The Comprehensive Aramaic Lexicon

45:01 )1(	וֻבפַלָגוּתְכוֹן יָת אַרעָא בְאַחסָנָא תַפְרשוּן אַפרָשוּתָא קֳדָם יוי קוּדשָא מִן אַרעָא אוּרכָא עַסרִין וְחַמשָה אַלפִין אוּרכָא וֻפֻתיָא עַסרָא אַלפִין קוּדשָא הוּא בְכָל תְחוּמָה סְחוֹר סְחוֹר:
45:02 )1(	יְהֵי מִדֵין לְקוּדשָא חֲמֵיש מְאָה <אמין#3#> בַחֲמֵיש מְאָה <אמין#3#> מְרֻבַע סְחוֹר סְחוֹר וְחַמשִין אַמִין רַוחָא לֵיה סְחוֹר סְחוֹר:
45:03 )1(	וֻמִן מִשחֲתָא הָדָא תִמשַח אוּרכָא עִסרִין וְחַמשָה אַלפִין וֻפוּתיָא עַשׂרָה אַלפִין וֻבֵיה יְהֵי מַקדְשָא קוֹדַש קוּדשִין:
45:04 )1(	קוּדשָא מִן אַרעָא הוּא לְכָהֲנַיָא דִמשַמְשִין בְבֵית מַקדְשָא <דייי#3#> יְהֵי דְקָרִיבִין לְשַמָשָא קֳדָם יוי וִיהֵי לְהוֹן אֲתַר שְבִיק לְבָתַיָא וְכִבשָא לְמַקדְשָא:
45:05 )1(	וְעַשרִין וְחַמשָה אַלפִין אוּרכָא וְעַשׂרָא אַלפִין פוּתיָא וִיהֵי לְלֵיוָאֵי מְשַמְשֵי בֵיתָא/בְבֵית מַקדְשָא#3#/ לְהוֹן לְאַחסָנָא עַסרִין לִשכָן:
45:06 )1(	וְאַחסָנַת קַרתָא תִיתְנוּן חַמשָה אַלפִין פוּתיָא וְאוּרכָא עַסרִין וְחַמשָה אַלפִין לִקבֵיל אַפרָשוּת קֻדשָא לְכָל בֵית יִשרָאֵל יְהֵי:
45:07 )1(	וֻלרַבָא מִכָא וֻמִכָא לְאַפרָשוּת קוּדשָא וֻלאַחסָנַת קַרתָא לִקבֵיל אַפרָשוּת קוּדשָא וְלִקבֵיל אַחסָנַת קַרתָא מֵרוּחַ מַערְבָא מַערְבָא וֻמֵרוּחַ מַדנְחָא מַדנְחָא וְאוּרכָא לִקבֵיל חַד מִן חֳלָקַיָא מִתְחוּם מַערְבָא עַל/עד#3#/ תְחוּם מַדנְחָא:
45:08 )1(	דָא אַרעָא תְהֵי לְרַבָא לְאַחסָנָא בְיִשרָאֵל וְלָא יֵינְסוּן/יונון#3#/ עוֹד רַברְבַי יָת עַמִי וְאַרעָא יִתְנוּן לְבֵית יִשרָאֵל לְשִבטֵיהוֹן:

45:09 )1(	כִדנָן אֲמַר יוי אֲלֹהִים סַגִי לְכוֹן רַברְבֵי יִשרָאֵל חִטפָא וֻבִזָא אַעדוֹ וְדִין דִקשוֹט וְזָכוּ עֲבִידוּ סַלִיקוּ תַקלָתְכוֹן מִגוֹן עַמִי אֲמַר יוי אֲלֹהִים:

45:10 )1(	מוֹזְנָוָן דִקשוֹט וֻמכִילָן דִקשוֹט וֻבִתִין דִקשוֹט יְהוֹן לְכוֹן:
45:11 )1(	מְכִילְתָא וֻבִיתָא טֵיקַס חַד יְהֵי לְכוֹן סְכוֹם תְלַת סְאִין לְמִסַב מַעסַר כוֹרָא/כוֹלָא#3#/ בִמכִילַת רַטִיבָא בִיתָא וַעֲסַר כוֹרָא יַבִישָא מְכִילְתָא מִן כוֹרָא הָוֵי טִקוּסֵיה:
45:12 )1(	וְסִלעָא עִסרִין מָעִין תַלתוּת מַניָא עִסרִין סִלעִין מְנֵי כַספָא עִסרִין וַחֲמֵיש סִלעִין רַבעוּת מַניָא חְמֵיש עַסרֵי סִלעִין כוּלְהוֹן שִתִין מַניָא רַבָא/דבה#3#/ מְנֵי קוּדשָא יְהֵי לְכוֹן:
45:13 )1(	דָא אַפרָשוּתָא דְתַפרְשוּן חַד מִן שִיתָא בִמכִילְתָא מִכוֹר חִטִין וְחַד מִן שִתָא בִמכִילְתָא מִכוֹר סְעָרִין:
45:14 )1(	וֻדחָזֵי לְמִסַב מִן מִשחָא בִמכִילַת רַטִיבָא מַעסְרָא בִיתָא מִן כוֹרָא חַד מִן עַסרָא הָויָא בִיתָא בְכוֹרָא אֲרֵי עֲסַר בִתִין כוֹרָא:
45:15 )1(	וְאִימַר חַד מִן עָנָא מִן מָאתַן דְחָזֵי לְמִסַב מִפִטמָא דְיִשרָאֵל לְמִנחָתָא וֻלעֲלָתָא וֻלנִכסַת קוּדשַיָא לְכַפָרָא עֲלֵיהוֹן אֲמַר יוי אֲלֹהִים:
45:16 )1(	כָל עַמָא דְאַרעָא יְהוֹן עָבְדִין יָת אַפרָשוּתָא הָדָא לְרַבָא בְיִשרָאֵל:
45:17 )1(	וְעַל רַבָא תְהֵי עֲלָתָא וֻמִנחָתָא וְנִסכַיָא בְחַגַיָא וֻביַרחַיָא וֻבשַבַיָא בְכָל מוֹעֲדֵי בֵית יִשרָאֵל הוּא יַעֲבֵיד יָת חַטָתָא וְיָת מִנחָתָא וְיָת עֲלָתָא וְיָת נִכסַת קוּדשַיָא לְכַפָרָא עַל בֵית יִשרָאֵל:
45:18 )1(	כִדנָן אֲמַר יוי אֲלֹהִים בְקַדמָאָה בְחַד לְיַרחָא תִסַב תוֹר בַר תוֹרֵי שְלִים וֻתדַכֵי/ותרבי#3#/ יָת מַקדְשָא:
45:19 )1(	וְיִסַב כָהֲנָא מִדְמָא דְחַטָתָא וְיִתֵין עַל סְקוּפַת בֵיתָא וְעַל אַרבַע זָויָת מְסָמְתָא לְמַדבְחָא וְעַל סְקוּפַת תְרַע דָרְתָא גָוָיתָא:
45:20 )1(	וְכֵין תַעֲבֵיד בְשִבעָה בְיַרחָא מִגְבַר דְמִשתְלֵי וֻמִטַפַש וֻתכַפְרוּן עַל בֵיתָא:
45:21 )1(	בְנִיסָן בְאַרבְעַת עַסרָא יוֹמָא לְיַרחָא יְהֵי לְכוֹן פִסחָא חַגָא שִבעָה יוֹמִין פַטִירָא יִתאֲכִיל:
45:22 )1(	וְיַעֲבֵיד רַבָא בְיוֹמָא הַהוּא חֲלִיפוֹהִי וֻחלַף כָל עַמָא דְאַרעָא תוֹרָא לְחַטָתָא:
45:23 )1(	וְשִבעָה יוֹמֵי חַגָא יַעֲבֵיד עֲלָתָא קֳדָם יוי שִבעָה תוֹרִין וְשִבעָה דִכרִין שַלמִין לְיוֹמָא שִבעָה יוֹמַיָא וְחַטָתָא צְפִיר בַר עִזִין לְיוֹמָא:
45:24 )1(	וֻמִנחָתָא מְכִילְתָא לְתוֹרָא וֻמכִילְתָא לְדִכרָא יַעֲבֵיד וֻמִשחָא מְלֵי הִינָא לִמכִילְתָא:
45:25 )1(	בִשבִיעָאָה בַחֲמֵישְת עַסרָא יוֹמָא לְיַרחָא בְחַגָא יַעֲבֵיד כְאִלֵין שִבעָה יוֹמַיָא כְחַטָתָא כַעֲלָתָא וֻכמִנחָתָא וֻכמִשחָא: