← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


18:01 ܒܗܘ ܝܘܡܐ ܩܪܒܘ ܬܠܡܝ̈ܕܘܗܝ ܐܡܪܝܢ ܠܗ܂ ܡܢܘ ܟܝ ܢܗܘܐ ܪܒ ܒܡܠܟܘܬܐ ܕܫܡܝܐ܂
18:02 ܩܪܐ ܝܫܘܥ ܛܠܝܐ ܚܕ ܘܐܩܝܡܗ ܒܝܢܬܗܘܢ
18:03 ܘܐܡܪ ܐܡܝܢ ܐܡܪܢܐ ܠܟܘܢ ܕܐܠܐ ܬܬܗܦܟܘܢ ܬܗܘܘܢ ܐܝܟ ܛܠܝ̈ܐ܂ ܠܐ ܬܥܠܘܢ ܠܡܠܟܘܬܐ ܕܫܡܝܐ܂
18:04 ܡܢ ܕܢܡܟ ܓܝܪ ܢܦܫܗ ܐܝܟ ܛܠܝܐ ܗܢܐ ܗܘ ܢܗܘܐ ܪܒ ܒܡܠܟܘܬܐ ܕܫܡܝܐ
18:05 ܘܟܠ ܕܢܩܒܠ ܐܝܟ ܚܕ ܡܢ ܗܠܝܢ ܛܠܝ̈ܐ ܒܫܡܝ ܠܝ ܗܘ ܡܩܒܠ
18:06 ܘܟܠ ܕܢܟܫܠ ܠܚܕ ܡܢ ܗܠܝܢ ܙܥܘܪ̈ܐ܂ ܕܡܗܝܡܢܝܢ ܒܝ܂ ܦܩܚ ܗܘܐ ܠܗ ܕܬܗܘܐ ܪܡܝܐ ܪܚܝܐ ܕܚܡܪܐ ܒܨܘܪܗ ܘܡܛܒܥ ܒܥܘܡܩܐ ܕܝܡܐ܀
18:07 ܘܝ ܠܗ ܠܥܠܡܐ ܡܢ ܡܟܫܘ̈ܠܐ ܕܐܬܝܢ܂ ܕܥܬܝܕܝܢ ܐܢܘܢ ܓܝܪ ܕܢܐܬܘܢ ܡܟܫܘ̈ܠܐ ܐܠܐ ܘܝ ܠܓܒܪܐ ܕܒܐܝܕܗ ܢܐܬܘܢ܂
18:08 ܐܢ ܕܝܢ ܐܝܕܟ ܐܘ ܪܓܠܟ ܡܟܫܠܐ ܠܟ ܦܣܘܩ ܫܕܝܗ ܡܢܟ܂ ܦܩܚ ܠܟ ܓܝܪ ܕܬܐܬܐ ܠܚܝ̈ܐ ܟܕ ܐܢ ܚܓܝܪ ܐܢܬ ܐܘ ܟܕ ܚܓܝܣ ܘܠܐ ܟܕ ܐܝܬ ܠܟ ܬܪ̈ܬܝܢ ܐܝ̈ܕܝܢ ܐܘ ܬܪ̈ܬܝܢ ܪ̈ܓܠܝܢ ܘܬܐܙܠ ܠܢܘܪܐ ܕܠܥܠܡ܂
18:09 ܐܢ ܥܝܢܟ ܡܟܫܠܐ ܠܟ ܚܨܝܗ ܫܕܝܗ ܡܢܟ ܦܩܚ ܠܟ ܓܝܪ ܕܬܥܘܠ ܠܚܝܐ܂ ܟܕ ܐܝܬ ܠܟ ܚܕܐ ܥܝܢܐ ܘܠܐ ܟܕ ܐܝܬ ܠܟ ܬܪ̈ܬܝܢ ܘܬܐܙܠ ܠܓܗܢܐ ܕܢܘܪܐ܀
18:10 ܚܙܘ ܕܠܡܐ ܬܒܣܘܢ ܒܚܕ ܡܢ ܗܠܝܢ ܙܥܘܪ̈ܐ ܐܡܪܢܐ ܠܟܘܢ ܓܝܪ ܕܡܠܐܟܝܗܘܢ ܒܟܘܠܙܒܢ ܚܙܝܢ ܐܦܘܗܝ ܕܐܒܝ ܕܒܫܡܝܐ
