The Comprehensive Aramaic Lexicon


03:01	ܒܗܢܘܢ ܝܘܡܬܐ ܐܬܐ ܝܘܚܢܢ ܡܥܡܕܢܐ ܘܡܟܪܙ ܗܘܐ ܒܡܕܒܪܐ ܕܝܗܘܕܐ܂

03:02	ܘܐܡܪ ܗܘܐ ܕܬܘܒܘ ܡܛܠ ܕܩܪܒܬ ܠܗ ܡܠܟܘܬܐ ܕܫܡܝܐ܂
03:03	ܗܢܘ ܕܟܬܝܒ ܥܠܘܗܝ ܒܐܫܥܝܐ ܢܒܝܐ ܕܐܡܪ ܗܘܐ ܕܛܝܒܘ ܐܘܪܚܐ ܠܡܪܝܐ
03:04	ܗܘ ܕܝܢ ܝܘܚܢܢ ܠܒܝܫ ܗܘܐ ܠܒܘܫܐ ܕܒܥܘܐ ܕܓܡ̈ܠܐ ܘܐܣܝܪ ܗܘܐ ܒܚܨܘ̈ܗܝ ܥܪܩܬܐ ܘܡܐܟܠܬܗ ܩܡܨܐ ܘܕܒܫܐ ܕܛܘܪܐ܂
03:05	ܗܝܕܝܢ ܐܬܝܢ ܗܘܘ ܠܘܬܗ ܒܢ̈ܝ ܐܘܪܫܠܡ ܘܟܠܗ ܝܗܘܕܐ ܘܟܠܗ ܥܒܪܐ ܕܝܘܪܕܢܢ ܢܗܪܐ
03:06	ܘܡܥܡܕ ܗܘܐ ܠܗܘܢ ܒܝܘܪܕܢܢ ܢܗܪܐ ܟܕ ܡܘܕܝܢ ܗܘܘ ܐܢܫ ܐܢܫ ܒܚܛܗܘܗܝ܂
03:07	ܟܕ ܚܙܐ ܕܝܢ ܣܓܝܐܐ ܕܐܬܝܢ ܠܡܥܡܘܕܝܬܗ ܡܢ ܦܪ̈ܝܫܐ ܘܙܕܘܩܝܐ ܐܡܪ ܠܗܘܢ ܝܠܕܐ ܕܐܟܕܢܐ ܡܢܘ ܚܘܝܟܘܢ ܠܡܥܪܩ ܡܢ ܪܘܓܙܐ ܕܥܬܝܕ ܠܡܐܬܐ
03:08	ܥܒܕܘ ܗܟܝܠ ܦܐܪܐ ܕܫܘܝܢ ܠܬܝܒܘܬܐ
03:09	ܘܠܐ ܬܐܡܪܘܢ ܕܐܒܐ ܐܝܬ ܠܢ ܐܒܪܗܡ ܐܡܪ ܐܢܐ ܠܟܘܢ ܓܝܪ ܕܡܫܟܚ ܐܠܗܐ ܡܢ ܗܠܝܢ ܟܦܐ ܠܡܩܡܘ ܒܢܝܐ ܠܐܒܪܗܡ
03:10	ܘܗܐ ܡܛܝ ܠܗ ܢܪܓܐ ܥܠ ܥܩܪ̈ܝܗܘܢ ܕܐܝܠܢܐ ܘܟܘܠ ܐܝܠܢܐ ܕܦܐܪ̈ܐ ܠܐ ܥܒܕ ܡܬܦܣܩ ܘܒܢܘܪܐ ܢܦܠ
03:11	ܐܢܐ ܕܝܢ ܡܥܡܕܢܐ ܠܟܘܢ ܒܡܝܐ ܠܬܝܒܘܬܐ ܗܘ ܕܝܢ ܐܝܢܐ ܕܐܬܐ ܒܬܪܝ ܪܒ ܗܘ ܡܢܝ܂ ܐܝܢܐ ܕܠܐ ܫܘܢܐ ܡܣܢܘܗܝ ܠܡܫܩܠ ܗܘ ܢܥܡܕܟܘܢ ܒܢܘܪܐ ܘܒܪܘܚܐ ܕܩܘܕܫܐ
03:12	ܗܘ ܕܐܚܝܕ ܪܦܫܐ ܒܐܝܕܗ ܘܡܕܟܐ ܐܕܪܗ ܘܚ̈ܛܐ ܚܡܠ ܒܐܘܨܪܗ ܘܬܒܢܐ ܡܘܩܕ ܒܢܘܪܐ ܕܠܐ ܕܥܟܐ܀
03:13	ܗܝܕܝܢ ܐܬܐ ܝܫܘܥ ܡܢ ܓܠܝܠܐ ܠܘܬ ܝܘܚܢܢ ܕܢܥܡܕܝܘܗܝ ܒܝܘܪܕܢܢ
03:14	ܘܟܠܝܗܝ ܝܘܚܢܢ ܘܐܡܪ ܠܗ ܐܢܐ ܚܫܚܢܐ ܕܐܢܬ ܬܥܡܕܢܝ ܘܐܢܬ ܠܘܬܝ ܐܬܝܬ
03:15	ܥܢܐ ܝܫܘܥ ܘܐܡܪ ܠܗ ܫܒܘܩ ܕܗܫܐ ܡܛܠ ܕܗܟܢܐ ܝܐܐ ܠܢ ܕܢܡܠܐ ܟܘܠܗ ܟܐܢܘܬܐ ܗܝܕܝܢ ܫܒܩܗ ܕܢܥܡܕ
03:16	ܘܟܕ ܥܡܕ ܘܣܠܩ ܡܢ ܡܝܐ ܘܗܐ ܐܬܦܬܚܘ ܫܡܝܐ ܘܚܙܐ ܪܘܚܐ ܕܐܠܗܐ ܕܢܚܬܬ ܒܕܡܘܬܐ ܕܝܘܢܐ ܘܩܘܝܬ ܥܠܘܗܝ
03:17	ܘܩܠܐ ܐܫܬܡܥ ܡܢ ܫܡܝܐ ܕܐܡܪ ܠܗ ܐܢܬ ܗܘ ܒܪܝ ܘܚܒܝܒܝ ܕܒܟ ܐܨܛܒܝܬ܀