The Comprehensive Aramaic Lexicon

118:001	ܛܘܒܝܗܘܢ ܦܢܝ ܡܘܡܐ ܒܐܘܪܚܐ ܗܠܝܢ ܕܐܙܠܝܢ ܒܢܝܡܘܣܗ ܕܡܪܐ
118:002	ܛܘܒܝܗܘܢ ܗܠܝܢ ܕܡܦܫܦܫܝܢ ܣܗܕܘܬ݁ܗ ܕܡܢ ܟܘܠܗ ܠܒܗܘܢ ܝܒܥܘܢ ܝܬ݁ܗ
118:003	ܠܐ ܓܪ ܗܠܝܢ ܕܥܒܕܝܢ ܥܒܪܢܝܡܘܣܐ ܒܐܘܪܚܬܗ ܗܠܟܘ
118:004	ܐܬ ܦܩܕܬ ܥܠ ܦܩܘܕܟ ܕܝܬ݁ܢܛܪܘܢ ܠܚܕܐ
118:005	ܠܐܘܝ ܡܫܬܘܝܢ ܐܘܪܚܬ݁ܝ ܕܝܢܛܪ ܝܬ݁ܗܘܢ ܠܨܕܝܩܟ
118:006	ܒܟܝܢ ܠܐ ܝܒܗܘܬ ܒܡܐ ܕܐܢܐ ܡܕܡܝ ܥܠ ܟܘܠܗܘܢ ܦܩܘܕܟ
118:007	ܐܫܬܘܕܐ ܠܟ ܒܐܫܘܘܬ݁ܗ ܕܠܒܝ ܒܡܐ ܕܐܢܐ ܝܠܘܦ ܕܝܢܝܐ ܕܨܕܝܩܟ
118:008	ܨܕܩܟ ܐܢܐ ܝܢܛܪ ܠܐ ܬܫܒܘܩ ܝܬ݁ܝ ܥܕܡܐ ܠܚܕܐ
118:009	ܒܡܗ ܕܡܫܘܐ ܛܠܝܐ ܐܘܪܚܗ ܒܡܐ ܕܗܘ ܡܢܛܝܪ ܡܠܝܟ
118:010	ܒܟܘܠܗ ܠܒܝ ܒܥܝܬ ܝܬ݁ܟ ܠܐ ܬܙܥܘܦ ܝܬ݁ܝ ܡܢ ܦܩܘܕܟ
118:011	ܒܓܘ ܠܒܝ ܐܛܡܪܬ ܡܠܝܟ ܠܒܕܝܠ ܕܠܐ ܝܣܟܝܠ ܠܟ
118:012	ܡܒܪܟ ܐܬ ܡܪܐ ܐܠܝܦ ܝܬ݁ܝ ܨܕܝܩܟ
118:013	ܒܣܝܦܘܬ݁ܝ ܬ݁ܢܝܬ ܟܘܠ ܕܝܢܝܐ ܕܦܡܟ
118:014	ܒܐܘܪܚܐ ܕܣܗܕܘܬ݁ܟ ܐܬ݁ܒܣܡܬ ܗܝܟ ܕܟܘܠ ܥܘܬܪ
118:015	ܒܦܩܘܕܟ ܗܘܬ݁ ܡܬ݁ܥܡܠ ܘܡܬ݁ܝܪ ܐܘܪܚܬ݁ܟ
118:016	ܒܨܕܩܟ ܗܘܬ݁ ܡܬ݁ܝܠܦ ܘܠܐ ܝܬ݁ܢܫܐ ܡܠܝܟ
118:017	ܓܙܝ ܠܥܒܕܟ ܕܝܚܐ ܘܝܢܛܝܪ ܡܠܝܟ
118:018	ܓܠܝ ܥܝܢܝ ܕܝܚܡܝܐܢ ܬܝܡܗܝܐ ܕܡܢ ܢܝܡܘܣܟ
118:019	ܬ݁ܘܬ݁ܒ ܐܢܐ ܒܐܪܥܐ ܠܐ ܬ݁ܛܡܘܪ ܡܢܝ ܦܩܘܕܟ
118:020	ܐܫܬܪܓ̈ܓ̈ܬ݁ ܢܦܫܝ ܕܬܬ݁ܚܡܕ ܠܕܝܢܟ ܒܟܘܠ ܩܝܪܘܣ
118:021	ܙܥܦܬ ܒܝܗܝܪܝܐ ܠܝܛܝܢ ܗܠܝܢ ܕܡܪܟܢܝܢ ܡܢ ܦܩܘܕܟ
118:022	ܐܪܝܡ ܡܢܝ ܚܣܕܝܐ ܘܦܣܝܠܘܬܐ ܕܣܗܕܘܬ݁ܟ ܐܢܐ ܒܥܝܬ
118:023	ܩܝܓܪ̈ ܝܬܒܘ ܐܪܟܘܢܝܢ ܘܥܠܝ ܗܘܘ ܡܡܠܠܝܢ ܘܥܒܕܟ ܗܘܐ ܡܬ݁ܥܡܠ ܒܨܕܝܩܟ
118:024	ܩܝܓܪ ܣܗܕܘܬ݁ܟ ܐܠܦܢܝ ܗܢܘܢ ܘܡܠܟܘܢܝ ܗܢܘܢ ܨܕܩܟ
118:025	ܕܒܩܬ݁ ܠܐܪܥܐ ܢܦܫܝ ܐܚܝ ܝܬ݁ܝ ܡܪܐ ܗܝܟ ܡܐ ܕܗܝ ܡܠܬܟ
118:026	ܐܘܪܚܬ݁ܝ ܬ݁ܢܝܬ ܕܫܡܥܬ ܡܢܝ ܘܐܠܝܦ ܝܬ݁ܝ ܨܕܩܟ
118:027	ܒܐܘܪܚܐ ܕܨܕܩܟ ܒܘܢܝܢ ܝܬ݁ܝ ܘܐܢܐ ܡܬ݁ܥܡܠ ܒܬܝܡܗܟ
118:028	ܢܗܡܬ݁ ܢܦܫܝ ܡܢ ܥܝܘܩ ܫܪܝܪ ܝܬ݁ܝ ܒܡܠܝܟ
118:029	ܐܘܪܚܐ ܕܛܘܠܡܐ ܐܪܚܩ ܡܢܝ ܘܒܢܝܡܘܣܟ ܐܬܪܚܡ ܥܠܝ
118:030	ܐܘܪܚܐ ܕܩܘܫܛܐ ܒܚܪܬ ܘܕܝܢܟ ܠܐ ܐܬ݁ܢܫܝܬ
118:031	ܕܒܩܬ݁ ܠܣܗܕܘܬ݁ܟ ܡܪܐ ܠܐ ܬ݁ܒܗܘܬ݁ ܝܬ݁ܝ
118:032	ܒܐܘܪܚܐ ܕܦܩܘܕܟ ܗܘܬ݁ ܪܗܛ ܟܕ ܗܘܬ ܡܦܬܐ ܠܒܝ
118:033	ܢܝܡܘܣ ܐܬ݁ܩܝܢ ܠܝ ܡܪܐ ܒܐܘܪܚܐ ܕܨܕܩܟ ܘܝܒܥܐ ܝܬ݁ܝ ܒܟܘܠ ܥܪ
118:034	ܒܘܢܝܢ ܝܬ݁ܝ ܘܝܦܫܦܫ ܢܝܡܘܣܟ ܘܝܢܛܪ ܝܬ݁ܗ ܒܟܘܠܗ ܠܒܝ
118:035	ܕܒܝܪ ܝܬ݁ܝ ܒܫܒܝܠܗܘܢ ܕܦܩܘܕܟ ܕܝܬ݁ܗܘܢ ܐܢܐ ܨܒܝܬ
118:036	ܐܪܟܝܢ ܠܒܝ ܠܣܗܕܘܬ݁ܟ ܘܠܐ ܠܥܨܝܘܢܐ
118:037	ܐܝܬ݁ܒ ܥܝܢܝ ܕܠܐ ܝܚܡܝܢ ܪܝܩܢܘܬܐ ܘܒܘܪܚܟ ܐܚܝ ܝܬ݁ܝ
118:038	ܐܩܡ ܡܠܬ݁ܟ ܠܥܒܕܟ ܒܕܚܠܬ݁ܟ
118:039	ܐܪܝܡ ܡܢܝ ܚܣܕܝܐ ܗܠܝܢ ܕܣܟܝܬ ܕܕܝܢܟ ܒܣܝܡܝܢ
118:040	ܗܐ ܐܬ݁ܚܡܕܬ ܠܦܩܘܕܟ ܘܒܨܕܩܟ ܐܚܝ ܝܬ݁ܝ
118:041	ܝܐܬ݁ܘܢ ܥܠܝ ܪܚܡܟ ܡܪܐ ܡܚܝܢܐ ܗܝܟ ܡܐ ܕܗܝ ܡܠܬܟ
118:042	ܘܐܢܐ ܡܓܝܒ ܠܗܠܝܢ ܕܡܚܣܕܝܢ ܠܝ ܡܠܐ ܕܥܠ ܡܠܟ ܐܢܐ ܣܒܪܬ
118:043	ܘܠܐ ܬ݁ܪܝܡ ܡܢ ܦܡܝ ܡܠܬ݁ܟ ܕܩܘܫܛܐ ܥܕܡܐ ܠܚܕܐ ܕܥܠ ܕܝܢܟ ܐܢܐ ܣܒܪܬ
118:044	ܝܢܛܝܪ ܢܝܡܘܣܟ ܒܟܘܠ ܥܪ ܠܝܥܠܡ ܘܠܝܥܠܡܗ ܕܥܠܝܡܐ
118:045	ܗܘܬ݁ ܡܗܠܝܟ ܒܦܘܬ݁ܝܐ ܕܦܩܘܕܟ ܕܝܬ݁ܗܘܢ ܐܢܐ ܒܥܝܬ݁
118:046	ܗܘܬ݁ ܡܡܠܝܠ ܒܣܗܕܘܬ݁ܟ ܩܘܕܡ ܡܠܟܝܢ ܘܠܐ ܗܘܬ݁ ܒܗܝܬ݁
118:047	ܗܘܬ݁ ܡܬ݁ܝܠܦ ܒܦܩܘܕܟ ܗܠܝܢ ܕܐܚܒܬ݁ ܠܝܚܕܐ
118:048	‍[‍ܘܬ݁ܠܝܬ݁‍]‍ ܐܕܘܝ ܠܘܬ݁ ܦܩܘܕܟ ܗܠܝܢ ܕܐܚܒܬ݁ ܘܗܘܬ݁ ܡܬܥܡܠ ܒܦܩܘܕܟ
118:049	ܐܕܟܝܪ ܡܠܬ݁ܟ ܠܥܒܕܟ ܗܕܐ ܕܣܒܪܬ ܝܬ݁ܝ
118:050	ܗܕܐ ܕܢܚܡܬ ܝܬ݁ܝ ܒܡܟܡܘܟܝ ܡܠܬ݁ܟ ܐܚܝ ܝܬ݁ܝ
118:051	ܝܗܝܪܝܐ ܥܒܪܘܝ ܕܢܝܡܘܣܐ ܥܕܡܐ ܠܚܕܐ ܘܡܢ ܢܝܡܘܣܟ ܠܐ ܐܪܟܢܬ
118:052	ܐܕܟܪܬ݁ ܕܝܢܟ ܕܡܢ ܠܝܥܠܡ ܡܪܐ ܘܐܝܬ݁ܢܚܡܬ݁
118:053	ܨܩܐ ܨܕܬ ܝܬ݁ܗܘܢ ܡܢ ܣܟܠܝܐ ܡܢ ܗܠܝܢ ܕܫܒܩܘ ܢܝܡܘܣܟ
118:054	ܫܥܢܘܢܝܢ ܗܘܘ ܠܝ ܨܕܩܟ ܒܐܬ݁ܪܐ ܕܬ݁ܘܬ݁ܒܘܬ݁ܝ
118:055	ܐܕܟܪܬ ܒܠܝܠܝܐ ܫܝܡܟ ܡܪܐ ܘܢܛܪܬ݁ ܢܝܡܘܣܟ
118:056	ܗܕܐ ܐܬ݁ܥܒܕܬ ܠܝ ܕܨܕܩܟ ܐܢܐ ܒܥܝܬ
118:057	‍[‍‍[‍ܚ‍]‍‍]‍ܘܠܩܝ ܗܘ ܡܪܐ ܘܐܡܪܬ ܕܝܢܛܪ ܢܝܡܘܣܟ
118:058	ܒܥܝܬ ܡܢ ܐܦ̈ܟ ܒܟܘܠܗ ܠܒܝ ܐܬ݁ܪܚܡ ܥܠܝ ܡܪܐ ܗܝܟ ܡܐ ܕܗܝ ܡܠܬ݁ܟ
118:059	ܐܬ݁ܚܫܒܬ݁ ܐܘܪܚܬܟ ܘܐܝܬ݁ܒܬ ܪܓܠܝ ܠܣܗܕܘܬܟ
118:060	ܐܬ݁ܥܬܕܬ ܘܠܐ ܐܬܥܪܒܒܬ ܕܝܢܛܪ ܦܩܘܕܟ
118:061	ܚܒܠܝܗܘܢ ܕܣܟܠܝܐ ܐܬܟܪܟܘ ܠܝ ܘܠܢܝܡܘܣܟ ܠܐ ܐܬ݁ܢܫܝܬ
118:062	ܒܡܨܥܬ݁ܗ ܕܠܝܠܝܐ ܗܘܬ݁ ܩܐܝܡ ܕܝܫܬܘܕܐ ܠܟ ܥܠ ܕܝܢܝܐ ܕܨܕܩܟ
118:063	ܫܘܬ݁ܦ ܐܢܐ ܠܟܘܠ ܗܠܝܢ ܕܕܚܠܝܢ ܡܢܟ ܘܥܡ ܗܠܝܢ ܕܡܢܛܪܝܢ ܦܩܘܕܟ
118:064	ܡܢ ܪܚܡܟ ܡܪܐ ܐܬܡܠܝܬ ܐܪܥܐ ܘܒܨܕܩܟ ܐܠܦ ܝܬ݁ܝ
118:065	ܒܣܝܡܘܬܐ ܥܒܕܬ ܥܡ ܥܒܕܟ ܡܪܐ ܗܝܟ ܡܐ ܕܗܝ ܡܠܬ݁ܟ
118:066	ܒܣܝܡܘܬܐ ܘܡܪܕܘܬܐ ܘܐܟܪܘܬܐ ܐܠܦ ܝܬ݁ܝ ܕܠܦܩܘܕܟ ܐܢܐ ܗܝܡܢܬ
118:067	ܥܕ ܠܐ ܐܬ݁ܡܟܡܟܬ ܐܢܐ ܒܣܝܬ ܠܒܕܝܠ ܟܕܝܢ ܡܠܬ݁ܟ ܐܢܐ ܢܛܪܬ
118:068	ܒܣܡܬ ܐܬ ܡܪܐ ܘܒܒܣܝܡܘܬ݁ܟ ܐܠܦ ܝܬ݁ܝ ܨܕܩܟ
118:069	ܐܣܬܓܝ ܥܠܝ ܛܘܠܡܝܗܘܢ ܕܝܗܝܪܝܐ ܐܢܐ ܕܝ ܒܟܘܠܗ ܠܒܝ ܝܦܫܦܫ ܦܩܘܕܟ
118:070	ܐܬܓܒܝܢ ܗܝܟ ܡܐ ܕܚܠܒܐ ܠܒܗܘܢ ܐܢܐ ܕܝ ܠܢܝܡܘܣܟ ܐܬ݁ܝܠܦܬ
118:071	ܛܒ ܗܘ ܠܝ ܕܡܟܡܟܬ ܝܬ݁ܝ ܕܝܠܦ ܝܬܗܘܢ ܠܨܕܩܟ
118:072	ܛܒ ܗܘ ܠܝ ܢܝܡܘܣܗ ܕܦܡܟ ܝܬܝܪ ܡܢ ܐܠܦܝܢ ܕܕܗܒ ܘܕܟܣܦ
118:073	ܐܕܝܟ ܥܒܕܬ ܝܬ݁ܝ ܘܓ‍[‍ ‍]‍ܬ ܝܬ݁ܝ ܒܘܢܝܢ ܝܬܝ ܘܝܠܦ ܦܩܘܕܟ
118:074	ܗܠܝܢ ܕܕܚܠܝܢ ܡܢܟ ܝܚܡܘܢ ܝܬ݁ܝ ܘܝܬܒܣܡܘܢ ܕܥܠ ܡܠܬܟ ܐܢܐ ܣܒܪܬ
118:075	ܐܟܪܬ ܡܪܐ ܕܨܕܩ ܗܢܘܢ ܕܝܢܟ ܘܡܢ ܩܘܫܛ ܡܟܡܟܬ ܝܬܝ
118:076	ܝܬ݁ܥܒܕܘܢ ܪܝܚܡܟ ܕܝܢܚܡܘܢ ܝܬ݁ܝ ܗܝܟ ܡܠܬܟ ܠܥܒܕܟ
118:077	ܝܬ݁ܘܢ ܠܝ ܬ݁ܚܢܘܢܟ ܘܐܢܐ ܚܝܐ ܕܢܝܡܘܣܟ ܗܘ ܐܘܠܦܢܝ
118:078	ܝܒܗܬ݁ܘܢ ܝܗܝܪܝܐ ܕܒܛܠܘܡ ܥܒܪܘ ܕܢܝܡܘܣܟ ܐܢܐ ܕܝ ܗܘܬ݁ ܡܬ݁ܥܡܠ ܒܦܩܘܕܟ
118:079	ܝܬܘܒܝܢ ܠܝ ܗܠܝܢ ܕܕܚܠܝܢ ܡܢܟ ܘܥܡ ܗܠܝܢ ܕܡܟܪܝܢ ܣܗܕܘܬ݁ܟ
118:080	ܝܬܥܒܕ ܠܒܝ ܦܢܝ ܡܘܡ ܒܨܕܩܟ ܠܒܕܝܠ ܕܠܐ ܝܒܗܘܬ݁
118:081	ܣܐܝܦܐ ܠܡܚܝܢܟ ܢܦܫܝ ܕܥܠ ܡܠ‍<‍ܬ‍>‍ܟ ܐܢܐ ܣܒܪܬ
118:082	ܣܐܦܝ ܥܝܢܝ ܠܡܠܬ݁ܟ ܡܢ ܐܡܪܝܢ ܐܡܬ݁ܝ ܬܝܢܚܡ ܝܬ݁ܝ
118:083	ܐܬ݁ܥܒܕܬ ܗܝܟ ܙܩܐ ܒܓܠܝܕܐ ܘܠܨܕܩܟ ܠܐ ܐܬ݁ܢܫܝܬ

118:084	ܟܡܐ ܗܢܘܢ ܝܘܡܝ ܕܥܒܕܟ ܐܡܬ݁ܝ ܐܬܥܒܕ ܠܝ ܕܝܢܐ ܡܢ ܗܠܝܢ ܕܪܕܦܝܢ ܠܝ

118:085	ܬ݁ܢܘ ܠܝ ܥܒܪܘܝ ܕܢܝܡܘܣܐ ܥܡܘܠ ܐܠܐ ܠܐ ܗܝܟ ܢܝܡܘܣܟ
118:086	ܟܘܠܗܘܢ ܦܩܘܕܟ ܒܩܘܫܛ ܘܒܛܠܘܡ ܪܕܦܘ ܝܬ݁ܝ ܣܝܥ ܝܬ݁ܝ
118:087	ܒܪ ܨܒܚܕ ܫܘܨܐܝ‍[‍ ‍]‍ ܒܐܪܥܐ ܐܢܐ ܕܝ ܠܐ ܫܒܩܬ ܦܩܘܕܟ
118:088	ܗܝܟ ܪܚܡܟ ܐܚܝ ܝܬ݁ܝ ܘܝܢܛܝܪ ܣܗܕܘܬܗ ܕܦܡܟ
118:089	ܠܝܥܠܡ ܡܪܐ ܡܠܬ݁ܟ ܩܐܝܡܐ ܒܓܘ ܫܘܡܝܐ
118:090	ܘܠܕܪ ܘܕܪܝܢ ܗܘ ܩܘܫܛܟ ܐܫܝܫܬ ܐܪܥܐ ܘܗܝ ܩܐܝܡܐ
118:091	ܘܒܬܩܢܘܬ݁ܟ ܡܬܩܝܡ ܝܘܡܐ ܕܟܘܠܐ ܗܢܘܢ ܥܘܒܕܟ
118:092	ܐܠܘ ܠܐ ܕܢܝܡܣܟ ܗܘ ܐܠܦܢܝ ܒܟܝܢ ܗܘܬ݁ ܐܒܝܕ ܒܡܟܡܘܟܝ
118:093	ܠܝܥܠܡ ܠܐ ܐܬ݁ܢܫܐ ܨܕܩܟ ܗܠܝܢ ܕܒܗܘܢ ܐܚܝ ܝܬ݁ܝ
118:094	ܕܝܠܟ ܐܢܐ ܐܚܝ ܝܬ݁ܝ ܕܨܕܩܟ ܐܢܐ ܒܥܝܬ
118:095	ܠܝ ܟܬܪܘ ܣܟܠܝܐ ܕܝܘܒܕܘܢ ܝܬ݁ܝ ܘܡܢ ܣܗܕܘܬ݁ܟ ܐܬ݁ܒܘܢܢܬ݁
118:096	ܠܟܘܠ ܫܝܨܝ ܚܡܝܬ ܣܘܦܘܬܐ ܘܦܩܘܕܟ ܠܚܕܐ
118:097	ܡܐ ܐܚܒܬ ܢܝܡܘܣܟ ܡܪܐ ܟܘܠܗ ܝܘܡܐ ܐܠܦܢܝ ܐܬ ܗܘ
118:098	ܝܬܝܪ ܡܢ ܒܥܝܠ ܕܒܒܝ ܚܟܡܬ݁ ܝܬ݁‍<‍ܝ‍>‍ ܕܠܦܩܘܕܟ ܕܠܝܥܠܡ ܗܘ ܠܝ
118:099	ܝܬܪ ܡܢ ܟܘܠ ܗܠܝܢ ܕܡܠܦܝܢ ܠܝ ܐܬ݁ܒܘܢܢܬ ܕܣܗܕܘܬ݁ܟ ܐܘܠܦܢܝ ܗܢܘܢ
118:100	ܝܬܪ ܡܢ ܩܫܝܫܝܐ ܐܬ݁ܒܘܢܢܬ ܕܦܩܘܕܟ ܐܢܐ ܒܥܝܬ
118:101	ܡܢ ܟܘܠ ܐܘܪܝܚ ܒܝܫܐ ܟܠܝܬ݁ ܪܓ̈ܠܝ ܠܒܕܝܠ ܕܝܢܛܪ ܡܠܝܟ
118:102	ܡܢ ܕܝܢܟ ܠܐ ܐܪܟܢܬ݁ ܕܐܬ ܗܘ ܕܐܬܩܢܬ ܠܝ ܢܝܡܘܣ
118:103	ܡܐ ܚܠܝܐܢ ܠܫܡܘܚܟܝ ܡܠܟ ܝܬ݁ܪ ܡܢ ܕܒܫܐ ܠܦܡܝ
118:104	ܘܡܢ ܦܩܘܕܟ ܐܬ݁ܒܘܢܢܬ ܠܒܕܝܠ ܟܕܝܢ ܣܢܝܬ ܟܘܠ ܐܘܪܝܚ ܕܛܘܠܡ
118:105	ܒܘܨܝܢ ܠܪܓ̈ܠܝ ܗܘ ܢܝܡܘܣܟ ܘܢܗܘܪ ܠܫܘܒܝܠܝ
118:106	ܝܡܝܬ݁ ܘܐܩܝܡܬ ܕܝܢܛܪ ܕܝܢܝܐ ܕܨܕܩܟ
118:107	ܐܬ݁ܡܟܡܟܬ݁ ܥܕܡܐ ܠܚܕܐ ܐܚܝ ܝܬ݁ܝ ܡܪܐ ܗܝܟ ܡܐ ܕܗܝ ܡܠܬ݁ܟ
118:108	ܨܒܝܘܢܗ ܕܦܡܝ ܨܒܝܬ ܡܪܐ ܘܕܝܢܟ ܐܠܝܦ ܝܬ݁ܝ
118:109	ܢܦܫܝ ܒܓܘ ܐܕܟ ܒܟܘܠ ܥܪ ܘܠܢܝܡܘܣܟ ܠܐ ܐܬܢܫܝܬ
118:110	ܐܣܝܡܘ ܠܝ ܣܟܠܝܐ ܦܚܝܢ ܘܡܢ ܦܩܘܕܟ ܠܐ ܛܥܝܬ
118:111	ܝܪܬܬ݁ ܣܗܕܘܬ݁ܟ ܕܠܝܥܠܡ ܕܚܕܘܬܗ ܕܠܒܗ ܗܢܘܢ
118:112	ܐܪܟܢܬ ܠܒܝ ܕܝܥܒܕ ܨܕܩܟ ܠܝܥܠܡ ܠܒܕܝܠ ܓܙܝܘܢܐ
118:113	ܥܒܪܘܝ ܕܢܝܡܘܣܐ ܣܢܝܬ ܘܠܢܝܡܘܣܟ ܐܚܒܬ
118:114	ܡܣܝܥܢܝ ܘܡܩܒܠܢܝ ܐܬ ܗܘ ܕܥܠ ܡܠܟ ܐܢܐ ܣܒܪܬ
118:115	ܐܪܟܢܘ ܡܢܝ ܡܒܝܫܢܝܐ ܘܝܦܫܦܫ ܦܩܘܕܝ ܕܐܝܠܗܝ
118:116	ܩܒܝܠ ܝܬ݁ܝ ܡܠܬ݁ܟ ܘܐܢܐ ܚܝܐ ܘܠܐ ܬ݁ܒܗ‍{‍ܘ‍}‍ܬ݁ ܝܬ݁ܝ ܡܢ ܣܘܟܐܝܗ
118:117	ܣܝܥ ܝܬ݁ܝ ܘܐܢܐ ܡܫܬܘܙܒ ܘܡܬ݁ܝܠܦ ܒܨܕܩܟ ܒܟܘܠ ܥܪ
118:118	ܦܣܠܬ ܟܘܠ ܗܠܝܢ ܕܪ‍[‍ ‍]‍ܝܢ ܡܢ ܨܕܩܟ ܠܒܕܝܠ ܕ‍{‍ܠ‍}‍‍<‍ܛ‍>‍ܘܠܡ ܗܝ ܬ݁ܝܪܬ݁ܗܘܢ
118:119	ܟܦܘܪܝܢ ܚܫܒܬ݁ ܟܘܠ ܣܟܠܗ ܕܐܪܥܐ ܠܒܕܝܠ ܟܕܝܢ ܐܚܒܬ ܣܗܕܘܬ݁ܟ
118:120	ܣܡܝܪ ܡܢ ܕܚܠܬ݁ܟ ܒܣܪܬ݁ܝ ܕܡܢ ܕܝܢܟ ܩܝܓ̈ܪ ܐܢܐ ܕܚܠܬ
118:121	ܥܒܕܬ ܕܝܢܐ ܘܨܕܩܐ ܠܐ ܬ݁ܡܣܘܪ ܝܬ݁ܝ ܠܗܠܝܢ ܕܛܠܡܝܢ ‍[‍
118:122	ܩܒܝܠ ܥܒܕܟ ܠܛܒܬܟ ܘܠܐ ܝܥܫܩܘܢ ܝܬ݁ܝ ܝܗܝܪܝܐ
118:123	ܥܝܢܝ ܣܐܦܝ ܠܡܚܝܢܟ ܘܠܡܠܬܐ ܕܨܕܩܟ
118:124	ܥܒܕܬ ܥܡ ܥܒܕܟ ܗܝܟ ܪܚܡܟ ܘܨܕܩܟ ܐܠܦ ܝܬ݁ܝ
118:125	ܥܒܕܟ ܐܝܬ݁ ܐܢܐ ܒܘܢܝܢ ܝܬ݁ܝ ܘܝܟܪ ܣܗܕܘܐܬ݁ܟ
118:126	ܩܝܪܘܣܐ ܗܘ ܕܢܥܒܕ ܠܡܪܐ ܕܒܕܪܘ ܝܬ݁ܗ ܠܢܝܡܘܣܟ
118:127	ܠܒܕܝܠ ܟܕܝܢ ܐܚܒܬ ܦܩܘܕܟ ܝܬܪ ܡܢ ܕܗܒܐ ܘܛܒܙܝܘܢ
118:128	ܠܒܕܝܠ ܟܕܝܢ ܠܩܒܘܠ ܟܘܠ ܦܩܘܕܟ ܗܘܬ݁ ܡܫܘܐ ܘܟܘܠ ܐܘܪܝܚ ܕܛܘܠܡ ܣܢܝܬ
118:129	ܡܬܡܗܝܢ ܗܢܘܢ ܣܗܕܘܬܟ ܠܒܕܝܠ ܟܕܝܢ ܦܫܦܫܬ ܝܬ݁ܗܘܢ ܢܦܫܝ
118:130	ܐܘܕܥܬ݁ܗܘܢ ܕܡܠܝܟ ܢܗܝܪܝܢ ܘܡܒܘܢܢܝܢ ܛܠܝܐ
118:131	ܦܡܝ ܦܬ݁ܚܬ݁ ܘܢܓܕܬ݁ ܪܘ‍[‍ ‍]‍ ܕܠܦܩܘܕܟ ܗܘܬ ܡܬ݁ܚܡܕ
118:132	ܐܕܡܝ ܒܝ ܘܐܬ݁ܪܚܡ ܥܠܝ ܗܝܟ ܕܝܢܗܘܢ ܕܗܠܝܢ ܫܝܡܟ
118:133	ܦܣܘܥܬ݁ܝ ܐܫܘܝ ܗܝ‍[‍ܟ‍]‍ ܡܠܬ݁ܟ ܡܪܐ ܘܠܐ ܝܡܪܐ ܥܠܝ ܟܘܠ ܥܒܪܢܝܡܘܣ
118:134	ܦܪܘܩ ܝܬ݁ܝ ܡܢ ܥܫܘܩܝܢ ܕܒܢܝܢܫ ܘܝܢܛܪ ܦܩܘܕܟ
118:135	ܐܦܟ ܐܢܗܪ̈ ܥܠ ܥܒܕܟ ܘܐܠܝܦ ܝܬ݁ܝ ܨܕܩܟ
118:136	ܡܒܘܩܝܢ ܕܡܝܢ ܐܚܬ݁ܝ ܥܝܢܝ ܥܕ ܠܐ ܢܛܪܬ݁ ܢܝܡܘܣܟ
118:137	ܨܕܝܩ ܐܬ ܡܪܐ ܘܫܘܐ ܗܘ ܕܝܢܟ
118:138	ܦܩܕܬ ܨܕܝܩ ܘܣܗܕܘܬ݁ܟ ܩܘܫܛ ܠܝܚܕܐ
118:139	ܐܫܚܬ݁ ܝܬ݁ܝ ܩܢܬܐ ܕܐܬ݁ܢܫܘ ܡܠܟ ܒܥܝܠ ܕܒܒܝ
118:140	ܨܪܝܦܐ ܗܝ ܠܝ ܡܠܬ݁ܟ ܠܚܕܐ ܘܥܒܕܟ ܐܚܒ ܝܬ݁ܝ
118:141	ܛܠܐ ܐܝܬ݁ ܐܢܐ ܘܦܣܠ ܘܨܕܩܟ ܠܐ ܐܬ݁ܢܫܝܬ
118:142	ܨܕܩܟ ܨܕܝܩ ܕܠܝܥܠܡ ܘܢܝܡܘܣܟ ܩܘܫܝܛ
118:143	ܠܚܘܨܝܢ ܘܥܩܐ ܐܫܟܚܘ ܝܬ݁ܝ ܘܦܩܘܕܟ ܗܢܘܢ ܐܘܠܦܢܝ
118:144	ܨܕܝܩ ܣܗܕܘܬ݁ܟ ܕܠܝܥܠܡ ܒܘܢܝܢ ܝܬ݁ܝ ܘܐܢܐ ܚܝܐ
118:145	ܐܨܝܚܬ݁ ܒܟܘܠܗ ܠܒܝ ܫܘܡܥ ܡܢܝ ܡܪܐ ܕܨܕܩܟ ܐܢܐ ܒܥܝܬ
118:146	ܐܨܝܚܬ݁ ܠܟ ܐܚܝ ܝܬ݁ܝ ܘܝܢܛܝܪ ܣܗܕܘܐܬ݁ܟ
118:147	ܩܕܡܬ݁ ܕܠܐ ܒܫ‍{‍ܪ‍}‍‍<‍ܥ‍>‍ܬ݁ܝ ܘܐܨܝܚܬ݁ ܕܥܠ ܡܠܟ ܐܢܐ ܣܒܪܬ݁
118:148	ܩܕܡܝ ‍[‍ܥ‍]‍ܝܢܝ ܡܢ ܓܘ ܨܦܪܐ ܕܝܠܦ ܝܬܗܘܢ ܠܡܠܟ
118:149	ܠܩܠܝ ܫܡܘܥ ܡܪܐ ܗܝܟ ܪܚܡܟ ܘܗܝܟ ܕܝܢܟ ܐܚܝ ܝܬ݁ܝ
118:150	ܐܬ݁ܩܪܒܘ ܗܠܝܢ ܕܪܕܦܝܢ ܠܝ ܒܥܒܪ ܢܡܘܣ ܘܡܢ ܢܝܡܘܣܟ ܐܬ݁ܪܚܩܘ
118:151	ܩܪܝܒ ܐܬ ܡܪܐ ܘܟܘܠ ܐܘܪܚܬ݁ܟ ܩܘܫܝܛ
118:152	ܡܢ ܪܝܫ ܐܟܪܬ݁ ܡܢ ܣܗܕܘܬ݁ܟ ܕܠܝܥܠܡ ܐܫܝܫܬ ܝܬ݁ܗܘܢ
118:153	ܚܡܝ ܡܟܝܟܘܬ݁ܝ ܘܦܠܝܛ ܝܬ݁ܝ ܕܠܢܝܡܘܣܟ ܠܐ ܐܬ݁ܢܫܝܬ݁