18:12 ܐܝܟܢܐ ܡܬܚܙܐ ܠܟܘܢ܂ ܐܢ ܢܗܘܝܢ ܠܓܒܪܐ ܡܐܐ ܥܢܐ ܘܬܛܥܐ ܚܕܐ ܡܢܗܝܢ ܘܠܐ ܫܒܩ ܬܫ̈ܥܝܢ ܘܬܫܥ ܒܛܘܪܐ ܘܐܙܠ ܒܥܐ ܠܗܝ ܕܛܥܬ
18:13 ܘܡܐ ܕܐܫܟܚܗ ܐܡܝܢ ܐܡܪܢܐ ܠܟܘܢ܂ ܕܚܕܐ ܒܗ܂ ܝܬܝܪ ܡܢ ܗܠܝܢ ܬܫ̈ܥܝܢ ܘܬܫܥ ܕܠܐ ܛܥܝ
18:14 ܗܟܢܐ ܠܐ ܨܒܐ ܐܒܝ ܕܒܫܡܝܐ܂ ܕܢܐܒܕ ܚܕ ܡܢ ܗܠܝܢ ܙܥܘܪ̈ܐ܀
18:15 ܐ݁ܢ ܕܝܢ ܢܣܟܠ ܒܟ ܐܚܘܟ܂ ܐܟܣܝܗܝ ܒܝܢܝܟ ܘܠܗ܂ ܐܢ ܫܡܥܟ ܝܬܪܬ ܐܚܘܟ܂
18:16 ܐܢ ܕܝܢ ܠܐ ܢܫܡܥܟ܂ ܕܒܪ ܥܡܟ ܬܘܒ ܚܕ ܐܘ ܬܪ̈ܝܢ ܕܥܠ ܦܘܡ ܬܪ̈ܝܢ ܘ̈ܬܠܬܐ ܣܗܕܝܢ ܬܩܘܡ ܟܘܠ ܡܠܐ
18:17 ܐܢ ܕܝܢ ܠܐ ܢܫܡܥ ܐܢܘܢ ܐܡܪ ܠܟܢܘܫܬܐ ܘܐܢ ܠܟܢܘܫܬܐ ܠܐ ܢܫܡܥ ܢܬܚܫܒ ܠܟ ܐܝܟ ܚܢܦܐ ܘܐܝܟ ܡܟܣܐ
18:18 ܘܐܡܝܢ ܐܡܪܢܐ ܠܟܘܢ ܡܕܡ ܕܬܐܣܪܘܢ ܒܐܪܥܐ ܢܗܘܐ ܐܣܝܪ ܒܫܡܝܐ ܘܡܕܡ ܕܬܫܪܘܢ ܒܐܪܥܐ ܢܗܘܐ ܫܪܐ ܒܫܡܝܐ
18:19 ܬܘܒ ܐܡܝܢ ܐܡܪ ܐܢܐ ܠܟܘܢ ܕܐܢ ܬܪܝܢ ܡܢܟܘܢ ܢܫܬܘܘܢ ܥܠ ܐܪܥܐ ܥܠ ܟܘܠ ܨܒܘ ܡܕܡ ܕܢܫܐܠܘܢ ܢܗܘܐ ܠܗܘܢ ܡܢ ܠܘܬ ܐܒܝ ܕܒܫܡܝܐ
18:20 ܠܝܬ ܓܝܪ ܬܪ̈ܝܢ ܐܘ ܬܠܬܐ ܕܟܢܝܫܝܢ ܒܫܡܝ܂ ܕܠܐ ܐܢܐ ܒܝܢܬܗܘܢ܀
18:21 ܗܝܕܝܢ ܩܪܒ ܫܡܥܘܢ ܟܐܦܐ ܘܐܡܪ ܡܪܝ ܟܡܐ ܙܒܢ̈ܝܢ ܐܢ ܢܣܟܠ ܒܝ ܐܚܝ܂ ܐܫܒܘܩ ܠܗ܂ ܥܕܡܐ ܠܫ̈ܒܥ
18:22 ܐܡܪ ܠܗ ܠܐ ܫܒ̈ܥ ܐܠܐ ܥܠ ܫܒܥܝܢ ܙܒܢܝܢ ܫ̈ܒܥ ܫ̈ܒܥ܀
