← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


02:01 ܘܟܕ ܐܬܝܠܕ ܝܫܘܥ ܒܝܬ ܠܚܡ ܕܝܗܘܕܐ ܒܝܘܡܝ ܗܪܘܕܣ ܡܠܟܐ ܘܗܐ ܡܓܘܫܐ ܐܬܘ ܡܢ ܡܕܢܚܐ ܠܐܘܪܫܠܡ
02:02 ܘܐܡܪܝܢ ܐܝܠܟܐ ܗܘ ܡܠܟܐ ܕܝܗܘܕܝܐ ܕܐܬܝܠܕ ܐܢܚܢܢ ܓܝܪ ܚܙܝܢ ܠܟܘܟܒܗ ܡܢ ܡܕܢܚܐ ܘܐܬܝܢ ܠܡܣܓܕ ܠܗ
02:03 ܟܕ ܫܡܥ ܕܝܢ ܗܪܘܕܣ ܡܠܟܐ ܐܬܕܠܚ ܘܟܠܗ ܐܘܪܫܠܡ ܥܡܗ
02:04 ܘܟܢܫ ܟܠܗܘܢ ܪܒܝ ܟܗܢܐ ܘܣܦܪ̈ܐ ܕܥܡܐ ܘܐܡܪ ܠܗܘܢ ܕܐܝܠܟܐ ܡܬܝܠܕ ܡܫܝܚܐ܂
02:05 ܐܡܪ̈ܝܢ ܠܗ ܒܝܬ ܠܚܡ ܕܝܗܘܕܐ܂ ܗܟܢܐ ܓܝܪ ܟܬܝܒ ܒܢܒܝܐ
02:06 ܘܐܦ ܐܢܬܝ ܒܝܬ ܠܚܡ ܕܝܗܘܕܐ ܠܐ ܗܘܝܬ ܒܨܝܪܐ ܡܢ ܡ̈ܠܟܐ ܕܝܗܘܕܐ ܡܢܟܝ ܓܝܪ ܢܦܘܩ ܡܠܟܐ ܕܗܘ ܢܪܥܝܘܗܝ ܠܥܡܝ ܐܝܣܪܝܠ
02:07 ܗܝܕܝܢ ܗܪܘܕܣ ܡܛܫܝܐܝܬ ܩܪܐ ܠܗܢܘܢ ܡܓܘ̈ܫܐ ܘܡܥܩܒ ܗܘܐ ܠܗܘܢ ܕܢܕܥ ܒܐܝܢܐ ܙܒܢܐ ܐܬܚܙܝ ܠܗܘܢ ܟܘܟܒܐ܂
02:08 ܘܫܕܪ ܐܢܘܢ ܠܒܝܬ ܠܚܡ܂ ܘܐܡܪ ܠܗܘܢ ܙܠܘ ܥܩܒܘ ܥܠܘܗܝ ܥܠ ܛܠܝܐ܂ ܘܡܐ ܕܐܫܟܚܬܘܢܝܗܝ ܬܘ ܚܘܘܢܢܝ ܕܐܙܠ ܐܦ ܐܢܐ ܐܣܓܘܕ ܠܗ
02:09 ܗܢܘܢ ܕܝܢ ܟܕ ܩܒܠܘ ܦܘܩܕܢܐ ܕܡܠܟܐ ܐܙܠܘ ܘܐܬܚܙܝ ܠܗܘܢ ܟܘܟܒܐ ܗܘ ܕܚܙܘ ܗܘܘ ܒܡܕܢܚܐ܂ ܐܙܠ ܗܘܐ ܩܕܡܝܗܘܢ ܥܕܡܐ ܕܐܬܐ ܩܡ ܐܬܪ ܕܬܡܢ ܗܘܐ ܛܠܝܐ܂
02:10 ܗܢܘܢ ܕܝܢ ܟܕ ܚܙܘܘܗܝ ܠܟܘܟܒܐ ܚܕܘܬܐ ܪܒܬܐ ܚܕܝܘ
02:11 ܘܥܠܘ ܠܒܝܬܐ ܘܚܙܘܘܗܝ ܠܛܠܝܐ ܥܡ ܡܪܝܡ ܐܡܗ ܘܢܦܠܘ ܘܣܓܕܘ ܠܗ܂ ܘܦܬܚܘ ܣܝܡܬܗܘܢ ܘܩܪܒܘ ܠܗ ܩܘܪܒܢܐ ܕܗܒܐ ܘܡܘܪܐ ܘܠܒܘܢܬܐ
02:12 ܘܐܬܚܙܝ ܠܗܘܢ ܒܚܙܘܐ ܕܠܐ ܢܗܦܟܘܢ ܠܘܬ ܗܪܘܕܣ܂ ܘܗܢܘܢ ܒܐܘܪܚܐ ܐܚܪܬܐ ܐܙܠܘ ܠܐܬܪܗܘܢ