118:154	ܕܘܢ ܕܝܢܝ ܘܦܪܘܩ ܝܬ݁ܝ ܠܒܕܝܠ ܡܠܬ݁ܟ ܐܚܝ ܝܬ݁ܝ
118:155	ܪܚܝܩܐ ܡܢ ܣܟܠܝܐ ܡܚܝܢܘܬܐ ܕܠܨܕܝܩܟ ܠܐ ܒܥܘ
118:156	ܬ݁ܚܢܘܢܟ ܣܓܝ ܡܪܐ ܗܝܟ ܕܝܢܟ ܐܚܝ ܝܬ݁ܝ
118:157	ܣܓܝ ܗܠܝܢ ܕܪܕܦܝܢ ܠܝ ܘܠܚܨܝܢ ܠܝ ܘܡܢ ܣܗܕܘܬ݁ܟ ܠܐ ܐܪܟܢܬ
118:158	ܚܡܝܬ ܗܠܝܢ ܕܠܐ ܡܒܘܢܢܝܢ ܘܗܘܬ݁ ܫܐܝܚ ܕܡܠܟ ܠܐ ܢܛܪܘ
118:159	ܚܡܝ ܕܦܩܘܕܟ ܐ‍[‍ܚ ‍]‍ܐ ܘܒܪܚܡܟ ܐܚܝ ܝܬ݁ܝ
118:160	ܪܝܫ ܡܠܟ ܩܘܫܛ ܘ‍[‍ ‍]‍ ܟܘܠ ܕܝܢܝܐ ܕܨܕܩܟ
118:161	ܐܪܟܘܢܝܐ ܪܕܦܘ ܝܬ݁ܝ ܠܡܓܝܢ ܘܡܢ ܡܠܟ ܡܬ݁ܪܗܒ ܠܒܝ
118:162	ܡܬ݁ܚܕܐ ܐܢܐ ܥܠ ܡܠܟ ܗܝܟ ܗܕܝܢ ܕܡܫܟܝܚ ܒܙܐ ܣܓܝ
118:163	ܛܘܠܡܐ ܣܢܝܬ ܘܣܗܒܬ ܘܠܢܝܡܘܣܟ ܐܚܒܬ
118:164	ܫܘܒܥܝܐ ܙܒܢܝܢ ܒܝܘܡܐ ܫܒܚܬ ܝܬ݁ܟ ܥܠ ܕܝܢܝܐ ܕܨܕܩܟ
118:165	ܫܝܠܡ ܣܓܝ ܠܗܠܝܢ ܕܡܚܒܝܢ ܫܝܡܟ ܘܠܝܬ݁ ܠܗܘܢ ܡܟܫܘܠ
118:166	ܣܟܝܬ ܠܡܚܝܢܟ ܡܪܐ ܘܠܦܩܘܕܟ ܐܚܒܬ
118:167	ܢܛܪܬ ܢܦܫܝ ܘܣܗܕܘܬ݁ܟ ܘܐܚܒܬ݁ ܝܬ݁ܗܘܢ ܠܚܕܐ
118:168	ܢܛܪܬ ܦܩܘܕܟ ܘܣܗܕܘܬ݁ܟ ܕܟܘܠ ܐܘܪܚܬ݁ܝ ܩܘܕܡܟ ܡܪܐ
118:169	ܬ݁ܩܪܘܒ ܒܥܘܬܝ ܩܘܕܡܟ ܡܪܐ ܗܝܟ ܡܠܬ݁ܟ ܒܘܢܝܢ ܝܬ݁ܝ
118:170	ܬ݁ܝܥܘܠ ܫܝܠܬܝ ܩܘܕܡܟ ܡܪܐ ܗܝܟ ܡܠܬ݁ܟ ܦܨܝ ܝܬ݁ܝ
118:171	ܓܣܝܐܢ ܣܝܦܘܬ݁ܝ ܫܝܪܐ ܟܕ ܬ݁ܠܝܦ ܝܬܝ ܨܕܩܟ
118:172	ܡܓܝܒ ܗܘ ܠܫܢܝ ܡܠܬ݁ܟ ܕܟܘܠܗܘܢ ܦܩܘܕܟ ܨܕ‍[‍
118:173	ܬܬ݁ܥܒܕ ܐܕܟ ܕܬ‍[‍ ‍]‍ ܕܠܦܩܘܕܟ ܐܢܐ ܒܚܪܬ
118:174	ܐܬ݁ܚܡܕܬ ܠܡܚܝܢܟ ܡܪܐ ܘܢܝܡܘܣܟ ܗܘ ܐܠܘܦܢܝ
118:175	ܬܝܚܐ ܢܦܫܝ ܘܬ݁ܝܫܒܚܢܟ ܘܕܝܢܟ ܝܣܝܥܘܢ ܝܬ݁ܝ
118:176	ܕܛܥܝܬ ܗܝܟ ܐܡܪܐ ܕܗܘܐ ܐܒܝܕ ܒܥܐ ܝܬܝ ܠܥܒܕܟ ܕܠܦܩܘܕܟ ܠܐ ܐ‍<‍ܬ‍>‍ܢܫܝܬ