The Comprehensive Aramaic Lexicon

01)063( 000:00	ܝܘܡ ܬܠܬܐ ܪ̈ܒܐ ܩܪܝܐܢ ܩܡܝ ܡܢ ܓܢܣܝܣ
01)063( 006:09	ܘܗܠܝܢ ܕܝ ܬ݁ܠܘܕܘܝ ܕܢܘܚ܀ ܢܘܚ ܗܘܐ ܒܪ̈ܢܫ ܨܕܝܩ ܫܘܠܡ ܒܕܪ̈ܗ܀ ܘܫܦܪ̈ ܢܘܚ ܠܐܠܗܐ܀
01)063( 006:10	ܘܐܘܠܕ ܬ݁ܠܬܐ ܒܢܝܢ܀ ܠܣܝܡ ܘܠܟܡ ܘܠܝܦܬ݁܀
01)063( 006:11	ܘܐܣܬܪܚܬ݁ ܩܘܕܡ ܐܠܗܐ܀ ܘܐܬ݁ܡܠܝܬ݁ ܐܪܥܐ ܣܟܠܢ܀
01)063( 006:12	ܘܚܡܐ ܡܪܐ ܐܠܗܐ ܠܐܪܥܐ ܘܗܘܬ݁ ܣܪܝܚܐ܀ ܕܣܪ̈ܚ ܟܘܠ ܒܣܪ̈ ܐܘܪ̈ܚܗ ܥܠ ܐܪܥܐ܀
01)063( 006:13	ܘܐܡܪ̈ ܐܠܗܐ ܠܢܘܚ ܩܝܪ̈ܘܣܗ ܕܟܘܠ ܒܪ̈ܢܫ ܡܛܐ݁ ܩܘܕܡܝ܀ ܕܐܬ݁ܡܠܝܐܬ݁ ܐܪܥܐ ܣܟܠܢ܀ ܡܢܗܘܢ ܘܐܢܐ ܣܪ̈ܚ ܠܗܘܢ ܘܠܐܪܥܐ܀

01)063( 006:14	ܥܒܕ ܠܟ ܟܝܒܘ ܕܩܝܣܝܢ ܕܐܪܒܥ ܙܘܝܐܢ܀ ܘܩܢܢܝܢ ܩܢܢܝܢ ܥܒܕ ܟܝܒܘܬܐ܀ ܘܚܡܘܪ̈ ܝܬ݁ܗ ܡܢ ܠܓܘ ܘܡܢ ܠܒܪ̈ ܒܚܝܡܪ̈܀

01)063( 006:15	ܘܗܟܕܝܢ ܬܥܒܕ ܟܝܒܘܬܐ ܬ݁ܠܬ݁ ܡܐܐ ܐܘܡܝܢ ܐܘܪܟܗ݀ ܕܟܝܒܘܬܐ܀ ܘܚܡܝܫܝܢ ܐܘܡܝܢ ܦܘܬܐܝܗ݀܀ ܘܬ݁ܠܬ݁ܝܢ ܐܘܡܝܢ ܪ̈ܘܡܝܗ݀܀
01)063( 006:16	ܟܢܝܫܐ ܬܥܒܕ ܝܬ݁ܗ ܠܟܝܒܘܬܐ܀ ܘܥܠ ܐܡܐ ܬܫܠܡ݁ ܝܬ݁ܗ ܡܢ ܠܥܠ܀ ܘܬ݁ܪ̈ܥܗ ܬܥܒܕ ܡܢ ܣܛܪ̈ܗ܀ ܪ̈ܦܝܢ ܐܪ̈‍{‍ܢ‍}‍‍<‍ܥ‍>‍ܝܝܢ ܘܬܢܝܢܝܢ ܘܪ̈ܦܝܢ ܬ݁ܠܝܬ݁ܝܝܢ ܬܥܒܕ ܝܬ݁ܗ܀
01)063( 006:17	ܐܢܐ ܕܝ ܗܐ ܐܢܐ ܡܝܛܐ ܛܘܦܢܐ ܡܝܢ ܥܠ ܐܪ̈ܥܐ܀ ܕܝܣܪ̈ܘܚ ܟܘܠ ܒܣܪ ܕܐܝܬ݁ ܒܗ ܪܘܚ ܕܚܝܝܢ ܬ݁ܚܘܬ݁ ܫܘܡܝܐ܀ ܘܟܘܠ ܡܐ ܕܝܗܐ݁ ܥܠ ܐܪܥܐ ܝܡܘܬ܀
01)063( 006:18	ܘܝܩܡ ܕܝܬ݁ܝܩܐ݁ ܕܝܠܝ ܥܡܟ܀ ܘܬܝܥܘܠ ܠܟܝܒܘܬܐ ܐܬ ܘܒܢܝܟ ܘܐܬܬ݁ܟ ܘܢܫܝ ܒܢܝܟ ܥܡܟ܀ ܘܡܢ ܟܘܠ ܒܥܝܪ̈ܝܐ܀
01)063( 006:19	ܘܡܢ ܟܘܠ ܪ̈ܡܣܬܐ܀ ܘܡܢ ܟܘܠ ܚܝܘܬܐ̈ ܘܡܢ ܟܘܠ ܒܣܪ̈܀ ܬ݁ܪ̈ܝܢ ܬ݁ܪܝܢ ܡܢ ܟܠܘܗܘܢ ܬܥܠ ܠܟܝܒܘܬܐ܃ ܕܬܙܘܢ ܝܬ݁ܗܘܢ ܥܡܟ܀ ܕܟܪ̈ ܘܢܩܒܐ ܝܗܘܢ
01)063( 006:20	ܡܢ ܟܘܠ ܦܪܚܢ ܕܦܪܚܢ ܠܓܢܣܗܝܢ܀ ܘܡܢ ܟܠܘ ܪ̈ܡܣܬܐ ܠܓܢܣܗܝܢ܀ ܬܪ̈ܝܢ ܬ݁ܪܝܢ ܡܢ ܟܘܠܗܘܢ ܝܥܘܠܘܢ ܠܘܬ݁ܟ ܕܥܡܟ ܝܬܙܝܢܘܢ ܕܟܪ̈ ܘܢܩܒܐ܀
01)063( 006:21	ܐܬ ܕܝ ܣܒ ܠܟ ܡܢ ܟܘܠ ܡܝܟ̈ܘܠܝܐ ܗܠܝܢ ܕܬ݁ܝܟ̈ܘܠܘܢ܀ ܘܬܟܢܫ ܠܘܬ݁ܟ ܘܝܗܘܢ ܠܟ ܘܠܗܠܝܟ ܠܡܝܟ̈ܠ܀
01)063( 006:22	ܘܥܒܕ ܢܘܚ ܟܘܠ ܡܐ ܕܦܩܕ ܝܬ݁ܗ ܐܠܗܐ ܗܟܕܢ ܥܒܕ܀
01)063( 007:01	ܘܐܡܪ̈ ܡܪ̈ܐ ܐܠܗܐ ܠܢܘܚ ܥܘܠ ܐܬ ܘܟܘܠ ܒܝܬܟ ܠܟܝܒܘܬܐ܀ ܕܠܟ ܚܡܝܬ ܨܕܝܩ ܩܘܕܡܝ ܒܗܕܢ ܕܪ̈ܐ܀
01)063( 007:02	ܡܢ ܒܥܝܪܝܐ ܕܝ ܕܟܝܐ ܐܥܠ ܠܘܬ݁ܟ ܫܘܒܥܐ ܫܘܒܥܐ܀ ܕܟܪ̈ ܘܢܩܒܐ܀ ܘܡܢ ܒܥܝܪ̈ܝܐ ܕܠܐ ܕܟܝܐܢ ܬ݁ܪ̈ܝܢ ܬܪ̈ܝܢ ܕܟܪ̈ ܘܢܩܒܐ܀
01)063( 007:03	ܘܡܢ ܦܪ̈ܚܬܐ ܕܕܟܝܐܢ ܫܘܒܥܐ ܫܘܒܥܐ ܕܟܪ̈ ܘܢܩܒܐ܀ ܘܡܢ ܦܪ̈ܚܬܐ ܕܠܐ ܕܟܝܐܢ ܬ݁ܪ̈ܝܢ ܬ݁ܪ̈ܝܢ ܕܟ̈ܪ ܘܢܩܒܐ܀ ܘܬܙܘܢ ܙܪܥ ܥܠ ܟܘܠܗ ܐܪ̈ܥܐ܀
