The Comprehensive Aramaic Lexicon

01:01 [ai]	ܩܰܫܺܝܫܳܐ܂ ܠܰܓܼܒܼܺܝܬܼܳܐ ܩܽܘܪܺܝܰܐ ܘܠܰܒܼܢܶܝܗ܃ ܐܰܝܠܶܝܢ ܕܶܐܢܳܐ ܡܰܚܶܒܼ ܐ̱ܢܳܐ ܒܰܫܪܳܪܳܐ܂ ܠܳܐ ܗ̱ܘܳܐ ܕܹܝܢ ܐܶܢܳܐ ܒܰܠܚܽܘܕܼܰܝ܃ ܐܶܠܳܐ ܟܽܠܗܽܘܢ ܐܰܝܠܶܝܢ ܕܝܰܕܼܥܽܘܗ̱ܝ ܠܰܫܪܳܪܳܐ܃
01:02 [ai]	ܡܶܛܽܠ ܫܪܳܪܳܐ ܐܰܝܢܳܐ ܕܰܡܩܰܘܶܐ ܒܰܢ܂ ܘܥܰܡܰܢ ܐܺܝܬܼܰܘܗ̱ܝ܂ ܠܥܳܠܰܡ܂
01:03 [ai]	ܬܶܗܘܶܐ ܥܰܡܰܢ܂ ܛܰܝܒܿܽܘܬܼܳܐ ܘܪ̈ܰܚܡܶܐ ܘܰܫܠܳܡܳܐ ܡܶܢ ܐܰܠܳܗܳܐ ܐܰܒܼܳܐ܃ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ ܒܪܶܗ ܕܰܐܒܼܳܐ܂ ܒܰܫܪܳܪܳܐ܂ ܘܰܒܼܚܽܘܒܿܳܐ܀
01:04 [ai]	ܚܕܼܺܝܬܼ ܣܰܓܿܺܝ܃ ܕܶܐܫܟܿܚܶܬܼ ܡܶܢ ܒܢܰܝܟܿܝ ܕܰܡܗܰܠܟܼܺܝܢ ܒܰܫܪܳܪܳܐ܃ ܐܰܝܟܿܰܢܳܐ ܕܦܽܘܩܕܳܢܳܐ ܢܣܰܒܼܢܰܢ ܡܶܢ ܐܰܒܼܳܐ܂
01:05 [ai]	ܘܗܳܫܳܐ ܡܦܿܺܝܣ ܐ̱ܢܳܐ ܠܶܟܼܝ܂ ܩܽܘܪܺܝܰܐ܃ ܠܳܐ ܗ̱ܘܳܐ ܐܰܝܟܼ ܦܽܘܩܕܳܢܳܐ ܚܰܕܼ̱ܬܼܳܐ ܟܳܬܼܶܒܼ ܐ̱ܢܳܐ ܠܶܟܼܝ܃ ܐܶܠܳܐ ܗܰܘ ܕܺܐܝܬܼ ܗ̱ܘܳܐ ܠܰܢ ܡܶܢ ܫܽܘܪܳܝܳܐ܃ ܕܢܰܚܶܒܼ ܚܰܕܼ ܠܚܰܕܼ܂
01:06 [ai]	ܘܗܳܢܳܐ ܐܺܝܬܼܰܘܗ̱ܝ ܚܽܘܒܿܳܐ܃ ܕܰܢܗܰܠܶܟܼ ܐܰܝܟܼ ܦܽܘܩܕܳܢܰܘܗ̱ܝ̈܂ ܗܳܢܳܐ ܦܽܘܩܕܳܢܳܐ ܐܺܝܬܼܰܘܗ̱ܝ܂ ܐܰܝܟܼ ܡܳܐ ܕܰܫܡܰܥܬܿܽܘܢ ܡܶܢ ܫܽܘܪܳܝܳܐ܃ ܕܒܶܗ ܗܘܰܝܬܿܽܘܢ ܡܗܰܠܟܼܺܝܢ܂
