The Comprehensive Aramaic Lexicon

13:01	ܒܗܘ ܝܘܡܐ ܢܦܩ ܗܘܐ ܝܫܘܥ ܝܬܒ ܥܠ ܝܕ ܝܡܐ
13:02	ܘܐܬܟܢܫܘ ܠܘܬܗ ܟܢܫܐ ܣܓܝ̈ܐܐ ܘܣܠܩ ܘܝܬܒ ܠܗ ܒܣܦܝܢܬܐ ܘܟܘܠܗ ܟܢܫܐ ܩܐܡ ܗܘܐ ܥܠ ܣܦܪܝ ܝܡܐ
13:03	ܘܡܡܠܠ ܥܡܗܘܢ ܣܓܝ ܒܦܠܐ̈ܬܐ ܘܐܡܪ ܗܘܐ ܗܐ ܢܦܩ ܙܪܘܥܐ ܠܡܙܪܥ ܙܪܥܐ܂
13:04	ܘܟܕ ܙܪܥ܂ ܐܝܬ ܕܢܦܠ ܥܠ ܝܕ ܐܘܪܚܐ܂ ܘܐܬܬ ܚܝܘܬ ܟܢܦܐ ܠܩܛܬܗ
13:05	ܘܐܝܬ ܕܢܦܠ ܥܠ ܫܘܥܐ ܘܡܛܠ ܕܕܩܩܐ ܗܘܐ ܘܠܝܬ ܥܦܪܐ ܣܓܝܐܐ ܒܪ ܫܥܬܗ ܫܘܚ
13:06	ܘܒܨܡܚܐ ܕܫܡܫܐ ܕܗܘܐ ܥܠܝܗ ܫܒ ܘܡܛܠ ܕܠܐ ܐܪܡܝ ܥܩܪܐ ܝܒܫ
13:07	ܘܐܚܪܢܐ ܢܦܠ ܒܝܬ ܟܘܒ̈ܐ ܘܝܥܘ ܟܘܒ̈ܐ ܥܡܗ ܘܚܢܩܘܗܝ
13:08	ܘܐܚܪܢܐ ܕܝܢ ܢܦܠ ܒܐܪܥܐ ܛܒܬܐ ܘܝܗܒ ܦ̈ܐܪܐ ܐܝܬ ܕܡ̈ܐܐ ܘܐܝܬ ܕܫ̈ܬܝܢ ܘܐܝܬ ܕܬܠܬܝܢ
13:09	ܟܠ ܕܐܝܬ ܠܗ ܐܕܢܐ ܢܫܡܥ
13:10	ܘܩܪܒܘ ܬܠܡܝܕ̈ܘܗܝ ܘܐܡܪܝܢ ܠܗ ܡܢܐ ܗܘ ܕܒܦܠܐܬܐ ܡܡܠܠ ܐܢܬ ܥܡܗܘܢ܂
13:11	ܗܘ ܕܝܢ ܥܢܐ ܘܐܡܪ ܠܗܘܢ ܡܛܘܠ ܕܠܟܘܢ ܗܘ ܝܗܝܒ ܠܡܕܥ ܐܪܙܐ ܕܡܠܟܘܬܐ ܠܗܢܘܢ ܕܝܢ ܠܐ ܝܗܝܒ ܠܗܘܢ
13:12	ܡܢ ܕܐܝܬ ܓܝܪ ܢܬܝܗܒ ܠܗ
13:13	ܘܡܢ ܕܠܝܬ ܠܗ ܘܐܦ ܗܘ ܡܕܡ ܕܐܝܬ ܠܗ ܢܬܢܣܒ ܡܢܗ ܡܛܠ ܗܢܐ ܒܦܠܐܬܐ ܡܡܠܠ ܐܢܐ ܥܡܗܘܢ ܕܡܕܡ ܕܚܙܝܢ ܠܐ ܢܚܙܘܢ ܘܡܕܡ ܕܫܡܥܝܢ ܠܐ ܢܫܡܥܘܢ ܘܠܐ ܢܣܬܟܠܘܢ܂ ܕܠܐ ܡܡܬܘܡ ܢܬܦܢܘܢ