01)063( 007:04	ܥܘܕ ܓܪ̈ ܫܘܒܥܐ ܝܘܡܝܢ ܐܢܐ ܡܝܛܐ ܡܛܪ̈ܐ ܥܠ ܐܪ̈ܥܐ܀ ܐܪ̈ܒܥܝܢ ܝܘܡܝܢ ܘܐܪܒܥܝܢ ܠܝܠܘܐܢ ܘܝܫܦܪ ܟܘܠ ܡܐ ܩܐܡ ܡܐ ܕܥܒܕܝܬ ܡܢ ܐܦܝܗ ܕܐܪ̈ܥܐ܀
01)063( 007:05	ܘܥܒܕ ܢܘܚ ܟܘܠ̊̊ܡܐ ܕܦܩܕ ܝܬ݁ܗ ܡܪ̈ܐ ܐܠܗܐ܀
01)063( 007:06	ܢܘܚ ܕܝ ܗܘܐ ܒܪ ܫܝܬ ܡܐܐ݁ ܫܢܝܢ܀ ܘܛܘܦܢܐ ܗܘܐ ܡܝܐ ܥܠ ܐܪ̈ܥܐ܀
01)063( 007:07	ܘܥܠ ܢܘܚ ܘܒܢܘܝ ܘܐܬܬ݁ܗ ܘܢܫܝܗܘܢ ܕܒܢܘܝ ܥܡܗ ܠܟܝܒܘܬܐ ܠܒܕܝܠ ܡܝܐ ܕܛܘܦܢܐ܀
01)063( 007:08	ܘܡܢ ܦܪ̈ܚܬܐ ܕܟܝܬܐ ܘܡܢ ܦܪ̈ܚܬܐ ܕܠܐ ܕܟܝܐܢ܀ ܘܡܢ ܟܘܠ ܪܡܣܬܐ ܕܪ̈ܡܣܢ ܥܠ ܐܪ̈ܥܐ
01)063( 007:09	ܬ݁ܪ̈ܝܢ ܬ݁ܪܝܢ ܥܠܘ ܠܘܬ݁ ܢܘܚ ܠܟܝܒܘܬܐ ܕܟܪ ܘܢܩܒܐ ܗܝܟ ܕܦܩܕ ܝܬ݁ܗ ܐܠܗܐ܀
01)063( 007:10	ܘܗܘܐ ܡܢ ܒܬ݁ܪ ܫܘܒܥܬܐ ܝܘܡܝܐ ܘܡܝܐ ܕܛܘܦܢܐ ܗܘܘ ܥܠ ܐܪ̈ܥܐ
01)063( 007:11	ܒܫܝܬܐ ܕܫܝܬ ܡܐܐ ܕܚܝܝܘܝ ܕܢܘܚ ܒܝܪ̈ܚܐ ܬܢܝܢܐ ܒܥܣܪܝܢ ܘܫܘܒܥܐ ܒܝܪ̈ܚܐ ܒܗ ܒܗܕܢ ܝܘܡܐ ܐܬ݁ܒܙܥܘ ܡܒܘܥܝܐ ܕܬ݁ܘܡܝܐ ܘܩܛܪ̈ܩܛܝܐ ܕܫܘܡܝܐ ܐܬ݁ܦܬ݁ܚܘ܀
01)063( 007:12	ܘܗܘܐ ܡܛܪ̈ܐ ܥܠ ܐܪ̈ܥܐ ܐܪ̈ܒܥܝܢ ܝܘܡܝܢ ܘܐܪ̈ܒܥܝܢ ܠܝܠܘܐܢ܀
01)063( 007:13	ܒܗ ܒܗܕܢ ܝܘܡܐ ܥܠ ܢܘܚ ܠܟܝܒܘܬܐ܀ ܘܥܡܗ ܣܝܡ ܘܟܡ ܘܝܦܬ݁܀ ܒܢܘܝ ܕܢܘܚ ܘܐܬܬ݁ܗ ܕܢܘܚ܀ ܘܬ݁ܠܬܐ ܢܫܝܗܘܢ ܕܒܢܘܝ܀
01)063( 007:14	ܘܟܘܠ ܠܓܢܣܗ ܘܟܘܠ ܒܥܝܪ̈ܐ ܠܓܢܣܗ ܘܟܘܠ ܪ̈ܡܣܐ ܕܙܝܥܐ ܥܠ ܐܪ̈ܥܐ ܠܓܢܣܗܘܢ܀ ܘܟܘܠ ܥܘܦܐ ܕܦܪ̈ܚ ܥܠ ܠܘܬ݁ ܢܘܚ ܠܟܝܒܘܬܐ܀
