← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

51004: TgO Nm

Click on a word for lexical analysis
Click on a red-colored coordinate for comments and/or translations of the line

previous chapter


30:01 )1( וַאֲמַר מֹשַה לִבנֵי יִשׂרָאֵל כְכֹל/כל#3#/ דְפַקֵיד יוי יָת מֹשַה:
30:02 )1( וֻמַלֵיל מֹשַה עִם רֵישֵי שִבטַיָא לִבנֵי ישׂראל לְמֵימַר דֵין פִתגָמָא דְפַקֵיד יוי:
30:03 )1( גְבַר אֲרֵי יִדַר נְדַר קדם יוי אוֹ יְקַיֵים קְיָם לְמֵיסַר אִיסָר עַל נַפשֵיה לָא יְבַטֵיל פִתגָמֵיה כְכֹל דְיִפוֹק מִפוּמֵיה יַעֲבֵיד:
30:04 )1( וְאִיתְתָא אֲרֵי תִידַר נְדַר קדם יוי וְתֵיסַר אִיסָר בְבֵית אֲבוּהָא בְרַביוּתַה:
30:05 )1( וְיִשמַע אֲבוּהָא יָת נִדרַה וַאֲסָרַה דַאֲסַרַת עַל נַפשַה וְיִשתוֹק לַה אֲבוּהָא וִיקוּמוּן כֹל נִדרַהָא וְכֹל אֵיסָרֵי דַאֲסַרַת עַל נַפשַה יְקוּמוּן:
30:06 )1( וְאִם אַעֲדִי אֲבוּהָא יָתְהוֹן בְיוֹמָא דִשמַע כֹל נִדרַהָא וַאֲסָרַהָא דַאֲסַרַת עַל נַפשַה לָא יְקוּמוּן וֻמִן קדם יוי יִשתְבֵיק לַה אֲרֵי אַעַדִי אֲבוּהָא יָתְהוֹן:
30:07 )1( וְאִם מִהוָה תִהוֵי לִגבַר וְנִדרַהָא עֲלַה אוֹ פֵירוּש סִפוָתַהָא דַאֲסַרַת עַל נַפשַה:
30:08 )1( וְיִשמַע בַעֲלַה בְיוֹמָא דִשמַע וְיִשתוֹק לַה וִיקוּמוּן נִדרַהָא וַאֲסָרַהָא דַאֲסַרַת עַל נַפשַה יְקוּמוּן:
30:09 )1( וְאִם בְיוֹמָא דִשמַע בַעֲלַה אַעֲדִי יָתְהוֹן וֻבַטֵיל יָת נִדרַה דַעֲלַה/די עלהא#3#/ וְיָת פֵירוּש סִפוָתַהָא דַאֲסַרַת עַל נַפשַה וֻמִן קדם יוי יִשתְבֵיק לַה:
30:10 )1( וֻנדַר אַרמְלָא וֻמתָרְכָא כֹל דַאֲסַרַת עַל נַפשַה קַייָם עַלַה:
30:11 )1( וְאִם בֵית/בבית#3#/ בַעֲלַה נְדַרַת אוֹ אֲסַרַת אֵיסַר עַל נַפשַה בְקִיוּם:
30:12 )1( וֻשמַע בַעֲלַה וֻשתֵיק לַה לָא אַעֲדִי יָתְהוֹן וִיקוּמוּן כֹל נִדרַהָא וְכֹל אֵיסָרֵי דַאֲסַרַת עַל נַפשַה יְקוּמוּן:
30:13 )1( וְאִם בַטָלָא יְבַטֵיל יָתְהוֹן בַעֲלַה בְיוֹמָא דִשמַע כֹל אַפָקוּת סִפוָתַהָא לְנִדרַהָא וֻלאִיסַר נַפשַה לָא יְקוּמוּן בַעֲלַה בַטֵילִינוּן וֻמִן קדם יוי יִשתְבֵיק לַה:
30:14 )1( כֹל נְדַר וְכֹל קִיוּמַת/קיום#3#/ אִסָר לְסַגָפָא נְפַש בַעֲלַה יְקַיֵימִינוּן וֻבַעֲלַה יְבַטֵילִינוּן:
30:15 )1( וְאִם מִשתָק יִשתוֹק לַה בַעֲלַה מִיוֹם לְיוֹם וִיקַייֵם יָת כֹל נִדרַהָא אוֹ יָת כֹל אֲסָרַהָא דַעֲלַה קַיֵים יָתְהוֹן אֲרֵי שְתֵיק לַה בְיוֹמָא דִשמַע:
30:16 )1( וְאִם בַטָלָא יְבַטֵיל יָתְהוֹן בָתַר דִשמַע וִיקַבֵיל יָת חוֹבַה:
30:17 )1( אִלֵין קִיָמַיָא/קְיָמַיָא#3#/ דְפַקֵיד יוי יָת מֹשַה בֵין גֻברָא לְאִיתְתֵיה בֵין אַבָא לִברַתֵיה בְרַביוּתַה בֵית אֲבוּהָא:

next chapter