The Comprehensive Aramaic Lexicon

26:01	ܘܗܘܐ ܕܟܕ ܫܠܡ ܡ̈ܠܘܗܝ ܗܠܝܢ ܐܡܪ ܠܬܠܡܝܕܘܗܝ
26:02	ܝܕܥܝܢ ܐܢܬܘܢ ܡܢ ܒܬܪ ܬܪܝܢ ܝܘܡܝܢ ܗܘܐ ܦܨܚܐ ܘܒܪܗ ܕܐܢܫܐ ܡܫܬܠܡ ܕܢܙܕܩܦ
26:03	ܗܝܕܝܢ ܐܬܟܢܫܘ ܪܒܝ ܟܗܢܐ ܘܩܫܝܫܐ ܕܥܡܐ ܠܕܪܬܗ ܕܩܝܦܐ ܪܒ ܟܗܢܐ
26:04	ܘܡܬܚܫܒܝܢ ܗܘܘ ܕܒܢܟܠܐ ܢܐܚܕܘܢܝܗܝ ܠܝܫܘܥ ܘܢܩܛܠܘܢܝܗܝ
26:05	ܐܡܪܝܢ ܗܘܘ ܠܐ ܒܥܕܥܝܕܐ ܘܠܐ ܒܦܨܚܐ ܕܠܐ ܢܗܘܐ ܫܓܘܫܝܐ ܒܥܡܐ
26:06	ܘܟܕ ܗܘܐ ܝܫܘܥ ܒܒܝܬ ܥܢܝܐ ܒܒܝܬܗ ܕܫܡܥܘܢ ܓܪܒܐ
26:07	ܩܪܒܬ ܐܢܬܬܐ ܚܕܐ ܘܐܝܬ ܗܘܬ ܥܠܝܗ ܫܛܝܦܬܐ ܕܡܫܚܐ ܕܒܣܡܐ ܕܝܩܝܪ̈ܝܢ ܕܡܘܗܝ ܘܐܫܦܥܬܗ ܥܠ ܪܫܗ ܕܝܫܘܥ ܟܕ ܣܡܝܟ
26:08	ܚܙܘ ܕܝܢ ܬܠܡܝܕܘܗܝ ܘܐܡܪܘ ܠܡܢܐ ܐܒܕܢܐ ܗܢܐ
26:09	ܡܫܟܚ ܗܘܐ ܓܝܪ ܗܢܐ ܕܢܙܕܒܢ ܒܣܓܝ ܘܢܬܝܗܒ ܠܡܣ̈ܟܢܐ
26:10	ܝܫܘܥ ܕܝܢ ܝܕܥ ܘܐܡܪ ܠܗܘܢ ܡܢܐ ܡܠܐܝܢ ܠܗ ܠܐܢܬܬܐ ܥܒܕܐ ܫܦܝܪܐ ܘܛܒܐ ܥܒܕܬ ܠܘܬܝ
26:11	ܐܝܬܝܗܘܢ ܡܣܟܢܐ ܓܝܪ ܒܟܠܙܒܢ ܠܘܬܟܘܢ ܐܢܘܢ ܐܢܐ ܕܝܢ ܠܐ ܒܟܠܙܒܢ ܠܘܬܟܘܢ ܐܢܐ
26:12	ܗܕܐ ܕܝܢ ܕܐܪܡܝܬ ܡܫܚܐ ܗܢܐ ܥܠ ܦܓܪܝ ܐܝܟ ܕܠܡܩܒܪܢܝ ܥܒܕܬ
26:13	ܐܡܝܢ ܐܡܪܢܐ ܠܟܘܢ ܕܐܝܟܐ ܕܬܬܟܪܙ ܣܒܪܬܝ ܗܕܐ ܒܟܠܗ ܥܠܡܐ ܬܬܡܠܠ ܐܦ ܡܕܡ ܕܥܒܕܬ ܐܢܬܬܐ ܗܕܐ ܠܕܘܟܪܢܗ܀
26:14	ܗܝܕܝܢ ܐܙܠ ܚܕ ܡܢ ܬܪܥܣܪ ܕܡܬܩܪܐ ܝܗܘܕܐ ܣܟܪܝܘܛܐ ܠܘܬ ܪܒܝ ܟܗܢܐ
