The Comprehensive Aramaic Lexicon

27:01	ܘܟܕ ܢܓܗܬ܂ ܫܩܠܘ ܡܠܟܐ ܟܠܗܘܢ ܪ̈ܒܝ ܟܗ̈ܢܐ ܘܩܫ̈ܝܫܐ ܕܥܡܐ ܥܠ ܝܫܘܥ ܕܢܡܝܬܘܢܗ܂
27:02	ܘܐܣܪܘܗܝ ܘܐܘܒܠܘܗܝ ܘܐܫܠܡܘܗܝ ܠܦܠܛܘܣ ܗܓܡܘܢܐ܀
27:03	ܗܝܕܝܢ ܟܕ ܚܙܐ ܝܗܘܕܐ ܡܫܠܡܢܐ ܕܐܬܚܝܒ ܐܬܬܘܝ ܘܐܗܦܟ ܗܠܝܢ ܬܠܬ̈ܝܢ ܕܟܣܦܐ ܠܪ̈ܒܝ ܟܗ̈ܢܐ ܘܠܩܫ̈ܝܫܐ
27:04	ܘܐܡܪ ܚܛܝܬ ܕܐܫܠܡܬ ܕܡܐ ܕܙܕܝܩܐ ܐܡܪ̈ܝܢ ܠܗ ܠܢ ܡܐ ܠܢ ܐܢܬ ܬܕܥ܂
27:05	ܗܘ ܕܝܢ ܫܕܝܗܝ ܟܣܦܐ ܒܗܝܟܠܐ ܘܫܢܝ ܘܐܙܠ ܬܠܐ ܠܗ ܘܐܬܚܢܩ܂
27:06	ܪ̈ܒܝ ܟܗ̈ܢܐ ܕܝܢ ܫܩܠܘܗܝ ܠܟܣܦܐ ܘܐܡܪ̈ܝܢ ܠܐ ܫܠܝܛ ܠܡܪܡܝܘܬܗ ܒܝܬ ܩܘܪܒܢܐ ܡܛܠ ܕܕܡ̈ܝܐ ܐܢܘܢ ܕܕܡܐ
27:07	ܘܢܣܒܘ ܡܠܟܐ܂ ܘܙܒܢܘ ܡܢܗ ܩܘܪܝܬ ܦܚܪܐ ܕܒܝܬ ܩܒܘܪܐ ܕܐܟܣܢܝܐ
27:08	ܡܛܠ ܗܢܐ ܐܬܩܪܝܬ ܗܝ ܩܘܪܝܬ ܕܡ ܥܕܡܐ ܠܝܘܡܢܐ܂
27:09	ܗܝܕܝܢ ܐܬܡܠܝ ܡܕܡ ܕܐܬܐܡܪ ܒܢܒܝܐ ܕܐܡܪ ܗܘܐ ܕܢܣܒܬ ܬ̈ܠܬܝܢ ܕܟܣܦܐ ܕܡܘܗܝ ܕܝܩܝܪܐ ܕܝܩܪܬ ܡܢ ܒܢܝ̈ܗܘܢ ܕܐܝܣܪܐܝܠ
27:10	ܘܝܗܒܬ ܐ̈ܢܝܢ ܠܩܘܪܝܬ ܦܚܪܐ ܐܝܟ ܕܦܩܕ ܠܝ ܡܪܝܐ܀
27:11	ܝܫܘܥ ܕܝܢ ܩܡ ܩܕܡ ܗܓܡܘܢܐ ܘܫܐܠܗ ܘܐܡܪ ܠܗ ܐܢܬ ܗܘ ܡܠܟܐ ܕܝܗܘ̈ܕܝܐ܂ ܐܡܪ ܠܗ ܝܫܘܥ ܐܢܬ ܐܡܪܬ܂
27:12	ܘܟܕ ܐܟܠܝܢ ܗܘܘ ܩܪ̈ܨܘܗܝ ܪ̈ܒܝ ܟܗܢܐ ܘܦܪ̈ܝܫܐ ܗܘ ܡܕܡ ܦܬܓܡ ܠܐ ܝܗܒ ܗܘܐ ܠܗܘܢ
27:13	ܗܝܕܝܢ ܐܡܪ ܠܗ ܦܝܠܛܘܣ ܠܐ ܫܡܥ ܐܢܬ ܟܡܐ ܣܗܕܝܢ ܡܣܗ̈ܕܝܢ ܥܠܝܟ܂
27:14	ܗܘ ܕܝܢ ܦܬܓܡ ܠܐ ܝܗܒ ܠܗ ܘܛܒ ܡܬܕܡܪ ܗܘܐ ܗܓܡܘܢܐ܂
27:15	ܒܟܠ ܥܕܥܝܕܐ ܕܝܢ ܡܥܕ ܗܘܐ ܗܓܡܘܢܐ ܕܢܗܘܐ ܫܪܐ ܠܥܡܐ ܐܣܝܪܐ ܚܕ ܐܝܢܐ ܕܗܢܘܢ ܨܒܝܢ ܗܘܘ܂
