← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


21:20 ܬܠܡܝܕܐ ܐܬܕܡܪܘ ܘܐܡܪܝܢ ܐܝܟܢܐ ܒܪܫܥܬܗ ܝܒܫܬ ܬܬܐ ܗܝ܂
21:21 ܥܢܐ ܝܫܘܥ ܘܐܡܪ ܠܗܘܢ ܐܡܝܢ ܐܡܪܢܐ ܠܟܘܢ ܕܐܢ ܬܗܘܐ ܒܟܘܢ ܗܝܡܢܘܬܐ ܘܠܐ ܬܬܦܠܓܘܢ ܠܐ ܒܠܚܘܕ ܐܝܟ ܗܕܐ ܬܬܐ ܬܥܒܕܘܢ ܐܠܐ ܐܢ ܬܐܡܪܘܢ ܠܛܘܪܐ ܗܢܐ ܕܐܫܬܩܠ ܘܦܠ ܒܝܡܐ ܘܢܗܘܐ ܗܟܢܐ܂
21:22 ܘܟܠ ܡܐ ܕܬܫܐܠܘܢ ܒܨܠܘܬܐ܂ ܘܬܗܝܡܢܘܢ ܬܣܒܘܢ܀
21:23 ܘܟܕ ܐܬܐ ܠܗܝܟܠܐ ܩܪܒܘ ܠܗ ܪ̈ܒܝ ܟܗܢܐ ܘܩܫܝܫܐ ܕܥܡܐ ܘܐܡܪ̈ܝܢ ܒܐܝܢܐ ܫܘܠܛܢ ܗܠܝܢ ܥܒܕ ܐܢܬ ܐܡܪ ܠܢ ܘܡܢܘ ܝܗܒ ܠܟ ܫܘܠܛܢܐ ܗܢܐ܂
21:24 ܥܢܐ ܝܫܘܥ ܘܐܡܪ ܠܗܘܢ ܘܐܦ ܐܢܐ ܐܫܐܠܟܘܢ ܡܠܬܐ ܚܕܐ ܕܬܐܡܪܘܢ ܠܝ܂ ܘܐܡܪ ܠܟܘܢ ܒܐܝܢܐ ܫܘܠܛܢ ܥܒܕܢܐ ܗܠܝܢ
21:25 ܡܥܡܘܕܝܬܗ ܕܝܘܚܢܢ ܡܢ ܐܝܡܟܐ ܗܘܬ ܡܢ ܫܡܝܐ ܐܘ ܡܢ ܒܢܝ ܐܢܫܐ ܗܢܘܢ ܕܝܢ ܡܬܚܫܒܝܢ ܗܘܘ ܒܝܢܬܗܘܢ ܘܐܡܪ̈ܝܢ ܕܐܢ ܢܐܡܪ ܕܡܢ ܫܡܝܐ ܗܝ ܢܐܡܪ ܠܢ ܘܠܡܢܐ ܠܐ ܗܝܡܢܬܘܢ ܒܗ܂
21:26 ܘܐܢ ܢܐܡܪ ܕܡܢ ܒܢ̈ܝ ܐܢܫܐ ܗܝ܂ ܕܚܠܝܢ ܐܢܚܢܢ ܡܢ ܟܢܫܐ܂ ܟܠܗܘܢ ܓܝܪ ܐܝܟ ܕܠܢܒܝܐ ܐܚܝܕܝܢ ܗܘܘ ܠܗ ܠܝܘܚܢܢ
21:27 ܘܥܢܘ ܘܐܡܪ̈ܝܢ ܠܝܫܘܥ܂ ܠܐ ܝܕܥܝܢ ܐܢܚܢܢ ܐܡܪ ܠܗܘܢ ܐܦ ܗܘ ܐܦܠܐ ܐܢܐ ܐܡܪܢܐ ܠܟܘܢ ܒܐܝܢܐ ܫܘܠܛܢ ܥܒܕܢܐ ܗܠܝܢ
21:28 ܐܝܟܢܐ ܕܝܢ ܡܬܚܙܝܐ ܠܟܘܢ ܠܓܒܪܐ ܕܝܢ ܚܕ ܐܝܬ ܗܘܘ ܠܗ ܬܪ̈ܝܢ ܒܢ̈ܝܢ܂ ܐܡܪ ܠܩܕܡܝܐ ܐܙܠ ܒܪܝ ܥܒܕ ܥܒܕܐ ܒܟܪܡܐ
21:29 ܐܡܪ ܠܗ ܠܐ ܨܒܢܐ ܘܒܐܚܪܝܬܐ ܬܘܬܗ ܢܦܫܗ ܘܐܙܠ ܠܟܪܡܐ܂
21:30 ܘܐܡܪ ܠܐܚܪܢܐ ܗܟܘܬ܂ ܘܥܢܐ ܘܐܡܪ ܐܝܢ ܡܪܝ ܘܠܐ ܐܙܠ
21:31 ܡܢܘ ܡܢ ܗܠܝܢ ܥܒܕ ܨܒܝܢܐ ܕܐܒܘܗܝ܂ ܐܡܪܝܢ ܠܗ ܗܘ ܐܚܪܝܐ܂ ܐܡܪ ܠܗܘܢ ܝܫܘܥ ܐܡܝܢ ܐܡܪܢܐ ܠܟܘܢ ܕܡܟܣ̈ܐ ܘܙܢܝ̈ܬܐ ܢܩܕܡܘܢܟܘܢ ܠܡܠܟܘܬܐ ܕܐܠܗܐ܂
21:32 ܐܬܐ ܓܝܪ ܠܘܬܟܘܢ ܝܘܚܢܢ ܒܐܘܪܚܐ ܕܟܐܢܘܬܐ ܘܠܐ ܗܝܡܬܘܢ ܒܗ܂ ܡܟܣ̈ܐ ܕܝܢ ܘܙܢܝ̈ܬܐ ܗܝܡܢܘܗܝ ܐܢܬܘܢ ܕܝܢ ܟܕ ܚܙܝܬܘܢ ܒܐܚܪܝܬܐ ܬܘܬܟܘܢ ܢܦܫܟܘܢ ܕܬܗܝܡܘܢ ܒܗ
21:33 ܫܡܥܘ ܡܬܠܐ܂ ܐܚܪܢܐ ܓܒܪܐ ܚܕ ܡܪܒܝܬܐ ܐܝܬ ܗܘܐ ܘܢܨܒ ܟܪܡܐ ܘܥܒܕ ܠܗ ܣܝܓܐ ܘܚܦܪ ܒܗ ܡܥܨܪܬܐ ܘܒܢܐ ܒܗ ܡܓܕܠܐ ܘܐܫܠܡܗ ܠܦܠܚ̈ܐ ܘܐܙܠ
21:34 ܟܕ ܗܘܐ ܕܝܢ ܙܒܢܐ ܕܦܐܪ̈ܐ ܫܕܪ ܥܒܕܘܗܝ ܠܘܬ ܦܠܚ̈ܐ ܕܢܫܕܪܘܢ ܠܗ ܡܢ ܦܐܪ̈ܐ
21:35 ܘܐܚܕܘ ܦܠܚ̈ܐ ܠܥܒܕܘܗܝ ܘܐܝܬ ܕܡܚܘܘܗܝ ܘܐܝܬ ܕܩܛܠܘܗܝ ܘܐܝܬ ܕܪܓܡܘܗܝ
21:36 ܬܘܒ ܫܕܪ ܥܒܕܐ ܐܚܪܢܐ ܕܣܓܝܐܝܢ ܡܢ ܩܕܡ̈ܝܐ ܘܥܒܕܘ ܠܗܘܢ ܗܟܘܬ܂
21:37 ܒܐܚܪܝܬܐ ܕܝܢ ܫܕܪ ܠܘܬܗܘܢ ܠܒܪܗ ܘܐܡܪ ܟܒܪ ܢܒܗܬܘܢ ܡܢ ܒܪܝ
21:38 ܦܠܚܐ ܕܝܢ ܟܕ ܚܙܘܘܗܝ ܠܒܪܗ ܐܡܪ̈ܝܢ ܗܢܘ ܝܪܘܬܐ ܬܘ ܢܩܛܠܝܘܗܝ܂ ܘܢܗܘܐ ܝܘܪܬܢܐ ܕܝܠܢ܂
21:39 ܘܐܚܕܘ ܐܦܩܘܗܝ ܠܒܪ ܡܢ ܟܪܡܐ ܘܩܛܠܘܗܝ
21:40 ܐܡܬܝ ܗܟܝܠ ܕܢܐܬܐ ܡܪܗ ܕܟܪܡܐ ܡܢܐ ܢܥܒܕ ܠܗܢܘܢ ܦܠܚܐ
21:41 ܐܡܪ̈ܝܢ ܠܗ ܕܒܝܫ ܒܝܫ ܢܘܒܕ ܐܢܘܢ ܘܟܪܡܐ ܢܬܠ ܠܦܠܚܐ ܐܚܪ̈ܢܐ ܕܝܗܒܝܢ ܦܐܪ̈ܐ ܒܙܒܢܗܘܢ
21:42 ܐܡܪ ܠܗܘܢ ܝܫܘܥ ܠܐ ܩܪ̈ܝܬܘܢ ܒܟܬܒܐ ܕܟܐܦܐ ܕܐܣܠܝܘ ܒܢܝܐ ܗܝ ܗܘܬ ܠܪܝܫ ܙܘܝܬܐ ܡܢ ܠܘܬ ܡܪܝܐ ܗܘܬ ܗܕܐ ܘܬܕܡܘܪܬܐ ܗܝ ܒܥܝܢܝܢ
21:43 ܡܛܠ ܗܢܐ ܐܡܪܢܐ ܠܟܘܢ ܕܬܫܬܩܠ ܡܢܟܘܢ ܡܠܟܘܬܐ ܕܐܠܗܐ ܘܬܬܝܗܒ ܠܥܡܐ ܕܝܗܒ ܦܐܪ̈ܐ
21:45 ܪܒܝ ܟܗ̈ܢܐ ܕܝܢ ܘܦܪ̈ܝܫܐ ܟܕ ܫܡܥܘ ܦܠܐ̈ܬܗ ܝܕܥܘ ܕܥܠܝܗܘܢ ܗܘ ܐܡܪ
21:46 ܘܒܥܘ ܠܡܐܚܕܗ ܘܕܚܠܘ ܡܢ ܥܡܐ ܕܐܝܟ ܕܠܢܒܝܐ ܐܚܝܕܝܢ ܗܘܘ ܠܗ܀

next chapter