← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


05:01 ܟܕ ܚܙܐ ܠܟܢܫܐ ܣܓܝ̈ܐܐ ܣܠܩ ܠܗ ܠܛܘܪܐ ܘܟܕ ܝܬܒ ܩܪܒܘ ܠܘܬܗ ܬܠܡ̈ܝܕܘܗܝ
05:02 ܘܫܪܝ ܠܡܐܡܪ ܠܗܘܢ܀
05:03 ܛܘܒ̈ܝܗܘܢ ܠܡܣ̈ܟܢܐ ܒܪܘܚܗܘܢ ܕܕܝܠܗܘܢ ܗܝ ܡܠܟܘܬܐ ܕܫܡܝܐ܀
05:04 ܛܘܒ̈ܝܗܘܢ ܠܐܒ̈ܝܠܐ ܕܗܢܘܢ ܢܬܒܝܐܘܢ܀
05:05 ܛܘܒ̈ܝܗܘܢ ܠܡܟܝܟܐ ܕܗܢܘܢ ܢܐܪܬܘܢܗ ܐܪܥܐ܀
05:06 ܛܘܒ̈ܝܗܘܢ ܠܐܝܠܝܢ ܕܟܦܢܝܢ ܘܨܗܝܢ ܠܟܢܘܬܐ ܕܗܢܘܢ ܢܣܒܥܘܢ܀
05:07 ܛܘܒ̈ܝܗܘܢ ܠܡܪ̈ܚܡܢܐ ܕܥܠܝܗܘܢ ܢܗܘܘܢ ܪ̈ܚܡܐ܀
05:08 ܛܘܒܝ̈ܗܘܢ ܠܐܝܠܝܢ ܕܕܟܝܢ ܒܠܒܗܘܢ ܕܗܢܘܢ ܢܚܙܘܢܗ ܠܐܠܗܐ܀
05:09 ܛܘܒܝ̈ܗܘܢ ܠܥܒ̈ܕܝ ܫܠܡܐ ܕܗܢܘܢ ܒܢ̈ܘܗܝ ܕܐܠܗܐ ܢܬܩܪܘܢ܀
05:10 ܛܘܒ̈ܝܗܘܢ ܠܐܝܠܝܢ ܕܪ̈ܕܝܦܝܢ ܡܛܠ ܙܕܝܩܘܬܐ܂ ܕܕܝܠܗܘܢ ܗܝ ܡܠܟܘܬܐ ܕܫܡܝܐ܀
05:11 ܛܘܒ̈ܝܟܘܢ ܟܕ ܢܗܘܝܢ ܣܢܝܢ ܠܟܘܢ ܒܢܝ ܐܢܫܐ ܘܪܕܦܝܢ ܠܟܘܢ ܘܡܐ ܕܐܡܪܝܢ ܥܠܝܟܘܢ ܕܒܝܫ ܡܛܘܠ ܫܡܝ ܕܝܠܝ܂
05:12 ܐܢܬܘܢ ܕܝܢ ܚܕܘ ܘܪܘܙܘ ܒܗܘ ܝܘܡܐ ܕܐܓܪܟܘܢ ܣܓܝ ܗܘ ܒܫܡܝܐ ܗܟܢܐ ܓܝܪ ܪ̈ܕܦܝܢ ܗܘܘ ܐܒܗܝܗܘܢ ܠܢܒܝܐ܀
05:13 ܐܢܬܘܢ ܐܢܘܢ ܡܠܚܗ ܕܐܪܥܐ ܐܢ ܡܠܚܐ ܬܦܟܗ ܒܡܢܐ ܬܬܡܠܚ ܠܡܕܡ ܠܐ ܐܙܠܐ ܐܠܐ ܕܬܫܬܕܐ ܠܒܪ ܘܢܗܘܘܢ ܕܝܫܝܢ ܠܗ ܒ̈ܢܝ ܐܢܫܐ܂
