← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


24:01 ܘܟܕ ܢܦܩ ܝܫܘܥ ܡܢ ܗܝܟܠܐ ܠܡܐܙܠ܂ ܘܩܪܒܘ ܬܠܡܝܕܘܗܝ܂ ܡܚܘܝܢ ܠܗ ܒܢܝܢܐ ܕܗܝܟܠܐ
24:02 ܗܘ ܕܝܢ ܥܢܐ ܘܐܡܪ ܠܗܘܢ ܚܙܝܢ ܐܢܬܘܢ ܗܠܝܢ ܟܠܗܝܢ ܟܐܦܐ ܐܡܝܢ ܐܡܪܢܐ ܠܟܘܢ ܕܠܐ ܬܫܬܒܩ ܗܪܟܐ ܟܦܐ ܥܠ ܟܐܦܐ ܕܠܐ ܬܫܬܪܐ܀
24:03 ܘܟܕ ܝܬܒ ܒܛܘܪ ܙܝܬܐ ܩܪܒܘ ܬܠܡܝܕܘܗܝ ܘܐܡܪܝܢ ܠܗ ܐܡܪ ܠܢ ܠܐܡܬܝ ܢܗܘܝܢ ܘܡܢܐ ܗܝ ܐܬܐ ܕܡܬܝܬܟ ܘܕܫܘܠܡܗ ܕܥܠܡܐ
24:04 ܥܢܐ ܝܫܘܥ ܘܐܡܪ ܠܗܘܢ ܚܙܘ ܕܠܐ ܐܢܫ ܢܛܥܝܟܘܢ
24:05 ܣܓܝܐܐ ܓܝܪ ܢܐܬܘܢ ܒܫܡܝ ܘܢܐܡܪܘܢ ܕܐܢܐ ܐܢܐ ܡܫܝܚܐ ܘܣܓܝܐܐ ܢܛܥܘܢ
24:06 ܥܬܝܕܝܢ ܐܢܬܘܢ ܕܝܢ ܠܡܫܡܥ ܩܪܒܐ ܘܫܡܥܐ ܕܩܪܒܐ ܚܙܘ ܕܝܢ ܕܠܡܢܐ ܬܕܚܠܘܢ ܥܬܝܕܢ ܕܡܗܘܐ ܗܠܝܢ ܐܠܐ ܠܐ ܥܕܟܝܠ ܫܘܠܡܐ
24:07 ܢܩܘܡ ܓܝܪ ܥܡܐ ܥܠ ܥܡܐ ܘܡܠܟܘܬܐ ܥܠ ܡܠܟܘܬܐ ܘܢܗܘܘܢ ܟܦ̈ܢܐ ܘܙܘܥܐ ܒܐܬܪܘܢ ܐܬܪܘܢ܂
24:08 ܗܠܝܢ ܕܝܢ ܟܠܗܝܢ ܪܫܐ ܐܢܝܢ ܕܚܒܠܐ
24:09 ܘܗܝܕܝܢ ܢܫܠܡܘܢܟܘܢ ܠܐܘܠܨܢܐ ܘܢܩܛܠܘܢܟܘܢ ܘܢܗܘܐ ܣܢܐ ܠܟܘܢ ܟܘܠ ܐܢܫ ܡܛܘܠ ܫܡܝ
24:10 ܗܝܕܝܢ ܢܬܟܫܠܘܢ ܣܓܝܐܐ ܘܚܕ ܠܚܕ ܢܫܠܡܘܢ ܘܢܣܢܘܢ ܚܕ ܠܚܕ
24:11 ܘܣܓܝܐܐ ܢܒܝܐ ܕܫܘܩܪܐ ܢܩܘܡܘܢ ܘܢܛܥܘܢ ܣܓ̈ܝܐܐ
24:12 ܘܡܛܠ ܣܓܝܐܘܬ ܥܘܠܐ ܢܦܘܓ ܚܘܒܐ ܕܣܓܝܐܐ
