The Comprehensive Aramaic Lexicon

10:01	ܘܩܪܐ ܠܬܪܥܣܪܬܗ ܘܝܗܒ ܠܗܘܢ ܫܘܠܛܢܐ ܠܡܦܩܘ ܪ̈ܘܚܐ ܛܢܦ̈ܬܐ ܘܠܡܐܣܝܘ ܟܘܠ ܟܐܒ ܘܟܪܗܢ܂
10:02	ܘܗ̈ܠܝܢ ܫܡܗܐ ܕܬܠܡ̈ܝܕܘܗܝ ܬܪ̈ܥܣܪ܂ ܩܕܡܝܐ ܫܡܥܘܢ ܟܐܦܐ ܘܐܢܕܪܝܘܣ ܐܚܘܗܝ ܘܝܥܩܘܒ ܘܝܘܚܢܢ ܒ̈ܢܝ ܙܒܕܝ
10:03	ܘܦܝܠܝܦܘܣ ܘܒܪ ܬܘܠܡܝ ܘܬܐܘܡܐ ܘܡܬܝ ܡܟܣܐ ܘܝܥܩܘܒ ܒܪ ܚܠܦܝ
10:04	ܘܫܡܥܘܢ ܩܢܢܝܐ ܘܝܗܘܕܐ ܒܪ ܝܥܩܘܒ݁ ܘܝܗܘܕܐ ܣܟܪܝܛܐ ܕܗܘ ܗܘܐ ܡܫܠܡܢܐ܂
10:05	ܘܫܕܪ ܡܪܢ ܗܠܝܢ ܬܪ̈ܥܣܪ ܬܠܡ̈ܝܕܘܗܝ ܘܦܩܕ ܐܢܘܢ ܘܐܡܪ ܠܗܘܢ ܒܐܘܪܚܐ ܕܥܡ̈ܡܐ ܠܐ ܬܐܙܠܘܢ ܘܠܟܪܟܐ ܕܫܡܪ̈ܝܐ ܠܐ ܬܥܠܘܢ
10:06	ܐܠܐ ܙܠܘ ܠܟܘܢ ܠܥܢܐ ܕܛܥܬ ܡܢ ܒܝܬ ܐܝܣܪܝܠ
10:07	ܘܡܐ ܕܐܙܠܬܘܢ ܐܟܪܙܘ ܘܐܡܪܘ ܩܪܒܬ ܡܠܟܘܬܐ ܕܫܡܝܐ
10:08	ܟܪܝܗܐ ܐܣܘ ܡܝ̈ܬܐ ܐܩܝܡܘ ܓܪܒܐ ܕܟܘ ܘܫܐ̈ܕܐ ܐܦܩܘ ܡܓܢ ܢܣܒܬܘܢ ܡܓܢ ܗܒܘ
10:09	ܠܐ ܬܩܢܘܢ ܠܟܘܢ ܕܗܒܐ ܘܟܣܦܐ ܘܐܦ ܠܐ ܢܚܫܐ ܒܟܝܣܝܟܘܢ
10:10	ܘܠܐ ܬܪܡܠܐ ܠܐܘܪܚܐ ܘܠܐ ܬܪܬܝܢ ܟܘܬܝܢܝܢ ܘܠܐ ܡܣܢܐ ܘܠܐ ܚܘܛܪܐ ܫܘܐ ܗܘ ܓܝܪ ܦܥܠܐ ܣܝܒܪܬܗ
10:11	ܠܐܝܢܐ ܟܪܟܐ ܕܥܠܝܢ ܐܢܬܘܢ ܗܘܝܬܘܢ ܫܐܠܝܢ ܡܢܘ ܫܘܐ ܘܬܡܢ ܗܘܘ ܥܕܡܐ ܕܢܦܩܝܢ ܐܢܬܘܢ
10:12	ܘܡܐ ܕܥܠܝܢ ܐܢܬܘܢ ܠܗ ܠܒܝܬܐ ܗܒܘ ܫܠܡܐ ܠܒܝܬܐ ܗܘ
10:13	ܘܐܢ ܕܫܘܐ ܒܝܬܐ ܗܘ ܫܠܡܟܘܢ ܢܗܘܐ ܥܠܘܗܝ ܘܐܠܐ ܫܠܡܟܘܢ ܥܠܝܟܘܢ ܢܬܘܒ
10:14	ܡܢ ܕܠܐ ܡܩܒܠ ܠܟܘܢ ܘܠܐ ܫܡܥ ܡܠܝܟܘܢ ܡܐ ܕܢܦܩܝܢ ܐܢܬܘܢ ܡܢ ܒܝܬܐ ܗܘ ܐܘ ܡܢ ܡܕܝܢܬܐ ܗܝ ܗܘܝܬܘܢ ܢܦܨܝܢ ܚܠܐ ܕܪ̈ܓܠܝܟܘܢ