13:14	ܕܬܫܠܡ ܥܠܝܗܘܢ ܢܒܝܘܬܗ ܕܐܫܥܝܐ ܢܒܝܐ܂ ܕܐܡܪ ܗܘܐ ܫܡܥܐ ܬܫܡܥܘܢ ܘܠܐ ܬܣܬܟܠܘܢ܂ ܘܡܚܙܐ ܬܚܙܘܢ ܘܠܐ ܬܚܙܘܢ܂
13:15	ܐܬܥܒܝ ܠܗ ܓܝܪ ܠܒܗ ܕܥܡܐ ܗܢܐ ܘܐ̈ܕܢܝܗܘܢ ܐܘܩܪܘ ܕܠܐ ܢܫܡܥܘܢ ܘܥܝܢ̈ܝܗܘܢ ܥܡܨܘ ܕܠܐ ܢܚܙܘܢ ܒܥܝܢ̈ܝܗܘܢ ܘܢܫܡܥܘܢ ܒܐܕܢܝܗܘܢ ܘܢܣܬܟܠܘܢ ܒܠܒܗܘܢ܀
13:16	ܕܝܠܟܘܢ ܕܝܢ ܛܘܒ̈ܝܗܝܢ ܠܥܝܢܝܟܘܢ ܕܚܙܝܢ܂ ܛܘܒܝܗܝܢ ܠܐܕܢ̈ܝܟܘܢ ܕܫܡܥܢ
13:17	ܐܡܝܢ ܓܝܪ ܐܡܪܢܐ ܠܟܘܢ ܕܣܓܝܐܐ ܢܒ̈ܝܐ ܘܙܕܝܩܐ ܐܬܪܓܪܓܘ ܠܡܚܙܐ ܡܕܡ ܕܐܢܬܘܢ ܚܙܝܢ ܘܠܐ ܚܙܘ ܘܠܡܫܡܥ ܡܕܡ ܕܐܢܬܘܢ ܫܡܥܝܢ ܘܠܐ ܫܡܥܘ
13:18	ܐܢܬܘܢ ܗܟܝܠ ܫܡܥܘ ܡܬܠܐ ܕܙܪܘܥܐ
13:19	ܟܘܠ ܐܢܫ ܕܫܡܥ ܡܠܬܐ ܕܡܠܟܘܬܐ ܘܠܐ ܡܣܬܟܠ ܐܬܐ ܒܝܫܐ ܘܚܛܦ ܠܗ ܠܙܪܥܐ ܡܢ ܠܒܗ ܗܢܘ ܕܐܙܕܪܥ ܥܠ ܝܕ ܐܘܪܚܐ
13:20	ܘܗܘ ܕܐܙܕܪܥ ܥܠ ܫܘܥܐ ܗܢܘ ܕܫܡܥ ܡܠܬܐ ܘܒܚܕܘܬܐ ܡܩܒܠ ܠܗ܂
13:21	ܡܛܠ ܕܠܝܬ ܠܗ ܥܩܪܐ ܒܗ ܙܒܢ ܙܥܘܪ ܩܐܡ ܒܗ ܡܐ ܕܗܘܐ ܕܝܢ ܐܘܠܨܢܐ ܐܘ ܪܕܘܦܝܐ ܡܛܠ ܡܠܬܐ ܥܓܠ ܡܬܟܫܠ
13:22	ܘܗܘ ܕܢܦܠ ܒܝܬ ܟܘܒ̈ܐ ܗܢܘ ܕܫܡܥ ܡܠܬܐ ܘܒܪܢܝܐ ܗܘ ܕܥܠܡܐ ܗܢܐ ܘܒܛܥܝܝ ܕܥܘܬܪܐ܂ ܘܗܠܝܢ ܚܢ̈ܩܝܢ ܠܗ ܘܕܠܐ ܦܐܪ̈ܝܢ ܗܘܐ܂
13:23	ܘܗܘ ܕܢܦܠ ܒܐܪܥܐ ܛܒܬܐ ܗܘ ܗܘ ܕܫܡܥ ܡܠܬܐ ܘܡܣܬܟܠ ܒܗ ܘܗܝܕܝܢ ܝܗܒ ܦܐܪ̈ܐ ܘܥܒܕ ܐܝܬ ܕܡ̈ܐܐ ܘܐܝܬ ܕܫܬܝܢ ܘܐܝܬ ܕܬܠܬܝܢ