01)063( 007:15	ܬ݁ܪܝܢ ܬ݁ܪܝܢ ܡܢ ܟܘܠ ܒܣܪ̈ ܕܐܝܬ݁ ܒܗ ܪ̈ܘܚ ܕܚܝܝܢ܀
01)063( 007:16	ܘܗܠܝܢ ܕܥܠܘ ܕܟܪ̈ ܘܢܩܒܐ ܡܢ ܟܘܠ ܒܣܪ̈ ܥܠܘ ܗܝܟ ܕܦܩܕ ܐܠܗܐ ܠܢܘܚ܀ ܘܐܚܕ ܡܪ̈ܐ ܐܠܗܐ ܟܝܒܘܬܐ ܡܢ ܡܢ ܠܒܪ̈ ܡܢܗ
01)063( 007:17	ܘܛܘܦܢܐ ܥܠ ܐܪܥܐ ܐܪ̈ܒܥܝܢ ܝܘܡܝܢ ܘܐܪܒܥܝܢ ܠܝܠܘܐܢ܀ ܘܣܓܘ ܡܝܐ ܘܬ݁ܠܘ ܟܝܒܘܬܐ܀ ܘܪ̈ܐܡܬ݁ ܡܢ ܐܪܥܐ܀
01)063( 007:18	ܘܡܝܐ ܗܘܘ ܨܝܕܝܢ ܘܣܓܐܢ ܗܘܘ ܥܠ ܐܪܥܐ ܠܚܕܐ܀܀ ܘܟܝܒܘܬܐ ܗܘܬ݁ ܫܝܛܐ ܠܥܠ ܡܢ ܡܝܐ܀
01)063( 007:19	ܘܡܝܐ ܗܘܘ ܨܝܕܝܢ ܠܚܕܐ ܠܚܕܐ ܥܠ ܐܪ̈ܥܐ܀ ܘܟܣܘ ܟܘܠ ܛܘܪܝܐ ܪ܃ܡܝܐ ܕܗܘܘ ܬ݁ܚܘܬ݁ ܫܘܡܝܐ܀
01)063( 007:20	ܚܡܝܫܥܣܪܐ݁ ܐܡܝܢ ܪ̈ܡܘ ܡܝܐ ܠܥܠ܀ ܘܟܣܘ ܟܘܠܗܘܢ ܛܘܪ̈ܝܐ
01)063( 007:21	ܘܡܝܬ݁ ܟܘܠ ܒܣܪ̈ ܕܡܬܙܝܥ ܥܠ ܐܪ̈ܥܐ܀ ܕܦܪܚܬܐ ܘܕܚܝܘܬܐ܀ ܘܕܟܘܠ ܪ̈ܡܣܐ ܕܙܝܥܐ ܥܠ ܐܪܥܐ܀ ܘܟܘܠ ܒܪܢܫ
01)063( 007:22	ܘܟܘܠ ܕܒܗ ܢܫܘܡܝ܀ ܘܟܘܠ ܕܗܘܐ ܥܠ ܝܒܝܫܬܐ ܡܝܬ݁܀
01)063( 007:23	ܘܐܦܫܪ̈ ܟܘܠ ܩܝܡܐ ܕܗܘܐ ܥܠ ܐܦܝܗ ܕܐܪܥܐ܀ ܡܢ ܒܪܢܫ ܥܕ ܒܥܝܪ̈܀܀ ܘܪ̈ܡܣܬܐ ܘܦܪ̈ܚܬܐ݁ ܕܫܘܡܝܐ܀ ܘܐܫܦܪ̈ܘ ܡܢ ܐܪ̈ܥܐ܀ ܘܐܫܬܬܪ̈ ܢܘܚ ܒܠܚܘܕܘܝ ܘܗܠܝܢ ܕܥܡܗ ܒܟܝܒܘܬܐ܀
01)063( 007:24	ܘܐܬ݁ܪ܃ܘܡܡܘ ܡܝܐ ܥܠ ܐܪ̈ܥܐ ܡܐܐ݁ ܘܚܡܝܫܝܢ܀