26:15	ܘܐܡܪ ܠܗܘܢ ܡܢܐ ܐܢܬܘܢ ܨܒܝܢ ܠܡܬܠ ܐܢܬܘܢ ܘܐܢܐ ܡܫܠܡ ܠܗ ܠܟܘܢ ܘܐܩܝܡܘ ܠܗ ܬܠܬܝܢ ܕܟܣܦܐ
26:16	ܘܡܢ ܗܝܕܝܢ ܒܥܐ ܗܘܐ ܠܗ ܦܠܥܐ ܕܢܫܠܡܝܘܗܝ
26:17	ܒܝܘܡܐ ܕܝܢ ܩܕܡܝܐ ܕܦܛܝܪܐ ܩܪܒܘ ܬܠܡܝܕܘܗܝ ܕܝܫܘܥ ܘܐܡܪܝܢ ܠܗ ܐܝܟܐ ܨܒܐ ܐܢܬ ܕܢܛܝܒ ܠܟ ܕܬܐܟܘܠ ܦܨܚܐ܂

26:18	ܐܡܪ ܠܗܘܢ ܙܠܘ ܠܡܕܝܢܬܐ ܠܘܬ ܦܠܢ ܘܐܡܪܘ ܠܗ ܪܒܢ ܐܡܪ ܙܒܢܝ ܩܪܝܒ ܗܘ ܠܘܬܟ ܥܒܕܢܐ ܦܨܚܐ ܥܡ ܬܠܡ̈ܝܕܝ܂

26:19	ܘܥܒܕܘ ܬܠܡܝ̈ܕܘܗܝ ܐܝܟܢܐ ܕܦܩܕ ܐܢܘܢ ܝܫܘܥ ܘܛܝܒܘ ܦܨܚܐ
26:20	ܘܟܕ ܗܘܐ ܪܡܫܐ ܣܡܝܟ ܗܘܐ ܠܘܬ ܬܪܥܣܪܬܗ
26:21	ܘܟܕ ܗܢܘܢ ܠܥܣܝܢ܂ ܐܡܪ ܠܗܘܢ ܐܡܝܢ ܐܡܪܢܐ ܠܟܘܢ ܕܚܕ ܡܢܟܘܢ ܢܫܠܡܢܝ
26:22	ܘܟܪܝܬ ܠܗܘܢ ܛܒ ܘܫܪܝܘ ܠܡܐܡܪ ܚܕ ܚܕ ܡܢܗܘܢ ܕܠܡܐ ܐܢܐ ܗܘ ܡܪܝ
26:23	ܐܡܪ ܠܗܘܢ ܗܘ ܕܡܘܫܛ ܐܝܕܗ ܥܡܝ ܒܠܓܬܐ ܗܘ ܢܫܠܡܢܝ܂
26:24	ܘܒܪܗ ܕܐܢܫܐ ܐܙܠ ܐܝܟܢܐ ܕܟܬܝܒ ܥܠܘܗܝ ܘܝ ܕܝܢ ܠܗܘ ܓܒܪܐ ܕܒܐܝܕܗ ܕܡܫܬܠܡ ܐܢܐ܂ ܦܩܚ ܗܘܐ ܠܗ ܐܠܘ ܠܐ ܐܬܝܠܕ܂
26:25	ܘܥܢܐ ܝܗܘܕܐ ܡܫܠܡܢܐ ܘܐܡܪ ܕܠܡܐ ܐܢܐ ܗܘ ܪܒܝ܂ ܐܡܪ ܠܗ܂ ܐܢܬ ܐܡܪܬ
26:26	ܘܟܕ ܗܢܘܢ ܠܥܣܝܢ ܢܣܒ ܝܫܘܥ ܠܚܡܐ ܘܒܪܟ ܥܠܘܗܝ ܘܩܨܐ ܘܝܗܒ ܠܬܠܡܝܕܘܗܝ ܘܐܡܪ ܣܒܘ ܐܟܘܠܘ ܗܢܘ ܦܓܪܝ
26:27	ܘܢܣܒ ܟܣܐ ܘܐܘܕܝ ܥܠܘܗܝ ܘܝܗܒ ܠܗܘܢ ܘܐܡܪ ܣܒܘ ܐܫܬܘ ܡܢܗ ܟܘܠܟܘܢ