24:13 ܐܠܐ ܡܢ ܕܡܣܝܒܪ ܥܕܡܐ ܠܚܪܬܐ ܗܘ ܢܚܐ
24:14 ܘܬܬܟܪܙ ܗܢܐ ܣܒܪܬܐ ܕܡܠܟܘܬܐ ܒܟܠܗ ܥܠܡܐ ܠܣܗܕܘܬܐ ܕܟܠܗܘܢ ܥܡܡܐ ܘܗܝܕܝܢ ܢܐܬܐ ܫܘܠܡܐ
24:15 ܡܐ ܕܝܢ ܕܚܙܝܬܘܢ ܐܬܐ ܕܛܢܦܘܬܐ ܕܐܬܐܡܪ ܒܕܢܝܐܝܠ ܢܒܝܐ ܗܘ ܕܩܪܐ ܢܣܬܟܠ
24:16 ܗܝܕܝܢ ܐܝܠܝܢ ܕܒܝܗܘܕ ܢܥܪܩܘܢ ܠܛܘܪܐ
24:17 ܘܗܘ ܕܒܐܓܪܐ ܗܘ ܠܐ ܢܚܘܬ ܠܡܣܒ ܡܢ ܒܝܬܗ܂
24:18 ܘܐܝܢܐ ܕܒܩܪܝܬܐ ܗܘ ܠܐ ܢܬܦܢܐ ܠܒܣܬܪܗ ܠܡܣܒ ܡܪܛܘܛܗ܀
24:19 ܘܝ ܕܝܢ ܠܒܛܢܬܐ ܘܠܐܝܠܝܢ ܕܡܝܢܩܢ ܒܗܢܘܢ ܝܘܡ̈ܬܐ
24:20 ܗܘܝܬܘܢ ܕܝܢ ܡܨܠܝܢ ܕܠܐ ܢܗܘܐ ܥܪܘܩܝܟܘܢ ܒܣܬܘܐ ܘܠܐ ܒܫܒܬܐ
24:21 ܢܗܘܐ ܓܝܪ ܗܝܕܝܢ ܐܘܠܨܢܐ ܪܒܐ ܕܠܐ ܐܟܘܬܗ ܡܢ ܥܘܡܪ ܥܠܡܐ ܥܕܡܐ ܠܝܘܡܢܐ ܘܐܦܠܐ ܢܗܘܐ
24:22 ܘܐܠܘ ܠܐ ܗܘܝܢ ܟܪܝܢ ܗܘܘ ܝܘܡܬܐ ܗܢܘܢ ܠܐ ܚܝܐ ܗܘܐ ܟܘܠ ܒܣܪ ܡܛܠ ܓܒܝܐ ܕܝܢ ܢܬܟܪܘܢ ܝܘܡܬܐ ܗܢܘܢ
24:23 ܗܝܕܝܢ ܐܢ ܐܢܫ ܢܐܡܪ ܠܟܘܢ ܕܗܐ ܗܪܟܐ ܗܘ ܡܫܝܚܐ ܗܐ ܗܪܬܡܢ ܗܘ ܠܐ ܬܗܝܡܢܘܢ
24:24 ܢܩܘܡܘܢ ܓܝܪ ܡܫܝܚܐ ܕܓܠܐ ܘܢܒ̈ܝܐ ܕܓܠܐ ܘܢܬܠܘܢ ܐܬܘܬܐ ܪܘܪܒܬܐ ܘܬܕܡܪܬܐ ܗܟܢܐ ܕܐܢ ܡܫܟܚܐ ܐܦ ܠܓܒܝܐ ܢܛܥܘܢ܂
24:25 ܗܐ ܩܕܡܬ ܐܡܪܬ ܠܟܘܢ
24:26 ܕܐܢ ܢܐܡܪܘܢ ܠܟܘܢ ܗܐ ܒܚܘܪܒܐ ܗܘ܂ ܠܐ ܬܦܩܘܢ ܐܘ ܗܐ ܒܬܘܢܐ ܗܘ ܠܐ ܬܗܝܡܢܘܢ
