← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

55420: le97 lection 49 Exod

Click on a word for lexical analysis
Click on a red-colored coordinate for comments and/or translations of the line

02)049( 008:22 ܕܬܕܘܥ ܕܐܢܐ ܗܘ ܡܪܐ ܡܪܗ ܕܟܘܠܗ ܐܪܥܐ܀
02)049( 008:23 ܘܐܢܐ ܝܗܒ ܐܦܪ̈ܫܘ ܥܠ ܩܗܠܝ ܠܒܝܢ ܩܗܠܟ܀ ܘܡܚܪ ܝܗܐ݁ ܗܕܢ ܐܬܐ ܥܠ ܐܪܥܐ܀
02)049( 008:24 ܘܥܒܕ ܡܪ̈ܐ ܗܟܕܢ܀ ܘܐܬܐ ܕܒܒ ܟܠܒܐ ܣܘܓܝ ܠܒܬܘܝ ܕܦܪܥܘܢ ܘܠܒܬܝܗ݀ܘܢ ܕܥܒܕܘܝ܃ ܘܠܟܘܠܗ ܐܪܥܐ ܕܡܨܪܝܢ܀ ܘܐܫܬܚܩܬ ܐܪܥܐ ܡܢ ܕܒܒܗ ܕܟܠܒܐ܀
02)049( 008:25 ܘܩܪܐ ܦܪܥܘܢ ܠܡܘܫܐ݁ ܘܠܐܗܪܘܢ ܘܐܡܪ܃ ܐܬܘ ܟ̈ܘܣܘ ܠܐܠܗܟܘܢ ܒܐܪ̈ܥܐ܀
02)049( 008:26 ܘܐܡܪ̈ ܡܘܫܐ݁ ܠܐ ܝܟܠ ܕܝܗܐ݁ ܟܕܝܢ܀ ܡܣܐܒܘܬܐ ܓܪ ܕܡܨܪܝܐ݁ ܐܢܢ ܢܟ̈ܣܝܢ ܠܡܪ̈ܐ ܐܠܗܢ܀ ܐܢ ܓܪ ܢܟܘܣ ܡܣܐܒܘܬ݁ܗܘܢ ܕܡܨܪܝܐ ܩܘܕܡܝܗܘܢ ܡܬ݁ܪ̈ܓܡܝܢ ܐܢܝܢ܀
02)049( 008:27 ܡܗܠܟ ܝܘܡܝܢ ܢܐܙܝܠ ܒܡܕܒܘܪ̈ܐ ܘܢܟ̈ܘܣ ܠܡܪܐ ܐܠܗܢ ܗܝܟ ܕܐܡܪ ܠܢ ܡܪ̈ܐ܀
02)049( 008:28 ܘܐܡܪ ܦܪܥܘܢ ܐܢܐ ܡܫܓܪ ܠܟܘܢ ܘܟ̈ܘܣܘ ܠܡܪ̈ܐ ܐܠܗܟܘܢ ܒܡܕܒܪ̈ܐ܀ ܐܠܐ ܠܪ̈ܘܚܩܐ ܠܐ ܬܪ̈ܚܩܘܢ ܕܬܝܙܠܘܢ܀ ܐܠܐ ܨܠܘ ܥܘܕ ܥܠ ܕܛܒܝ ܠܘܬ݁ ܡܪܐ܀