26:28	ܗܢܘ ܕܡܝ ܕܝܬܩܐ ܚܕܬܐ ܕܡܬܐܫܕ ܚܠܦ ܣܓܝܐܐ ܠܫܘܒܩܢܐ ܕܚ̈ܛܗܐ
26:29	ܐܡܪܢܐ ܠܟܘܢ ܓܝܪ ܕܠܐ ܐܫܬܐ ܡܢ ܗܫܐ ܡܢ ܦܐܪܗ ܕܓܦܬܐ ܥܕܡܐ ܠܝܘܡܐ ܕܐܫܬܝܘܗܝ ܥܡܟܘܢ ܚܕܬܐ ܒܡܠܟܘܬܗ ܕܐܒܝ
26:30	ܘܟܕ ܫܒܚܘ܂ ܐܙܠܘ ܠܛܘܪܐ ܕܙܝ̈ܬܐ
26:31	ܗܝܕܝܢ ܐܡܪ ܠܗܘܢ ܝܫܘܥ ܟܠܟܘܢ ܬܬܟܫܠܘܢ ܒܝ ܒܗܢܐ ܠܠܝܐ ܟܬܝܒ ܗܘ ܓܝܪ ܕܐܡܚܐ ܠܪܥܝܐ ܘܢܬܒܕܪܘܢ ܐܡܪ̈ܐ ܕܥܢܗ܂
26:32	ܘܡܐ ܕܩܡܬ ܡܩܕܡܢܐ ܠܟܘܢ ܠܓܠܝܠܐ܀
26:33	ܥܢܐ ܫܡܥܘܢ ܟܐܦܐ ܘܐܡܪ ܐܢ ܟܠܗܘܢ ܢܬܟܫܠܘܢ ܒܟ ܐܢܐ ܠܥܠܡ ܠܐ ܡܬܟܫܠܢܐ ܒܟ
26:34	ܐܡܪ ܠܗ ܝܫܘܥ ܐܡܝܢ ܐܡܪܢܐ ܠܟ ܕܒܗܢܐ ܠܠܝܐ ܥܕܠܐ ܢܩܪܐ ܬܪܢܓܠܐ ܬܠܬ̈ ܙܒܢܝܢ ܬܟܦܘܪ ܒܝ܂
26:35	ܐܡܪ ܠܗ ܫܡܥܘܢ ܟܐܦܐ ܐܢ ܢܗܘܐ ܠܝ ܠܡܡܬ ܥܡܟ ܠܐ ܐܟܦܘܪ ܒܟ ܘܐܦ ܟܠܗܘܢ ܬܠܡ̈ܝܕܐ ܗܟܢܐ ܐܡܪܘ
26:36	ܗܝܕܝܢ ܐܬܐ ܥܡܡܗܘܢ ܝܫܘܥ ܠܐܬܪܐ ܕܡܬܩܪܐ ܓܘܣܡܢܝ ܐܡܪ ܠܬܠܡ̈ܝܕܘܗܝ ܬܒܘ ܗܪܟܐ ܥܕ ܐܙܠ ܐܨܠܐ
26:37	ܘܕܒܪ ܠܫܡܥܘܢ ܘܠܬܪܝܗܘܢ ܒܢܝ ܙܒܕܝ ܘܫܪܝ ܗܘܐ ܠܡܬܟܡܪܘ ܘܠܡܨܦ܂
26:38	ܗܝܕܝܢ ܐܡܪ ܠܗܘܢ ܗܐ ܟܪܝܐ ܗܝ ܠܗ ܠܢܦܫܝ ܥܕܡܐ ܠܡܘܬܐ ܩܘܘ ܗܪܟܐ ܘܐܬܥܝܪܘ ܥܡܝ
26:39	ܘܫܢܝ ܡܢܗܘܢ ܩܠܝܠ ܢܦܠ ܥܠ ܐܦ̈ܘܗܝ ܘܡܨܠܐ ܗܘܐ ܘܐܡܪ ܗܘܐ ܐܒܝ ܕܐܢ ܡܫܟܚ ܕܢܥܒܪ ܡܢܝ ܟܣܐ ܗܢܐ ܒܪܡ ܠܐ ܨܒܝܢܝ ܕܝܠܝ ܢܗܘܐ ܐܠܐ ܐܢ ܕܝܠܟ
