← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

51005: TgO Dt

Click on a word for lexical analysis
Click on a red-colored coordinate for comments and/or translations of the line

previous chapter


19:01 )1( אֲרֵי יְשֵיצֵי יוי אֲלָהָך יָת עַמְמַיָא דַיוי אֲלָהָך יָהֵיב לָך יָת אֲרַעהוֹן וְתֵירְתִינוּן וְתִיתֵיב בְקִרוֵיהוֹן וֻבבָתֵיהוֹן:
19:02 )1( תְלָת קִרוִין תַפרֵיש לָך בְגוֹ אַרעָך דַיוי אֲלָהָך יָהֵיב לָך לְמֵירְתַה:
19:03 )1( תַתקֵין לָך אוֹרחָא וֻתתַלֵית יָת תְחוּם אַרעָך דְיַחסְנִינָך יוי אֲלָהָך וִיהֵי לְמִיעִירַק/למיעירוק#3#/ לְתַמָן כֹל קָטוֹל:
19:04 )1( וְדֵין פִתגָם קָטוֹלָא דְיִעִירוֹק לְתַמָן וְיִתקַיַים דְיִקטוֹל יָת חַברֵיה בְלָא מַדְעֵיה וְהוּא לָא סָנֵי לֵיה מֵאִתמָלִי וֻמִדְקַמוֹהִי/ומדקדמוהי#3#/:
19:05 )1( וֻדיֵיעוֹל עִם חַברֵיה בְחוּרשָא לְמִיקַץ אָעִין וְתִתמְרֵיך/וְתִתמְרֵיג#3#/ יְדֵיה בְבַרזְלָא/בגרזנא#3#/ לְמִיקְצֵיה אָעָא וְיִשתְלֵיף בַרזְלָא מִן אָעָא וְיַשכַח יָת חַברֵיה וִימוּת הוּא יְעִירוֹק לַחדָא מִן קִרוַיָא הָאִלֵין וְיִתקַיַים:
19:06 )1( דִלמָא יִרדוֹף גָאֵיל דְמָא בָתַר קָטוֹלָא אֲרֵי יִיחַם/יתיחם#3#/ לִיבֵיה וְיִדבְקִינֵיה אֲרֵי תַסגֵי אוֹרחָא וְיִקטְלִינֵיה נְפַש וְלֵיה לֵית חוֹבַת דִין דִקטוֹל אֲרֵי לָא סָנֵי הוּא לֵיה מֵאִתמָלִי וֻמִדְקַמוֹהִי/ומדקדמוהי#3#/:
19:07 )1( עַל כֵין אֲנָא מְפַקֵיד לָך לְמֵימַר תְלָת קִרוִין תַפרֵיש לָך:
19:08 )1( וְאִם יַפתֵי יוי אֲלָהָך יָת תְחוּמָך כְמָא דְקַיֵים לַאֲבָהָתָך וְיִתֵין לָך יָת כֹל ארעא דְמַלֵיל לְמִיתַן לַאֲבָהָתָך:
19:09 )1( אֲרֵי תִיטַר יָת כֹל תַפקֵידתָא הָדָא לְמַעבְדָה דַאֲנָא מְפַקֵיד לָך יוֹמָא דֵין לְמִרחַם יָת יוי אֲלָהָך וְלִמהָך בְאוֹרחָן דְתָקְנָן קְדָמוֹהִי כֹל יוֹמַיָא וְתוֹסֵיף לָך עוֹד תְלָת קִרוִין עַל תְלָת אִלֵין:
19:10 )1( וְלָא יִשתְפֵיך דַם זַכַי בְגוֹ אַרעָך דַיוי אֲלָהָך יָהֵיב לָך אַחסָנָא וִיהֵי עֲלָך חוֹבַת דִין דִקטוֹל:
19:11 )1( וַאֲרֵי יְהֵי גְבַר סָנֵי לְחַברֵיה וְיִכמוֹן לֵיה וִיקוּם עֲלוֹהִי וְיִקטַלִינֵיה נְפַש וִימוּת וְיִעִירוֹק לַחדָא מִן קִרוַיָא הָאִלֵין:
19:12 )1( וְיִשלְחוּן סָבֵי קַרתֵיה וְיִדבְרוּן יָתֵיה מִתַמָן וְיִתְנוּן/וְיִמסְרוּן#3#/ יָתֵיה בְיַד גָאֵיל דְמָא וִימוּת/ויתקטיל#3#/:
19:13 )1( לָא תְחוּס עֵינָך עֲלוֹהִי וֻתפַלֵי אָשְדֵי דַם זַכַי מִישראל וְיִיטַב לָך:
19:14 )1( לָא תְשַנֵי תְחוּמָא דְחַברָך דְתַחִימוּ קַדמָאֵי בְאַחסָנְתָך דְתַחסֵין בארעא דַיוי אֲלָהָך יָהֵיב לָך לְמֵירְתַה:
19:15 )1( לָא יְקוּם סָהִיד חַד בִגבַר לְכֹל עֲוָיָן וֻלכָל חוֹבִין בְכֹל חֵיט/חֵטא#3#/ דְיִחטֵי עַל מֵימַר תְרֵין סָהֲדִין אוֹ עַל מֵימַר תְלָתָה סָהֲדִין יִתקַייַם פִתגָמָא:
19:16 )1( אֲרֵי יְקוּם סָהִיד שַקָר/שְקַר#3#/ בִגבַר לְאַסהָדָא בֵיה סָתיָא:
19:17 )1( וִיקוּמוּן תְרֵין גַברִין/גוברין#3#/ דִילְהוֹן דִינָא קדם יוי קדם כָהֲנַיָא וְדַיָינַיָא דִיהוֹן בְיוֹמַיָא הָאִינוּן:
19:18 )1( וְיִתבְעוּן דַיָינַיָא יָאוּת וְהָא סָהִיד שִקרָא סָהֲדָא שִקרָא אַסהֵיד בַאֲחוּהִי:
19:19 )1( וְתַעבְדוּן לֵיה כְמָא דְחַשֵיב לְמַעֲבַד לַאֲחוּהִי וֻתפַלֵי עָבֵיד דְבִיש מִבֵינָך:
19:20 )1( וֻדיִשתְאַרוּן/וֻדיִשתַאְרוּן#3#/ יִשמְעוּן וְיִדחֲלוּן וְלָא יוֹסְפוּן/יֵיסְפוּן#3#/ לְמַעֲבַד עוֹד כְפִתגָמָא בִישָא הָדֵין בֵינָך:
19:21 )1( וְלָא תְחוּס עֵינָך נַפשָא חֲלָף נַפשָא עֵינָא חֲלָף עֵינָא שִינָא חלָף שִינָא יְדָא חֲלָף יְדָא רִגלָא חֲלָף רִגלָא:

next chapter