01)063( 008:01	ܘܐܬ݁ܕܟܪ̈ ܐܠܗܐ ܠܢܘܚ ܘܠܟܘܠ ܚܝܘܬܐ܀ ܘܠܟܘܠ ܒܥܝܪ̈ܝܐ܃ ܘܠܟܘܠ ܦܪ̈ܚܬܐ ܘܪ̈ܡܣܬܐ܃ ܘܠܟܘܠ ܡܐ ܕܗܘܐ ܥܡܗ ܒܟܝܒܘܬܐ܀ ܘܐܝܛܝ ܐܠܗܐ ܪ̈ܘܚܐ ܥܠ ܐܪܥܐ܃ ܘܐܬ݁ܩܛܥܘ ܡܝܐ܃
01)063( 008:02	ܡܒܘܥܝܐ ܕܬ݁ܘܡܐ܃ ܘܩܛܪܩܬܝܐ ܕܫܘܡܝܐ܀ ܘܐܬܨܝܕ ܡܛܪ̈ܐ ܡܢ ܫܘܡܝܐ܀
01)063( 008:03	ܘܗܦܟܘ ܡܝܐ ܐܙܠܝܢ ܡܢ ܐܪ̈ܥܐ܃ ܗܦܟܝܢ ܗܘܘ܀ ܘܗܘܘ ܡܝܐ ܚܣܪܝܢ ܡܢ ܐܪ̈ܥܐ ܡܢ ܒܬ݁ܪ̈ ܡܐܐ݁ ܘܚܡܝܫܝܢ ܝܘܡܝܢ܀
01)063( 008:04	ܘܝܬܒܬ݁ ܒܝܪ̈ܚܐ ܫܒܝܥܝܐ ܒܥܣܪ̈ܝܢ ܘܫܘܒܥܐ ܒܝܪ̈ܚܐ ܥܠ ܛܘܪܝܐ ܕܐܪ̈ܒܛ܀
01)063( 008:05	ܡܝܐ ܕܝ ܗܘܘ ܚܣܪ̈ܝܢ ܥܕ ܡܐ ܠܝܪ̈ܚܐ ܥܣܝܪܝܐ܀ ܘܒܝܪ̈ܚܐ ܥܣܝܪ̈ܝܐ ܒܚܕ ܒܝܪ̈ܚܐ ܐܬ݁ܚܡܘ ܪ̈ܫܝܗܘܢ ܕܛܘܪ̈ܝܐ܀
01)063( 008:06	ܘܗܘܐ ܡܢ ܒܬ݁ܪ̈ ܐܪܒܥܝܢ ܝܘܡܝܢ ܦܬ݁ܚ ܢܘܚ ܟܘܬܐ ܕܟܝܒܘܬܐ ܕܥܒܕ܀
01)063( 008:07	ܘܫܓܪ̈ ܕܝܚܡܐ ܐܢ ܫܠܘ ܡܝܐ܀ ܘܢܦܩ ܘܠܐ ܬ݁ܒ ܥܕ ܡܐ ܕܝܒܝܫܘ ܡܝܐ ܡܢ ܐܪ̈ܥܐ܀
01)063( 008:08	ܘܫܓܪ ܠܝܘܢܐ ܡܢ ܠܘܬ݁ܗ ܕܝܚܡܐ݁ ܐܢ ܫܠܘ ܡܝܐ ܡܢ ܐܦܝܗ ܕܐܪ̈ܥܐ܀
01)063( 008:09	ܘܟܕ ܠܐ ܐܫܟܚܬ݁ ܠܗ ܝܘܢܐ ܢܝܚ ܠܪܝܓ̈ܠܝܗ܀ ܬ݁ܒܬ݁ ܠܘܬ݁ܗ ܠܟܝܒܘܬܐ܀ ܕܗܘܘ ܡܝܐ ܥܠ ܟܘܠ ܐܦܝܗ ܕܐܪܥܐ܀ ܘܦܫܛ ܐܝܕܗ ܘܢܣܒ ܝܬ݁ܗ ܘܥܠ ܝܬ݁ܗ ܠܘܬ݁ܗ ܠܟܝܒܘܬܐ܀
01)063( 008:10	ܘܟܬܪ̈ ܥܘܕ ܫܘܒܥܐ ܝܘܡܝܢ܀ ܘܫܓܪ̈ ܬܘܒ ܠܝܘܢܐ ܡܢ ܟܝܒܘܬܐ܀
01)063( 008:11	ܘܬ݁ܒܬ݁ ܝܬ݁ܗ ܝܘܢܐ ܠܦܝ ܪܡܫܐ݁܃ ܘܗܘܐ ܥܡܗ ܛܪ̈ܦ ܕܙܝܬ݁ ܩܣܝܡ ܒܦܡܗ܀ ܘܝܕܥ ܢܘܚ ܕܢܚܘ ܡܝܐ ܡܢ ܐܪ̈ܥܐ܀