26:40	ܘܐܬܐ ܠܘܬ ܬܠܡܝܕܘܗܝ ܘܐܫܟܚ ܐܢܘܢ ܟܕ ܕܡܟܝܢ ܘܐܡܪ ܠܫܡܥܘܢ ܗܟܢܐ ܐܦܠܐ ܚܕܐ ܫܥܐ ܐܫܟܚܬܘܢ ܠܡܬܥܪܘ ܥܡܝ
26:41	ܐܬܥܝܪܘ ܘܨܠܘ ܕܠܐ ܬܥܠܘܢ ܠܢܣܝܘܢܐ ܪܘܚܐ ܨܒܝܐ ܐܠܐ ܦܓܪܐ ܟܪܝܗ
26:42	ܬܘܒ ܕܬܪܬܝܢ ܙܒܢܝܢ ܐܙܠ ܠܡܨܠܝܘ ܐܡܪ ܐܒܝ ܐܢ ܠܐ ܡܫܟܚ ܟܣܐ ܗܢܐ ܕܢܥܒܪ ܐܠܐ ܐܢ ܐܫܬܝܬܗ ܢܗܘܐ ܨܒܝܢܟ܂
26:43	ܘܐܬܐ ܬܘܒ ܘܐܫܟܚ ܐܢܘܢ ܟܕ ܕܡܟܝܢ ܡܛܘܠ ܕܥܝܢܝܗܘܢ ܒܫܢܬܐ ܝܩܝܪܢ ܗܘܝ܂
26:44	ܘܫܒܩ ܐܢܘܢ ܘܐܙܠ ܠܡܨܠܝܘ ܕܬܠܬ̈ ܙܒܢܝܢ ܘܬܘܒ ܗܟܘܬ ܐܡܪ܂
26:45	ܗܝܕܝܢ ܐܬܐ ܠܘܬ ܬܠܡܝܕܘܗܝ ܘܐܡܪ ܠܗܘܢ ܕܡܟܘ ܡܟܝܠ ܘܐܬܢܝܚܘ ܗܐ ܓܝܪ ܩܪܒܬ ܫܥܬܐ ܘܒܪܗ ܕܐܢܫܐ ܡܫܬܠܡ ܒܐܝܕܝܗܘܢ ܕܚ̈ܛܝܐ
26:46	ܩܘܡܘ ܢܐܙܠ ܡܟܐ ܡܛܐ ܠܗ ܗܘ ܕܡܫܠܡ ܠܝ܀
26:47	ܥܕ ܗܘ ܡܡܠܠ ܘܗܐ ܝܗܘܕܐ ܚܕ ܡܢ ܬܪ̈ܥܣܪܬܐ ܐܬܐ ܘܥܡܗ ܟܢܫܐ ܣܓܝܐܐ ܒܣ̈ܝܦܐ ܘܚܘܛܪ̈ܐ ܡܢ ܠܘܬ ܪ̈ܒܝ ܟܗ̈ܢܐ ܘܩܫܝܫܐ ܕܥܡܐ܂
26:48	ܝܗܘܕܐ ܕܝܢ ܡܫܠܡܢܐ ܝܗܒ ܠܗܘܢ ܐܬܐ ܘܐܡܪ ܕܠܗܘ ܐܝܢܐ ܕܢܫܩܢܐ ܠܗ ܠܗ ܐܚܘܕܘ
26:49	ܘܩܪܒ ܠܘܬ ܝܫܘܥ ܘܢܫܩܗ ܘܐܡܪ ܠܗ ܫܠܡ ܪܒܝ
26:50	ܝܫܘܥ ܕܝܢ ܐܡܪ ܠܗ ܥܠ ܡܐ ܐܬܝܬ ܚܒܪܝ ܗܝܕܝܢ ܩܪܒܘ ܘܐܪܡܝܘ ܥܠܘܗܝ ܐܝܕܝܐ ܘܐܚܕܘܗܝ ܠܝܫܘܥ
26:51	ܘܗܐ ܚܕ ܡܢ ܬܠܡܝܕܘܗܝ ܕܝܫܘܥ ܐܘܫܛ ܐܝܕܗ ܘܫܡܛ ܣܝܦܐ ܘܡܚܝܗܝ ܠܛܠܝܗ ܕܪܒ ܟܗ̈ܢܐ ܘܫܩܠܗ ܐܕܢܗ
26:52	ܗܝܕܝܢ ܐܡܪ ܠܗ ܝܫܘܥ ܐܗܦܟ ܣܝܦܐ ܠܕܘܟܬܗ ܟܠܗܘܢ ܓܝܪ ܐܝܠܝܢ ܕܫܩܠܘ ܣܝܦܐ ܒܣܝܦܐ ܢܐܒܕܘܢ܂