13:24	ܬܘܒ ܐܘܣܦ ܘܐܡܪ ܠܗܘܢ ܡܬܠܐ ܐܚܪܢܐ ܕܡܝܐ ܡܠܟܘܬܐ ܕܫܡܝܐ ܠܓܒܪܐ ܕܙܪܥ ܙܪܥܐ ܛܒܐ ܒܩܪܝܬܗ
13:25	ܘܟܕ ܕܡܟܘ ܐܢܫܐ ܐܬܐ ܒܥܠܕܒܒܐ ܘܙܪܥ ܙܝܙܢܐ ܒܝܬ ܚ̈ܛܐ ܘܐܙܠ
13:26	ܘܟܕ ܝܥܐ ܥܣܒܐ ܘܥܒܕ ܦܐܪ̈ܐ ܐܬܚܙܝܘ ܙܝܙܢܐ
13:27	ܩܪܒܘ ܥܒܕܐ ܠܘܬ ܡܪܗܘܢ ܘܐܡܪ̈ܝܢ ܠܗ ܡܪܢ ܠܐ ܙܪܥܐ ܛܒܐ ܙܪܥܬ ܒܩܪܝܬܟ ܡܢ ܐܝܡܟܐ ܒܗ ܙܝܙܢܐ
13:28	ܐܡܪ ܠܗܘܢ ܓܒܪܐ ܒܥܠܕܒܒܐ ܥܒܕ ܗܕܐ ܐܡܪ̈ܝܢ ܠܗ ܥܒܕ̈ܘܗܝ ܐܢ ܨܒܐ ܐܢܬ ܢܐܙܠ ܢܠܩܘܛ ܐܢܘܢ
13:29	ܐܡܪ ܠܗܘܢ ܠܐ ܕܠܡܐ ܟܕ ܠܩܛܝܢ ܐܢܬܘܢ ܙܝܙ̈ܢܐ ܬܥܩܪܘܢ ܐܦ ܚܛܐ ܥܡܗܘܢ܂
13:30	ܐܠܐ ܫܒܘܩܘ ܪܒܝܢ ܐܟܚܕܐ ܥܕܡܐ ܠܚܨܕܐ ܘܒܗܘ ܙܒܢܐ ܕܚܨܕܐ ܐܡܪ ܐܢܐ ܠܚܨܘܕ̈ܐ ܠܩܛܘ ܠܘܩܕܡ ܙܝܙ̈ܢܐ ܘܐܣܘܪܘ ܐܢܘܢ ܡܣܪܝܬܐ ܐܝܟ ܕܠܢܘܪܐ ܘܚ̈ܛܐ ܟܢܫܘ ܐܢܝܢ ܠܐܘܨܪ̈ܐ܀
13:31	ܘܐܡܪ ܗܘܐ ܠܗܘܢ ܡܬܠܐ ܐܚܪܢܐ ܕܡܝܐ ܡܠܟܘܬܐ ܕܫܡܝܐ ܠܦܪܕܬܐ ܕܚܪܕܠܐ ܕܢܣܒ ܓܒܪܐ ܙܪܥܗ ܒܩܪܝܬܗ
13:32	ܘܙܥܘܪܝܐ ܗܝ ܡܢ ܟܠܗܘܢ ܙܪܥܘܢܐ܂ ܘܡܐ ܕܪܒܬ ܪܒܐ ܗܝ ܡܢ ܟܘܠܗܘܢ ܝܪ̈ܩܘܢܐ ܘܗܘܝܐ ܐܝܠܢܐ ܘܐܬܝܐ ܚܝܘܬ ܟܢܦܐ ܘܫܟܢܐ ܒܣܘܟܝܗ܃
13:33	ܡܬܠܐ ܐܚܪܢܐ ܕܡܝܐ ܡܠܟܘܬܐ ܕܫܡܝܐ ܠܚܡܝܪܐ ܕܢܣܒܬ ܐܢܬܬܐ ܐܛܫܝܬ ܒ̈ܬܠܬ ܣܐܝܢ ܩܡܚܐ ܥܕܡܐ ܕܗܘܐ ܟܘܠܗ ܚܡܝܪܐ