05:14 ܐܢܬܘܢ ܐܢܘܢ ܢܘܗܪܗ ܕܥܠܡܐ܂ ܘܠܐ ܡܫܟܚܐ ܡܕܝܢܬܐ ܕܥܠ ܛܘܪܐ ܒܢܝܐ ܕܬܛܫܐ
05:15 ܘܠܐ ܐܢܫ ܡܢܗܪ ܫܪܓܐ ܘܣܐܡ ܠܗ ܬܚܝܬ ܣܐܬܐ ܐܠܐ ܣܐܡ ܠܗ ܠܥܠ ܡܢ ܡܢܪܬܐ ܘܠܟܠ ܕܐܝܬ ܒܒܝܬܐ ܡܢܗܪ܂
05:16 ܗܟܢܐ ܢܢܗܪ ܢܘܗܪܟܘܢ ܠܩܕܡ ܒ̈ܢܝ ܐܢܫܐ ܕܢܚܙܘܢ ܥܒܕ̈ܝܟܘܢ ܫܦܝܪ̈ܐ܂ ܘܢܫܒܚܘܢ ܠܐܒܘܟܘܢ ܕܒܫܡܝܐ܀
05:17 ܠܐ ܬܣܒܪܘܢ ܕܐܬܝܬ ܠܡܫܪܐ ܢܡܘܣܐ ܘܢܒ̈ܝܐ ܠܐ ܐܬܝܬ ܕܐܫܪܐ ܐܠܐ ܠܡܡܠܝܘ ܐܢܘܢ܂
05:18 ܐܡܝܢ ܓܝܪ ܐܡܪܢܐ ܠܟܘܢ ܥܕܡܐ ܕܢܥܒܪܘܢ ܫܡܝܐ ܘܐܪܥܐ܂ ܝܘܕ ܐܬܘܬܐ ܚܕܐ ܠܐ ܬܥܒܪ ܡܢ ܢܡܘܣܐ ܥܕܡܐ ܕܟܘܠ ܢܗܘܐ
05:19 ܘܡܢ ܕܢܫܪܐ ܚܕ ܡܢ ܦܘܩ̈ܕܢܐ ܗ̈ܠܝܢ ܙܥܘܪܐ ܘܢܠܦ ܗܟܢܐ ܠܒܢ̈ܝ ܐܢܫܐ ܒܨܝܪܐ ܢܬܩܪܐ ܒܡܠܟܘܬܐ ܕܫܡܝܐ ܟܘܠ ܕܢܥܒܕ ܕܝܢ ܘܢܠܦ ܗܟܢܐ ܗܢܐ ܪܒܐ ܢܬܩܪܐ ܒܡܠܟܘܬܐ ܕܫܡܝܐ
05:20 ܐܡܪܢܐ ܠܟܘܢ ܓܝܪ ܕܐܠܐ ܬܐܬܪ ܙܕܝܩܘܬܟܘܢ ܡܢ ܕܣܦܪ̈ܐ ܘܦܪ̈ܝܫܐ ܠܐ ܬܥܠܘܢ ܠܡܠܟܘܬܐ܀
05:21 ܫܡܥܬܘܢ ܕܐܬܐܡܪ ܠܩܕܡ̈ܝܐ ܠܐ ܬܩܛܘܠ ܘܟܘܠ ܡܢ ܕܢܩܛܘܠ ܢܬܚܝܒ ܒܕܝܢܐ܂
05:22 ܐܢܐ ܕܝܢ ܐܡܪܢܐ ܠܟܘܢ ܕܟܘܠ ܡܢ ܕܪܓܙ ܥܠ ܐܚܘܗܝ ܐܝܩܐ ܢܗܘܐ ܡܚܝܒ ܒܕܝܢܐ ܘܟܘܠ ܕܢܐܡܪ ܠܐܚܘܗܝ ܪܩܐ ܡܚܝܒ ܗܘ ܒܟܢܘܫܬܐ܂ ܘܡܢ ܕܢܐܡܪ ܠܐܚܘܗܝ ܫܛܝܐ ܡܚܝܒ ܗܘ ܠܓܗܢܐ ܕܢܘܪܐ܀