26:53	ܐܘ ܣܒܪ ܐܢܬ ܕܠܐ ܡܫܟܚ ܐܢܐ ܕܐܒܥܐ ܡܢ ܐܒܝ ܘܢܬܠ ܠܝ ܝܬܝܪ ܡܢ ܬܪܬܥܣܪܐ ܠܓܝܘ̈ܢܝܢ ܕܡܠܐܟܐ
26:54	ܐܠܐ ܐܝܟܢܐ ܢܬܡܠܘܢ ܟܬܒܐ ܕܗܟܢܐ ܘܠܐ ܠܡܗܘܐ
26:55	ܒܗܝ ܫܥܬܐ ܐܡܪ ܝܫܘܥ ܠܟܢܫܐ ܐܝܟ ܕܥܠ ܓܝܣܐ ܢܦܩܬܘܢ ܥܠܝ ܒܣܝ̈ܦܐ ܘܒܚܘܛܪܐ ܠܡܐܚܕܢܝ ܟܠܝܘܡ ܒܗܝܟܠܐ ܝܬܒ ܗܘܝܬ ܘܡܠܦ ܗܘܝܬ ܘܠܐ ܐܚܕܬܘܢܢܝ܂
26:56	ܗܠܝܢ ܕܝܢ ܟܠܗܝܢ ܕܗܘܝ ܕܢܬܡܠܘܢ ܟܬܒܐ ܕܢܒ̈ܝܐ܀ ܗܝܕܝܢ ܫܒܩܘܗܝ ܬܠܡܝܕܘܗܝ ܟܠܗܘܢ ܘܥܪܩܘ܂
26:57	ܘܐܚܕܘܗܝ ܗܢܘܢ ܘܐܘܒܠܘܗܝ ܠܘܬ ܩܝܦܐ ܪܒ ܟܗܢܐ ܐܬܪ ܕܟܢܝܫܝܢ ܣܦܪܐ ܘܩܫܝܫܐ ܕܥܡܐ
26:58	ܫܡܥܘܢ ܕܝܢ ܐܙܠ ܗܘܐ ܒܬܪܗ ܡܢ ܪܘܚܩܐ ܥܕܡܐ ܠܕܪܬܗ ܕܪܒ ܟܗܢܐ ܘܥܠ ܠܓܘ ܘܝܬܒ ܗܘܐ ܥܡ ܕܚܫܐ ܕܢܚܙܐ ܚܪܬܐ
26:59	ܘܟܠܗ ܟܢܘܫܬܐ ܒܥܝܢ ܗܘܘ ܥܠܘܗܝ ܥܠ ܝܫܘܥ ܣܗܕܐ ܐܝܟ ܕܢܡܝܬܘܢܝܗܝ
26:60	ܘܠܐ ܐܫܟܚܘ ܘܐܬܘ ܣܓܝܐܐ ܣܗܕܝ ܫܘܩܪܐ ܘܠܐ ܐܫܟܚܘ ܠܡܐܡܪ ܫܪܝܪܬܐ ܒܐܚܪܝܬܐ ܐܬܘ ܬܪܝܢ ܐܚܪܢܝܢ ܣܗܕܐ ܕܫܘܩܪܐ
26:61	ܘܐܡܪܝܢ ܗܢܐ ܐܡܪ ܕܡܫܟܚܢܐ ܕܐܣܬܪܝܘܗܝ ܠܗܝܟܠܐ ܗܢܐ ܘܠܬܠܬܐ ܝܘܡܝܢ ܐܒܢܝܘܗܝ
26:62	ܘܩܡ ܪܒ ܟܗ̈ܢܐ ܘܐܡܪ ܠܗ ܠܐ ܝܗܒ ܐܢܬ ܦܬܓܡܐ ܡܢܐ ܗܠܝܢ ܡܣܗܕܝܢ ܥܠܝܟ܂
26:63	ܝܫܘܥ ܕܝܢ ܫܬܝܩ ܗܘܐ ܥܢܐ ܪܒ ܟܗ̈ܢܐ ܘܐܡܪ ܠܗ ܡܘܡܢܐ ܠܟ ܒܐܠܗܐ ܚܝܐ܂ ܕܬܐܡܪ ܠܢ ܐܢ ܐܢܬ ܗܘ ܡܫܝܚܐ ܒܪܗ ܕܐܠܗܐ
26:64	ܐܡܪ ܠܗ ܐܢܬ ܐܡܪܬ ܐܡܪ ܐܢܐ ܠܟܘܢ ܕܡܢ ܗܫܐ ܬܚܙܘܢܝܗܝ ܠܒܪܗ ܕܐܢܫܐ ܕܝܬܒ ܡܢ ܝܡܝܢܐ ܕܚܝܠܐ ܘܐܬܐ ܥܠ ܥ̈ܢܢܝ ܫܡܝܐ
26:65	ܗܝܕܝܢ ܪܒ ܟܗܢܐ ܨܪܝ ܡܐܢܘܗܝ ܘܐܡܪ ܓܕܦ ܡܢܐ ܬܘܒ ܡܬܒܥܐ ܠܢ ܣܗ̈ܕܐ ܗܐ ܫܡܥܬܘܢ ܡܢ ܦܘܡܗ ܓܘܕܦܐ
26:66	ܡܢܐ ܥܘܕ ܨܒ̈ܝܢ ܐܢܬܘܢ ܥܢܘ ܟܠܗܘܢ ܘܐܡܪܘ ܕܚܝܒ ܗܘ ܡܘܬܐ
26:67	ܗܝܕܝܢ ܩܪܒܘ ܠܗ ܘܪܩܘ ܒܐܦܘܗܝ ܘܡܩܦܚܝܢ ܗܘܘ ܠܗ ܘܡܒܙܚܝܢ ܒܗ ܐܚܪܢܐ ܕܝܢ ܡܫ̈ܩܦܝܢ ܗܘܘ ܦܟܘ̈ܗܝ
26:68	ܘܐܡܪ̈ܝܢ ܐܬܢܒܐ ܠܢ ܡܫܝܚܐ ܡܢܘ ܡܚܟ܂
26:69	ܫܡܥܘܢ ܕܝܢ ܝܬܒ ܗܘܐ ܠܒܪ ܒܕܪܬܐ ܘܩܪܒܬ ܥܠܝܡܬܐ ܚܕܐ ܘܐܡܪܐ ܠܗ ܘܐܦ ܐܢܬ ܥܡ ܝܫܘܥ ܗܘܝܬ ܓܠܝܠܐ܂
26:70	ܗܘ ܕܝܢ ܟܦܪ ܠܥܝܢ ܟܠܗܘܢ ܘܐܡܪ ܠܐ ܝܕܥܢܐ ܡܢܐ ܐܡܪܬܝ ܘܐܦ ܠܐ ܚܟܡܢܐ
26:71	ܘܟܕ ܢܦܩ ܠܬܪܥܐ ܕܕܪܬܐ ܚܙܬܗ ܐܚܪܬܐ ܘܐܡܪܐ ܠܗܘܢ ܗܢܐ ܥܡ ܝܫܘܥ ܗܘܐ ܢܨܪܝܐ
26:72	ܘܬܘܒ ܟܦܪ ܘܝܡܐ ܕܠܐ ܝܕܥܢܐ ܠܗ ܠܓܒܪܐ ܗܢܐ܂
26:73	ܘܡܢ ܒܬܪ ܩܠܝܠ ܩܪܒܘ ܗܢܘܢ ܕܩܝܡܝܢ܂ ܘܐܡܪܘ ܠܫܡܥܘܢ ܫܪܝܪܐܝܬ ܡܢܗܘܢ ܐܢܬ ܕܐܦ ܡܡܠܠܟ ܓܝܪ ܕܡܐ ܗܘ
26:74	ܗܝܕܝܢ ܫܪܝ ܠܡܚܪܡܘ ܘܠܡܐܡܐ ܕܠܐ ܝܕܥܢܐ ܠܗ ܠܓܒܪܐ ܗܢܐ܂ ܘܒܗ ܒܫܥܬܐ ܩܪܐ ܬܪܢܓܠܐ܂
26:75	ܘܐܬܕܟܪ ܫܡܥܘܢ ܡܠܬܗ ܕܝܫܘܥ ܕܐܡܪ ܗܘܐ ܠܗ ܥܕܠܐ ܢܩܪܐ ܬܪܢܓܠܐ ܬܠ̈ܬ ܙܒ̈ܢܝܢ ܬܟܦܘܪ ܒܝ܂ ܘܟܕ ܢܦܩ ܠܒܪ ܒܟܐ ܡܪܝܪܐܝܬ܀