The Comprehensive Aramaic Lexicon

Exod17:01)0(	ונטלו כל כנשת בני ישראל ממדבר סין למטליון על מימר יהוה ושרו ברפידים ולית מים למשתי עמה
Exod17:02)0(	ואתיגר עמה עם משה ואמר אב לנן מים ונשתה ואמר לון משה מה תתיגרון עמי ומה תנסון ית יהוה
Exod17:03)0(	ואצטעו תמן עמה למים ורנן עמה על משה ואמרו למה אסקתנן ממצרים למקטל יתי וית בני וית קניאני בצעו
Exod17:04)0(	וצבע משה ליהוה למימר מה אעבד לעמה הדן עוד זעור וירגמוני
Exod17:05)0(	ואמר יהוה למשה עבר לקדם עמה וסב עמך מן חכימי ישראל ואטרך דמעית בה ית נהרה תסב באדך ותהך
Exod17:06)0(	אהנה קעם לקדמיך תמן על תקפה בחורב ותמעי בתקפה ויפק מנה מים וישתה עמה ועבד כן משה לעיני חכימי ישראל
Exod17:07)0(	וקרא שם אתרה נסיון ותיגרה על תיגר בני ישראל ועל נסיונון ית יהוה למימר האית יהוה בגבנן אם לית
Exod17:08)0(	ואתא עמלק ואגחי עם ישראל ברפידים
Exod17:09)0(	ואמר משה ליהושע בחר לנן גברים ופק אגחי בעמלק מחר אהנה קעם על ריש גבעתה ואטר האלהים באדי
Exod17:10)0(	ועבד יהושע כמד אמר לה משה למגחי בעמלק ומשה ואהרן וחור סלקו לריש גבעתה
Exod17:11)0(	והוה כמד ארם משה אדיו ואגבר ישראל וכמד אנח אדיו ואגבר עמלק

Exod17:12)0(	ואדי משה יקרי ונסבו אבן ושבו תחתיו ויתב עליה ואהרן וחור סמכו באדיו מדן אחד ומדן אחד והוו אדיו תליאן עד על שמשה

Exod17:13)0(	ונצע יהושע ית עמלק וית עמה וקטלון לפם חרב
Exod17:14)0(	ואמר יהוה למשה כתב דה דכרן בספר ושבי במשמוע יהושע הלא מיעי אמעי ית דכר עמלק מתחת שומיה
Exod17:15)0(	ובנא משה מדבח וקרא שמה יהוה נצועה
Exod17:16)0(	ואמר הלא אתר על כרסי קרבה ליהוה בעמלק מדר ודר