01)063( 008:12	ܘܟܬܪ ܥܘܕ ܫܘܒܥܐ ܝܘܡܝܢ ܚܘܪ̈ܢܝܢ ܘܫܓܪ ܠܝܘܢܐ ܘܠܐ ܐܘܣܦܬ݁ ܕܬܬܘܒ ܠܘܬ݁ܗ܀
01)063( 008:13	ܘܗܘܐ ܒܫܝܬܐ ܕܫܝܬ ܡܐܐ ܘܚܕܐ ܫܢܝܢ ܕܚܝܘܝܝ ܕܢܘܚ ܒܝܪ̈ܚܐ ܩܡܝܐ ܒܚܕ ܒܝܪ̈ܚܐ܀ ܗܦܟܘ ܡܝܐ ܡܢ ܐܪ̈ܥܐ܀ ܘܓܠܝ ܢܘܚ ܪ̈ܟܣܐ ܕܟܝܒܘܬܐ ܕܥܒܕ܀ ܘܚܡܐ ܕܣܐܦܘ ܡܝܐ ܡܢ ܐܦܝܗ ܕܐܪ̈ܥܐ܀
01)063( 008:14	ܒܝܪ̈ܚܐ ܕܝ ܬܢܝܢܐ ܒܥܣܪ̈ܝܢ ܘܫܘܒܥܐ ܒܝܪ̈ܚܐ ܝܒܫܬ݁ ܐܪܥܐ܀
01)063( 008:15	ܘܐܡܪ̈ ܡܪ̈ ܐܠܗܐ ܠܢܘܚ ܕܐܡܪ̈܀
01)063( 008:16	ܦܘܩ ܟܝܒܘܬܐ ܐܬ ܘܐܬܬ݁ܟ ܘܒܢܝܟ ܘܢܫܝܗܘܢ ܕܒܢܝܟ ܥܡܟ܀
01)063( 008:17	ܘܟܘܠ ܚܝܘܬܐ ܘܟܘܠ ܕܥܡܟ܀ ܘܟܘܠ ܒܣܪ̈ ܡܢ ܦܪܚܬܐ ܥܕ ܒܥܝܪܝܐ܀ ܘܟܘܠ ܪܡܣܐ ܕܡܬܙܝܥܐ ܥܠ ܐܪܥܐ ܐܦܝܩ ܥܡܟ܀ ܘܪܒܘ ܘܣܓܘ ܥܠ ܐܪܥܐ܀
01)063( 008:18	ܘܢܦܩ ܢܘܚ ܘܐܬܬܗ ܘܒܢܘܝ ܘܢܫܝܗܘܢ ܕܒܢܘܝ ܥܡܗ܀
01)063( 008:19	ܘܟܘܠ ܚܝܘܬܐ ܘܟܘܠ ܒܥܝܪܝܐ ܘܟܘܠ ܪ̈ܡܣܐ ܕܡܬܙܝܥܐ ܥܠ ܐܪ̈ܥܐ ܠܓܢܣܗܘܢ܀ ܢܦܩܘ ܡܢ ܟܝܒܘܬܐ܀
01)063( 008:20	ܘܒܢܐ݁ ܢܘܚ ܡܕܒܚ ܠܐܠܗܐ ܘܢܣܒ ܡܢ ܟܘܠ ܒܥܝܪܝܐ ܕܕܟܝܐܢ ܘܐܣܩ ܥܠ ܡܕܒܚܐ܀
01)063( 008:21	ܘܐܪ̈ܝܚ ܐܠܗܐ ܪܝܚ ܒܝܣܡ܃ ܘܐܡܪ̈ ܡܪܐ ܐܠܗܐ܀ ܐܬܚܫܒܝܬ ܕܠܐ ܝܘܣܦ ܕܝܠܘܛ ܐܪ̈ܥܐ ܠܓܠܠ ܥܘܒܕܝܗܘܢ ܕܒܢܝܢܫܐ܀ ܕܡܬܩܢܐ ܗܝ ܚܫܒܬ݁ܗ ܕܒܪ̈ܢܫܐ ܝܨܝܦܐܝܬ݁ ܥܠ ܒܝܫܬܐ ܡܢ ܛܠܝܘܬ݁ܗ܀ ܠܐ ܐܘܢ ܝܘܣܦ ܥܘܕ ܕܝܫܩܘܦ ܟܘܠ ܒܣܪ̈ ܚܝ ܗܝܟ ܕܥܒܕܝܬ܀