02:13 ܘܡܢ ܒܬܪܗܘܢ ܐܬܚܙܝ ܠܝܘܣܦ ܡܠܐܟܐ ܕܡܪܝܐ ܒܚܠܡܐ܂ ܘܐܡܪ ܠܗ ܩܘܡ ܫܩܘܠ ܠܛܠܝܐ ܘܠܐܡܗ ܘܥܪܘܩ ܠܡܨܪܝܢ ܘܬܡܢ ܗܘܝ ܥܕܡܐ ܕܐܡܪܢܐ ܠܟ ܡܛܠ ܕܥܬܝܕ ܗܘ ܗܪܘܕܣ ܠܡܒܥܝܗ ܠܛܠܝܐ ܐܝܟܢܐ ܕܢܘܒܕܝܘܗܝ
02:14 ܝܘܣܦ ܕܝܢ ܩܡ ܫܩܠܗ ܠܛܠܝܐ ܘܠܐܡܗ ܒܠܠܝܐ ܘܐܙܠ ܠܗ ܠܡܨܪܝܢ܂
02:15 ܘܬܡܢ ܗܘܐ ܥܕܡܐ ܕܡܝܬ ܗܪܘܕܣ ܡܠܟܐ܂ ܕܢܬܡܠܐ ܡܕܡ ܕܐܬܡܠܠ ܡܢ ܡܪܝܐ ܒܦܘܡ ܐܫܥܝܐ ܢܒܝܐ܂ ܕܐܡܪ ܗܘܐ ܡܢ ܡܨܪܝܢ ܩܪܝܬ ܠܒܪܝ
02:16 ܗܝܕܝܢ ܗܪܘܕܣ ܟܕ ܚܙܐ ܕܒܙܚܘ ܒܗ ܡܓܘܫܐ ܐܬܚܡܬ ܛܒ ܘܫܕܪ ܩܛܠ ܛ̈ܠܝܐ ܟܘܠ ܕܐܝܬ ܒܝܬ ܠܚܡ܂ ܘܒܬܚܘܡܗ ܡܢ ܒܪ ܬܪܬܝܢ ܫܢܝܢ ܘܠܬܚܬ ܠܕܡܘܬܐ ܕܙܒܢܐ ܕܐܡܪܘ ܠܗ ܡܓܘܫܐ
02:17 ܗܝܕܝܢ ܫܠܡܬ ܡܠܬܐ ܕܐܡܪ ܗܘܐ ܐܪܡܝܐ ܢܒܝܐ
02:18 ܩܠܐ ܐܫܬܡܥ ܒܪܡܬܐ ܐܠܝܐ ܘܒܟܝܐ ܘܬܢܚܬܐ ܣܓܝܐܬܐ ܩܠܐ ܕܪܚܝܠ ܕܒܟܝܐ ܗܘܬ ܥܠ ܒܢܝܗ ܘܠܐ ܨܒܝܐ ܗܘܬ ܠܡܬܒܝܐܘ ܡܛܠ ܕܠܐ ܐܝܬܝܗ̈ܘܢ܀
02:19 ܟܕ ܡܝܬ ܕܝܢ ܗܪܘܕܣ ܡܠܟܐ ܐܬܚܙܝ ܠܝܘܣܦ ܒܡܨܪܝܢ ܡܠܐܟܐ ܕܡܪܝܐ
02:20 ܘܐܡܪ ܠܗ ܒܚܠܡܐ ܩܘܡ ܫܩܘܠ ܠܛܠܝܐ ܘܠܐܡܗ ܘܐܙܠ ܠܐܪܥܐ ܕܐܝܣܪܐܝܠ ܡܛܠ ܕܡܝܬܘ ܠܗܘܢ ܐܝܠܝܢ ܕܒܥܝܢ ܗܘܘ ܢܦܫܗ ܕܛܠܝܐ
02:21 ܘܗܘ ܩܡ ܫܩܠܗ ܠܛܠܝܐ ܘܠܐܡܗ ܘܐܬܐ ܠܐܪܥܐ ܕܐܝܣܪܐܝܠ
02:22 ܟܕ ܫܡܥ ܕܝܢ ܝܘܣܦ ܕܐܪܟܠܐܘܣ ܗܘܐ ܡܠܟܐ ܒܕܘܟܬ ܗܪܘܕܣ ܐܒܘܗܝ ܕܚܠ ܠܡܐܙܠ ܠܬܡܢ ܘܚܙܐ ܒܚܠܡܐ ܕܢܐܙܠ ܠܗ ܠܐܬܪܐ ܕܓܠܝܠܐ
02:23 ܘܐܬܐ ܠܬܡܢ ܘܥܡܪ ܗܘܐ ܒܡܕܝܢܬܐ ܕܡܬܩܪܝܐ ܢܨܪܬ ܘܐܬܡܠܝܬ ܡܠܬܐ ܕܐܡܝܪܐ ܒܢܒܝܐ ܕܢܨܪܝܐ ܢܬܩܪܐ܂

next chapter