← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

55420: le97 lection 51 Exod

Click on a word for lexical analysis
Click on a red-colored coordinate for comments and/or translations of the line

02)051( 000:00 ܒܐܪܒܥܬܐ ܕܫܘܒܬܐ ܫܬܝܬܐ ܕܐܪ̈ܒܥܝܬܐ ܒܨܝܘܢ ܫܥܢܘܢܐ
02)051( 084:02 ܨܒܝܬ ܡܪܐ ܒܐܪ̈ܥܟ ܘܐܬ݁ܒܬ ܫܒܝܬ݁ܗ ܕܝܥܩܘܒ
02)051( 000:00 ܥܢܝܬܗ ܕܝ
02)051( 084:08 ܐܘܕܥ ܠܢ ܡܪ̈ܐ ܪܚܡܝܟ ܘܡܚܝܢܟ ܗܝܒ ܠܒ ܩܪ̈ܝܐܢ ܩܡܝ ܡܢ ܡܦܩܢܐ ܐܩܠܘܬܐ܀
02)051( 010:01 ܘܐܡܪ̈ ܠܡܘܫܐ݁ ܕܐܡܪ̈ ܥܘܠ ܠܘܬ݁ ܦܪ̈ܥܘܢ܀ ܐܢܐ ܓܪ̈ ܩܫܝܬ ܠܒܗ ܘܠܒܗܘܢ ܕܥܒܕܘܝ܀ ܕܡܢ ܟܢ ܝܐܬ݁ܘܢ ܗܠܝܢ ܐܬܐܝ ܥܠܘܝ܀
02)051( 010:02 ܠܡܠܘ ܕܬܬ݁ܢܘܢ ܒܐܕܢܝܗܘܢ ܕܒܢܝܟܘܢ ܘܠܒܢܝܗܘܢ ܕܒܢܝܟܘܢ܀ ܟܘܠ ܡܐ ܥܒܕܬ ܠܡܨܪ̈ܝܐ݁܀ ܘܐܬ݁ܝ ܗܠܝܢ ܕܥܒܕܝܬ ܒܗܘܢ܀ ܘܬܕܘܥܘܢ ܕܐܢܐ ܗܘ ܡܪ̈ܐ܀
02)051( 010:03 ܘܥܠ ܡܘܫܐ݁ ܘܐܗܪ̈ܘܢ ܠܘܬ݁ ܦܪ̈ܥܘܢ ܘܐܡܪ̈ܘ ܠܗ܀ ܗܟܕܝܢ ܐܡܪ̈ ܡܪ̈ܐ ܐܠܗܐ ܕܥܒܪܝܐ ܥܕ ܐܡܬ݁ܝ ܠܝܬ݁ ܐܬ ܨܒܐ ܕܬܒܗܘܬ݁ ܡܢܝ܀ ܫܓܝܪ̈ ܩܗܠܝ ܕܝܦܠܚܘܢ ܠܝ܀
02)051( 010:04 ܘܐܢ ܠܐ ܬܨܒܐ݁ ܐܬ ܕܬܫܓܝܪ̈ ܠܩܗܠܝ܀ ܗܐ ܐܢܐ ܡܝܛܐ݁ ܡܚܪ̈ ܒܗܕܐ ܫܥܬܐ ܩܡܨ ܣܓܝ ܥܠ ܟܘܠ ܬܚܘܡܝܟ܀
02)051( 010:05 ܘܝܟܣܐ݁ ܕܐܪ̈ܥܐ܀ ܘܠܐ ܬܝܟܘܠ ܕܬܚܡܐ݁ ܐܪ̈ܥܐ܀ ܘܝܐܟ̈ܘܠ ܟܘܠ ܝܬ݁ܪ̈ܘܢܐ ܕܐܫܬܒܝܩ܀ ܡܐ ܕܫܒܩܬ݁ ܠܟܘܢ ܐܒܢ ܒܪ̈ܕܐ܀ ܘܝܐܟ̈ܘܠ ܐܝܠܢܐ ܕܨܡܚ ܠܟܘܢ ܥܠ ܐܪ̈ܥܐ܀