01)063( 008:22	ܟܘܠ ܝܘܡܗ ܕܐܪ̈ܥܐ ܙܪ̈ܥܐ ܘܚܨܕܐ܃ ܥܪܝܐ ܘܫܘܪܒܐ܃ ܩܝܛܐ ܘܣܬ݁ܘܐ܃ ܐܝܡܡܐ ܘܠܝܠܝܐ ܝܫܠܘܢ܀
01)063( 009:01	ܘܒܪܟ ܐܠܗܐ ܠܢܘܚ ܘܠܒܢܘܝ ܘܐܡܪ̈ ܠܗܘܢ܀ ܪ̈ܒܘ ܘܣܓܘ ܘܡܠܘ ܐܪ̈ܥܐ ܘܡܪܘ ܥܠܝܗ܀
01)063( 009:02	ܘܐܪ̈ܬܬ݁ܘܬ݁ܟܘܢ ܬ݁ܗܐ݁ ܥܠ ܟܘܠ ܚܝܘܬܐ ܕܐܪܥܐ܀ ܘܥܠ ܟܘܠ ܦܪ̈ܚܬܐ ܕܫܘܡܝܐ܀ ܘܥܠ ܟܘܠ ܕܡܬܙܝܥܝܢ ܥܠ ܐܪܥܐ܀ ܘܥܠ ܟܘܠ ܢܘܢܘܝ ܕܝܡܐ܀ ܝܗܒܬ ܝܬ݁ܗܘܢ ܠܟܘܢ ܬ݁ܚܘܬ݁ ܐܝܕܝܟܘܢ܀
01)063( 009:03	ܘܥܠ ܟܘܠ ܪ̈ܡܣܐ ܚܝܐ ܠܟܘܢ ܝܗܐ݁ ܠܡܝܟܘܠܐ܃ ܗܝܟ ܝܩܪܐ ܕܥܣܒܐ ܝܗܒܬ ܠܟܘܢ܀
01)063( 009:04	ܒܪܢ ܕܝ ܢܩܣ ܒܐܕܡܐ ܕܢܦܫܐ ܠܐ ܬܝܟ̈ܘܠܘܢ܀
01)063( 009:05	ܐܕܡܟܘܢ ܓܪ̈ ܕܝܠܟܘܢ ܕܢܦܫܬ݁ܟܘܢ ܝܒܥܐ܀ ܡܢ ܐܝܕܐ ܕܟܘܠ ܚܝܘܬܐ ܝܒܥܐ݁ ܝܬ݁ܗ܀ ܘܡܢ ܐܝܕܗ ܕܐܚܘܝ ܕܒܪ̈ܢܫ
01)063( 009:06	ܕܫܦܟ ܐܕܡ ܕܒܪ̈ܢܫ ܝܫܬܦܟ ܐܕܡܗ ܚܘܠܦܗ܀ ܕܒܨܘܪܬܗ ܕܐܠܗܐ ܥܒܕܝܬ ܒܪܢܫܐ܀
01)063( 009:07	ܐܬܘܢ ܕܝ ܪܒܘ ܘܣܓܘ ܘܡܠܘ ܝܬ݁ܗ ܠܐܪܥܐ ܘܡܪܘ ܥܠܝܗ܀
01)063( 009:08	ܘܐܡܪ ܐܠܗܐ ܠܢܘܚ ܘܠܒܢܘܝ ܥܡܗ ܕܐܡܪ̈
01)063( 009:09	ܐܢܐ ܗܐ ܐܢܐ ܡܩܝܡ ܕܝܬ݁ܝܩܐ݁ ܕܝܠܝ ܠܟܘܢ ܘܠܙܪܥܟܘܢ ܡܢ ܒܬ݁ܪܟܘܢ܀
01)063( 009:10	ܘܠܟܘܠ ܢܦܫ ܚܝܐ ܕܥܡܟܘܢ܀ ܡܢ ܦܪܚܬܐ ܘܡܢ ܒܥܝܪܝܐ ܘܟܘܠ ܚܝܘܬܐ ܕܐܪ̈ܥܐ܀ ܟܘܠ ܕܥܡܟܘܢ܀ ܡܢ ܟܘܠ ܗܠܝܢ ܕܢܦܩܘ ܡܢ ܟܝܒܘܬܐ܀
