← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62057: Phile (Philemon)

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

01 [ai]ܦܿܰܘܠܳܘܣ ܐܰܣܺܝܪܶܗ ܕܝܶܫܽܘܥ ܡܫܺܝܚܳܐ܂ ܘܛܺܝܡܳܬܼܶܐܳܘܣ ܐܰܚܳܐ܃ ܠܦܼܺܝܠܺܡܳܘܢ ܚܰܒܺܝܒܼܳܐ ܘܦܼܳܠܚܳܐ ܕܥܰܡܰܢ܂
02 [ai]ܘܠܰܐܦܿܝܰܐ ܚܰܒܺܝܒܼܬܿܰܢ܂ ܘܠܰܐܪܟܼܺܝܦܿܳܘܣ ܦܳܠܚܳܐ ܕܥܰܡܰܢ܂ ܘܰܠܥܺܕ̱ܿܬܳܐ ܕܰܒܼܒܼܰܝܬܿܳܟܼ܂
03 [ai]ܛܰܝܒܿܽܘܬܼܳܐ ܥܰܡܟܼܽܘܢ ܘܰܫܠܳܡܳܐ܂ ܡܶܢ ܐܰܠܳܗܳܐ ܐܰܒܼܽܘܢ܃ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ܀
04 [ai]ܡܰܘܕܿܶܐ ܐ̱ܢܳܐ ܠܰܐܠܳܗܝ ܒܟܽܠܙܒܼܰܢ܂ ܘܡܶܬܿܕܿܟܼܰܪ ܐ̱ܢܳܐ ܠܳܟܼ ܒܰܨܠܰܘܳܬܼܝ̈܃
05 [ai]ܗܳܐ ܡܶܢ ܕܫܶܡܥܶܬܼ ܗܰܝܡܳܢܽܘܬܼܳܟܼ܂ ܘܚܽܘܒܿܳܐ܂ ܕܺܐܝܬܼ ܠܳܟܼ ܠܘܳܬܼ ܡܳܪܰܢ ܝܶܫܽܘܥ ܘܰܠܘܳܬܼ ܟܽܠܗܽܘܢ ܩܰܕܿܺܝܫܶܐ̈܃
06 [ai]ܕܬܶܗܘܶܐ܃ ܫܰܘܬܿܳܦܼܽܘܬܼܳܐ ܕܗܰܝܡܳܢܽܘܬܼܳܟܼ ܝܳܗܒܿܳܐ ܦܿܺܐܪ̈ܶܐ܃ ܒܰܥܒܼܳܕܼܶܐ̈܂ ܘܒܼܺܝܕܼܰܥܬܼܳܐ ܕܟܽܠ ܛܳܒܼܳܢ̈܂ ܕܺܐܝܬܼ ܠܟܼܽܘܢ ܒܝܶܫܽܘܥ ܡܫܺܝܚܳܐ܂
07 [ai]ܚܰܕܼܽܘܬܼܳܐ ܓܶܝܪ ܣܰܓܿܺܝܐܬܼܳܐ ܐܺܝܬܼ ܠܰܢ ܘܒܼܽܘܝܳܐܳܐ܃ ܕܰܒܼܝܰܕܼ ܚܽܘܒܼܳܟܼ ܐܶܬܿܬܿܢܺܝܚ ܘܪ̈ܰܚܡܶܐ ܕܩܰܕܿܺܝܫܶܐ̈܂
08 [ai]ܡܶܛܽܠ ܗܳܕܼܶܐ ܦܰܪܶܗ̱ܣܺܝܰܐ ܣܰܓܿܺܝܐܬܼܳܐ ܐܺܝܬܼ ܠܺܝ ܒܰܡܫܺܝܚܳܐ܃ ܕܶܐܦܼܩܽܘܕܼ ܠܳܟܼ ܐܰܝܠܶܝܢ ܕܙܳܕܼܩܳܢ̈܂
09 [ai]ܡܶܛܽܠ ܚܽܘܒܿܳܐ ܕܶܝܢ ܡܶܒܼܥܳܐ ܗ̱ܽܘ ܒܿܳܥܶܐ ܐ̱ܢܳܐ ܡܶܢܳܟܼ܂ ܐܶܢܳܐ ܦܿܰܘܠܳܘܣ܃ ܕܺܐܝܬܼܰܝ ܣܳܒܼܳܐ ܐܰܝܟܼ ܕܝܳܕܼܰܥ ܐܰܢ̱ܬܿ܃ ܗܳܫܳܐ ܕܶܝܢ ܐܳܦܼ ܐܰܣܺܝܪܳܐ ܕܝܶܫܽܘܥ ܡܫܺܝܚܳܐ܂
10 [ai]ܘܒܼܳܥܶܐ ܐ̱ܢܳܐ ܡܶܢܳܟܼ܃ ܥܰܠ ܒܶܪܝ ܐܰܝܢܳܐ ܕܝܶܠܕܿܶܬܼ ܒܰܐܣܽܘܪ̈ܰܝ܂ ܐܳܢܺܣܺܝܡܳܘܣ܃
11 [ai]ܗܰܘ ܕܒܰܙܒܼܰܢ ܠܰܝܬܿ ܗ̱ܘܳܐ ܠܳܟܼ ܒܶܗ ܚܰܫܚܽܘ܃ ܗܳܫܳܐ ܕܶܝܢ ܐܳܦܼ ܠܳܟܼ ܐܳܦܼ ܠܺܝ ܛܳܒܼ ܚܳܫܰܚ܂