02)051( 010:06 ܘܝܬ݁ܡܠܘܢ ܒܬܝܟ ܘܒܬܝܗܘܢ ܕܥܒܕܝܟ ܘܟܘܠ ܒܬܝܐ ܕܒܟܘܠ ܐܪ̈ܥܐ ܡܨܪ̈ܝܢ܀ ܡܐ ܕܐܒܗܬ݁ܟ ܡܢ ܝܘܡܝܗܘܢ ܠܐ ܚܡܘ ܘܠܐ ܐܒܗܬ݁ܗܘܢ ܕܐܒܗܬ݁ܟ܀ ܡܢ ܝܘܡܐ ܕܗܘܘ ܥܠ ܐܪ̈ܥܐ ܥܕܡܐ ܠܝܘܡܕܢ܀ ܘܐܪܟܢ ܢܦܩ ܡܢ ܩܘܕܡ ܦܪ̈ܥܘܢ܀
02)051( 010:07 ܘܐܡܪ̈ܘ ܕܦܪܥܘܢ ܠܗ܀ ܥܕ ܡܛ݁ܝ ܝܗܐ݁ ܠܢ ܗܕܐ܀ ܬ݁ܘܩܠܐ܀ ܫܓܝܪ ܒܢܝܢܫܐ ܕܝܦܠܘܚܘܢ ܠܡܪ̈ܐ ܐܠܗܗܘܢ܀ ܐܐ݁ ܨܒܐ ܐܬ ܕܬܕܘܥ ܕܐܒܕܬ݁ ܡܨܪ̈ܝܢ܀
02)051( 010:08 ܘܐܝܬܒܘ ܘܠܐܗܪ̈ܘܢ ܠܘܬ݁ ܦܪ̈ܥܘܢ ܘܐܡܪ ܠܗܘܢ ܐܙܠܘ ܦܠܘܚܘ ܠܡܪܐ ܐܠܗܟܘܢ܀ ܡܢ ܕܝ ܡܢ ܗܢܘܢ ܗܠܝܢ ܕܐܙܠܝܢ܀
02)051( 010:09 ܘܐܡܪ̈ ܡܘܫܝ ܥܡ ܥܘܠܘܡܝܢܢ ܘܣܒܝܢܢ ܢܐܙܝܠ܀ ܥܡ ܒܢܝܢܝܢ ܘܒܢܬܐܢ ܢܐܙܠ܀ ܥܡ ܐܡܪ̈ܬ݁ܢ ܘܥܡ ܬ݁ܘܪ̈ܝܢܢ܀ ܐܝܬ݁ ܗܘ ܓܪ̈ ܡܘܥܕܗ ܕܡܪ̈ܐ ܐܠܗܢ܀
02)051( 010:10 ܘܐܡܪ̈ ܠܗܘܢ ܗܟܕܢ ܡܪ̈ܐ ܥܡܟܘܢ܀ ܒܡܐ ܕܝܫܓܪ̈ ܝܬ݁ܟܘܢ ܘܠܟܘܠ ܡܐ ܕܠܟܘܢ܀ ܚܡܝ ܕܒܝܫܬܐ ܡܬܩܢܐ ܩܘܕܡܝܟܘܢ܀
02)051( 010:11 ܠܐ ܟܕܝܢ ܐܠܐ ܝܐܙܠܘܢ ܘܦܠܘܚܘ ܠܡܪ̈ܐ ܕܗܕܐ ܐܬܘܢ ܒܥܝܢ܀ ܘܐܦܩܘ ܝܬ݁ܗܘܢ ܡܢ ܩܘܕܡ ܐܦ̈ܘܝ ܕܦܪ̈ܥܘܢ܀
02)051( 010:12 ܘܐܡܪ̈ ܡܪܐ ܠܡܘܫܐ݁ ܦܫܘܛ ܐܝܕܟ ܥܠ ܐܪ̈ܥܐ ܕܡܨܪܝܢ ܘܝܣܘܩ ܩܡܨܐ ܥܠ ܐܪܥܐ ܕܡܨܪܝܢ ܘܝܟ̈ܘܠ ܥܣܒܗ ܕܐܪ̈ܥܐ܀ ܘܟܘܠ ܦܝܪ̈ܝܐ ܕܐܝܠܢܝܐ܀ ܡܐ ܕܫܒܩܬ݁ ܐܒܢ ܒܪ̈ܕܐ܀
