← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


20:01 ܕܡܝܐ ܡܠܟܘܬܐ ܕܫܡܝܐ ܠܓܒܪܐ ܡܪܒܝܬܐ ܕܢܦܩ ܒܫܦܪܐ ܠܡܐܓܪ ܦܥ̈ܠܐ ܠܟܪܡܗ܂
20:02 ܘܩܨ ܥܡܗܘܢ ܡܢ ܕܝܢܪܐ ܚܕ ܠܦܥܠܐ ܚܕ ܒܝܘܡܐ ܚܕ ܘܫܕܪ ܐܢܘܢ ܠܟܪܡܗ
20:03 ܘܢܦܩ ܒܬ̈ܠܬ ܫܥܝܢ ܘܚܙܐ ܐܚܪ̈ܢܐ ܕܩܝܡܝܢ ܒܫܘܩܐ ܘܒܛܠܝܢ
20:04 ܐܡܪ ܠܗܘܢ ܙܠܘ ܐܦ ܐܢܬܘܢ ܠܟܪܡܐ ܘܡܐ ܕܙܕܩ ܐܬܠ ܠܟܘܢ܂
20:05 ܘܢܦܩ ܬܘܒ ܒܫܬ ܫ̈ܥܝܢ ܘܒܬܫ̈ܥ ܘܗܟܘܬ ܥܒܕ
20:06 ܘܢܦܩ ܒܚܕܥܣܪ̈ܐ ܫܥܝܢ ܘܚܙܐ ܐܚܪ̈ܢܐ ܕܩܝܡܝܢ ܐܡܪ ܠܗܘܢ ܡܢܐ ܩܝܡܝܢ ܐܢܬܘܢ ܗܪܟܐ ܘܒܛܠܝܢ ܟܘܠܗ ܝܘܡܐ
20:07 ܐܡܪܝܢ ܠܗ ܠܐ ܐܢܫ ܐܓܪܢ ܐܡܪ ܠܗܘܢ ܙܠܘ ܐܦ ܐܢܬܘܢ ܠܟܪܡܐ ܕܝܠܝ
20:08 ܘܟܕ ܗܘܐ ܕܝܢ ܪܡܫܐ ܐܡܪ ܡܪܐ ܠܪܒܝܬܗ ܩܪܝ ܐܢܘܢ ܠܦ̈ܥܠܐ ܘܗܒ ܠܗܘܢ ܐܓܪܗܘܢ ܘܫܪܝ ܡܢ ܐܚܪ̈ܝܐ ܥܕܡܐ ܠܩܕ̈ܡܝܐ
20:09 ܘܟܕ ܐܬܘ ܗܢܘܢ ܕܒܚܕܥܣܪܐ ܫ̈ܥܝܢ ܫܩܠܘ ܕܝܢܪ ܕܝܢܪ
20:10 ܘܟܕ ܐܬܘ ܩܕܡ̈ܝܐ ܣܒܪ̈ܝܢ ܗܘܘ ܕܠܗܘܢ ܝܬܝܪ ܢܬܠ ܘܢܣܒܘ ܐܦ ܗܢܘܢ ܕܝܢܪ ܕܝܢܪ
20:11 ܟܕ ܚܙܘ ܕܝܢ ܪܛܢܝܢ ܥܠ ܡܪܒܝܬܐ
20:12 ܘܐܡܪ̈ܝܢ ܗܠܝܢ ܐܚܪ̈ܝܐ ܕܚܕܐ ܗܘ ܫܥܐ ܦܠܚܘ ܐܫܘܝܬ ܐܢܘܢ ܥܡܢ ܕܫܩܠܢ ܝܘܩܪܗ ܕܝܘܡܐ܂ ܒܚܘܡܐ܂
20:13 ܗܘ ܕܝܢ ܥܢܐ ܘܐܡܪ ܠܚܕ ܡܢܗܘܢ ܪܚܡܝ ܠܐ ܡܗܪ ܐܢܐ ܠܟ ܠܐ ܗܘܐ ܒܕܝܢܪ ܩܨܬ ܥܡܟ܂
