The Comprehensive Aramaic Lexicon

22:01	ܬܘܒ ܥܢܐ ܝܫܘܥ ܘܐܡܪ ܠܗܘܢ ܒܦܠܐ̈ܬܐ
22:02	ܐܬܕܡܝܬ ܡܠܟܘܬܐ ܕܫܡܝܐ ܠܓܒܪܐ ܡܠܟܐ܂ ܕܥܒܕ ܡܫܬܘܬܐ ܠܒܪܗ
22:03	ܘܫܕܪ ܥܒܕܘܗܝ ܕܢܩܪܘܢ ܠܗܢܘܢ ܕܩܪ̈ܝܢ ܗܘܘ ܠܡܫܬܘܬܐ ܘܠܐ ܨܒܘ ܠܡܐܬܐ
22:04	ܬܘܒ ܫܕܪ ܥܒ̈ܕܐ ܐܚܪܢܐ ܘܐܡܪ ܐܡܪܘ ܠܗܢܘܢ ܕܩܪܝܢ ܗܐ ܟܠ ܡܕܡ ܡܛܝܒ ܗܘ ܐܬܘ ܠܒܝܬ ܡܫܬܘܬܐ
22:05	ܗܢܘܢ ܕܝܢ ܒܣܘ ܘܐܝܬ ܕܐܙܠ ܠܩܪܝܬܗ܂ ܘܐܝܬ ܕܐܙܠ ܠܬܐܓܪܬܐ܂
22:06	ܘܫܪܟܐ ܕܝܢ ܕܐܫܬܚܪܘ ܐܚܕܘ ܠܥܒܕܘܗܝ ܘܨܥܪܘ ܘܩܛܠܘ ܐܢܘܢ܂
22:07	ܘܪܓܙ ܗܘ ܡܠܟܐ ܘܫܕܪ ܚܝ̈ܠܘܗܝ ܘܐܘܒܕܘ ܠܩܛܘܠܐ ܗܢܘܢ ܘܡܕܝܢܬܗܘܢ ܐܘܩܕܘ ܒܢܘܪܐ
22:08	ܗܝܕܝܢ ܐܡܪ ܠܥܒ̈ܕܘܗܝ ܡܫܬܘܬܐ ܡܛܝܒܐ ܗܝ ܘܗܢܘܢ ܕܩܪ̈ܝܢ ܠܐ ܫܘܝܢ ܗܘܘ ܠܗ܂
22:09	ܡܟܝܠ ܦܘܩܘ ܠܒܝܬ ܐܘܪ̈ܚܬܐ ܘܠܟܘܠ ܕܡܫܟܚܝܢ ܐܢܬܘܢ ܩܪܘܘܗܝ ܠܒܝܬ ܡܫܬܘܬܐ܂
22:10	ܘܢܦܩܘ ܥܒ̈ܕܐ ܗܢܘܢ ܠܒܝܬ ܐܘܪ̈ܚܬܐ ܘܟܢܫܘ ܟܘܠ ܕܐܫܟܚܘ ܒܝܫ̈ܐ ܘܛܒܐ ܘܐܬܡܠܝ ܒܝܬ ܡܫܬܘܬܐ ܣܡ̈ܝܟܐ܂
22:11	ܘܟܕ ܥܠ ܡܠܟܐ ܠܡܚܙܐ ܣܡܝ̈ܟܐ ܚܙܐ ܬܡܢ ܓܒܪܐ ܕܠܐ ܠܒܝܫ ܗܘܐ ܠܒܘܫ̈ܐ ܕܡܫܬܘܬܐ܂
22:12	ܐܡܪ ܠܗ ܪܚܡܝ ܐܝܟܢܐ ܥܠܬ ܠܗܪܟܐ ܕܢܚ̈ܬܐ ܕܡܫܬܘܬܐ ܠܝܬ ܠܟ ܗܘ ܕܝܢ ܫܬܩ ܠܗ
22:13	ܗܝܕܝܢ ܐܡܪ ܡܠܟܐ ܠܡܫܡܫ̈ܢܐ ܐܚܕܘܗܝ ܒܐ̈ܝܕܘܗܝ ܘܒܪ̈ܓܠܘܗܝ ܘܐܦܩܘܗܝ ܠܚܫܘܟܐ ܒܪܝܐ ܬܡܢ ܢܗܘܐ ܒܟܝܐ ܘܚܘܪܩ ܫ̈ܢܐ