18:23 ܡܛܠ ܗܢܐ ܕܡܝܐ ܡܠܟܘܬܐ ܕܫܡܝܐ ܠܓܒܪܐ ܡܠܟܐ ܕܨܒܐ ܠܡܣܒ ܚܫܒܢܐ ܡܢ ܥܒܕܘܗܝ
18:24 ܘܟܕ ܫܪܝ ܠܡܣܒ ܩܪܒ ܠܗ ܕܚܝܒ ܗܘܐ ܠܗ ܒܪܒܘ ܟܟܪܝܢ
18:25 ܘܟܕ ܠܝܬ ܗܘܐ ܠܗ ܠܡܦܪܥ ܦܩܕ ܕܢܙܒܢܘܢܗ ܠܗ ܘܠܐܢܬܬܗ ܘܠܒܢܘܗܝ ܘܢܬܢܣܒ ܟܠ ܡܕܡ ܕܐܝܬ ܠܗ
18:26 ܢܦܠ ܥܒܕܐ ܗܘ ܘܣܓܕ ܠܡܪܗ ܘܐܡܪ ܐܓܪ ܥܠܝ ܪܘܚܐ܂ ܘܟܠܡܕܡ ܐܦܪܘܥ
18:27 ܘܐܬܪܚܡ ܥܠܘܗܝ ܘܫܪܝܗܝ ܘܐܦ ܚܘܒܬܐ ܫܒܩ ܠܗ
18:28 ܢܦܩ ܗܘ ܥܒܕܐ ܘܐܫܟܚ ܚܕ ܡܢ ܟܢܘ̈ܬܗ ܕܚܝܒ ܗܘܐ ܠܗ ܕܝܢܪܐ ܡܐܐ ܘܐܚܕܗ ܘܚܢܩ ܗܘܐ ܠܗ܂ ܘܐܡܪ ܗܒ ܠܝ ܡܐ ܕܚܝܒ ܐܢܬ ܠܝ
18:29 ܘܢܦܠ ܗܘܐ ܟܢܬܗ ܒܥܐ ܗܘܐ ܡܢܗ܂ ܘܐܡܪ ܐ݁ܓܪ ܥܠܝ ܪܘܚܐ ܘܐܦ ܐܢܐ ܦܪܥܢܐ܂
18:30 ܗܘ ܕܝܢ ܠܐ ܩܒܠ ܒܥܘܬܗ܂ ܐܠܐ ܐܪܡܝܗ ܒܝܬ ܐܣܝܪ̈ܐ ܥܕܡܐ ܕܢܦܪܘܥ ܡܐ ܕܚܝܒ
18:31 ܟܕ ܚܙܘ ܕܝܢ ܟܢܘܬܗ ܐܝܠܝܢ ܕܗܘܝ ܟܪܝܬ ܠܗܘܢ ܘܐܬܘ ܐܫܬܥܝܘ ܠܡܪܗܘܢ ܟܘܠ ܡܐ ܕܗܘܐ
18:32 ܗܝܕܝܢ ܩܪܝܗܝ ܡܪܗ ܘܐܡܪ ܠܗ ܥܒܕܐ ܒܝܫܐ ܗܝ ܟܘܠܗ ܚܘܒܬܐ ܫܒܩܬ ܠܟ ܡܛܠ ܕܒܥܝܬ ܡܢܝ
18:33 ܠܐ ܚܝܒ ܗܘܝܬ ܕܬܚܘܢ ܠܟܢܬܟ܂ ܐܝܟܢܐ ܕܐܢܐ ܚܢܬܟ
18:34 ܘܪܓܙ ܥܠܘܗܝ ܡܪܗ ܘܐܫܠܡܗ ܕܢܗܘܐ ܡܬܢܓܕ ܥܕܡܐ ܕܢܦܪܘܥ ܡܐ ܕܚܝܒ܂
18:35 ܗܟܢܐ ܢܥܒܕ ܠܟܘܢ ܐܒܝ ܕܒܫܡܝܐ ܐܠܐ ܬܫܒܩܘܢ ܐܢܫ ܠܐܚܘܗܝ ܡܢ ܠܒܟܘܢ܀

next chapter