05:23 ܐܢ ܗܟܝܠ ܡܩܪܒ ܐܢܬ ܩܘܪܒܢܟ ܥܠ ܡܕܒܚܐ ܘܬܡܢ ܬܥܗܕ ܕܐܚܘܟ ܐܚܝܕ ܥܠܝܟ ܐܟܬܐ
05:24 ܫܒܘܩ ܩܘܪܒܢܟ ܬܡܢ ܥܠ ܡܕܒܚܐ ܘܙܠ ܠܘܩܕܡ ܐܬܪܥܐ ܥܡ ܐܚܘܟ ܘܗܝܕܝܢ ܬܐ ܩܪܒ ܩܘܪܒܢܟ
05:25 ܗܘܝܬ ܡܬܐܘܐ ܥܡ ܒܥܠܕܝܢܟ ܒܥܓܠ ܥܕ ܥܡܗ ܐܢܬ ܒܐܘܪܚܐ ܕܠܡܐ ܒܥܠܕܝܢܟ ܢܫܠܡܟ ܠܕܝܢܐ ܘܬܦܠ ܒܝܬ ܐܣܝܪܐ
05:26 ܘܐܡܝܢ ܐܡܪ ܐܢܐ ܠܟ ܕܠܐ ܬܦܘܩ ܡܢ ܬܡܢ ܥܕܡܐ ܕܬܬܠ ܫܡܘܢܐ ܐܚܪܝܐ
05:27 ܫܡܥܬܘܢ ܕܐܬܐܡܪ ܠܐ ܬܓܘܪ
05:28 ܐܢܐ ܕܝܢ ܐܡܪܢܐ ܠܟܘܢ ܕܟܠ ܡܢ ܕܚܙܐ ܐܢܬܬܐ ܘܪܐܓ ܠܗ܂ ܓܪܗ ܒܠܒܗ
05:29 ܐܢ ܕܝܢ ܥܝܢܟ ܕܝܡܝܢܐ ܡܟܫܠܐ ܠܟ ܚܨܝܗ ܫܕܝܗ ܡܢܟ܂ ܦܩܚ ܠܟ ܓܝܪ ܕܚܕ ܗܕܡܟ ܢܐܒܕ ܘܠܐ ܟܘܠܗ ܦܓܪܟ ܢܐܙܠ ܠܓܗܢܐ
05:31 ܐܬܐܡܪ ܕܡܢ ܕܫܒܩ ܐܢܬܬܗ ܢܬܠ ܠܗ ܐܓܪܬܐ ܕܕܘܠܐ
05:32 ܐܢܐ ܕܝܢ ܐܡܪܢܐ ܠܟܘܢ ܕܡܢ ܕܫܪܐ ܐܢܬܬܗ ܕܠܐ ܐܬܐܡܪ ܥܠܝܗ ܓܘܪܐ ܗܘܝܘ ܡܓܝܪ ܠܗ܂ ܘܡܢ ܕܢܣܒ ܫܒܝܩܬܐ ܡܓܪ ܓܐܪ
05:33 ܫܡܥܬܘܢ ܕܐܬܐܡܪ ܕܠܐ ܬܐܡܐ ܡܘܡܬ ܫܘܩܪܐ ܐܠܐ ܬܬܠ ܠܡܪܝܐ ܡܘܡܬܐ
05:34 ܐܢܐ ܕܝܢ ܐܡܪܢܐ ܠܟܘܢ ܕܩܢܘܡܟܘܢ ܠܐ ܬܐܡܘܢ܂ ܠܐ ܒܫܡܝܐ ܕܟܘܪܣܝܗ ܐܢܘܢ ܕܐܠܗܐ
05:35 ܘܠܐ ܒܐܪܥܐ ܕܟܘܒܫܐ ܗܝ ܬܚܝܬ ܪ̈ܓܠܘܗܝ܂ ܘܠܐ ܒܐܘܪܫܠܡ ܡܛܠ ܕܡܕܝܢܬܗ ܗܝ ܕܡܠܟܐ ܪܒܐ܂