02)049( 008:29 ܘܐܡܪ ܗܐ ܐܢܐ ܢܦܩ ܡܢ ܠܘܬ݁ܟ܀ ܘܝܨܠܐ݁ ܠܘܬ݁ ܡܪܐ ܐܠܗܐ܀ ܘܝܐܙܠ ܠܗ ܕܒܒ ܟܠܒܐ ܡܢ ܦܪܥܘܢ܀ ܘܡܢ ܥܒܕܘܝ ܘܡܢ ܩܗܠܗ ܡܚܪ̈܀ ܠܐ ܥܘܕ ܝܘܣܦ ܦܪܥܘܢ ܕܠܐ ܝܫܓܪ̈ ܠܩܗܠܐ ܕܝܟ̈ܘܣ ܠܡܪܐ܀
02)049( 008:30 ܘܢܦܩ ܡܘܫܝ ܡܢ ܩܘܕܡ ܦܪܥܘܢ ܘܨܠܐ݁ ܠܘܬ݁ ܡܪܐ̈܀
02)049( 008:31 ܘܥܒܕ ܗܝܟ ܡܐ ܕܐܡܪ̈ ܡܘܫܐ݁܀ ܘܐܪܝܡ ܕܒܒ ܟܠܒܐ ܡܢ ܦܪܥܘܢ ܘܡܢ ܩܗܠܗ܀ ܘܠܐ ܝܬܪ ܐܘܦ ܠܐ ܚܕ܀
02)049( 008:32 ܘܩܫܝ ܦܪܥܘܢ ܠܒܗ ܐܘܦ ܒܗܕܢ ܙܒܢܐ ܘܠܐ ܨܒܐ ܕܝܫܓܪ ܠܩܗܠܐ܀
02)049( 009:01 ܘܐܡܪ ܡܪܐ ܠܡܘܫܐ݁ ܥܘܠ ܠܘܬ݁ ܦܪܥܘܢ ܘܬܝܡܘܪ̈ ܠܗ܀ ܗܟܕܢ ܐܡܪ ܡܪܐ ܐܠܗܐ܀ ܫܓܪ ܩܗܠܝ ܕܝܦܠܚܘܢ ܠܝ܀
02)049( 009:02 ܘܐܢ ܕܝ ܠܐ ܨܒܝܬ ܕܬܫܓܪ̈ ܩܗܠܝ܀ ܐܠܐ ܥܕ ܟܕܘ ܐܬ ܨܐܕ ܠܗ܀
02)049( 009:03 ܗܐ ܐܝܕܗ ܕܡܪܐ ܗܘܝܐ ܒܒܥܝܪ̈ܝܟ ܗܠܝܢ ܕܒܡܝܫܪܐ ܒܣܘܣܘܬܐ܃ ܘܒܚܡܪܝܐ܃ ܘܒܓܡܠܝܐ܃ ܘܒܬ݁ܘܪ̈ܝܐ܃ ܘܒܐܡܪܬܐ܃ ܡܘܬ݁ܢ ܪܒ ܠܚܕܐ܀
02)049( 009:04 ܘܐܢܐ ܡܦܪܫ ܐܢܐ ܒܝܢ ܒܥܝܪܝܐ ܕܐܝܣܪܐܝܠ ܘܒܝܢ ܒܥܝܪܝܐ ܕܡܨܪܝܐ݁܀ ܘܠܐ ܝܡܘܬ݁ ܡܢ ܒܥܝܪܝܐ ܕܒܢܘܝ ܐܝܣܪܐܝܠ ܐܘܦ ܠܐ ܚܕ܀
02)049( 009:05 ܘܝܗܒ ܡܪܐ ܐܬܩܢܘ ܠܡܚܪ̈܀ ܕܝܥܒܕ ܡܪܐ ܡܠܬܐ ܗܕܐ ܥܠ ܐܪܥܐ܀
02)049( 009:06 ܘܥܒܕ ܡܪ̈ܐ ܡܠܬܐ ܗܕܐ ܥܠ ܐܪܥܐ ܒܝܘܡܐ ܕܡܚܪ܀ ܘܡܝܬ݁ ܟܘܠܗܘܢ ܒܥܝܪ̈ܝܗܘܢ ܕܡܨܪܝܐ݁܀ ܘܡܢ ܒܥܝܪ̈ܝܐ ܕܒܢܝ ܐܝܣܪ̈ܐܝܠ ܠܐ ܡܝܬ݁ ܐܘܦ ܠܚܕ܀
02)049( 009:07 ܘܚܡܐ ܦܪܥܘܢ ܕܠܐ ܡܝܬ݁ ܡܢ ܒܥܝܪܝܐ ܕܒܢܝ ܐܣܪ̈ܝܠ ܐܘܦ ܠܚܕ܀ ܘܐܬ݁ܩܫܝ ܠܒܗ ܕܦܪ̈ܥܘܢ ܘܠܐ ܫܓܪ ܠܩܗܠܐ܀