20:14 ܫܩܠ ܕܝܢܪܟ ܘܙܠ ܐܢ ܨܒܢܐ ܕܝܢ ܕܐܬܠ ܠܗܢܐ ܐܚܪܝܐ ܐܝܟ ܕܠܟ܂
20:15 ܠܐ ܫܠܝܛ ܐܢܐ ܒܒܝܬܝ ܕܐܥܒܕ ܡܐ ܕܨܒܐ ܐܢܐ ܐܘ ܥܝܢܟ ܒܝܫܐ ܕܐܢܐ ܛܒ ܐܢܐ
20:16 ܗܟܢܐ ܢܗܘܘܢ ܐܚܪ̈ܝܐ ܩܕܡ̈ܝܐ ܘܩܕܡ̈ܝܐ ܐܚܪ̈ܝܐ ܣܓܝܐܝܢ ܐܢܘܢ ܩܪ̈ܝܐ ܘܙܥܘܪܝܢ ܓܒ̈ܝܐ܀
20:17 ܘܟܕ ܣܠܩ ܗܘܐ ܝܫܘܥ ܠܐܘܪܫܠܡ ܕܒܪ ܥܡܗ ܠܬܪܥܣܪ̈ܬܗ ܒܐܘܪܚܐ ܘܐܡܪ ܠܗܘܢ ܒܝܢܝܗܘܢ ܘܠܗ
20:18 ܗܐ ܣܠܩܝܢ ܐܢܚܢܢ ܠܐܘܪܫܠܡ ܘܢܫܬܠܡ ܒܪܗ ܕܐܢܫܐ ܠܪ̈ܒܝ ܟܗܢܐ ܘܠܣܦܪ̈ܐ ܘܢܚܝܒܘܢܗ ܠܡܘܬܐ
20:19 ܘܢܫܠܡܘܢܗ ܠܥܡܐ ܘܢܒܙܚܘܢ ܒܗ ܘܢܢܓܕܘܢܗ ܘܢܙܩܦܘܢܗ܂ ܘܠܝܘܡܐ ܕܬܠܬܐ ܢܩܘܡ܀
20:20 ܗܝܕܝܢ ܩܪܒܬ ܠܗ ܐܡܗܘܢ ܕܒ̈ܢܝ ܙܒܕܝ܂ ܗܝ ܘܒܢܝ̈ܗ ܘܢܦܠܬ ܣܓܕܬ ܠܗ܂ ܘܫܐܠܐ ܗܘܬ ܠܗ ܡܕܡ܂
20:21 ܗܘ ܕܝܢ ܐܡܪ ܠܗ ܡܢܐ ܨܒܝܬܝ܂ ܐܡܪܐ ܠܗ ܡܪܝ ܕܢܬܒܘܢ ܗܠܝܢ ܬܪ̈ܝܢ ܒܢ̈ܝ ܚܕ ܡܢ ܝܡܝܢܟ ܘܚܕ ܡܢ ܣܡܠܟ ܒܡܠܟܘܬܟ
20:22 ܥܢܐ ܝܫܘܥ ܘܐܡܪ ܠܗܘܢ ܠܐ ܝܕܥܝܢ ܐܢܬܘܢ ܡܢܐ ܫܐ̈ܠܝܢ ܐܢܬܘܢ ܡܫܟܚܝܢ ܐܢܬܘܢ ܠܡܫܬܐ ܟܣܐ ܕܐܢܐ ܥܬܝܕ ܠܡܫܬܐ܂ ܐܡܪ̈ܝܢ ܡܫܟܚܝܢ ܐܢܚܢܢ
20:23 ܐܡܪ ܠܗܘܢ ܝܫܘܥ ܟܣܝ ܫܬܝܢ ܐܢܬܘܢ ܕܬܬܒܘܢ ܕܝܢ ܡܢ ܝܡܝܢܝ ܘܡܢ ܣܡܠܝ ܗܕܐ ܠܐ ܗܘܬ ܠܝ ܕܐܬܠ ܠܟܘܢ ܐܠܐ ܠܐܝܠܝܢ ܕܡܛܝܒ ܠܗܘܢ ܐܒܝ܂
20:24 ܟܕ ܫܡܥܘ ܥܣܪ̈ܐ ܪܛܢܘ ܥܠ ܗܢܘܢ ܬܪ̈ܝܢ ܐܚ̈ܝܢ

next chapter