24:27 ܐܝܟܢܐ ܕܒܪܩܐ ܓܝܪ ܒܪܩ ܡܢ ܡܕܢܚܐ ܘܡܬܚܙܐ ܥܕܡܐ ܠܡܥܪܒܐ ܗܟܢܐ ܬܗܘܐ ܡܬܝܬܗ ܕܒܪܗ ܕܐܢܫܐ
24:28 ܐܝܟܐ ܕܦܓܪܐ ܬܡܢ ܢܬܟܢܫܘܢ ܢܫܪ̈ܐ܀
24:29 ܡܚܕܐ ܕܝܢ ܡܢ ܒܬܪ ܐܘܠܨܢܐ ܕܗܢܘܢ ܝܘܡܬܐ ܢܚܫܟ ܫܡܫܐ ܘܢܘܗܪܗ ܕܣܗܪܐ ܠܐ ܢܢܗܪ ܘܢܦܠܘܢ ܟܘܟܒܐ ܡܢ ܫܡܝܐ ܘܢܙܘܥܘܢ ܚܝܠܘܬܐ ܕܫܡܝܐ
24:30 ܘܗܝܕܝܢ ܢܬܚܙܐ ܢܝܫܗ ܕܒܪܗ ܕܐܢܫܐ ܒܫܡܝܐ ܘܬܚܙܘܢ ܠܒܪܗ ܕܐܢܫܐ ܕܐܬܐ ܥܠ ܥܢܢܝ̈ ܫܡܝܐ ܥܡ ܚܝܠܐ ܪܒܐ ܘܫܘܒܚܐ
24:31 ܘܢܫܕܪ ܡܠܐܟܘܗܝ ܥܡ ܩܪܢܐ ܪܒܬܐ ܘܢܟܢܫ ܠܓܒ̈ܘܗܝ ܡܢ ܐܪ̈ܒܥ ܪ̈ܘܚܐ ܡܢ ܥܒܪܐ ܕܫܡܝܐ ܥܕܡܐ ܠܥܒܪܐ
24:32 ܡܢ ܬܬܐ ܕܝܢ ܝܠܦܘ ܦܠܐܬܐ ܕܡܐ ܕܪܟܘ ܣܘ̈ܟܝܗ ܘܦܪܥܘ ܛܪܦܝܗ ܝܕܥܝܢ ܐܢܬܘܢ ܕܩܪܝܒ ܗܘ ܩܝܛܐ
24:33 ܗܟܢܐ ܐܦ ܐܢܬܘܢ ܡܐ ܕܚܙܝܬܘܢ ܗܠܝܢ ܟܠܗܝܢ ܝܕܥܝܢ ܐܢܬܘܢ ܕܩܪܒܬ ܠܬܪܥܐ
24:34 ܐܡܝܢ ܐܡܪܢܐ ܠܟܘܢ ܕܠܐ ܬܥܒܪ ܫܪܒܬܐ ܗܕܐ ܥܕܡܐ ܕܗܠܝܢ ܟܘܠܗܝܢ ܢܗܘܝܢ
24:35 ܫܡܝܐ ܘܐܪܥܐ ܢܥܒܪܘܢ ܘܡܠܝ ܠܐ ܢܥܒܪܢ܀
24:36 ܥܠ ܝܘܡܐ ܕܝܢ ܘܥܠ ܫܥܬܐ ܗܝ ܐܢܫ ܠܐ ܝܕܥ ܘܐܦܠܐ ܡܠܐܟܝ ܫܡܝܐ ܐܠܐ ܐܒܐ ܒܠܚܘܕ
24:37 ܐܝܟ ܕܗܘܐ ܓܝܪ ܒܝܘܡܝ ܢܘܚ ܗܟܢܐ ܬܗܘܐ ܡܬܝܬܗ ܕܒܪܗ ܕܐܢܫܐ܂
24:38 ܐܟܙܢܐ ܓܝܪ ܕܡܢ ܩܕܡ ܛܘܦܢܐ ܐܟܠܝܢ ܗܘܘ ܘܫܬܝܢ ܘܡܟܪܝܢ ܘܡܡܟܪ̈ܝܢ ܥܕܡܐ ܕܥܠ ܢܘܚ ܠܩܒܘܬܐ