01)063( 009:11	ܘܝܩܝܡ ܕܝܬ݁ܝܩܐ݁ ܕܝܠܝ ܠܘܬ݁ܟܘܢ܀ ܘܠܐ ܝܡܘܬ݁ ܒܣܪ̈ ܡܢ ܡܝܐ ܕܛܘܦܢܐ܀ ܘܠܐ ܝܗܐ݁ ܥܘܕ ܛܘܦܢ ܕܡܝܢ ܕܝܣܪܘܚ ܟܘܠܗ ܐܪ̈ܥܐ܀
01)063( 009:12	ܘܐܡܪ ܐܠܗܐ ܠܢܘܚ܀ ܗܕܐ ܗܝ ܐܬܐ ܕܕܝܬ݁ܝܩܐ݁ ܗܕܐ ܕܐܢܐ ܝܗܒ ܒܝܢܝ ܠܒܝܢܟܘܢ ܘܒܝܢ ܟܘܠ ܢܦܫ ܚܝܐ ܕܥܡܟܘܢ ܠܕܪܝܐ ܕܠܥܠܡ܀
01)063( 009:13	ܩܫܛܝ ܐܢܐ ܡܣܝܡ ܒܥܢܢܝܐ܀ ܘܬ݁ܗܐ݁ ܠܐܬ݁ ܕܕܝܬ݁ܝܩܐ݁ ܕܠܥܠܡ ܒܝܢܝ ܠܒܝܢ ܐܪܥܐ܀
01)063( 009:14	ܘܝܗܐ݁ ܟܕ ܝܗܝ ܐܢܐ ܡܣܩ ܥܢܢܝܐ ܥܠ ܐܪ̈ܥܐ ܬܬ݁ܚܡܐ݁ ܩܫܛܝ ܒܥܢܢܐ
01)063( 009:15	ܘܝܬ݁ܕܟܪ̈ ܕܝܬ݁ܝܩܐ݁ ܕܝܠܝ ܗܕܐ ܕܗܝ ܒܝܢܝ ܘܒܢܝܟܘܢ ܘܒܝܢ ܟܘܠ ܢܦܫ ܚܝܐ ܕܟܘܠ ܒܣܪ̈܀ ܘܠܐ ܝܗܘܢ ܥܘܕ ܡܝܢ ܕܛܘܦܢ ܕܝܫܦܪܘܢ ܟܘܠ ܒܣܪ̈܀
01)063( 009:16	ܘܬ݁ܗܐ݁ ܩܫܛܝ ܒܥܢܢܝܐ ܘܝܬ݁ܚܡܐ݁ ܘܝܬ݁ܕܟܪ̈ ܕܝܬ݁ܝܩܐ ܕܝܠ‍<‍ܝ‍>‍ ܕܠܥܠܡ܀ ܒܝܢܝ ܘܠܒܝܢ ܟܘܠ ܢܦܫ ܚܝܐ ܕܟܘܠ ܒܣܪ ܥܠ ܐܪܥܐ܀
01)063( 009:17	ܘܐܡܪ ܠܢܘܚ܀ ܗܕܐ ܗܝ ܐܬܐ ܕܕܝܬ݁ܝܩܐ݁ ܗܕܐ ܕܐܬܩܢܬ ܒܝܢܝ ܠܒܝܢ ܟܘܠ ܒܣܪ̈ ܕܝܗܒ ܥܠ ܐܪܥܐ܀
01)063( 009:18	ܗܘ ܕܝ ܒܢܘܝ ܕܢܘܚ ܗܠܝܢ ܕܢܦܩܘ ܡܢ ܟܝܒܘܬܐ ܣܝܡ ܘܟܡ ܘܝܦܬ݁܀ ܟܐܡ ܗܘܐ ܐܒܘܝ ܕܟܢܥܢ܀
01)063( 009:19	ܬ݁ܠܬܐ ܗܠܝܢ ܗܢܘܢ ܒܢܘܝ ܕܢܘܚ܀ ܡܢ ܗܠܝܢ ܐܙܕܪ̈ܥܘ ܥܠ ܟܘܠܗ ܐܪ̈ܥܐ