The Comprehensive Aramaic Lexicon

15:01	ܗܝܕܝܢ ܩܪܒܘ ܠܗ ܡܢ ܐܘܪܫܠܡ ܣܦܪ̈ܐ ܘܦܪ̈ܝܫܐ ܘܐܡܪܝܢ ܠܗ܂
15:02	ܠܡܢܐ ܥܒܪܝܢ ܬܠܡܝܕܝܟ ܥܠ ܦܘܩܕܢܐ ܕܣܒܝܢ ܠܐ ܓܝܪ ܡܫܝܓܝܢ ܐܝܕܝܗܘܢ ܘܐܟܠܝܢ ܠܚܡܐ
15:03	ܗܘ ܕܝܢ ܥܢܐ ܘܐܡܪ ܠܗܘܢ ܠܡܢܐ ܐܦ ܐܢܬܘܢ ܥܒܪܝܢ ܐܢܬܘܢ ܥܠ ܦܘܩܕܢܐ ܕܐܠܗܐ ܡܛܠ ܦܘܩܕܢܝܟܘܢ܂
15:04	ܐܠܗܐ ܓܝܪ ܐܡܪ ܝܩܪ ܠܐܒܘܟ ܘܠܐܡܟ ܘܡܢ ܕܡܨܚܐ ܠܐܒܘܗܝ ܘܠܐܡܗ ܡܡܬ ܢܡܘܬ܂
15:05	ܐܢܬܘܢ ܕܝܢ ܐܡܪ̈ܝܢ܂ ܐܢܬܘܢ ܕܡܢ ܕܢܐܡܪ ܠܐܒܘܗܝ ܘܠܐܡܗ ܩܘܪܒܢ ܐܢ ܬܬܗܢܐ ܡܢܝ܂ ܘܗܢܐ ܠܐ ܠܐܒܘܗܝ ܘܠܐ ܠܐܡܗ ܡܝܩܪ܂
15:06	ܘܒܛܠܬܘܢ ܡܠܬܐ ܕܐܠܗܐ ܡܛܠ ܦܘܩܕܢܝܟܘܢ܂
15:07	ܢܣܒܝ ܒܐܦܐ ܫܦܝܪ ܐܬܢܒܝ ܥܠܝܟܘܢ ܐܫܥܝܐ ܢܒܝܐ ܕܐܡܪ ܗܘܐ
15:08	ܥܡܐ ܗܢܐ ܒܣܦܘܬܗ ܗܘ ܡܝܩܪ ܠܝ܂ ܘܒܠܒܗ ܪܚܝܩ ܡܢܝ܂
15:09	ܣܪܝܩܐܝܬ ܕܝܢ ܕܚܠܝܢ ܠܝ ܡܠܦܝܢ ܝܘܠܦܢܐ ܕܦܘܩܕܢܐ ܕܒܢܝ ܐܢܫܐ܀
15:10	ܘܩܪܐ ܠܟܢ̈ܫܐ ܘܐܡܪ ܠܗܘܢ ܫܡܥܘ ܘܐܣܬܟܠܘ
15:11	ܕܠܐ ܗܘܐ ܡܕܡ ܕܥܐܠ ܠܦܘܡܐ ܡܣܝܒ ܠܗ ܠܒܪ ܐܢܫܐ ܐܠܐ ܡܕܡ ܕܢܦܩ ܡܢ ܦܘܡܐ܂ ܗܘ ܡܣܝܒ ܠܗ ܠܒܪ ܐܢܫܐ
15:12	ܗܝܕܝܢ ܩܪܒܘ ܬܠܡܝܕܘܗܝ ܘܐܡܪ̈ܝܢ ܠܗ ܝܕܥܬ ܕܦܪ̈ܝܫܐ ܟܕ ܫܡܥܘ ܡܠܬܐ ܗܕܐ ܐܬܟܫܠܘ܂
15:13	ܗܘ ܕܝܢ ܥܢܐ ܘܐܡܪ ܟܠ ܢܨܒܬܐ ܕܐܒܐ ܕܒܫܡܝܐ ܠܐ ܢܨܒܗ ܬܬܥܩܪ
15:14	ܫܒܘܩܘ ܠܗܘܢ ܢܓܘ̈ܕܐ ܐܢܘܢ ܕܣܡ̈ܝܐ܂ ܣܡܝܐ ܕܝܢ ܕܠܣܡܝܐ ܡܕܒܪ ܥܡܗ ܒܓܘܡܨܐ ܢܦܠ܂