13:34	ܗܠܝܢ ܟܠܗܝܢ ܡܠܠ ܝܫܘܥ ܠܟܢܫܐ ܒܦܠܐ̈ܬܐ ܘܕܠܐ ܦܠܐܬܐ ܠܐ ܡܡܠܠ ܗܘܐ ܥܡܗܘܢ
13:35	ܕܢܬܡܠܐ ܡܕܡ ܕܐܬܡܠܠ ܒܢܒܝܐ ܕܐܡܪ ܗܘܐ ܐܦܬܚ ܦܡܝ ܒܡ̈ܬܠܐ ܘܐܡܪ ܟܣ̈ܝܬܐ ܕܡܢ ܩܕܝܡ܀
13:36	ܗܝܕܝܢ ܫܒܩ ܠܟܢܫܐ ܘܐܬܐ ܠܒܝܬܐ ܘܩܪܒܘ ܬܠܡ̈ܝܕܘܗܝ ܘܐܡܪ̈ܝܢ ܠܗ ܦܫܩ ܠܢ ܡܬܠܐ ܗܘ ܕܙܝܙ̈ܢܐ ܕܩܪܝܬܐ
13:37	ܗܘ ܕܝܢ ܥܢܐ ܘܐܡܪ ܠܗܘܢ ܙܪܘܥܗ ܕܙܪܥܐ ܛܒܐ ܒܪܗ ܗܘ ܕܐܢܫܐ
13:38	ܘܩܪܝܬܐ ܥܠܡܐ ܗܝ܂ ܘܙܪܥܐ ܛܒܐ ܗܠܝܢ ܐܢܘܢ ܒܢ̈ܝܗ ܕܡܠܟܘܬܐ ܘܙܝܙ̈ܢܐ ܒܢܘ̈ܗܝ ܐܢܘܢ ܕܒܝܫܐ܂
13:39	ܘܙܪܘܥܗܘܢ ܗܘܝܘ ܒܝܫܐ ܘܚܨܕܐ ܫܘܠܡܗ ܕܥܠܡܐ ܘܚܨܘ̈ܕܐ ܡܠܐܟܐ
13:40	ܐܟܙܢܐ ܗܟܝܠ ܕܡܬܠܩܛܝܢ ܙܝܙܢ̈ܐ ܘܝܩܕܝܢ ܒܢܘܪܐ ܗܟܢܐ ܢܗܘܐ ܒܫܘܠܡܗ ܕܥܠܡܐ܂
13:41	ܢܫܕܪ ܒܪܗ ܕܐܢܫܐ ܡܠܐܟܘܗܝ ܘܢܓܒܘܢ ܡܢ ܒܝܬ ܡܠܟܘܬܗ ܟܘܠܗܘܢ ܟܫܠܐ ܘܟܠܗܘܢ ܥ̈ܒܕܝ ܥܘܠܐ
13:42	ܘܢܪܡܘܢ ܐܢܘܢ ܒܐܬܘܢܐ ܕܢܘܪܐ ܬܡܢ ܢܗܘܐ ܒܟܝܐ ܘܚܘܪܩ ܫ̈ܢܐ
13:43	ܘܗܝܕܝܢ ܙܕܝܩ̈ܐ ܢܢܗܪܘܢ ܒܡܠܟܘܬܐ ܕܐܒܘܗܘܢ܂ ܡܢ ܕܐܝܬ ܠܗ ܐܕܢܐ ܕܢܫܡܥ ܢܫܡܥ܀
13:44	ܕܡܝܐ ܡܠܟܘܬܐ ܕܫܡܝܐ ܠܣܝܡܬܐ ܕܣܝܡܐ ܒܩܪܝܬܐ܂ ܕܡܢ ܕܐܫܟܚܗ ܛܫܝܗ܂ ܘܒܚܕܘܬܗ܂ ܐܙܠ ܙܒܢ ܟܠ ܕܐܝܬ ܠܗ ܘܙܒܢ ܠܗ ܠܩܪܝܬܐ ܗܝ܀
13:45	ܬܘܒ ܕܡܝܐ ܡܠܟܘܬܐ ܕܫܡܝܐ ܠܓܒܪܐ ܬܓܪܐ ܕܒܥܐ ܗܘܐ ܡܪܓܢܝܬܐ