12 [ai]ܘܫܰܕܿܰܪܬܿܶܗ ܠܳܟܼ܂ ܐܰܢ̱ܬܿ ܕܶܝܢ ܐܰܝܟܼ ܕܰܠܝܰܠܕܿܳܐ ܕܺܝܠܝ܂ ܗܳܟܼܰܢܳܐ ܩܰܒܿܶܠܳܝܗ̱ܝ܂
13 [ai]ܨܳܒܼܶܐ ܗ̱ܘܺܝܬܼ ܓܶܝܪ ܕܰܠܘܳܬܼܝ ܐܶܚܕܿܺܝܘܗ̱ܝ܃ ܕܢܶܗܘܶܐ ܡܫܰܡܶܫ ܠܺܝ ܚܠܳܦܼܰܝܟܿ ܒܰܐܣܽܘܪ̈ܶܐ ܕܶܐܘܰܢܓܿܶܠܺܝܳܘܢ܂
14 [ai]ܒܶܠܥܳܕܼ ܡܶܠܟܿܳܟܼ ܕܶܝܢ ܠܳܐ ܨܒܼܺܝܬܼ ܡܶܕܶܡ ܠܡܶܥܒܿܰܕܼ܃ ܕܠܳܐ ܐܰܝܟܼ ܕܒܰܩܛܺܝܪܳܐ ܬܶܗܘܶܐ ܛܳܒܼܬܼܳܟܼ܃ ܐܶܠܳܐ ܒܨܶܒܼܝܳܢܳܟܼ܂
15 [ai]ܟܒܼܰܪ ܕܶܝܢ ܐܳܦܼ ܡܶܛܽܠ ܗܳܕܼܶܐ ܫܰܢܺܝ ܕܫܳܥܬܼܳܐ܃ ܕܰܠܥܳܠܰܡ ܬܶܐܚܕܿܺܝܘܗ̱ܝ܃
16 [ai]ܠܳܐ ܡܶܟܿܺܝܠ ܐܰܝܟܼ ܥܰܒܼܕܿܳܐ܂ ܐܶܠܳܐ ܝܰܬܿܺܝܪ ܡܶܢ ܥܰܒܼܕܿܳܐ܂ ܐܰܚܳܐ ܚܰܒܺܝܒܼܳܐ ܕܺܝܠܝ ܚܰܕܼ ܟܡܳܐ ܕܺܝܠܳܟܼ܂ ܘܒܼܰܒܼܣܰܪ ܘܰܒܡܳܪܰܢ܂
17 [ai]ܐܶܢ ܗܳܟܼܺܝܠ ܐܺܝܬܼܰܝܟܿ ܠܺܝ ܫܰܘܬܿܳܦܼܳܐ܃ ܩܰܒܿܶܠܳܝܗ̱ܝ ܐܰܝܟܼ ܕܠܺܝ܂
18 [ai]ܘܶܐܢ ܡܶܕܶܡ ܚܰܣܪܳܟܼ ܐܰܘ ܚܰܝܳܒܼ܃ ܗܳܕܼܶܐ ܥܠܰܝ ܚܫܽܘܒܼ܂
19 [ai]ܐܶܢܳܐ ܦܿܰܘܠܳܘܣ ܟܶܬܼܒܿܶܬܼ ܒܺܐܝܕܼܰܝ̈܂ ܐܶܢܳܐ ܦܳܪܰܥ ܐ̱ܢܳܐ܃ ܕܠܳܐ ܐܺܡܰܪ ܠܳܟܼ܃ ܕܳܐܦܼ ܢܰܦܼܫܳܟܼ ܚܰܝܳܒܼ ܐܰܢ̱ܬܿ ܠܺܝ܂
20 [ai]ܐܺܝܢ ܐܳܚܝ܂ ܐܶܢܳܐ ܐܶܬܿܬܿܢܺܝܚ ܒܳܟܼ ܒܡܳܪܰܢ܂ ܐܰܢܺܝܚ ܪ̈ܰܚܡܰܝ ܒܰܡܫܺܝܚܳܐ܂
21 [ai]ܡܶܛܽܠ ܕܰܬܼܟܼܺܝܠ ܐ̱ܢܳܐ ܕܫܳܡܰܥ ܐܰܢ̱ܬܿ ܠܺܝ܃ ܟܶܬܼܒܿܶܬܼ ܠܳܟܼ܂ ܘܝܳܕܼܰܥ ܐ̱ܢܳܐ܂ ܕܝܰܬܿܺܝܪ ܡܶܢ ܡܳܐ ܕܳܐܡܰܪ ܐ̱ܢܳܐ܃ ܥܳܒܼܶܕܼ ܐܰܢ̱ܬܿ܂
22 [ai]ܒܰܚܕܼܳܐ ܕܶܝܢ ܐܳܦܼ ܛܰܝܶܒܼ ܠܺܝ ܒܶܝܬܼ ܡܰܫܪܝܳܐ܂ ܡܣܰܒܰܪ ܐ̱ܢܳܐ ܓܶܝܪ܃ ܕܒܰܨܠܰܘܳܬܼܟܼܽܘܢ̈ ܡܶܬܼܺܝܗܶܒܼ ܐ̱ܢܳܐ ܠܟܼܽܘܢ܀
23 [ai]ܫܳܐܶܠ ܒܰܫܠܳܡܳܟܼ ܐܶܦܿܰܦܼܪܰܐ ܫܰܒܼܝܳܐ ܕܥܰܡܝ ܒܝܶܫܽܘܥ ܡܫܺܝܚܳܐ܂
24 [ai]ܘܡܰܪܩܳܘܣ ܘܰܐܪܺܣܛܰܪܟܼܳܘܣ܂ ܘܕܼܺܡܰܐ܂ ܘܠܽܘܩܰܐ ܡܥܰܕܿܪ̈ܳܢܰܝ܂
25 [ai]ܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܪܽܘܚܟܼܽܘܢ܂ ܐܰܡܺܝܢ ܿ܀ܿ܀ܿ