← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


14:01 ܒܙܒܢܐ ܕܝܢ ܫܡܥ ܗܪܘܕܣ ܪܫܐ ܪܒܝܥܝܐ ܫܡܥܗ ܕܝܫܘܥ܂
14:02 ܘܐܡܪ ܠܥܒ̈ܕܘܗܝ܂ ܗܢܘ ܝܘܚܢܢ ܡܥܡܕܢܐ ܩܡ ܡܢ ܒܝܬ ܡܝܬܐ ܡܛܠ ܗܢܐ ܣܓܝ ܚܝܠܗ܂
14:03 ܗܪܘܕܣ ܓܝܪ ܐܚܕܗ ܗܘܐ ܠܝܘܚܢܢ ܘܐܪܡܝܗ ܒܝܬ ܐܣܝܪ̈ܐ ܡܛܠ ܗܪܘܕܝܐ ܐܢܬܬ ܦܝܠܦܘܣ ܐܚܘܗܝ܂
14:04 ܐܡܪ ܗܘܐ ܠܗ ܓܝܪ ܝܘܚܢܢ ܕܠܐ ܫܠܝܛ ܠܟ ܠܡܣܒܗ܂
14:05 ܘܨܒܐ ܗܘܐ ܠܡܩܛܠܗ ܘܕܚܠ ܗܘܐ ܡܢ ܥܡܗ ܡܛܠ ܕܐܝܟ ܕܠܢܒܝܐ ܐܚܝܕܝܢ ܗܘܘ ܠܗ
14:06 ܘܟܕ ܗܘܐ ܒܝܬ ܝܠܕܗ ܕܗܪܘܕܣ ܥܠܬ ܪܩܕܬ ܒܪܬܗ ܕܗܪܘܕܝܐ ܘܫܦܪܬ ܠܗܪܘܕܣ
14:07 ܘܐܫܬܘܕܝ ܠܗ ܒܡܘܡܬܐ ܕܟܠ ܡܐ ܕܬܫܐܠܝܘܗܝ ܢܬܠ ܠܗ
14:08 ܗܝ ܕܝܢ ܡܛܠ ܕܡܠܦܐ ܗܘܬ ܡܢ ܐܡܗ ܐܡܪܬ ܗܒ ܠܝ ܗܪܟܐ ܒܦܝܢܟܐ ܪܫܗ ܕܝܘܚܢܢ ܡܥܡܕܢܐ
14:09 ܘܟܪܝܬ ܠܗ ܠܡܠܟܐ ܘܡܛܠ ܡܘܡܬܐ ܘܡܛܠ ܣܡܝܟܐ ܦܩܕ ܕܢܬܝܗܒ ܠܗ݀
14:10 ܘܫܕܪ ܫܩܠ ܪܫܗ ܕܝܘܚܢܢ ܡܢ ܒܝܬ ܐܣܝܪ̈ܐ
14:11 ܘܐܝܬܝܘ ܪܫܗ ܕܝܘܚܢܢ ܒܦܝܢܟܐ ܘܐܬܝܗܒ ܠܗ ܠܛܠܝܬܐ ܘܗܝ ܐܘܒܠܬܗ ܠܐܡܗ݀
14:12 ܘܫܩܠܘ ܬܠܡܝܕܘܗܝ ܫܠܕܗ ܘܩܒܪܘܗܝ ܘܐܬܘ ܚܘܝܘ ܠܝܫܘܥ܂
14:13 ܝܫܘܥ ܕܝܢ ܟܕ ܫܡܥ ܫܢܝ ܡܢ ܬܡܢ ܠܐܬܪܐ ܚܘܪܒܐ ܒܠܚܘܕܘܗܝ ܘܟܕ ܫܡܥܘ ܟܢܫܐ ܕܡܢ ܡ̈ܕܝܢܬܐ ܐܙܠܘ ܠܗܘܢ ܒܬܪܗ ܒܪܓܠ܂
14:14 ܘܟܕ ܐܬܟܢܫ ܣ̈ܓܝܐܐ ܐܬܪܚܡ ܥܠܝܗܘܢ ܘܠܟܪܝܗܝܗܘܢ ܐܣܝ܂
14:15 ܘܟܕ ܗܘܐ ܪܡܫܐ ܐܡܪܝܢ ܠܗ ܬܠܡܝܕܘܗܝ ܐܬܪܐ ܚܘܪܒ ܫܪܝ ܠܟܢܫܐ ܢܐܙܠܘܢ ܠܩܘܪ̈ܝܐ ܕܢܙܒܢܘܢ ܠܗܘܢ ܣܝܒܪܬܐ
14:16 ܐܡܪ ܠܗܘܢ ܠܐ ܡܬܒܥܐ ܠܗܘܢ ܠܡܐܙܠ ܗܒܘ ܠܗܘܢ ܐܢܬܘܢ ܠܡܠܥܣ
14:17 ܐܡܪܝܢ ܠܗ ܠܝܬ ܬܢܢ ܂܂܂ ܂܂܂ ܚܡܫ ܂܂܂ ܘܬܪܝܢ ܢܘܢܝܢ
14:18 ܐܡܪ ܠܗܘܢ ܐܝܬܘ ܐܢܘܢ ܠܝ
14:19 ܘܦܩܕ ܠܟܢܫܐ ܕܢܣܬܡܟܘܢ ܥܠ ܝܘܪܩܐ ܘܫܩܠ ܠܗܠܝܢ ܚܡܫ ܓܪܝܨܢ ܘܬܪ̈ܝܢ ܢܘܢܝܢ ܘܚܪ ܒܫܡܝܐ ܘܒܪܟ ܘܩܨܐ ܠܚܡܐ ܘܝܗܒ ܠܬܠܡܝܕܘܗܝ ܘܬܠܡܝܕܘܗܝ ܝܗܒܘ ܠܟܢܫܐ