22:14	ܣܓܝܐܝܢ ܐܢܘܢ ܓܝܪ ܩܪܝܐ ܘܙܥܘܪ̈ܝܢ ܓܒ̈ܝܐ܀
22:15	ܗܝܕܝܢ ܐܙܠܘ ܦܪ̈ܝܫܐ ܢܣܒܘ ܡܠܟܐ ܕܐܝܟܢܐ ܢܨܘܕܘܢܗ ܒܡܠܬܐ
22:16	ܘܫܕܪܘ ܠܘܬܗ ܬܠܡܝ̈ܕܘܗܝ ܥܡ ܥܒ̈ܕܐ ܕܗܪܘܕܣ ܘܐܡܪܝܢ ܠܗ ܡܠܦܢܐ ܝܕܥܝܢ ܐܢܚܢܢ ܕܫܪܝܪ ܐܢܬ ܘܐܘܪܚܗ ܕܐܠܗܐ ܒܩܘܫܬܐ ܡܠܦ ܐܢܬ ܘܠܐ ܒܛܝܠ ܠܟ ܒܐܢܫ ܠܐ ܓܝܪ ܢܣܒ ܐܢܬ ܒܐܦ̈ܝ ܒܢܝ ܐܢܫܐ
22:17	ܐܝܟܢܐ ܕܝܢ ܡܨܛܒܐ ܠܟ܂ ܘܠܐ ܠܢ ܕܢܬܠ ܟܣܦ ܪܫܐ ܠܩܣܪ ܐܘ ܠܐ܂
22:18	ܝܫܘܥ ܕܝܢ ܟܕ ܝܕܥ ܒܝܫܘܬܗܘܢ ܐܡܪ ܠܗܘܢ ܢܣܒ̈ܝ ܒܐܦ̈ܐ ܡܢܐ ܡܢܣܝܢ ܐܢܬܘܢ ܠܝ܂
22:19	ܚܘܐܘܢܢܝ ܛܒܥܐ ܕܟܣܦ ܪܫܐ ܘܐܫܛܘ ܠܗ ܕܝܢܪܐ܂
22:20	ܐܡܪ ܠܗܘܢ ܝܫܘܥ܂ ܨܠܡܐ ܗܢܐ ܘܟܬܝܒܬܐ ܕܡܢܘ
22:21	ܐܡܪ̈ܝܢ ܠܗ ܕܩܣܪ ܗܝܕܝܢ ܐܡܪ ܠܗܘܢ ܗܒܘ ܕܩܣܪ ܠܩܣܪ ܘܕܐܠܗܐ ܠܐܠܗܐ܂
22:22	ܘܟܕ ܫܡܥܘ ܐܬܕܡܪܘ ܘܫܒܩܘܗܝ ܘܐܙܠܘ܀
22:23	ܘܒܗܘ ܝܘܡܐ ܩܪܒܘ ܙܕܘܩܝܐ ܘܐܡܪ̈ܝܢ ܠܗ ܠܝܬ ܚܝܬ ܡܝܬܐ ܘܡܫܐܠܝܢ ܗܘܘ ܠܗ
22:24	ܘܐܡܪܝܢ ܡܠܦܢܐ ܡܘܫܐ ܐܡܪ ܠܢ ܐܢ ܐܢܫ ܡܐܬ ܘܠܝܬ ܠܗ ܒܢ̈ܝܐ ܬܗܘܐ ܐܢܬܬܗ ܠܐܚܘܗܝ܂
22:25	ܘܫܒܥܐ ܐܚܝܢ ܐܝܬ ܗܘܘ܂ ܘܡܝܬ ܩܕܡܝܐ ܘܠܐ ܥܒܕ ܡܢܗ ܒܪܐ ܘܗܘܬ ܐܢܬܬܗ ܠܐܚܘܗܝ
22:26	ܘܐܦ ܐܚܪܢܐ ܗܟܘܬ܂ ܘܐܦ ܕܬܠܬܐ ܥܕܡܐ ܠܫܒܥܬܝܗܘܢ
22:27	ܒܐܚܪܝܬܐ ܕܟܠܗܘܢ ܡܝܬܬ ܗܝ ܐܢܬܬܐ
22:28	ܒܚܝܬ ܡܝܬܐ ܠܐܝܢܐ ܡܢ ܟܘܠܗܘܢ ܐܚܐ ܬܗܘܐ ܐܢܬܬܐ ܗܐ ܓܝܪ ܟܠܗܘܢ ܢܣܒܘܗ
22:29	ܥܢܐ ܝܫܘܥ ܘܐܡܪ ܠܗܘܢ ܣܓܝ ܛܥܝܢ ܐܢܬܘܢ ܘܠܐ ܝܕܥܝܢ ܐܢܬܘܢ ܟܬܒܐ ܘܠܐ ܚܝܠܗ ܕܐܠܗܐ
