← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


23:01 ܗܝܕܝܢ ܐܡܪ ܝܫܘܥ ܠܟܢܫܐ ܘܠܬܠܡܝܕܘܗܝ
23:02 ܥܠ ܟܘܪܣܝܐ ܕܡܘܫܐ ܝܬܒܘ ܣܦܪ̈ܐ ܘܦܪ̈ܝܫܐ
23:03 ܘܟܠ ܡܐ ܕܐܡܪܝܢ ܠܟܘܢ ܗܘܝܬܘܢ ܥܒܕܝܢ ܐܝܟ ܥܒܕܝܗܘܢ ܕܝܢ ܠܐ ܬܥܒܕܘܢ ܐܡܪܝܢ ܓܝܪ ܘܠܐ ܥܒܕܝܢ
23:04 ܘܐܣܪܝܢ ܡܘܒ̈ܠܐ ܝܩܝܪ̈ܬܐ ܘܣܝܡܝܢ ܥܠ ܟܬܦܬܐ ܕܒܢ̈ܝ ܐܢܫܐ܂ ܘܗܢܘܢ ܕܝܢ ܠܐ ܩܪܒܝܢ ܠܗܝܢ
23:05 ܘܟܠ ܡܕܡ ܓܝܪ ܕܥܒܕܝܢ ܕܢܬܚܙܘܢ ܠܒܢ̈ܝ ܐܢܫܐ ܘܡܦܬܝܢ ܥܪ̈ܩܐ ܕܬܦܠܝܗܘܢ ܘܡܘܪܟܝܢ ܬܟ̈ܠܬܐ ܕܡܪܛܘܛܝܗܘܢ
23:06 ܘܪܚܡܝܢ ܪܝܫ ܣܡ̈ܟܐ ܒܐܚܫܡܝܬܐ ܘܡܘ̈ܬܒܐ ܡܝܩܪܐ ܒܟܢܘܫܬܐ
23:07 ܘܫܠܡܐ ܒܫܘܩ̈ܐ ܘܨܒܝܢ ܕܢܗܘܘܢ ܩܪ̈ܝܢ ܠܗܘܢ ܒܢܝ ܐܢܫܐ ܪܒܝ ܪܒܝ
23:08 ܐܢܬܘܢ ܠܐ ܬܩܪܘܢ ܪܒܝ ܚܕ ܗܘ ܡܠܦܢܟܘܢ ܘܐܢܬܘܢ ܟ̈ܠܟܘܢ ܐܚ̈ܐ
23:09 ܘܐܒܐ ܠܐ ܬܩܪܘܢ ܠܟܘܢ ܒܐܪܥܐ ܚܕ ܗܘ ܓܝܪ ܐܒܘܟܘܢ ܕܒܫܡܝܐ
23:10 ܘܐܦܠܐ ܬܬܩܪܘܢ ܡܠܦܢܐ ܡܛܠ ܕܡܠܦܢܟܘܢ ܡܫܝܚܐ ܗܘ܂
23:11 ܘܕܨܒܐ ܒܟܘܢ ܕܢܗܘܐ ܪܒ ܢܗܘܐ ܠܟܘܢ ܡܫܡܫܢܐ܂
23:12 ܟܠ ܕܢܪܝܡ ܓܝܪ ܢܦܫܗ ܢܬܡܟܟ ܘܟܠ ܕܢܡܟ ܢܦܫܗ ܢܬܪܝܡ܀
23:13 ܘܝ ܠܟܘܢ ܕܝܢ ܣܦܪ̈ܐ ܘܦܪ̈ܝܫܐ ܢܣܒܝܢ ܒܐܦ̈ܐ ܐܚܝܕܝܢ ܐܢܬܘܢ ܐܩܠܝܕܐ ܕܡܠܟܘܬܐ ܕܫܡܝܐ ܩܕܡ ܒܢ̈ܝ ܐܢܫܐ ܠܐ ܓܝܪ ܐܢܬܘܢ ܥܠܝܢ܂ ܘܠܐ ܠܐܝܠܝܢ ܕܐܬܝܢ ܠܡܥܠ ܫܒܩܝܢ ܐܢܬܘܢ܀