02)051( 010:13 ܘܦܫܛ ܡܘܫܝ ܚܘܛܪܗ ܠܫܘܡܝܐ܃ ܘܡܪܐ ܐܝܛܝ ܪ̈ܘܚܐ ܕܕܪ̈ܘܡܐ ܥܠ ܐܪ̈ܥܐ ܟܘܠܗ ܝܘܡܐ ܝܬ݁ܗ܀ ܘܟܘܠܗ ܠܝܠܝܐ ܘܨܦܪ̈ܐ ܗܘܐ ܘܪ̈ܘܚܐ ܕܕܪ̈ܘܡܐ ܢܣܒ ܠܩܡܨܐ
02)051( 010:14 ܘܐܣܝܩ ܝܬ݁ܗ ܥܠ ܟܘܠܗ ܐܪ̈ܥܐ ܕܡܨܪ̈ܝܢ܀ ܘܐܬܢܝܚ ܥܠ ܟܘܠ ܬ݁ܚܘܡܝܢ ܕܡܨܪ̈ܝܢ܀ ܣܓܝ ܗܘܐ ܠܚܕܐ ܠܐ ܗܘܐ ܩܘܕܡܘܝ ܟܘܬ݁ܗ ܩܡܨ ܕܡܐ ܠܗ܀ ܘܡܢ ܒܬ݁ܪ̈ ܗܕܢ ܠܐ ܗܘܐ݁ ܟܕܢ܀
02)051( 010:15 ܘܟܣܝ ܐܦ̈ܝܗ ܕܐܪ̈ܥܐ܀ ܘܐܣܬܪܚܬ݁ ܐܪܥܐ܀ ܘܐܟ̈ܠ ܟܘܠ ܥܣܒܗ ܕܐܪ̈ܥܐ܃ ܘܟܘܠ ܦܝܪ̈ܝܐ ܕܐܝܠܢܝܐ܃ ܗܠܝܢ ܕܐܫܬܒܩ ܡܢ ܐܒܢ ܒܪܕܐ܀ ܠܐ ܐܫܬܒܩ ܟܠܘܡ ܝܪܘܩ ܒܐܝܠܢܝܐ܀ ܘܒܟܘܠ ܥܣܒܐ ܕܡܝܫܪ̈ܐ ܒܟܘܠܗ ܐܪ̈ܥܐ ܕܡܨܪ̈ܝܢ܀
02)051( 010:16 ܘܐܫܬܒܫ ܕܝܩܪ̈ܝ ܠܡܘܫܐ ܘܠܐܗܪ̈ܘܢ ܕܐܡܪ̈ ܐܣܟܝܠܬ ܩܘܕܡ ܡܪ̈ܐ ܐܠܗܟܘܢ ܘܒܟܘܢ܀
02)051( 010:17 ܣܒܘܠܘ ܐܘܢ ܣܟܠܬܝ ܥܘܕ ܟܕܘ܀ ܘܨܠܘ ܠܘܬ݁ ܡܪ̈ܐ ܐܠܗܟܘܢ ܘܝܥܒܪ̈ ܡܢܝ ܗܕܢ ܡܘܬܐ܀
02)051( 010:18 ܘܢܦܩ ܡܘܫܐ ܡܢ ܩܘܕܡ ܦܪܥܘܢ ܘܨܠܝ ܠܘܬ݁ ܡܪ̈ܐ܀
02)051( 010:19 ܘܗܦ̈ܟ ܡܪ̈ܐ ܘܐܝܬܝ ܪ̈ܘܚ ܡܢ ܝܡܐ ܬ݁ܩܝܦ ܠܚܕܐ܀ ܘܢܣܒ ܠܩܡܨܐ ܘܫܕܐ݁ ܒܝܡܐ ܣܡܘܩܐ܀ ܘܠܐ ܐܫܬܬܪ̈ ܩܡܨ ܚܕ ܒܟܘܠ ܐܪ̈ܥܐ ܕܡܨܪ̈ܝܢ܀
02)051( 010:20 ܘܩܫܝ ܡܪ̈ܐ ܠܒܗ ܕܦܪ̈ܥܘܢ ܘܠܐ ܫܓܪ ܠܒܢܝ ܐܝܣܪ̈ܐܝܠ܀
02)051( 010:21 ܘܐܡܪ̈ ܡܪ̈ܐ ܠܡܘܫܐ݁ ܦܫܘܛ ܐܝܕܟ ܠܫܘܡܝܐ܀ ܘܝܗܐ݁ ܩܒܠܐ ܥܠ ܐܪܥܐ ܕܡܨܪܝܢ܀ ܩܒܠ ܕܓܫܓܘܫ܀
02)051( 010:22 ܘܦܫܛ ܡܘܫܐ݁ ܐܝܕܗ ܠܫܘܡܝܐ ܘܗܘܐ ܩܒܠܐ ܘܥܫܫܐ ܘܥܪ̈ܦܠܐ ܥܠ ܟܘܠܗ ܐܪܥܐ ܕܡܨܪ̈ܝܢ܀ ܬ݁ܠܬܐ ܝܘܡܝܢ