10:15	ܘܐܡܝܢ ܐܡܪ ܐܢܐ ܠܟܘܢ ܕܠܐܪܥܐ ܕܣܕܘܡ ܘܕܥܡܘܪܐ ܢܗܘܐ ܦܫܝܚ ܒܝܘܡܐ ܕܕܝܢܐ ܝܬܝܪ ܡܢ ܕܠܟܪܟܐ ܗܘ܂

10:16	ܗܐ ܐܢܐ ܡܫܕܪ ܐܢܐ ܠܟܘܢ ܐܝܟ ܐܡܪܐ ܒܝܢܝ ܕܐܒ̈ܐ܂ ܗܘܘ ܗܟܝܠ ܥܪܝܡܝܢ ܐܝܟ ܚܘ̈ܘܬܐ ܘܬܡܝܡܝܢ ܐܝܟ ܝܘ̈ܢܐ܀

10:17	ܐܙܕܗܪܘ ܡܢ ܒܢ̈ܝ ܐܢܫܐ ܕܡܫܠܡܝܢ ܠܟܘܢ ܠܒܝܬ ܕܝܢܐ ܘܕܢܢܓܕܘܢܟܘܢ ܒܟܢܘܫܬܗܘܢ
10:18	ܘܩܕܡ ܡ̈ܠܟܐ ܘܗܓ̈ܡܘܢܐ ܬܩܘܡܘܢ܂ ܡܛܠ ܫܡܝ ܘܠܣܗܕܘܬܗܘܢ ܕܝܠܗܘܢ ܘܕܥܡܡ̈ܐ܂
10:19	ܡܐ ܕܡܩܪܒܝܢ ܠܟܘܢ ܠܐ ܬܐܨܦܘܢ ܡܢܐ ܬܐܡܪܘܢ ܡܬܝܗܒ ܠܟܘܢ ܓܝܪ ܒܗܝ ܫܥܬܐ ܡܐ ܕܬܐܡܪܘܢ
10:20	ܠܐ ܗܘܐ ܓܝܪ ܐܢܬܘܢ ܡܡܠܠܝܢ܂ ܐܠܐ ܪܘܚܐ ܗܝ ܕܐܒܘܟܘܢ ܡܡܠܠܐ ܒܟܘܢ܂
10:21	ܢܫܠܡ ܓܝܪ ܐܚܐ ܠܐܚܘܗܝ ܠܡܘܬܐ ܘܐܒܐ ܠܒܪܗ ܠܡܘܬܐ ܘܢܩܘܡܘܢ ܒܢ̈ܝܐ ܠܐܒܗܝܗܘܢ܂ ܘܢܡܝܬܘܢ ܐܢܘܢ
10:22	ܘܢܗܘܘܢ ܣܢܝܢ ܠܟܘܢ ܒܢܝ ܐܢܫܐ ܡܛܘܠ ܫܡܝ ܐܝܢܐ ܕܝܢ ܕܢܣܝܒܪ ܥܕܡܐ ܠܚܪܬܐ ܗܘ ܢܚܐ܀
10:23	ܡܐ ܕܪ̈ܕܦܝܢ ܠܟܘܢ ܒܗܢܐ ܟܪܟܐ܂ ܥܪܘܩܘ ܠܟܘܢ ܡܢܗ ܠܐܚܪܢܐ܂ ܘܐܢ ܒܐܚܪܢܐ ܪܕܦܝܢ ܠܟܘܢ ܥܪܘܩܘ ܠܟܘܢ ܠܐܚܪܢܐ܂ ܘܐܡܝܢ ܓܝܪ ܐܡܪ ܐܢܐ ܠܟܘܢ ܕܠܐ ܬܫܠܡܘܢ ܐܢܘܢ ܟܘܠܗܘܢ ܟܪ̈ܟܐ ܕܒܝܬ ܐܝܣܪܐܝܠ܂ ܥܕܡܐ ܕܢܐܬܐ ܒܪܗ ܕܐܢܫܐ܂
10:24	ܠܝܬ ܬܠܡܝܕܐ ܕܡܝܬܪ ܡܢ ܪܒܗ܂
10:25	ܟܕܘ ܠܗ ܠܬܠܡܝܕܐ ܕܢܗܘܐ ܐܝܟ ܪܒܗ܂ ܘܠܥܒܕܐ ܐܝܟ ܡܪܗ ܘܐܢ ܠܡܪܗ ܕܒܝܬܐ ܩܪܘ ܒܥܠܙܒܘܒ ܠܒܢ̈ܝ ܒܝܬܗ ܐܝܟܢܐ ܢܩܪܘܢ
10:26	ܠܐ ܗܟܝܠ ܬܕܚܠܘܢ ܡܢܗܘܢ ܠܝܬ ܓܝܪ ܡܕܡ ܕܟܣܐ ܕܠܐ ܢܬܓܠܐ܂ ܘܠܐ ܕܡܛܫܝ܂ ܕܠܐ ܢܬܝܕܥ
10:27	ܡܕܡ ܕܐܡܪܢܐ ܠܟܘܢ ܒܚܫܘܟܐ ܐܡܪܘܗܝ ܐܢܬܘܢ ܒܢܘܗܪܐ܂ ܘܡܕܡ ܕܫܡܥܝܢ ܐܢܬܘܢ ܒܐܕܢܝܟܘܢ ܐܟܪܙܘ ܥܠ ܐܓܪ̈ܐ܂
