The Comprehensive Aramaic Lexicon

05.006:004	ܫܡܘܥ ܐܝܣܪܐܝܠ ܡܪܐ ܐܠܗܟ ܡܪܐ ܚܕ ܗܘ܂܂
05.006:005	ܘܬܚܒ ܠܡܪܐ ܐܠܗܟ ܡܢ ܟܘܠܗ ܠܒܟ " " ^ܢ^ܦܫܟ ^ܘܡ^ܢ ܟܘܠܗ ܚܝܠܟ܂܂
05.006:006	ܘܝܗ̈ܢ ܡܠ̈ܝܐ ܗܠܝܢ ܟܘܠܗܝܢ ܕܐܢܐ ܡܦܩܕ ܠܟ ܝܘܡܕܢ ܒܠܒܟ ܘܒܢܦܫܟ܂܂
05.006:007	ܘܬܬܢܐ݁ ܝܬܗܝܢ ܠܒܢ̈ܝ^ܟ^ ܘܒܗܝܢ ܬܗܐ݁ ܡܡܠܠ ܟܕ ܐܬ ܝܬܒ ܒܒܝܬܟ ܘܟܕ ܐܬ ܐܙܠ ܒܐܘܪܚܐ܂܂ ܘܟܕ ܐܬ ܕܡܟ܂ ܘܐܬ ܩܐܡ܂܂
05.006:008	ܘܬܩܛܘܪ ܝܬܗܝܢ ܠܐܬ݁ ܥܠ ܐܝܕܟ݁ ܘܝܗ̈ܢ ܕܠܐ ܙܝ̈ܥܢ ܡܢ ܩܘܕܡ ܥܝܢ̈ܝܟ܂܂
05.006:009	ܘܬܟܬܘܒ ܝܬܗܝܢ ܥܠ " " ܘܕܬܪ̈ܥܝܟ܂܂
05.006:010	ܘܝܗܐ݁ ܟܕ ܝܥܠ ܝܬܟ ܡܪܐ ܐܠܗܟ ܠܐܪܥܐ ܗܕܐ ܕܝܡܐ ܠܐܒܗܬܟ܂܂ ܠܐܒܪܗܡ ܘܠܐܝܣܚܩ ܘܠܝܥܩܘܒ ܕܝܬܠ ܠܟ ܡܕܝܢܢ ܪܒܪ̈ܒܢ ܘܛ̈ܒܢ ܗܠܝܢ ܕܠܐ ܒܢܝܬ܂
05.006:011	ܘܒ̈ܬܝܢ ܡ̈ܠܝܢ ܟܘܠ ܛܒ̈ܢ ܗܠܝܢ ܕܠܐ ܡܠܝܬ܂܂ ܓܘ̈ܒܝܢ ܦܣܝ̈ܠܝܢ ܕܠܐ ܚܨܒܬ܂ ܟܪ̈ܡܝܢ ܘܒܝܬ ܙܝ̈ܬܝܢ ܗܠܝܢ ܕܠܐ ܢܨܒܬ܂܂ " " ܘܬܣܒܘܥ
05.006:012	ܐܣܬܟܠ ܠܓܪܡܟ ܕܠܐ ܝܬܦܬܝ ܠܒܟ ܘܬܬܢܫܐ݁ ܠܡܪܐ ܐܠܗܟ ܗܕܢ ܕܐܦܩ ܝܬܟ ܡܢ ܐܪܥܐ ܕܡܨܪܝܢ ܡܢ ܒܝܬܐ ܕܥܒܕܘܬ^ܐ^
05.006:013	ܠܡܪܐ ܐܠܗܟ ܕܚܘܠ ܘܠܗ ܬܦܠܘܚ܂܂ ܘܠܘܬܗ ܬܬܕܒܩ ܘܒܫܝܡܗ ܬܝܡܐ