02)049( 009:08 ܘܐܡܪ̈ ܡܪܐ ܠܡܘܫܝ ܘܠܐܗܪ̈ܘܢ ܕܐܡܪ̈܀ ܣܒܘ ܐܬܘܢ ܡܠܘ ܐܝܕܝܟܘܢ ܢܚܠ ܕܐܬܘܢ ܘܝܕܪ̈ܐ݁ ܝܬ݁ܗ ܡܘܫܐ݁ ܠܫܘܡܝܐ ܩܘܕܡ ܦܪ̈ܥܘܢ ܘܩܘܕܡ ܥܒܕܘܝܝ܃
02)049( 009:09 ܘܝܗܐ݁ ܪ̈ܒܘܚ ܥܠ ܟܘܠܗ ܐܪܥܐ ܕܡܨܪ̈ܝܢ܀ ܘܝܗܐ݁ ܥܠ ܒܢܝܢܫܐ ܘܥܠ ܒܥܝܪܝܐ ܫܚܢܝܢ ܪܬ݁ܚܝܢ ܫܠܒܘܩܝܐܢ ܒܒܢܝܢܫܐ ܘܒܒܥܝܪ̈ܝܐ܀ ܒܟܘܠܗ ܐܪܥܐ ܕܡܨܪ̈ܝܢ܀
02)049( 009:10 ܘܢܣܒܘ ܢܚܠܐ ܕܐܬܘܢܐ ܘܩܡܘ ܩܘܕܡ ܦܪܥܘܢ܀ ܘܕܪܐ݁ ܝܬ݁ܗ ܡܘܫܐ݁ ܠܫܘܡܝܐ ܘܗܘܘ ܫܚܢܝܢ ܫܠܒܘܩܝܐܢ ܒܒܢܝܢܫܐ ܘܒܒܥܝܪܝܐ܃
02)049( 009:11 ܘܠܐ ܚܪܫܝܐ ܝܟܠܝܢ ܕܝܩܘܡܘܢ ܩܘܕܡ ܡܘܫܝ ܠܒܕܝܠ ܫܚܢܝܐ܀ ܗܘܘ ܓܪ̈ ܫܚܢܝܐ ܒܚܪܫܝܐ ܘܒܟܘܠܗ ܐܪܥܐ ܕܡܨܪܝܢ܀
02)049( 009:12 ܘܩܫܝ ܡܪܐ ܠܒܗ ܕܦܪ̈ܥܘܢ ܘܠܐ ܫܡܥ ܗܟܡܐ ܕܐܡܪ̈ ܡܪܐ ܠܡܘܫܐ݁܀
02)049( 009:13 ܘܐܡܪ̈ ܡܪ̈ܐ ܠܡܘܫܐ݁܀ ܩܪ̈ܘܨ ܒܨܦܪܐ ܘܬܩܘܡ ܩܘܕܡ ܘܬܝܡܘܪ ܠܗ܃ ܗܟܕܢ ܐܡܪ̈ ܡܪܐ ܐܠܗܐ ܕܥܒܪ̈ܝܐ݁܀ ܫܓܪ ܩܗܠܝ ܘܝܦܠܘܚܘܢ ܠܝ܀
02)049( 009:14 ܒܗܕܢ ܓܪ̈ ܙܒܢܐ ܕܟܕܘ ܐܢܐ ܡܫܓܪ ܟܘܠ ܦܓܘܥܬ݁ܝ ܠܠܒܟ ܘܠܕܥܒܕܝܟ ܘܠܕܩܗܠܟ܀ ܘܬܕܘܥ ܕܠܝܬ݁ ܟܘܬܝ ܒܟܘܠܗ ܐܪ̈ܥܐ܀
02)049( 009:15 ܟܕܘ ܓܪ̈ ܐܫܓܪ̈ ܐܝܕܝ ܘܝܚܡܐ݁ ܝܬ݁ܟ ܘܠܩܗܠܟ ܒܡܘܬܐ ܘܬܫܬܚܩ ܡܢ ܐܪ̈ܥܐ܀
02)049( 009:16 ܘܠܒܕܝܠ ܟܕܢ ܐܬܢܛܪܬ ܕܝܘܕܥ ܒܟ ܚܝܠܝ܃ ܘܝܬܢܐ݁ ܫܝܡܝ ܒܟܘܠܗ ܐܪ̈ܥܐ܀