23:15 ܘܝ ܠܟܘܢ ܣܦܪ̈ܐ ܘܦܪ̈ܝܫܐ ܢܣ̈ܒܝ ܒܐܦܐ ܕܡܬܟܪܟܝܢ ܐܢܬܘܢ ܝܡܐ ܘܝܒܫܐ ܕܬܥܒܕܘܢ ܚܕ ܓܝܘܪܐ ܘܡܐ ܕܗܘܐ ܥܒܕܝܢ ܐܢܬܘܢ ܠܗ ܒܪܗ ܕܓܗܢܐ ܐܥܦܐ ܥܠܝܟܘܢ܀
23:16 ܘܝܠܟܘܢ ܢܓܘ̈ܕܐ ܣܡ̈ܝܐ ܕܐܡܪ̈ܝܢ ܐܢܬܘܢ ܕܡܢ ܕܝܡܐ ܒܗܝܟܠܐ ܠܐ ܡܟܐ ܘܡܢ ܕܝܡܐ ܒܕܗܒܐ ܕܒܗܝܟܠܐ ܚܛܐ
23:17 ܣܟ̈ܠܐ ܘܥܘܝܪ̈ܐ ܡܢܐ ܪܒ ܕܗܒܐ ܐܘ ܗܝܟܠܐ ܕܗܘ ܡܩܕܫ ܠܗ ܠܕܗܒܐ
23:18 ܘܡܢ ܕܝܡܐ ܒܡܕܒܚܐ ܠܐ ܡܟܐ ܘܡܢ ܕܝܡܐ ܒܩܘܪܒܢܐ ܕܥܠ ܡܕܒܚܐ ܚܛܐ
23:19 ܥܘܝܪ̈ܐ ܡܢܐ ܪܒ ܩܘܪܒܢܐ ܐܘ ܡܕܒܚܐ ܕܗܘ ܡܩܕܫ ܠܗ ܠܩܘܪܒܢܐ
23:20 ܡܢ ܕܝܡܐ ܗܟܝܠ ܒܡܕܒܚܐ ܝܡܐ ܒܗ ܘܒܟܠ ܡܐ ܕܐܝܬ ܥܠܘܗܝ
23:21 ܘܡܢ ܕܝܡܐ ܒܗܝܟܠܐ ܝܡܐ ܒܗ ܘܒܡܢ ܕܥܡܪ ܒܗ
23:22 ܘܡܢ ܕܝܡܐ ܒܫܡܝܐ ܝܡܐ ܒܟܘܪܣܝܗ ܕܐܠܗܐ ܘܒܡܢ ܕܝܬܒ ܥܠܘܗܝ
23:23 ܘܝܠܟܘܢ ܣܦܪ̈ܐ ܘܦܪ̈ܝܫܐ ܢܣ̈ܒܝ ܒܐ̈ܦܐ ܕܡܥܣܪ̈ܝܢ ܐܢܬܘܢ ܗܪܙܡܐ ܘܫܒܬܐ ܘܟܡܘܢܐ ܘܫܒܩܬܘܢ ܝܩܝܪܬܐ ܕܐܘܪܝܬܐ ܕܝܢܐ ܘܚܢܢܐ ܘܗܝܡܢܘܬܐ܂ ܗܠܝܢ ܕܝܢ ܥܒܕܬܘܢ ܘܗܠܝܢ ܕܝܢ ܠܐ ܫܒܩܬܘܢ܂
23:24 ܢܓܘ̈ܕܐ ܣܡܝܐ ܕܡܨܠܠܝܢ ܐܢܬܘܢ ܡܢ ܒܩ̈ܐ ܘܒܠܥܝܢ ܐܢܬܘܢ ܓܡܠܐ܀
23:25 ܘܝܠܟܘܢ ܣܦܪ̈ܐ ܘܦܪ̈ܝܫܐ ܢܣ̈ܒܝ ܒܐܦܐ ܕܡܕܟܝܢ ܐܢܬܘܢ ܒܪܗ ܕܟܣܐ ܘܕܦܝܢܟܐ ܘܡܢ ܠܓܘ ܡ̈ܠܝܢ ܚܛܘܦܝܐ ܘܟܠ ܛܢܦܘܬܐ
23:26 ܦܪ̈ܝܫܐ ܥܘܝܪܐ ܕܟܘ ܠܘܩܕܡ ܓܘܗ ܕܟܣܐ ܘܐܦ ܒܪܗ ܕܟܐ ܗܘ܀
23:27 ܘܝܠܟܘܢ ܣܦܪ̈ܐ ܘܦܪ̈ܝܫܐ ܢܣ̈ܒܝ ܒܐ̈ܦܐ ܕܕܡܝܢ ܐܢܬܘܢ ܠܩܒܪ̈ܐ ܕܡܢ ܠܒܪ ܡܚܘܪ̈ܝܢ܂ ܘܡܢ ܠܓܘ ܡܠܝܢ ܓܪ̈ܡܐ ܕܡܝ̈ܬܐ ܘܟܠܗ ܛܢܦܘܬܐ܂