05.006:014	ܠܐ ܬܗܘܢ ܐܙ̈ܠܝ^ܢ^ ܒܬܪ ܐܠܗ̈ܝܢ ܚܘܪ̈ܢܝܢ ܡܢ ܐܠܗܝ̈ܗܘܢ ܕܡܝܢ̈ܝܐ ܗܠܝܢ݁ ܕܚܘܓܠܬܟܘܢ݁
05.006:015	ܕܐܠܗ ܩܢܐܝ " " ܐ݁ܠܗܟ ܒܓܘܟ܂܂ ܠܐ ܝܪܓܘܙ ܘܝܬܚܡܬ ܡܪܐ ܐܠܗܟ ܥܠܝܟ܂܂ ܘܝܫܚܘܩ ܝܬܟ ܡܢ ܐܦ̈ܝܗ݀ ܕܐܪܥܐ܂܂
05.006:016	ܠܐ ܬܢܣܐ݁ ܠܡܪܐ ܐܠܗܟ ܗܟܡܐ ܕܢܣܝ̈ܬܘܢ ܒܢܣܝܘܢܐ܂܂
05.006:017	ܢܛ^ܘ^ܪ ܬܢܛܪ ܟܘܠܗܘܢ ܦܩ̈ܘܕܘܝ ܕܡܪܐ ܐܠܗܟ܂ ܘܣܗ̈ܕܘܬܗ ܘܨܕܩ̈ܘܝ ܗܠܝܢ ^ܕ^ܦܩܕܬ ܝܬܟ
05.006:018	ܘܬܥܒܕ ܡܐ ܕܛܒ ܘܡܐ ‍[‍ܕ‍]‍ܫܦܪ ܩܘܕܡ ܡܪܐ ܐܠܗܟ ܘܝܛܘܒ ܠܟ " " ^ܐܪܥܐ^ ܛܒܬܐ ܕܝܡܐ ܡܪܐ ܠܐܒܗ̈ܬܟܘܢ
05.006:019	ܕܝܪܕܘܦ ܟܘܠܗܘܢ ܣܢ̈ܐܝܟ ܡܢ ܩܘܕܡ ܐܦ̈ܝܟ܂܂ ܗܝܟ ܡܐ ܕܡܠܠ ܡܪܐ܂܂
05.006:020	ܘܝܗܐ݁ ܟܕ ܝܫܘܠ ܝܬܟ ܒܪܟ ܡܚܪ ܘܝܐܡܘܪ ܡܐ ܗܢܝܢ ܣܗܕܘ̈ܬܐ ܘܨܕܩܝ̈ܐ ܘܕܝܢ̈ܝܐ ܗܠܝܢ ܕܦܩܕ ܡܪܐ ܐܠܗܢ܂܂
05.006:021	ܘܬܝܡܘܪ ܠܒܪܟ ܥܒ̈ܕܝܢ ܗܘܝܢܢ ܠܦܪܥܘܢ ܒܐܪܥܐ ܕܡܨܪ̈ܝܢ܂܂ ܘܐܦܩ ܝܬܢ ܡܪܐ ܐܠܗܐ ܡܢ ܬܡ݁ܢ ܒܐܝܕ ܫܪܝܪܐ ܘܒܐܕܪܥ ܡܪܘܡܡ܂܂
05.006:022	ܘܝܗܒ ܡܪܐ ܐܬ̈ܝܢ ܘܓܒܘܪ̈ܢ ܪܒܪ̈ܒܢ ܘܒܝ̈ܫܢ ܒܐܪܥܐ ܕܡܨܪܝܢ܂܂ ܒܦܪܥܘܢ ܘܒܒܝܬܗ ܘܒܚܝܠܗ ܩܘܕܡܝܢܢ
05.006:023	ܘܠܢ ܐܦܩ ܡܪܐ ܐܠܗܢ ܡܢ ܬܡ݁ܢ܂܂ ܕܝܥܠ ܝܬܢ ܘܝܬܠ ܠܢ ܐܪܥܐ ܗܕܐ ܕܝܡܐ ܡܪܐ ܐܠܗܢ ܠܐܒܗ̈ܬܢ ܕܝܬܠ ܠܢ܂܂
05.006:024	ܘܦܩܕ ܝܬܢ ܡܪܐ ܕܢܥܒܕ ܟܘܠܗܘܢ ܨܕܩ̈ܝܐ ܗܠܝܢ܂܂ ܕܢܕܚܘܠ ܡܢ ܡܪܐ ܐܠܗܢ܂ ܕܝܛܘܒ ܠܢ ܟܘܠܗܘܢ ܝܘܡ̈ܝܐ ܕܢܚܐ݁ ܗܝܟ ܕܝܘܡܕܢ܂܂
05.006:025	ܘܨܕܝܩܘ ܬܗܐ݁ ܠܢ܂܂ ܐܢ ܢܗܐ݁ ܢܛܪ̈ܝܢ ܕܢܥܒܕ ܟܘܠܗܘܢ ܦܩܘܕܝܐ ܗܠܝܢ ܩܘܕܡ ܡܪܐ ܐܠܗܢ܂܂ ܗܟܡܐ ܕܦܩܕ ܝܬܢ ܡܪܐ܂܂
05.007:001	ܘܝܗܐ݁ ܐ݁ܢ ܝܥܠ ܝܬܟ ܡܪܐ ܐܠܗܟ ܠܐܪܥܐ ܕܐܬ ܥܠܠ ܠܬܡ݁ܢ ܕܬܝܪܘܬ ܝܬܗ ܝܪܝܡ ܡܝ̈ܢܝܢ ܪܒܪ̈ܒܝܢ ܘܚ̈ܝܘܠܝܢ ܡܢ ܩܘܕܡ ܐܦܝ̈ܟ ܠܟܛܝܐ܂ ܘܠܐܡܘܪ̈ܝܐ܂ ܘܠܟܢܥܢܝܐ܂ ܘܠܦܪܙܝܐ܂ ܘܠܓܪܓܫܝܐ܂ ܘܠܚܘܝܐ܂ ܘܠܝܒܘܫܝܐ܂܂ ܫܘܒܥܐ ܡܝܢ̈ܝܢ ܪ̈ܒܪ̈ܒܝܢ ܘܚܝ̈ܘܠܝܢ ܡܢܟ܂܂
05.007:002	ܘܝܡܣܘܪ ܝܬܗܘܢ ܡܪܐ ܐܠܗܟ ܒܝܢ ܐܝ̈ܕܝܟ ܘܬܫܚܘܩ ܝܬܗܘܢ܂ ܣܪܚܢ ܬܣܪܘܚ ܝܬܗܘܢ܂܂ ܠܐ ܬܬܩܢ ܠܘܬܗܘܢ ܕܝܬܝܩܐ݁܂܂ ܘܠܐ ܬܬܪ̈ܚܡܘܢ ܥܠܝܗܘܢ܂
05.007:003	ܘܠܐ ܬܬܚ̈ܬܢܘܢ ܠܗܘܢ܂܂ ܠܐ ܬܬܠ ܒܪܬܟ ܠܒܪܗ܂܂ ܘܠܐ ܬܣܒ ܒܪܬܗ ܠܒܪܟ܂܂
05.007:004	ܝܪܚܩ ܓܪ ܠܒܪܟ ܡܢܝ ܘܝܦܠܘܚ ܠܐܠܗ̈ܝܢ ܚܘܪ̈ܢܝܢ܂܂ ܘܝܪܓܘܙ ܒܚܡܐ ܡܪܐ ܥܠܝܟܘܢ܂ ܘܝܫܩܘܦ ܝܬܟܘܢ ܒܦܪܝܥ܂܂
05.007:005	ܐܠܐ ܗܟܕܢ ܬܥܒܕ ܠܗܘܢ܂܂ ܒܘܡܣ̈ܝܗܘܢ ܣܬܘܪ̈ܘ܂ ܘܡܨ̈ܒܬܗܘܢ ܬܒܪ̈ܘ܂ ܘܫܬܠ̈ܝܗܘܢ ܩܛܥ̈ܘ܂ ܘܓܠܝ̈ܦܝܐ ܕܐܠܗܝ̈ܗܘܢ ܐܘܩ̈ܕܘ ܒܢܘܪܐ܂܂
05.007:006	ܕܩܗܠ ܩܕܝܫ ܐܬ ܠܡܪܐ ܐܠܗܟ ܘܠܟ ܒܚܪ ܡܪܐ ܐܠܗܟ ܕܬܗܐ݁ ܠܗ ܩܗܠ ܠܩܢܝܐܢ ܡܢ ܟܘܠܗܘܢ ܡܝܢ̈ܝܐ ܕܐܝܬ ܥܠ ܐܦܝ̈ܗ݀ ܕܐܪܥܐ܂܂
05.007:007	ܠܐ ܗܝܟ ܕܣܓܝ ܐܬܘܢ ܡܣ̈ܬܓܝܢ ܡܢ ܟܘܠܗܘܢ ܡܝܢ̈ܝܐ ܨܒܐ ܒܟܘܢ ܡܪܐ ܘܒܚܪ ܝܬܟܘܢ܂܂ ܐܬܘܢ ܓܪ ܙܥܘܪ̈ܝܢ ܐܬܘܢ ܡܢ ܟܘܠܗܘܢ ܡܝܢܝܐ܂܂
05.007:008	ܐܠܐ ܡܢ ܠܒܕܝܠ ܕܡܚܒ ܠܟܘܢ ܡܪܐ܂܂ ܘܡܥܙܢܐ݁ ܡܘܡܝܐ ܕܝܡܐ ܠܐܒ^ܗܬܟܘܢ^ ܐܦܩ ܝܬܟܘܢ ܡܪܐ ܒܐܝܕ ܫܪܝܪܐ ܘܒܐܕܪܥ ܡܪܘܡܡ ܘܦܪܩ ܝܬܟ ܡܢ ܒܝܬ ܥܒܕܘܬܐ ܡܢ ܐܝܕܗ ܕܦܪܥܘܢ ܡܠܟܐ ܕܡܨܪܝܢ܂܂
05.007:009	ܘܬܟܪ ܕܡܪܐ ܐܠܗܟ݁ ܗܕܢ ܗܘ ܐܠܗܐ ܡܗܝܡܢܐ ܗܕܢ ܕܢܛܪ ܕܝܬܝܩܐ݁ ܘܪ̈ܚܡܝܐ ܠܗܠܝܢ ܕܡܚ̈ܒܝܢ ܠܗ݀ ܘܠܗܠܝܢ ܕܢܛܪ̈ܝܢ ܦܩܘ̈ܕܘܝ ܠܐܠܦ ܕܪ̈ܝܢ

05.007:010	‍[‍ ܂ ܂ ܂ ܠܗܠ‍]‍ܝܢ ܕܣ̈ܢܝܢ ܥܠ ܐ̈ܦܝܢܢ܂ ^ܝܫ^ܚܘܩ ܝܬܗܘܢ ܘܠܐ ܡܘܚܪ܂܂ ܠܗܠܝܢ ܕܣ̈ܢܝܢ ܥܠ ܐܦܝ̈ܢܢ ܝܫܚܘܩ ܝܬܗܘܢ܂܂

05.007:011	^ܘܢ^ܛܪ̈ܘ ܦܩܘ̈ܕܘܝ ܘܨܕܩ̈ܘܝ ܘܕܝܢܘ̈ܝ ܗܠܝܢ ܕܐܢܐ ܡܦܩܕ ܠܟ ܝܘܡܕܢ ܕܬܥܒܕ܂܂
05.007:012	ܘܝܗܐ݁ ܐܢ ܬܫܡܘ̈ܥܘܢ ܟܘܠܗܘܢ ܨܕܩ̈ܝܐ ܗܠܝܢ ܘܬܢܛܪ̈ܘܢ ܘܬܥܒ̈ܕܘܢ ܝܬܗܘܢ܂܂ ܝܢܛܪ ܠܟ ܡܪܐ ܐܠܗܟ ܕܝܬܝܩܐ݁ ܘܪ̈ܚܡܝܐ ܗܟܡܐ ܕܝܡܐ ܠܐܒܗܬܟ܂܂
05.007:013	ܘܝܚܒ ܝܬܟ ܘܝܒܪܟ ܝܬܟ ܘܝܣܓܐ ܝܬܟ܂ ܘܝܒܪܟ ܝܠܝ̈ܕܝܗ݀ ܕܟܪܣܟ ܘܦܝܪ̈ܝܗ݀ ܕܐܪܥܟ܂܂ ܥܒܘܪܟ ܘܚܡܪܟ ܘܡܝܫܚܟ܂܂ ܒܘܩܪ̈ܬܐ ܕܬܘܪ̈ܝܟ ܘܡܪܥܝܬܐ ܕܐܡܪ̈ܬܟ܂ ܥܠ ܐܪܥܐ ܗܕܐ ܕܝܡܐ ܡܪܐ ܠܐܒܗ̈ܬܟ ܕܝܬܠ ܠܟ܂܂
05.007:014	ܒܪܝܟ ܬܗܐ݁ ܡܢ ܟܘܠܗܘܢ ܡܝܢ̈ܝܐ܂܂ ܠܐ ܝܗܐ݁ ܒܟܘܢ ܥܩܪ ܘܠܐ ܥܩܪܐ܂ ܘܠܐ ܒܒܥܝܪ̈ܝܟ܂܂
05.007:015	ܘܝܪܝܡ ܡܢܟ ܡܪܐ ܟܘܠ ܡܪܫܠܘܬܐ ܘܟܘܠ ܒܘܫܝܐ ܕܡܨܪܝܢ ܒܝܫ̈ܝܐ ܗܠܝܢ ܕܚܡܝܬ ܘܗܠܝܢ ܕܐܟܪܬ ܠܐ ܝܬܠ ܥܠܝܟ܂܂ ܐܠܐ ܝܪܡܐ݁ ܝܬܗܘܢ ܥܠ ܟܘܠܗܘܢ ܣܐ̈ܢܝܟ܂܂
05.007:016	ܘܬܐܟܘܠ ܟܘܠܗ݀ ܒܙܬܗܘܢ ܕܡܝ̈ܢܝܐ ܗܠܝܢ ܕܡܪܐ ܐܠܗܟ ܝܗܒ ܠܟ܂܂ ܠܐ ܬܚܘܣ ܥܝܢܝܟ ܥܠܝܗܘܢ ܘܠܐ ܬܦܠܘܚ ܠܐܠܗܝ̈ܗܘܢ݁ ܕܦܚ ܗܘ ܠܟ ܗܕܢ܂܂
05.007:017	ܐܢ ܕܝ ܬܝܡܘܪ ܒܚܫܒܬܟ ܕܣܓܝ ܗܘ ܡܝܢܐ ܗܕܢ ܐܐ݁ ܓܪ ܐܢܐ܂ ܗܝܟ ܐܢܐ ܝܟܠ ܕܝܫܚܘܩ ^ܝܬ^ܗ^ܘܢ^
05.007:018	‍[‍ ܂ ܂ ܂ ‍]‍ ܬܕܚܘܠ ܡܢܗܘܢ ܕܟܪ‍{‍ܬ‍}‍ ܬܕܟܪ ܟܘܠ ܕܥܒܕ ܡܪܐ ܐܠܗܐ ܠܦܪܥܘܢ ܘܠܟܘܠܗܘܢ ܡܨܪܝܢ܂܂
05.007:019	ܢܣܝܘܢܝܐ ܗܠܝܢ ܪ̈ܒܪ̈ܒܝܐ ܕܚܡ̈ܝ ܥܝܢ̈ܝܟ ܐܬ̈ܝܐ ܘܓܒܘܪ̈ܬܐ ܗܠܝܟ ܪܒܪ̈ܒܬܐ ܘܐܝܕܐ ܫܪܝܪܬܐ ܘܐܕܪܥܐ ܪܡܐ ܗܝܟ ܐܦܩ ܝܬܟ ܡܪܐ ܐܠܗܟ ܗܟܕܢ ܝܥܒܕ ܡܪܐ ܐܠܗܟ ܠܟܘܠܗܘܢ ܡܝܢ̈ܝܐ ܗܠܝܢ ܕܐܬ ܕܚܠ ܡܢ ܩܘܕܡ ܐܦܝ̈ܗܘܢ܂܂
05.007:020	ܘܐܘܦ ܕܒܘܪ̈ܝܐ ܝܫܓܪ ^ܡܪ^ܐ ܐܠܗܟ ܒܗܘܢ܂܂ ܥܕܡܐ ܕܝܫܬܚ̈ܩܘܢ ܗܠܝܢ ܕܝܬܪ̈ܝܢ ܘܗܠܝܢ ܕܛܡܝܪ̈ܝܢ ܡܢ ܩܘܕܡ ܐܦ̈ܝܟ܂
05.007:021	ܠܐ ܬܕܚܘܠ ܡܢܗܘܢ܂܂ ܕܡܪܐ ܐܠܗܟ ܒܓܘܟ ܐܠܗ ܪܒ ܘܫܪܝܪ܂܂
05.007:022	ܘܡܪܐ ܐܠܗܟ ܝܫܘܨܐ ܡܝܢ̈ܝܐ ܗܠܝܢ ܡܢ ܩܘܕܡ ܐܦ̈ܝܟ ܕܨܝܒ ܨܝܒ܂܂ ܠܝܬ ܐܬ ܝܟܠ ܡܫܘܨܐ݁ ܝܬܗܘܢ ܒܦܪܝܥ܂ ܕܠܐ ܬܬܥܒܕ ܐܪܥܐ ܚܪܒܐ܂ ܘܬܣܓܝ ܥܠܝܟ ܚܝܘܬܐ ܕܛܘܪܐ܂܂
05.007:023	ܘܡܪܐ ܐܠܗܟ ܝܡܣܘܪ ܝܬܗܘܢ ܒܝܢ ܐܝ̈ܕܝܟ܂ ܘܬܝܒܕ ܝܬܗܘܢ ܐܒܕܢ ܪܒ ܥܕܡܐ ܕܬܫܚܘܩ ܝܬܗܘܢ܂܂
05.007:024	ܘܝܡܣܘܪ ܡܠܟܝ̈ܗܘܢ ܒܝܢ ܐܝ̈ܕܝܟ܂܂ ܘܬܘܒܕ ܫܝܡܗܘܢ ܡܢ ܝܬܗ ܐܬܪܐ܂܂ ܐܢܫ ܠܐ ܝܩܘܡ ܩܘܕܡ ܐܦ̈ܝܟ݁ ܥܕܡܐ ܕܬܫܚܘܩ ܝܬܗܘܢ܂܂
05.007:025	ܓܠܝܦ̈ܝܐ ܕܐܠܗܝ̈ܗܘܢ ܬܘܩ̈ܕܘܢ ܒܢܘܪܐ܂܂ ܠܐ ܬܬܚܡܕ ܡܢܗܘܢ ܕܗܒ ܐܐ݁ ܟܣܦ܂ ܘܠܐ ܬܣܒ ܠܟ ܕܠܐ ܬܦܘܠ ܠܒܕܝܠܗ܂ ܕܣܐܘܒܐ ܗܘ ܠܡܪܐ ܐܠܗܟ܂܂
05.007:026	ܘܠܐ ܬܥܠ ܣܐܘܒܬܐ ܠܒܝܬܟ܂܂ ܘܬܗܐ݁ ܚܪܡ ܗܟܡܐ ܕܗܕܢ܂܂ ܢܕܘܕ ܬܢܕܕ ܘܣܝܐܘܒ ܬܣܐܒ ܕܚܪܡ ܗܘ܂܂