The Comprehensive Aramaic Lexicon

08:01 [ai]	ܪܺܝܫܳܐ ܕܶܝܢ ܕܟܽܠܗܶܝܢ܂ ܐܺܝܬܼ ܠܰܢ ܪܰܒܿ ܟܿܽܘܡܪ̈ܶܐ܃ ܐܰܝܢܳܐ ܕܺܝܬܼܶܒܼ ܡܶܢ ܝܰܡܺܝܢܳܐ ܕܟܽܘܪܣܝܳܐ ܕܪܰܒܿܽܘܬܼܳܐ ܒܰܫܡܰܝܳܐ܃
08:02 [ai]	ܘܰܗܘܳܐ ܡܫܰܡܫܳܢܳܐ ܕܒܶܝܬܼ ܩܽܘܕܼܫܳܐ ܘܰܕܼܡܰܫܟܿܢܳܐ ܕܰܫܪܳܪܳܐ܃ ܗܰܘ ܕܰܩܒܼܰܥ ܐܰܠܳܗܳܐ ܘܠܳܐ ܒܰܪܢܳܫܳܐ܂
08:03 [ai]	ܟܽܠ ܪܰܒܿ ܟܿܽܘܡܪ̈ܶܐ ܓܶܝܪ ܕܩܳܐܶܡ܃ ܕܰܢܩܰܪܶܒܼ ܩܽܘܪ̈ܒܳܢܶܐ ܘܕܼܶܒܼܚܶܐ̈܂ ܡܶܛܽܠ ܗܳܢܳܐ ܙܳܕܼܩܳܐ ܗ̱ܘܳܬܼ ܐܳܦܼ ܠܗܳܢܳܐ܃ ܕܢܶܗܘܶܐ ܐܺܝܬܼ ܠܶܗ ܡܶܕܶܡ ܕܰܢܩܰܪܶܒܼ܂
08:04 [ai]	ܘܶܐܠܽܘ ܒܰܐܪܥܳܐ ܗ̱ܘܳܐ܃ ܐܳܦܼܠܳܐ ܟܽܘܡܪܳܐ ܗܳܘܶܐ ܗ̱ܘܳܐ܃ ܡܶܛܽܠ ܕܺܐܝܬܼܰܝܗܽܘܢ ܗ̱ܘܰܘ ܟܿܽܘܡܪ̈ܶܐ ܕܰܡܩܰܪܒܼܺܝܢ ܗ̱ܘܰܘ ܩܽܘܪ̈ܒܳܢܶܐ ܐܰܝܟܼ ܕܰܒܼܢܳܡܽܘܣܳܐ܃
08:05 [ai]	ܗܳܢܽܘܢ ܕܰܡܫܰܡܫܺܝܢ ܠܰܕܼܡܽܘܬܼܳܐ ܘܰܠܛܶܠܳܢܝܳܬܼܳܐ̈ ܕܗܳܠܶܝܢ ܕܒܰܫܡܰܝܳܐ܃ ܐܰܝܟܼ ܕܶܐܬܼܶܐܡܰܪ ܠܡܽܘܫܶܐ ܟܰܕܼ ܥܳܒܼܶܕܼ ܗ̱ܘܳܐ ܡܰܫܟܿܢܳܐ܃ ܕܰܚܙܺܝ ܘܰܥܒܼܶܕܼ ܟܽܠܡܶܕܶܡ ܒܰܕܼܡܽܘܬܼܳܐ ܗܳܝ ܕܶܐܬܼܚܰܙܝܰܬܼ ܠܳܟܼ ܒܛܽܘܪܳܐ܂
08:06 [ai]	ܗܳܫܳܐ ܕܶܝܢ ܬܿܶܫܡܶܫܬܳܐ ܕܰܡܝܰܬܿܪܳܐ ܡܶܢ ܗܳܝ ܩܰܒܿܶܠ ܝܶܫܽܘܥ ܡܫܺܝܚܳܐ܃ ܐܰܟܼܡܳܐ ܕܰܡܝܰܬܿܪܳܐ ܐܳܦܼ ܕܺܝܰܬܼܺܝܩܺܐ ܗܳܝ ܕܰܥܒܼܺܝܕܼ ܒܿܳܗ ܡܶܨܥܳܝܳܐ܂ ܘܰܒܫܽܘܘ̱ܕܿܳܝܶܐ̈ ܕܰܡܝܰܬܿܪܺܝܢ܃ ܡܶܢ ܕܗܳܝ ܐܶܬܼܝܰܗܒܿܰܬܼ܂
08:07 [ai]	ܐܶܠܽܘ ܓܶܝܪ ܐܺܝܬܼܶܝܗ ܗ̱ܘܳܬܼ ܩܰܕܼܡܳܝܬܳܐ ܕܠܳܐ ܪܶܫܝܳܢ܃ ܠܰܝܬܿ ܗ̱ܘܳܐ ܐܰܬܼܪܳܐ ܠܗܳܕܼܶܐ ܕܿܬܼܰܪ̈ܬܿܶܝܢ܂