15:15	ܥܢܐ ܫܡܥܘܢ ܟܐܦܐ ܘܐܡܪ ܠܗ ܦܫܩ ܠܢ ܡܬܠܐ ܗܢܐ
15:16	ܐܡܪ ܠܗ ܐܦܠܐ ܐܢܬܘܢ ܥܕܡܐ ܠܗܫܐ ܠܐ ܡܣܬܟܠܝܢ ܐܢܬܘܢ܂
15:17	ܠܐ ܝܕܥܝܢ ܐܢܬܘܢ ܕܟܘܠ ܡܕܡ ܕܥܐܠ ܠܦܘܡܐ ܠܟܪܣܐ ܗܘ ܐܙܠ܂ ܘܡܢ ܬܡܢ ܡܫܬܕܐ ܒܬܕܟܝܬܐ
15:18	ܘܡܕܡ ܕܡܢ ܠܒܐ ܢܦܩ ܡܢ ܦܘܡܐ ܗܘ ܢܦܩ ܘܗܘ ܡܣܝܒ ܠܗ ܠܒܪ ܐܢܫܐ
15:19	ܡܢ ܠܒܐ ܗܘ ܓܝܪ ܢܦܩܢ ܡܚܫܒܬܐ ܒܝܫܬܐ ܕܩܛܠܐ ܘܕܓܘܪܐ ܘܕܙܢܝܘܬܐ ܘܕܓܢܒܘܬܐ ܘܕܣܗܕܘܬ ܫܘܩܪܐ ܘܓܘܕܦܐ
15:20	ܗܠܝܢ ܐܢܝܢ ܕܡܣܝܒܢ ܠܗ ܠܒܪ ܐܢܫܐ ܟܕ ܐܢܫ ܓܝܪ ܢܐܟܘܠ ܠܚܡܐ ܟܕ ܠܐ ܡܫܓܢ ܐܝܕܘܗܝ ܠܐ ܡܣܬܝܒ ܒܪ ܐܢܫܐ
15:21	ܘܢܦܩ ܝܫܘܥ ܡܢ ܬܡܢ ܘܐܙܠ ܠܗ ܠܬܚܘܡܐ ܕܨܘܪ ܘܕܨܝܕܢ܂
15:22	ܘܗܐ ܐܢܬܬܐ ܟܢܥܢܝܬܐ ܢܦܩܬ ܡܢܗܘܢ ܡܢ ܬܚ̈ܘܡܐ ܗܢܘܢ܂ ܘܙܥܩܬ ܘܐܡܪܐ ܪܚܡ ܥܠܝ ܡܪܝ ܒܪܗ ܕܕܘܝܕ ܒܪܬܝ ܒܝܫܐܝܬ ܡܬܕܒܪܐ ܡܢ ܫܐܕܐ
15:23	ܗܘ ܕܝܢ ܠܐ ܝܗܒ ܠܗ ܦܬܓܡܐ ܘܩܪܒܘ ܬܠܡܝܕܘܗܝ ܘܒܥܘ ܡܢܗ ܘܐܡܪ̈ܝܢ ܫܪܝܗ ܕܗܐ ܩܥܝܐ ܘܐܬܝܐ ܒܬܪܢ
15:24	ܗܘ ܕܝܢ ܥܢܐ ܘܐܡܪ ܠܗܘܢ ܠܐ ܐܫܬܕܪܬ ܐܠܐ ܠܘܬ ܥܢܐ ܗܠܝܢ ܕܛܥܝ ܡܢ ܒܝܬ ܐܝܣܪܐܝܠ
15:25	ܗܝ ܕܝܢ ܩܪܒܬ ܣܓܕܬ ܠܘܬܗ ܘܐܡܪܐ ܠܗ ܡܪܝ ܥܕܪܝܢܝ܂
15:26	ܗܘ ܕܝܢ ܥܢܐ ܘܐܡܪ ܠܗ ܠܐ ܘܠܐ ܠܡܣܒ ܠܚܡܐ ܕܒܢܝܐ ܪܡܝܢ ܠܟܠܒܐ
15:27	ܐܡܪܐ ܠܗ ܐܝܢ ܡܪܝ ܐܦ ܟܠܒ̈ܐ ܐܟܠܝܢ ܡܢ ܦܬܘܪ̈ܐ ܕܡܪ̈ܝܗܘܢ ܘܚܝܝܢ܂