22:30	ܒܝܬ ܡܝ̈ܬܐ ܓܝܪ ܠܐ ܢܣܒܝܢ ܢܫܐ ܐܦ ܠܐ ܢܫܐ ܗܘܝܢ ܠܓܒܪܐ ܐܠܐ ܐܝܟ ܡܠܐܟܐ ܕܐܠܗܐ ܒܫܡܝܐ
22:31	ܥܠ ܩܝܡܬܐ ܕܝܢ ܕܡܢ ܒܝܬ ܡܝܬܐ ܠܐ ܩܪܝܬܘܢ ܡܕܡ ܕܐܡܪ ܐܠܗܐ
22:32	ܕܐܢܐ ܐܠܗܗ ܕܐܒܪܗܡ ܘܐܠܗܗ ܕܐܝܣܚܩ ܘܐܠܗܗ ܕܝܥܩܘܒ ܘܗܐ ܐܠܗܐ ܠܐ ܗܘܐ ܕܡܝܬܐ ܐܠܐ ܕܚܝ̈ܐ
22:33	ܘܟܕ ܫܡܥܘ ܟܢܫܐ ܗܢܘܢ ܡܬܕܡܪܝܢ ܗܘܘ ܒܝܘܠܦܢܗ
22:34	ܦܪ̈ܝܫܐ ܕܝܢ ܟܕ ܚܙܘ ܕܫܬܩ ܐܢܘܢ ܠܙܕܘܩ̈ܝܐ ܐܬܟܢܫܘ ܠܘܬܗ
22:35	ܘܫܐܠ ܗܘܐ ܚܕ ܡܢܗܘܢ ܟܕ ܡܢܣܐ ܠܗ ܘܐܡܪ ܠܗ
22:36	ܡܠܦܢܐ ܐܝܢܐ ܦܘܩܕܢܐ ܪܒ ܒܐܘܪܝܬܐ
22:37	ܐܡܪ ܠܗ ܝܫܘܥ ܕܬܪܚܡ ܠܡܪܝܐ ܐܠܗܟ ܡܢ ܟܘܠܗ ܠܒܟ܂ ܘܡܢ ܟܘܠܗ ܢܦܫܟ ܘܡܢ ܟܘܠܗ ܚܝܠܟ
22:38	ܗܢܘ ܦܘܩܕܢܐ ܪܒܐ ܘܪܫܝܐ
22:39	ܘܕܒܬܪܗ ܗܘ ܕܕܡܐ ܠܗ ܕܬܪܚܡ ܠܩܪܝܒܟ ܐܝܟ ܢܦܫܟ
22:40	ܒܗܠܝܢ ܬܪܝܢ ܦܘܩܕܢܝܢ ܬܠܝܐ ܐܘܪܝܬܐ ܘܢܒܝܐ
22:41	ܘܟܕ ܟܢܝܫܝܢ ܗܘܘ ܦܪܝܫܐ ܡܫܐܠ ܗܘܐ ܠܗܘܢ ܝܫܘܥ

22:42	ܘܐܡܪ ܡܢܐ ܡܣܬܒܪ ܠܟܘܢ ܥܠ ܡܫܝܚܐ ܒܪ ܡܢܘ ܐܡܪܝܢ ܠܗ ܒܪ ܕܘܝܕ

22:43	ܐܡܪ ܠܗܘܢ ܘܐܝܟܢܐ ܕܘܝܕ ܩܪܐ ܠܗ ܡܪܝ ܐܡܪ ܓܝܪ
22:44	ܕܐܡܪ ܡܪܝܐ ܠܡܪܝ ܕܬܒ ܠܟ ܡܢ ܝܡܝܢܝ ܥܕܡܐ ܕܐܣܝܡ ܒܥܠܕܒܒܝܟ ܬܚܝܬ ܪܓܠܝܟ
22:45	ܘܐܢ ܕܘܝܕ ܡܪܝ ܩܪܐ ܠܗ ܐܝܟܢܐ ܒܪܗ ܗܘ
22:46	ܘܠܐ ܐܫܟܚܘ ܕܢܬܠ ܠܗ ܦܬܓܡܐ ܐܦܠܐ ܐܢܫ ܐܡܪܚ ܡܢ ܗܝ ܫܥܬܐ ܠܡܫܐܠܘܬܗ ܬܘܒ