02)051( 010:23 ܠܐ ܚܡܐ݁ ܐܢܫ ܠܐܚܘܝ܀ ܘܠܐ ܩܡ ܐܢܫ ܡܢ ܡܫܟܘܒܝܬ݁ܗ ܬ݁ܠܬܐ ܝܘܡܝܢ܀ ܘܢܗܘܪ̈ܐ ܗܘܐ ܠܟܘܠ ܒܢܝ ܐܝܣܪ̈ܐܝܠ ܒܟܘܠ ܗܢ ܕܗܘܘ܀
02)051( 010:24 ܘܩܪ̈ܐ݁ ܦܪ̈ܥܘܢ ܠܡܘܫܐ݁ ܘܠܐܗܪܘܢ ܕܐܡܪ̈܀ ܐܙܠܘ ܦܠܘܚܘ ܠܡܪ̈ܐ ܐܠܗܟܘܢ ܠܒܪ̈ ܡܢ ܐܡܪ̈ܬ݁ܟܘܢ ܐܘܦ ܘܬ݁ܘܪ̈ܝܟܘܢ ܫܒܘܩܘ ܘܡܐ ܕܠܟܘܢ ܝܐܙܠ ܥܡܟܘܢ܀
02)051( 010:25 ܘܐܡܪ̈ ܠܗ ܡܘܫܐ݁܀ ܐܠܐ ܕܐܘܦ ܐܬ ܬܬܠ ܠܢ ܢܟ̈ܝܣܢ ܘܥܠܘܐܢ ܗܠܝܢ ܕܢܥܒܕ ܠܡܪ̈ܐ ܐܠܗܢ܀
02)051( 010:26 ܘܐܘܦ ܝܐܙܠܘܢ ܥܡܢ ܘܠܐ ܢܫܒܘܩ ܛܠܦ ܡܢܗܘܢ܀ ܓܪ ܢܣܒ ܕܢܦܠܘܚ ܠܡܪ̈ܐ ܐܠܗܢ܀ ܘܐܢܢ ܠܝܬ݁ ܐܢܢ ܝܕܥܝܢ ܡܐ ܢܦܠܘܚ ܠܡܪ̈ܐ ܐܠܗܢ܀ ܥܕܡܐ ܕܢܐܬܐ݁ ܠܬ݁ܡܢ܀
02)051( 010:27 ܘܩܫܝ ܡܪܐ ܠܒܗ ܕܦܪ̈ܥܘܢ ܘܠܐ ܨܒܐ݁ ܕܝܫܓܪ ܝܬ݁ܗܘܢ܀
02)051( 010:28 ܘܐܡܪ̈ ܠܗ ܦܪ̈ܥܘܢ ܐܙܠ ܠܟ ܡܢܝ ܐܣܬܟܠ ܠܓܪ̈ܡܟ ܕܡܢ ܟܕܘ ܠܐ ܬܘܣܦ ܕܬܚܡܝ ܐܦ̈ܐܝ܀ ܒܟܝܢ ܒܝܘܡܐ ܕܬܬ݁ܚܡܝ ܠܝ ܬܡܘܬ݁܀
02)051( 010:29 ܘܐܡܪ̈ ܠܗ ܡܘܫܐ݁ ܝܐܘܬ݁ ܐܡܪ̈ܬ܀ ܡܢ ܟܕܘ ܠܐ ܝܬ݁ܚܡܐ݁ ܠܐܦ̈ܝܟ܀
02)051( 011:01 ܘܐܡܪ̈ ܡܪ̈ܐ ܠܡܘܫܐ݁܀ ܥܘܕ ܡܚܐ ܚܕܐ ܝܝܬܐ݁ ܥܠ ܦܪ̈ܥܘܢ ܘܥܠ ܡܨܪܝܢ܀ ܘܡܢ ܒܬ݁ܪ ܗܠܝܢ ܗܘ ܡܫܓܪ̈ ܠܟܘܢ ܡܢ ܟܐ܀ ܡܦܩ ܠܟܘܢ ܐܦܩܘ ܡܢ ܟܐ܀
02)051( 011:02 ܡܠܠ ܐܘܢ ܒܛܘܡܘܪܝܢ ܒܐܕܢܝܗܘܢ ܕܩܗܠܐ܀ ܘܝܫܘܠ ܐܢܫ ܡܢ ܚܒܪ̈ܗ ܘܐ݁ܝܬܐ ܡܢ ܚܒܪܬ݁ܗ܀ ܡܐܢܝܢ ܕܟܣܦ ܘܡܐܢܝܢ ܕܕܗܒ ܘܠܒܘܫܝܢ܀