24:39 ܘܠܐ ܝܕܥܘ ܥܕܡܐ ܕܐܬܐ ܛܘܦܢܐ ܘܫܩܠ ܠܟܠܗܘܢ ܗܟܢܐ ܬܗܘܐ ܡܬܝܬܗ ܕܒܪܗ ܕܐܢܫܐ
24:40 ܗܝܕܝܢ ܬܪܝܢ ܢܗܘܘܢ ܒܛܘܪܐ ܚܕ ܢܬܕܒܪ ܘܚܕ ܢܫܬܒܩ
24:41 ܘܬܪܬܝܢ ܢܗܘܝܢ ܛܚܢܢ ܪܚܝܐ ܚܕܐ ܡܬܕܒܪܐ ܘܚܕܐ ܡܫܬܒܩܐ
24:42 ܗܘܘ ܥܝܪܝܢ ܕܠܐ ܝܕܥܝܢ ܐܢܬܘܢ ܒܐܝܕܐ ܫܥܬܐ ܐܬܐ ܡܪܟܘܢ
24:43 ܘܗܕܐ ܗܘܝܬܘܢ ܝܕܥܝܢ ܕܐܠܘ ܝܕܥ ܗܘܐ ܡܪܐ ܒܝܬܐ ܒܐܝܕܐ ܡܛܪܬܐ ܐܬܐ ܗܘܐ ܓܢܒܐ ܡܬܬܥܝܪ ܗܘܐ ܘܠܐ ܫܒܩ ܗܘܐ ܕܢܬܦܠܫ ܒܝܬܗ
24:44 ܡܛܠ ܗܢܐ ܐܦ ܐܢܬܘܢ ܗܘܝܬܘܢ ܡܛܝܒܝܢ ܕܒܫܥܬܐ ܕܠܐ ܣܒܪܝܢ ܐܢܬܘܢ ܢܐܬܐ ܒܪܗ ܕܐܢܫܐ
24:45 ܡܢܘ ܟܝ ܐܝܬܘܗܝ ܐܝܢܐ ܥܒܕܐ ܡܗܝܡܢܐ ܘܚܟܝܡܐ ܕܐܩܝܡܗ ܡܪܗ ܥܠ ܟܢ̈ܘܬܗ܂ ܕܢܬܠ ܠܗܘܢ ܦܪܣܐ ܒܙܒܢܗ܂
24:46 ܛܘܒܘܗܝ ܠܥܒܕܐ ܗܘ ܕܐܢ ܢܐܬܐ ܡܪܗ ܢܫܟܚܝܗܝ ܕܥܒܕ ܗܟܢܐ܂
24:47 ܐܡܝܢ ܐܡܪܢܐ ܠܟܘܢ ܕܢܫܠܛܘܗܝ ܥܠ ܟܘܠ ܡܐ ܕܐܝܬ ܠܗ܂
24:48 ܐܢ ܕܝܢ ܢܐܡܪ ܥܒܕܐ ܒܝܫܐ ܒܠܒܗ ܕܡܪܝ ܡܘܚܪ ܠܡܐܬܐ
24:49 ܘܢܫܪܐ ܠܡܡܚܐ ܠܟܢܘܬܗ ܘܢܗܘܐ ܐܟܠ ܘܫܬܐ ܥܡ ܪܘܝܐ
24:50 ܢܐܬܐ ܡܪܗ ܕܥܒܕܐ ܗܘ ܒܝܘܡܐ ܕܠܐ ܣܒܪ ܘܒܫܥܬܐ ܕܠܐ ܝܕܥ
24:51 ܘܢܦܠܓܝܘܗܝ ܘܢܣܝܡ ܡܢܬܗ ܥܡ ܢܣܒܝ ܒܐܦ̈ܐ ܘܬܡܢ ܢܗܘܐ ܒܟܝܐ ܘܚܘܪܩ ܫܢܐ܀

next chapter