10:28	ܘܠܐ ܬܕܚܠܘܢ ܡܢ ܐܝܠܝܢ ܕܩܛܠܝܢ ܦܓܪܐ ܘܢܦܫܐ ܠܐ ܫܠܝܛܝܢ܂ ܠܡܩܛܠ܂ ܕܚܠܘ ܕܝܢ ܝܬܝܪܐܝܬ ܡܢ ܗܘ ܕܡܫܟܚ ܦܓܪܐ ܘܢܦܫܐ ܠܡܪܡܝܘ ܒܓܗܢܐ܂
10:29	ܬܪ̈ܬܝܢ ܨܦܪ̈ܝܢ ܡܙܕܒܢܢ ܒܐܣܪ ܘܚܕܐ ܡܢܗܝܢ ܒܠܥܕ ܡܢ ܐܒܘܟܘܢ ܠܐ ܢܦܠܐ ܥܠ ܐܪܥܐ܂
10:30	ܘܐܦܢ ܡܢ̈ܐ ܕܣܥܪ̈ܟܘܢ ܟܠܗܝܢ ܡܢ̈ܝܢ ܐܢ̈ܝܢ
10:31	ܠܐ ܗܟܝܠ ܬܕܚܠܘܢ ܡܛܠ ܡܢ ܨܦܪ̈ܐ ܣܓܝܐ ܝܬܝܪ̈ܝܢ ܐܢܬܘܢ
10:32	ܟܠ ܐܢܫ ܕܢܘܕܐ ܒܝ܂ ܐܦ ܐܘܕܐ ܒܗ ܩܕܡ ܐܒܝ ܕܒܫܡܝܐ
10:33	ܘܡܢ ܕܢܟܦܘܪ ܒܝ ܩܕܡ ܒܢܝ ܐܢܫܐ ܐܦ ܐܢܐ ܐܟܦܘܪ ܒܗ ܩܕܡ ܐܒܝ ܕܒܫܡܝܐ
10:34	ܠܐ ܬܣܒܪܘܢ ܕܫܝܢܐ ܐܬܝܬ ܕܐܪܡܐ ܒܐܪܥܐ ܠܐ ܐܬܝܬ ܕܐܪܡܐ ܫܝܢܐ ܐܠܐ ܣܝܦܐ
10:35	ܐܬܝܬ ܓܝܪ ܕܐܦܠܘܓ ܒܪܐ ܥܠ ܐܒܘܗܝ ܘܒܪܬܐ ܥܠ ܐܡܗ ܘܟܠܬܐ ܥܠ ܚܡܬܗ܂
10:36	ܘܒܥܠܕܒܒܘܗܝ ܕܓܒܪܐ ܒܢ̈ܝ ܒܝܬܗ܂
10:37	ܡܢ ܕܪܚܡ ܕܝܢ ܠܐܒܘܗܝ ܘܠܐܡܗ ܝܬܝܪ ܡܢ ܕܠܝ ܗܘ ܠܐ ܫܘܐ ܠܝ܂ ܘܡܢ ܕܪܚܡ ܒܪܗ ܐܘ ܒܪܬܗ܂ ܝܬܝܪ ܡܢ ܕܠܝ ܗܘ ܠܐ ܫܘܐ ܠܝ
10:38	ܘܟܠ ܕܠܐ ܫܩܠ ܙܩܝܦܗ ܘܐܬܐ ܒܬܪܝ ܠܐ ܫܘܐ ܠܝ
10:39	ܟܠ ܕܢܫܟܚ ܓܝܪ ܢܦܫܗ܂ ܢܘܒܕܝܗ ܘܟܠ ܕܢܘܒܕ ܢܦܫܗ ܡܛܘܠܬܝ ܢܫܟܚܝܗ܂
10:40	ܡܢ ܕܡܩܒܠ ܠܟܘܢ ܠܝ ܗܘ ܡܩܒܠ܂ ܘܡܢ ܕܠܝ ܡܩܒܠ ܡܩܒܠ ܠܡܢ ܕܫܕܪܢܝ܂
10:41	ܡܢ ܕܡܩܒܠ ܓܝܪ ܢܒܝܐ ܒܫܡ ܢܒܝܐ ܐܓܪܐ ܕܢܒܝܐ ܡܩܒܠ ܘܡܢ ܕܡܩܒܠ ܙܕܝܩܐ ܒܫܡ ܙܕܝܩܐ ܐܓܪܐ ܕܙܕܝܩܐ ܢܣܒ܂
10:42	ܘܟܠ ܡܢ ܕܢܫܩܐ ܟܣܐ ܕܡܝ̈ܐ ܩܪ̈ܝܪܐ ܠܚܕ ܡܢ ܗܠܝܢ ܙܥܘܪ̈ܐ ܒܫܡܐ ܕܬܠܡܝܕܘܬܐ ܐܡܝܢ ܐܡܪܢܐ ܠܟܘܢ ܕܠܐ ܢܐܒܕ ܐܓܪܗ܀