܘܢ܃ ܐܳܦܼ ܒܺܝ ܡܗܰܝܡܢܺܝܢ ܗ̱ܘܰܝܬܿܽܘܢ܂ ܡܽܘܫܶܐ ܓܶܝܪ ܥܠܰܝ ܟܬܼܰܒܼ܂
05:47 [ai]ܘܶܐܢ ܠܰܟܼܬܼܳܒܼܰܘܗ̱ܝ̈ ܕܗܰܘ ܠܳܐ ܡܗܰܝܡܢܺܝܢ ܐܢ̱ܬܿܽܘܢ܃ ܐܰܝܟܿܰܢܳܐ ܠܡܶܠܰܝ̈ ܕܺܝܠܝ ܬܗܰܝܡܢܽܘܢ܀܀

next chapter