08:08 [ai]	ܪܳܫܶܐ ܠܗܽܘܢ ܓܶܝܪ ܘܶܐܡܰܪ܂ ܕܗܳܐ ܝܰܘܡܳܬܼܳܐ̈ ܐܳܬܼܶܝܢ܂ ܐܳܡܰܪ ܡܳܪܝܳܐ܃ ܘܶܐܓܼܡܽܘܪ ܥܰܠ ܒܰܝܬܳܐ ܕܒܶܝܬܼ ܐܺܝܣܪܳܝܶܠ ܘܥܰܠ ܒܰܝܬܳܐ ܕܒܶܝܬܼ ܺܝܗܽܘܕܼܳܐ ܕܺܝܰܬܼܺܩܺܐ ܚܕܼܰܬܼܳܐ܃
08:09 [ai]	ܠܳܐ ܐܰܝܟܼ ܗܳܝ ܕܺܝܰܬܼܺܩܺܐ ܕܝܶܗܒܿܶܬܼ ܠܰܐܒܼܳܗܰܝܗܽܘܢ̈ ܒܝܰܘܡܳܐ ܕܶܐܚܕܿܶܬܼ ܒܺܐܝܕܼܗܽܘܢ ܘܰܐܦܿܩܶܬܼ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ܂ ܡܶܛܽܠ ܕܗܶܢܽܘܢ ܠܳܐ ܩܰܘܺܝܘ ܒܕܺܝܰܬܼܺܩܺܐ ܕܺܝܠܝ܃ ܐܳܦܼ ܐܶܢܳܐ ܒܣܺܝܬܼ ܒܗܽܘܢ܂ ܐܶܡܰܪ ܡܳܪܝܳܐ܂
08:10 [ai]	ܗܳܕܼܶܐ ܕܶܝܢ ܕܺܝܰܬܼܺܩܺܐ ܕܶܐܬܿܶܠ ܠܒܼܰܝܬܳܐ ܕܒܶܝܬܼ ܐܺܝܣܪܳܝܶܠ܂ ܒܳܬܼܰܪ ܝܰܘܡܳܬܼܳܐ̈ ܗܳܢܽܘܢ ܐܳܡܰܪ ܡܳܪܝܳܐ܃ ܐܶܬܿܠܺܝܘܗ̱ܝ ܠܢܳܡܽܘܣܝ ܒܡܰܕܿܥܰܝܗܽܘܢ̈܂ ܘܥܰܠ ܠܶܒܿܰܘܳܬܼܗܽܘܢ̈ ܐܶܟܼܬܿܒܼܺܝܘܗ̱ܝ܂ ܘܶܐܗܘܶܐ ܠܗܽܘܢ ܐܶܢܳܐ ܐܰܠܳܗܳܐ܂ ܘܗܶܢܽܘܢ ܢܶܗܘܽܘܢ ܠܺܝ ܥܰܡܳܐ܂
08:11 [ai]	ܘܠܳܐ ܢܰܠܶܦܼ ܐ̱ܢܳܫ ܠܒܼܰܪ ܡܕܼܺܝܢ̱ܬܿܶܗ ܐܳܦܼܠܳܐ ܠܰܐܚܽܘܗ̱ܝ܃ ܘܢܺܐܡܰܪ ܕܕܼܰܥ ܠܡܳܪܝܳܐ܃ ܡܶܛܽܠ ܕܟܽܠܗܽܘܢ ܢܶܕܿܥܽܘܢܳܢܝ܃ ܡܶܢ ܙܥܽܘܪܗܽܘܢ ܘܰܥܕܼܰܡܳܐ ܠܩܰܫܺܝܫܗܽܘܢ܂
08:12 [ai]	ܘܶܐܚܰܣܶܐ ܐܶܢܽܘܢ ܡܶܢ ܥܰܘܠܗܽܘܢ܃ ܘܰܚܛܳܗܰܝܗܽܘܢ̈ ܬܽܘܒܼ ܠܳܐ ܐܶܬܿܕܿܟܼܰܪ ܠܗܽܘܢ܂
08:13 [ai]	ܒܗܳܝ ܕܶܐܡܰܪ ܚܕܼܰܬܼܳܐ܃ ܠܩܰܕܼܡܳܝܬܳܐ ܐܰܥܬܿܩܳܗ܂ ܘܰܐܝܢܳܐ ܕܰܥܬܼܶܩ ܘܰܣܶܐܒܼ܃ ܩܰܪܺܝܒܼ ܗ̱ܽܘ ܠܰܚܒܼܳܠܳܐ܀

next chapter