14:20 ܘܐܟܠܘ ܟܠܗܘܢ ܘܣܒܥܘ ܘܫܩܠܘ ܬܘܬܪ̈ܐ ܕܩܨܝܐ ܡܢ ܩܕܡܝܗܘܢ ܬܪܥܣܪ ܩܘܦܝܢܝܢ ܟܕ ܡܠܝܢ܂
14:21 ܗܘܝܢ ܗܘܘ ܕܝܢ ܗܢܘܢ ܕܐܟܠܘ ܚܡܫܐ ܐܠܦܝܢ ܣܛܪ ܡܢ ܛܠܝ̈ܐ ܘܢܫܐ܂
14:22 ܘܦܩܕ ܠܬܠܡܝܕܘܗܝ ܕܢܬܒܘܢ ܒܐܠܦܐ ܘܢܩܕܡܘܢܗ ܠܥܒܪܐ ܕܝܡܬܐ ܥܕ ܫܪܐ ܠܟܢܫܐ ܗܢܘܢ
14:23 ܘܟܕ ܫܪܐ ܐܢܘܢ ܣܠܩ ܠܛܘܪܐ ܒܠܚܘܕܘܗܝ ܠܡܨܠܝܘ ܘܟܕ ܗܘܐ ܪܡܫܐ ܒܠܚܘܕܘܗܝ ܗܘܐ ܬܡܢ
14:24 ܘܣܦܝܢܬܐ ܂܂܂ ܂܂܂ ܂܂܂ ܂܂܂ ܂܂܂ ܂܂܂ ܗܘܬ ܂܂܂ ܂܂܂ ܂܂܂ ܂܂܂ ܂܂܂ ܘܐܫܬܓܫܬ ܥܠܝܗܘܢ ܝܡܬܐ ܡܛܠ ܕܪܘܚܐ ܠܩܒܠܗܘܢ ܗܘܬ
14:25 ܒܡܛܪܬܐ ܕܝܢ ܪܒܝܥܝܬܐ ܕܠܠܝܐ ܐܬܐ ܠܘܬܗܘܢ ܝܫܘܥ ܟܕ ܡܗܠܟ ܥܠ ܡܝܐ
14:26 ܟܕ ܚܙܘ ܕܡܗܠܟ ܥܠ ܓܠܠܝ ܝܡܐ ܐܬܙܝܥܘ ܘܐܡܪ̈ܝܢ ܕܫܐܕܐ ܗܘ ܘܡܢ ܕܚܠܬܗܘܢ ܝܗܒܘ ܩܠܐ܂
14:27 ܘܝܫܘܥ ܡܚܕܐ ܡܠܠ ܥܡܗܘܢ ܘܐܡܪ ܬܪܣܘ ܐܢܐ ܐܢܐ ܠܐ ܬܕܚܠܘܢ
14:28 ܥܢܐ ܫܡܥܘܢ ܟܐܦܐ ܘܐܡܪ ܠܗ ܐܢ ܐܢܬ ܗܘ ܐܦܣ ܕܐܬܐ ܠܘܬܟ ܥܠ ܡܝܐ
14:29 ܗܘ ܕܝܢ ܐܡܪ ܠܗ ܬܐ ܘܢܚܬ ܫܡܥܘܢ ܟܐܦܐ ܡܢ ܣܦܝܢܬܐ ܘܡܗܠܟ ܗܘܐ ܥܠ ܡܝܐ ܘܐܬܐ ܠܘܬ ܝܫܘܥ
14:30 ܟܕ ܚܙܐ ܪܘܚܐ ܕܥܫܝܢܐ ܕܚܠ ܘܫܪܝ ܠܡܛܒܥ ܘܩܪܐ ܒܩܠܐ ܪܡܐ ܘܐܡܪ ܡܪܝ ܐܚܢܝ
14:31 ܝܫܘܥ ܡܚܕܐ ܐܘܫܛ ܐܝܕܗ ܘܐܚܕܗ ܘܐܡܪ ܠܗ ܙܥܘܪ ܗܝܡܢܘܬܐ ܂܂܂ ܐܬܦܠܓܬ
14:32 ܘܟܕ ܣܠܩܘ ܠܣܦܝܢܬܐ ܦܣܩܬ ܪܘܚܐ
14:33 ܘܩܪܒܘ ܗܢܘܢ ܕܒܣܦܝܢܬܐ ܣܓܕܘ ܠܗ ܘܐܡܪܝܢ ܫܪܝܪܐܝܬ ܐܢܬ ܗܘ ܒܪܗ ܕܐܠܗܐ܀
14:34 ܘܟܕ ܣܠܩܘ ܠܝܒܫܐ ܐܬܘ ܠܓܢܣܪ܂
14:35 ܘܐܫܬܘܕܥܘܗܝ ܒ̈ܢܝ ܐܬܪܐ ܗܘ ܫܕܪܘ ܠܐܬܪܗܘܢ܂ ܘܐܝܬܝܘ ܠܗ ܟܠܗܘܢ ܐܝܠܝܢ ܕܒܝܫ ܒܝܫ ܥܒܝܕܝܢ ܗܘܘ
14:36 ܘܒܥܝܢ ܗܘܘ ܡܢܗ ܕܢܩܪܒܘܢ ܠܟܢܦܐ ܕܡܪܛܘܛܗ ܒܠܚܘܕ ܘܟܠ ܐܝܠܝܢ ܕܩܪܒܝܢ ܗܘܘ ܚܝܝܢ ܗܘܘ܀

next chapter