01:07 [ai]	ܡܶܛܽܠ ܕܣܰܓܿܺܝܶܐܐ̈ ܡܰܛܥܝܳܢܶܐ̈ ܢܦܼܰܩܘ ܒܶܗ ܒܥܳܠܡܳܐ܂ ܐܰܝܠܶܝܢ ܕܠܳܐ ܡܰܘܕܶܝܢ ܕܝܶܫܽܘܥ ܡܫܺܝܚܳܐ ܐܶܬܼܳܐ ܒܰܒܼܣܰܪ܂ ܗܳܢܳܐ ܐܺܝܬܼܰܘܗ̱ܝ ܡܰܛܥܝܳܢܳܐ ܘܰܐܢܛܺܝܟܼܪܺܝܣܛܳܘܣ܂
01:08 [ai]	ܐܶܙܕܿܰܗ̱ܪܘ ܒܢܰܦܼܫܟܼܽܘܢ܃ ܕܠܳܐ ܬܰܘܒܿܕܼܽܘܢ ܡܶܕܶܡ ܕܰܦܼܠܰܚܬܿܽܘܢ܃ ܐܶܠܳܐ ܐܰܓܼܪܳܐ ܡܫܰܠܡܳܢܳܐ ܬܶܬܼܦܿܰܪܥܽܘܢ܂
01:09 [ai]	ܟܽܠ ܐܰܝܢܳܐ ܕܥܳܒܼܰܪ ܘܠܳܐ ܡܩܰܘܶܐ ܒܝܽܘܠܦܿܳܢܶܗ ܕܰܡܫܺܝܚܳܐ܃ ܐܰܠܳܗܳܐ ܠܰܝܬܿ ܒܶܗ܂ ܗܰܘ ܕܰܡܩܰܘܶܐ ܒܝܽܘܠܦܿܳܢܶܗ܃ ܗܳܢܳܐ܂ ܘܠܰܐܒܼܳܐ ܘܠܰܒܼܪܳܐ ܐܺܝܬܼ ܠܶܗ܂
01:10 [ai]	ܐܶܢ ܐ̱ܢܳܫ ܐܳܬܼܶܐ ܠܘܳܬܼܟܼܽܘܢ܃ ܘܗܳܢܳܐ ܝܽܘܠܦܿܳܢܳܐ ܠܳܐ ܡܰܝܬܿܶܐ܃ ܠܳܐ ܬܩܰܒܿܠܽܘܢܳܝܗ̱ܝ ܒܒܼܰܝܬܳܐ܂ ܘܰܚܕܼܺܝ ܠܳܟܼ܂ ܠܳܐ ܬܺܐܡܪܽܘܢ ܠܶܗ܂
01:11 [ai]	ܗܰܘ ܓܹܝܪ ܕܳܐܡܰܪ ܠܶܗ ܚܕܼܺܝ ܠܳܟܼ܃ ܡܫܰܘܬܿܰܦܼ ܗ̱ܽܘ ܠܰܥܒܼܳܕܼܰܘܗ̱ܝ̈ ܒܺܝܫܶܐ̈܀
01:12 [ai]	ܟܰܕܼ ܣܰܓܿܺܝܳܐܬܼܳܐ̈ ܐܺܝܬܼ ܗ̱ܘܳܐ ܠܺܝ ܠܡܶܟܼܬܿܰܒܼ ܠܟܼܽܘܢ܃ ܠܳܐ ܒܥܺܝܬܼ ܕܰܒܼܝܰܕܼ ܟܰܪܛܺܝܣܳܐ ܘܰܕܼܝܽܘܬܼܳܐ܂ ܐܶܠܳܐ ܡܣܰܒܰܪ ܐ̱ܢܳܐ܂ ܕܺܐܬܼܶܐ ܠܘܳܬܼܟܼܽܘܢ܃ ܘܦܼܽܘܡܳܐ ܠܘܳܬܼ ܦܽܘܡܳܐ ܢܡܰܠܶܠ܃ ܕܚܰܕܼܽܘܬܼܳܐ ܕܺܝܠܰܢ ܬܶܗܘܶܐ ܡܫܰܡܠܝܳܐ܂
01:13 [ai]	ܫܳܐܠܺܝܢ ܫܠܳܡܶܟܼܝ܃ ܒܢܰܝܳܐ ܕܚܳܬܼܶܟܼܝ ܓܒܼܺܝܬܼܳܐ܂ ܐܰܡܺܝܢ܀