23:28 ܗܟܢܐ ܐܦ ܐܢܬܘܢ ܡܢ ܠܒܪ ܡܬܚܙܝܢ ܐܢܬܘܢ ܠܒ̈ܢܝ ܐܢܫܐ ܐܝܟ ܙܕܝܩ̈ܐ ܘܡܢ ܠܓܘ ܡ̈ܠܝܢ ܥܘܠܐ ܘܫܓܝܫܘܬܐ
23:29 ܘܝܠܟܘܢ ܣܦܪ̈ܐ ܘܦܪ̈ܝܫܐ ܢܣ̈ܒܝ ܒܐܦ̈ܐ ܕܒܢܝܢ ܐܢܬܘܢ ܩܒܪ̈ܐ ܕܢܒ̈ܝܐ ܘܡܨܒܬܝܢ ܐܢܬܘܢ ܒܝܬ ܩܒܘܪ̈ܐ ܕܙܕܝܩܐ
23:30 ܘܐܡܪܝܢ ܐܢܬܘܢ ܕܐܠܘ ܗܘܝܢ ܒܝܘܡܝ ܐܒ̈ܗܝܢ ܠܐ ܡܫ̈ܬܘܬܦܐ ܗܘܝܢ ܠܗܘܢ ܒܕܡܐ ܕܢܒ̈ܝܐ܂
23:31 ܡܟܝܠ ܡܘܕܝܢ ܐܢܬܘܢ ܕܒܢ̈ܝܐ ܐܢܬܘܢ ܕܗܢܘܢ ܕܩܛܠܘ ܠܢܒ̈ܝܐ܂
23:32 ܘܐܦ ܐܢܬܘܢ ܬܡܠܘܢ ܡܘܫܚܬܐ ܕܐܒܗ̈ܝܟܘܢ
23:33 ܚܘ̈ܘܬܐ ܝܠܕܐ ܕܐܟܕܢܐ ܐܝܟܢܐ ܬܥܪܩܘܢ ܡܢ ܕܝܢܐ ܕܓܗܢܐ
23:34 ܡܛܠ ܗܢܐ ܗܐ ܐܢܐ ܡܫܕܪܢܐ ܠܘܬܟܘܢ ܢܒ̈ܝܐ ܘܚܟܝ̈ܡܐ ܘܣܦܪ̈ܐ ܡܢܗܘܢ ܬܩܛܠܘܢ ܘܬܙܩܦܘܢ ܘܡܢܗܘܢ ܬܢܓܕܘܢ ܒܟܢܘܫܬܟܘܢ ܘܬܪܕܦܘܢ ܐܢܘܢ ܡܢ ܡܕܝܢܐ ܠܡܕܝܢܐ܂
23:35 ܕܢܐܬܐ ܥܠܝܟܘܢ ܕܡܐ ܟܘܠܗ ܕܙܕܝܩܐ ܕܐܬܐܫܕ ܥܠ ܐܪܥܐ܂ ܡܢ ܕܡܗ ܕܗܒܝܠ ܙܕܝܩܐ ܘܥܕܡܐ ܠܕܡܗ ܕܙܟܪܝܐ ܒܪ ܒܪܟܝܐ ܗܘ ܕܩܛܠܬܘܢ ܒܝܢܝ ܗܝܟܠܐ ܠܡܕܒܚܐ
23:36 ܐܡܝܢ ܐܡܪܢܐ ܠܟܘܢ ܕܢܐܬܝܢ ܗܠܝܢ ܟܘܠܗܝܢ ܥܠ ܫܪܒܬܐ ܗܕܐ܀
23:37 ܐܘܪܫܠܡ ܐܘܪܫܠܡ ܕܩܛܠܬܝ ܢܒܝܐ ܘܪܓܡܬܝ ܠܐܝܠܝܢ ܕܫܠܝܚܝܢ ܗܘܘ ܠܘܬܟܝ ܟܡܐ ܙܒܢܝܢ ܨܒܝܬ ܕܐܟܢܫ ܐܢܘܢ ܠܒܢܝ̈ܟܝ ܐܝܟ ܬܪܢܓܘܠܬܐ ܕܟܢܫܐ ܠܦܪܘܓܝܗ ܕܬܚܝܬ ܟܢܦ̈ܝܗ ܘܠܐ ܨܒܝܬܘܢ
23:38 ܗܐ ܫܒܝܩ ܒܝܬܟܘܢ
23:39 ܐܡܪܢܐ ܠܟܘܢ ܓܝܪ ܕܠܐ ܬܚܙܘܢܢܝ ܡܢ ܗܫܐ ܥܕܡܐ ܕܬܐܡܪܘܢ ܒܪܝܟ ܗܘ ܕܐܬܐ ܒܫܡܗ ܕܡܪܝܐ܀

next chapter