05:36 ܘܠܐ ܒܪܝܫܟ ܬܐܡܐ܂ ܡܛܠ ܕܠܐ ܡܫܟܚ ܐܢܬ ܠܡܥܒܕ ܒܗ ܡܢܬܐ ܚܕܐ ܕܣܥܪܐ ܐܘܟܡܬܐ ܐܘ ܚܘܪܬܐ܂
05:37 ܐܠܐ ܬܗܘܐ ܡܠܬܟܘܢ ܐܝܢ ܐܝܢ ܘܠܐ ܠܐ܂ ܡܕܡ ܕܡܢ ܗܠܝܢ ܝܬܝܪ ܡܢ ܒܝܫܐ ܗܘ܀
05:38 ܫܡܥܬܘܢ ܕܐܬܐܡܪ ܕܥܝܢܐ ܚܠܦ ܥܝܢܐ܂ ܘܫܢܐ ܚܠܦ ܫܢܐ܂
05:39 ܐܢܐ ܕܝܢ ܐܡܪܢܐ ܠܟܘܢ ܕܠܐ ܬܩܘܡܘܢ ܠܩܒܠ ܒܝܫܐ܂ ܐܠܐ ܡܢ ܕܡܚܐ ܠܟ ܥܠ ܦܟܟ ܩܪܒ ܠܗ ܐܚܪܢܐ܂
05:40 ܘܡܢ ܕܨܒܐ ܕܢܕܘܢ ܥܡܟ ܘܢܣܒ ܟܘܬܝܢܟ ܫܒܘܩ ܠܗ ܐܦ ܡܪܛܘܛܟ܂
05:41 ܡܢ ܕܡܫܚܪ ܠܟ ܕܬܐܙܠ ܥܡܗ ܡܝܠ ܐܙܠ ܥܡܗ ܬܘܒ ܬܪ̈ܝܢ ܐܚܪܢܝܢ܂
05:42 ܘܡܢ ܕܫܐܠ ܠܟ ܗܒ ܠܗ܂ ܘܡܢ ܕܨܒܐ ܠܡܐܙܦ ܡܢܟ ܠܐ ܬܟܠܝܗܝ܀
05:43 ܫܡܥܬܘܢ ܕܐܬܐܡܪ ܕܬܪܚܡ ܠܩܪܝܒܟ ܘܬܣܢܐ ܠܒܥܠܕܒܒܟ܂
05:44 ܐܢܐ ܕܝܢ ܐܡܪ ܐܢܐ ܠܟܘܢ ܕܪ̈ܚܡܘ ܠܒܥܠܕܒܒܝܟܘܢ܂ ܘܨܠܘ ܥܠ ܐܝܠܝܢ ܕܪ̈ܕܦܝܢ ܠܟܘܢ܂
05:45 ܐܝܟܢܐ ܕܬܗܘܘܢ ܒܢܘ̈ܗܝ ܕܐܒܘܟܘܢ ܕܒܫܡܝܐ ܗܘ ܕܡܕܢܚ ܫܡܫܗ ܥܠ ܛܒ̈ܐ ܘܥܠ ܒܝܫ̈ܐ܂ ܘܡܚܬ ܡܛܪܗ ܥܠ ܟܐ̈ܢܐ ܘܥܠ ܥ̈ܘܠܐ܂
05:46 ܐܢ ܓܝܪ ܬܚܒܘܢ ܐܝܠܝܢ ܕܡܚܒܝܢ ܠܟܘܢ ܡܢܘ ܐܓܪܟܘܢ ܐܦ ܡܟܣ̈ܐ ܗܟܢܐ ܥܒܕܝܢ܂
05:48 ܗܘܘ ܗܟܝܠ ܐܢܬܘܢ ܓܡܝܪ̈ܐ ܐܝܟܢܐ ܕܐܒܘܟܘܢ ܕܒܫܡܝܐ ܓܡܝܪ ܗܘ܂

next chapter