02)049( 009:17 ܡܐ ܐܘܢ ܐܬ ܡܬ݁ܩܫܝ ܒܩܗܠܝ ܕܠܐ ܬܫܓܪ̈ ܝܬ݁ܗܘܢ܀
02)049( 009:18 ܗܐ ܐܢܐ ܡܡܛܪ ܒܗܕܐ ܫܥܬܐ ܡܚܪ ܐܒܢ ܒܪ̈ܕ ܣܓܝ ܠܚܕܐ܀ ܗܕܐ ܕܟܘܬ݁ܗ ܠܐ ܗܘܬ݁ ܒܡܨܪܝܢ ܡܢ ܝܘܡܐ ܕܐܬܒܪ̈ܝܐܬ݁ ܥܕ ܡܐ ܠܝܘܡܕܢ܀
02)049( 009:19 ܟܕܘ ܐܘܢ ܐܫܬܒܫ ܟܢܫ ܒܥܝܪ̈ܝܟ ܘܟܘܠܡܐ ܕܠܟ ܒܡܝܫܪܐ܀ ܟܘܠܗܘܢ ܓܪ ܒܢܝܢܫܐ ܘܒܥܝܪܝܐ ܟܘܠ ܕܝܫܬܟܚ ܒܡܝܫܪܐ ܘܠܐ ܝܥܘܠ ܠܒܝܬܐ܀ ܬܦܘܠ ܥܠܘܝ ܐܒܢ ܒܪ̈ܕܐ ܝܡܘܬ݁܀
02)049( 009:20 ܘܡܢ ܕܕܚܠ ܡܢ ܡܠܬ݁ܗ ܕܡܪ̈ܐ ܡܢ ܥܒܕܘܝ ܕܦܪܥܘܢ ܟܢܫ ܛܠܘܝ ܘܒܥܝܪ̈ܘܝ ܠܒܝܬܝܐ܀
02)049( 009:21 ܘܡܢ ܕܠܐ ܐܕܡܝ ܒܚܫܒܬ݁ܗ ܠܡܠܬ݁ܗ ܕܡܪܐ ܫܒܩ ܛܠܘܝ ܘܒܥܝܪ̈ܘܝ ܒܡܝܫܪ̈ܐ܀
02)049( 009:22 ܘܐܡܪ ܡܪܐ ܠܡܘܫܐ݁ ܦܫܘܛ ܐܝܕܟ ܠܫܘܡܝܐ ܘܬ݁ܗܐ݁ ܐܒܢ ܒܪ̈ܕܐ ܥܠ ܟܘܠܗ ܐܪ̈ܥܐ ܕܡܨܪ̈ܝܢ ܥܠ ܒܢܝܢܫܐ ܘܥܠ ܒܥܝܪ̈ܝܐ ܘܥܠ ܟܘܠܗ ܥܣܒܐ ܕܒܡܝܫܪܐ ܥܠ ܐܪ̈ܥܐ ܕܡܨܪ̈ܝܢ܀
02)049( 009:23 ܘܦܫܛ ܡܘܫܐ݁ ܐܝܕܗ ܠܫܘܡܝܐ ܘܡܪ̈ܐ ܝܗܒ ܩܠܝܐ ܘܐܒܢ ܒܪܕܐ ܘܗܘܬ݁ ܢܘܪ̈ܐ ܪ̈ܗܛܐ ܥܠ ܟܘܠܗ ܐܪܥܐ ܕܡܨܪ̈ܝܢ܀
02)049( 009:24 ܘܗܘܬ݁ ܐܒܢ ܒܪܕܐ ܢܚܬܐ ܘܢܘܪܐ ܡܫܠܗܒܐ ܒܐܒܢ ܒܪܕܐ܀ ܣܓܝ ܠܚܕܐ ܗܕܐ ܕܠܐ ܗܘܬ݁ ܟܘܬ݁ܗ ܒܟܘܠܗ ܐܪ̈ܥܐ ܕܡܨܪ̈ܝܢ ܡܢ ܝܘܡ ܕܗܘܐ ܥܠܝܗ ܡܝܢ܀
02)049( 009:25 ܘܡܚܬ݁ ܒܪ̈ܕܐ ܒܟܘܠܗ ܐܪܥܐ ܕܡܨܪܝܢ܀ ܟܘܠ ܡܐ ܕܗܘܐ ܒܡܝܫܪ̈ܐ ܡܢ ܒܪ̈ܢܫ ܘܥܕܡܐ ܠܒܥܝܪ̈ ܘܟܘܠܗ ܥܣܒܐ ܗܕܢ ܕܒܡܝܫܪܐ ܡܚܬ݁ ܐܒܢ ܒܪܕܐ ܘܟܘܠ ܐܝܠܢܝܐ ܕܒܡܝܫܪܐ ܫܚܩܬ݁܀