13:46	ܘܟܕ ܐܫܟܚ ܡܪܓܢܝܬܐ ܚܕܐ ܛܒܬܐ ܘܝܩܝܪܬ ܕܡܝܐ ܐܙܠ ܙܒܢ ܟܠ ܡܐ ܕܐܝܬ ܠܗ ܘܙܒܢܗ ܠܗ܀
13:47	ܬܘܒ ܕܡܝܐ ܡܠܟܘܬܐ ܕܫܡܝܐ ܠܡܨܝܕܬܐ ܪܒܬܐ ܕܢܦܠܬ ܒܝܡܐ ܘܡܢ ܟܠ ܓܢܣ ܟܢܫܬ
13:48	ܟܕ ܡܠܘܘܗ ܕܝܢ ܢܓܕܘܗ ܠܣܦܪܝ ܝܡܐ ܘܝܬܒܘ ܓܒܝܘ ܢܘ̈ܢܐ ܕܛܒ̈ܝܢ ܛܒܝܢ ܘܕܫܦܠܝܢ ܫܕܘ ܐܢܘܢ ܠܒܪ
13:49	ܗܟܢܐ ܢܗܘܐ ܒܣܘܦܗ ܕܥܠܡܐ ܢܦܩܘܢ ܡܠܐܟܐ ܘܢܦܪܫܘܢ ܠܒܝܫ̈ܐ ܡܢ ܒܝܢܬ ܙܕܝܩ̈ܐ
13:50	ܘܢܪܡܘܢ ܐܢܘܢ ܒܐܬܘܢܐ ܕܢܘܪܐ ܬܡܢ ܢܗܘܐ ܒܟܝܐ ܘܚܘܪܩ ܫܢܐ
13:51	ܐܣܬܟܠܬܘܢ ܗܠܝܢ ܟܠܗܝܢ ܐܡܪܝܢ ܠܗ ܐܝܢ

13:52	ܐܡܪ ܠܗܘܢ ܡܛܠ ܗܢܐ ܟܠ ܣܦܪܐ ܕܡܬܠܡܕ ܠܡܠܟܘܬ ܫܡܝܐ ܕܡܐ ܠܓܒܪܐ ܡܪܒܝܬܐ ܕܡܦܩ ܡܢ ܣܝܡܬܗ ܚܕܬܐ ܘܥܬܝܩܐ܂

13:53	ܘܟܕ ܫܠܡ ܝܫܘܥ ܡܬ̈ܠܐ ܗܠܝܢ ܫܢܝ ܠܗ ܡܢ ܬܡܢ
13:54	ܘܐܬܐ ܠܗ ܠܡܕܝܢܬܗ܂ ܘܡܠܦ ܗܘܐ ܠܗܘܢ ܒܟܢܘ̈ܫܬܗܘܢ ܐܝܟ ܕܢܬܡܗܘܢ܂ ܘܐܡܪܝܢ ܐܝܡܟܐ ܠܗ ܠܗܢܐ ܗܕܐ ܚܟܡܬܐ ܟܠܗ ܘܚܝܠܐ
13:55	ܠܐ ܗܘܐ ܗܢܐ ܒܪ ܝܘܣܦ ܘܫܡܗ ܠܐܡܗ ܡܪܝܡ ܘܐܚܘܗܝ ܝܥܩܘܒ ܘܝܘܣܦ ܘܫܡܥܘܢ ܘܝܗܘܕܐ
13:56	ܘܐܚܘܬܗ ܟܠܗܝܢ ܠܘܬܢ܂ ܡܢ ܐܝܡܟܐ ܠܗ ܗܠܝܢ ܟܠܗܝܢ ܠܗܢܐ
13:57	ܘܡܬܟܫܠܝܢ ܗܘܘ ܒܗ ܝܫܘܥ ܕܝܢ ܐܡܪ ܠܗܘܢ ܠܝܬ ܢܒܝܐ ܕܡܨܛܥܪ ܐܠܐ ܒܡܕܝܢܬܗ ܘܒܒܝܬܗ
13:58	ܘܠܐ ܥܒܕ ܬܡܢ ܚܝܠܐ ܣܓܝܐܐ ܡܛܠ ܚܣܝܪܘܬ ܗܝܡܢܘܬܗܘܢ܀