02)051( 011:03 ܘܝܗܒ ܡܪܐ ܚܣܕ ܠܩܗܠܐ ܩܘܕܡ ܡܨܪܝܐ݁ ܘܫܝܠܘ ܠܗܘܢ܀ ܘܡܘܫܐ݁ ܒܪܢܫ ܪ̈ܒ ܐܬ݁ܥܒܕ ܠܚܕܐ ܩܘܕܡ ܡܨܪ̈ܝܐ݁܃ ܘܩܘܕܡ ܦܪܥܘܢ܃ ܘܩܘܕܡ ܟܘܠ ܥܒܕܘܝ ܕܦܪ̈ܥܘܢ܀ ܘܒܥܝܢܘܝ ܕܩܗܠܐ܀
02)051( 011:04 ܘܐܡܪ ܡܘܫܐ݁ ܗܟܕܢ ܐܡܪ̈ ܡܪ̈ܐ܀ ܒܦܠܓܗ ܕܠܝܠܝܐ ܐܢܐ ܥܠܠ ܒܡܨܥܬ݁ܗ ܡܨܪ̈ܝܢ܀
02)051( 011:05 ܘܝܡܘܬ݁ ܟܘܠ ܒܟܘܪ̈ ܒܐܪ̈ܥܐ ܕܡܨܪ̈ܝܢ܂ ܡܢ ܒܘܟܪ̈ܗ ܕܦܪ̈ܥܘܢ ܗܕܢ ܕܝܬܒ ܥܠ ܟܘܪ̈ܣܝܗ܀ ܘܥܕܡܐ ܠܒܘܟܪܗ ܕܐܡܬܐ ܗܕܐ ܕܝ‍{‍ܗ‍}‍‍<‍ܬ‍>‍ܒܐ ܒܒܝܬ݁ ܪ̈ܚܝܐ܀ ܘܥܕܡܐ ܠܒܟܘܪ̈ ܕܒܥܝܪ̈܀
02)051( 011:06 ܘܝܠܠܐ ܪ̈ܒܐ ܬ݁ܗܐ ܒܟܘܠܗ ܐܪ̈ܥܐ ܕܡܨܪ̈ܝܢ܀ ܗܕܐ ܕܟܘܬ݁ܗ ܠܐ ܗܘܬ݁܀ ܘܟܘܬ݁ܗ ܥܘܕ ܠܐ ܬܬܘܣܦ ܕܬ݁ܗܐ݁܀
02)051( 011:07 ܘܒܟܘܠ ܒܢܝ ܐܝܣܪ̈ܐܝܠ ܠܐ ܝܗܘܪ̈ ܟܠܒ ܒܠܝܫܢܗ܀ ܡܢ ܒܪܢܫ ܥܕ ܒܥܝܪ̈܀ ܠܡܠܘ ܕܬܟܪ̈ ܟܡܐ ܝܦܪ̈ܫ ܡܪ̈ܐ ܒܝܢ ܡܨܪܝܐ ܠܒܝܢ ܐܝܣܪ̈ܐܝܠ܀
02)051( 011:08 ܘܝܚܘܬ݁ܘܢ ܗܠܝܢ ܥܒܕܝܟ ܠܘܬ݁ܝ ܘܝܣܓܘܕܘܢ ܠܝ ܕܐܡܪ̈ܝܢ ‍[‍ܕ‍]‍ܦܘܩ ܐܬ ܘܟܘܠ ܩܗܠܟ ܗܠܝܢ ܕܥܡܟ܀ ܘܡܢ ܒܬ݁ܪ̈ ܟܕܢ ܝܦܘܩ܀ ܘܢܦܩ ܡܘܫܐ݁ ܡܢ̊̊ܩܘܕܡ ܦܪ̈ܥܘܢ ܒܚܡܐ܀
02)051( 011:09 ܘܐܡܪ̈ ܡܪ̈ܐ ܠܡܘܫܐ݁܀ ܠܐ ܝܫܡܘܥ ܠܟܘܢ ܦܪ̈ܥܘܢ܀ ܕܝܣܓܐ݁ ܐܬ̈ܝ ܘܓܒܘܪܬ݁ܝ܀ ܒܐܪ̈ܥܐ ܕܡܨܪ̈ܝܢ܀
02)051( 011:10 ܘܡܘܫܐ݁ ܘܐܗܪ̈ܘܢ ܥܒܕܘ ܟܘܠ ܓܒܘܪ̈ܬܐ ܩܘܕܡ ܦܪ̈ܥܘܢ܀ ܘܩܫܝ ܡܪ̈ܐ ܠܒܗ ܕܦܪ̈ܥܘܢ ܘܠܐ ܨܒܐ ܕܝܫܓܪ̈ ܠܒܢܝ ܐܝܣܪ̈ܐܝܠ ܡܢ ܐܪ̈ܥܗ