02)049( 009:26 ܒܠܚܘܕ ܒܐܪܥܐ ܕܓܫܡ ܗܢ ܕܗܘܘ ܒܢܝ ܐܝܣܪܐܝܠ ܠܐ ܗܘܬ݁ ܐܒܢ ܒܪܕܐ܀
02)049( 009:27 ܘܫܓܪ ܩܪܐ ܠܡܘܫܐ݁ ܘܠܐܗܪܘܢ ܘܐܡܪ̈ ܠܗܘܢ ܐܣܟܠܝܬ ܟܕܘ ܡܪ̈ܐ ܕܝ ܨܕܝܩ ܘܐܢܐ ܘܩܗܠܝ ܪ̈ܫܝܥܝܢ܀
02)049( 009:28 ܘܨܠܘ ܐܘܢ ܠܘܬ݁ ܡܪ̈ܐ ܘܝܫܠܐ݁ ܘܠܐ ܝܗܘܢ ܩܠܘܝ ܕܐܠܗܐ ܘܐܒܢ ܒܪܕܐ ܘܢܘܪܐ ܘܐܢܐ ܡܫܓܪ̈ ܠܟܘܢ܀ ܘܡܢ ܟܕܘ ܠܐ ܬܘܣܦܘܢ ܕܬܟܬܪܘܢ܀
02)049( 009:29 ܘܐܡܪ ܠܗ ܡܘܫܐ݁ ܫܘܐ݁ ܕܝܦܘܩ ܡܢ ܡܕܝܢܬܐ ܝܦܫܘܛ ܐܝܕܝ ܠܘܬ݁ ܡܪܐ܀ ܘܩܠܝܐ ܝܫܠܘܢ ܘܐܒܢ ܒܪܕܐ ܘܡܛܪ̈ܐ܀ ܘܠܐ ܝܗܘܢ ܥܘܕ܀ ܕܬܕܘܥ ܕܕܡܪܐ ܗܝ ܐܪܥܐ
02)049( 009:30 ܘܐܬ ܘܥܒܕܝܟ ܝܕܥ ܐܢܐ ܕܥܕ ܟܕܘ ܠܐ ܕܚܠܬܘܢ ܡܢ ܡܪ̈ܐ܀
02)049( 009:31 ܘܟܝܬܢܐ ܘܣܥܪܝܐ ܠܩܝ܀ ܣܥܪܝܐ ܓܪ ܗܘܝ ܩܐܡܝܢ܀ ܘܟܝܬܢܐ ܗܘܬ݁ ܡܙܪ̈ܥܐ܀
02)049( 009:32 ܘܚܛܝܐ ܘܟܘܢܬ݁ܝܐ ܠܐ ܠܩܝ ܠܩܝܫܐ ܓܪ̈ ܗܘܘ܀
02)049( 009:33 ܘܢܦܩ ܡܘܫܐ݁ ܡܢܩܘܕܡ ܦܪ̈ܥܘܢ ܠܒܪ̈ ܡܢ ܡܕܝܢܬܐ ܘܦܫܛ ܐܝܕܘܝ ܠܘܬ݁ ܡܪܐ܃ ܘܫܠܘ ܩܠܝܐ ܘܐܒܢ ܒܪܕܐ ܘܡܛܪܐ ܥܘܕ ܠܐ ܢܛܦ ܬܘܒ ܥܠ ܐܪ̈ܥܐ܀
02)049( 009:34 ܘܚܡܐ ܦܪ̈ܥܘܢ ܕܫܠܐ ܡܛܪ̈ܐ ܘܐܒܢ ܒܪ̈ܕܐ ܘܩܠܝܐ܀ ܘܐܘܣܦ ܕܝܣܟܝܠ ܘܩܫܝ ܠܒܗ ܘܕܥܒܕܘܗܝ܀
02)049( 009:35 ܘܐܬ݁ܩܫܝ ܠܒܗ ܕܦܪ̈ܥܘܢ ܘܠܐ ܫܓܪ̈ ܠܒܢܘܝ ܐܝܣܪܐܝܠ܀ ܗܟܡܐ ܕܡܠܠ ܡܪ̈ܐ ܒܐܝܕܗ ܕܡܘܫܐ݁܀