15:28	ܗܝܕܝܢ ܥܢܐ ܘܐܡܪ ܐܘ ܐܢܬܬܐ ܪܒܐ ܗܝ ܗܝܡܢܘܬܟܝ ܢܗܘܐ ܠܟܝ ܐܝܟ ܕܨܒܝܬܝ܂ ܘܡܢ ܗܕܐ ܫܥܬܐ ܐܬܐܣܝܬ ܒܪܬܟܝ
15:29	ܘܫܢܝ ܠܗ ܡܢ ܬܡܢ ܝܫܘܥ ܘܐܬܐ ܠܗ ܥܠ ܝܕ ܝܡܬܐ ܕܓܠܝܠܐ ܘܣܠܩ ܝܬܒ ܠܗ ܒܛܘܪܐ
15:30	ܘܩܪܒܘ ܠܗ ܟܢܫ̈ܐ ܣܓܝ̈ܐܐ ܘܐܝܬ ܥܡܗܘܢ ܚܓܝܪ̈ܐ ܘܡܥܘܪ̈ܐ ܘܚܓܝ̈ܣܐ ܘܚܪܫܐ ܘܣ̈ܓܝܐܐ ܐܚܪ̈ܢܐ܂ ܘܫܕܘ ܐܢܘܢ ܬܚܝܬ ܪ̈ܓܠܘܗܝ ܘܐܣܝ ܐܢܘܢ
15:31	ܘܡܬܕܡܪܝܢ ܗܘܘ ܟܢܫܐ ܕܚܙܝܢ ܚܪܫܐ ܕܡܡܠܠܝܢ ܘܚܓܝܪ̈ܐ ܕܡܗܠܟܝܢ ܘܣܡܝܐ ܕܚܙܝܢ ܘܡܫܒܚܝܢ ܗܘܘ ܠܐܠܗܐ ܕܐܝܣܪܐܝܠ܀
15:32	ܘܩܪܐ ܝܫܘܥ ܠܬܠܡܝܕܘܗܝ ܘܐܡܪ ܡܬܪܚܡ ܐܢܐ ܥܠ ܟܢܫܐ ܗܢܐ ܕܗܐ ܬܠܬ̈ܐ ܝܘܡܝܢ ܡܩܘܝܢ ܠܘܬܝ ܘܠܝܬ ܠܗܘܢ ܡܐ ܕܢܐܟܠܘܢ ܘܕܐܫܪܐ ܐܢܘܢ ܟܕ ܨܝܡܝܢ ܠܐ ܨܒܢܐ܂ ܕܠܐ ܢܥܘܦܘܢ ܠܗܘܢ ܒܐܘܪܚܐ܂
15:33	ܐܡܪܝܢ ܠܗ ܬܠܡܝܕܘܗܝ ܡܢ ܐܝܡܟܐ ܠܢ ܠܚܡܐ ܒܚܘܪܒܐ ܠܡܠܥܣܘ ܠܟܠܗ ܟܢܫܐ ܗܢܐ
15:34	ܐܡܪ ܠܗܘܢ ܝܫܘܥ ܟܡܐ ܠܚ̈ܡܝܢ ܐܝܬ ܥܠܝܟܘܢ܂ ܐܡܪ̈ܝܢ ܫ̈ܒܥ ܓܪ̈ܝܨܢ ܘܢܘܢܐ ܩܠܝܠ
15:35	ܘܦܩܕ ܠܟܢܫܐ ܕܢܣܬܡܟܘܢ܂ ܥܠ ܐܪܥܐ
15:36	ܘܢܣܒ ܠܗܠܝܢ ܫܒܥ ܓܪ̈ܝܨܢ ܘܢܘ̈ܢܐ܂ ܘܒܪܟ ܘܩܨܐ ܘܝܗܒ ܠܬܠܡܝܕܘܗܝ ܘܬܠܡܝܕܘܗܝ ܣܡܘ ܠܟܢܫ̈ܐ

15:37	ܘܐܟܠܘ ܟܘܠܗܘܢ ܘܣܒܥܘ܂ ܘܫܩܠܘ ܡܢ ܩܕܡܝܗܘܢ ܬܘܬܪ̈ܐ ܕܠܚ̈ܡܐ ܫܒܥܐ ܣܦܪܝܕܝܢ ܟܕ ܡ̈ܠܝܢ܂

15:38	ܗܘܝܢ ܗܘܘ ܕܝܢ ܐܢܫܐ ܕܐܟܠܘ ܐܪܒܥܐ ܐ̈ܠܦܝܢ ܣܛܪ ܡܢ ܢܫ̈ܐ ܘܛܠܝܐ
15:39	ܘܟܕ ܫܪܐ ܠܟܢܫܐ ܣܠܩ ܝܬܒ ܠܗ ܒܣܦܝܢܬܐ ܘܐܬܐ ܠܗ ܠܬܚܘܡܐ ܕܡܓܕܢ܀