27:16	ܘܐܣܝܪ ܗܘܐ ܠܗܘܢ ܓܒܪܐ ܚܕ ܝܕܝܥܐ ܕܫܡܗ ܗܘܐ ܝܫܘܥ ܒܪ ܐܒܐ܂ ܐܪܡܐ ܗܘܐ ܒܝܬ ܐܣܝܪ̈ܐ ܡܛܠ ܒܝܫ̈ܬܐ ܕܥܒܕ ܗܘܐ ܘܩܛܠ ܗܘܐ ܩܛܠܐ܂
27:17	ܘܟܕ ܟܢܝܫܝܢ ܟܠܗܘܢ ܝܗܘܕܝܐ ܐܡܪ ܠܗܘܢ ܦܝܠܛܘܣ܂ ܠܡܢ ܨܒܝܢ ܐܢܬܘܢ ܕܐܫܪܐ ܠܟܘܢ܂ ܠܝܫܘܥ ܒܪ ܐܒܐ ܐܘ ܠܝܫܘܥ ܕܡܬܩܪܐ ܡܫܝܚܐ܂
27:18	ܝܕܥ ܗܘܐ ܓܝܪ ܕܡܛܠ ܚܣܡܐ ܗܘ ܐܫܠܡܘܗܝ ܠܗ܂
27:19	ܘܟܕ ܗܘ ܝܬܒ ܥܠ ܒܝܡ܂ ܫܠܚܐ ܠܗ ܐܢܬܬܗ܂ ܘܐܡܪܐ ܠܗ ܠܐ ܠܟ ܘܠܗܘ ܙܕܝܩܐ܂ ܣܓܝ ܓܝܪ ܚܫܬ ܝܘܡܢܐ ܒܚܠܡܝ ܡܛܘܠܬܗ܀
27:20	ܪ̈ܒܝ ܟܗܢܐ ܕܝܢ ܘܩܫܝܫܐ ܐܦܣܘ ܠܥܡܐ ܕܢܫܐܠܘܢ ܠܒܪ ܐܒܐ܂ ܘܢܘܒܕܘܢ ܠܝܫܘܥ܂
27:21	ܥܢܐ ܗܓܡܘܢܐ ܘܐܡܪ ܠܗܘܢ ܠܡܢ ܨܒܝܢ ܐܢܬܘܢ ܕܐܫܪܐ ܠܟܘܢ ܐܡܪܝܢ ܠܗ ܠܒܪ ܐܒܐ
27:22	ܐܡܪ ܠܗܘܢ ܦܝܠܛܘܣ ܘܡܢܐ ܐܥܒܕ ܠܝܫܘܥ ܕܡܬܩܪܐ ܡܫܝܚܐ ܐܡܪܝܢ ܟܠܗܘܢ ܢܙܕܩܦ
27:23	ܐܡܪ ܠܗܘܢ ܡܢܐ ܓܝܪ ܕܒܝܫ ܥܒܝܕ ܠܗ ܗܝܕܝܢ ܝܬܝܪܐܝܬ ܩܥܝܢ ܗܘܘ ܘܐܡܪܝܢ ܢܙܕܩܦ
27:24	ܟܕ ܚܙܐ ܕܝܢ ܦܝܠܛܘܣ ܕܡܕܡ ܠܐ ܡܘܬܪ ܠܗ ܐܠܐ ܟܡܐ ܂܂܂ ܪܘܒܐ ܡܣܓܐ ܣܓܐ ܢܣܒ ܡܝܐ ܘܐܫܝܓ ܐܝ̈ܕܘܗܝ ܠܥܝܢ ܟܠܗ ܟܢܫܐ ܘܐܡܪ ܙܟܝ ܐܢܐ ܡܢ ܕܡܐ ܗܢܐ ܐܢܬܘܢ ܝܕܥܝܢ
27:25	ܘܥܢܐ ܟܘܠܗ ܥܡܐ ܘܐܡܪܘ ܕܡܗ ܕܗܢܐ ܥܠܝܢ ܘܥܠ ܒܢ̈ܝܢ
27:26	ܗܝܕܝܢ ܫܪܐ ܠܗܘܢ ܠܒܪ ܐܒܐ ܘܢܓܕ ܒܦܪܓܠܐ ܠܝܫܘܥ ܘܐܫܠܡܗ ܠܗܘܢ ܕܢܙܕܩܦ
27:27	ܗܝܕܝܢ ܐܣܛܪ̈ܛܝܘܛܐ ܕܗܓܡܘܢܐ ܐܥܠܘܗܝ ܠܝܫܘܥ ܠܦܪܛܘܪܝܢ܂ ܘܟܢܫܘ ܥܠܘܗܝ ܟܢܫܐ
27:28	ܘܐܠܒܫܘܗܝ ܢܚ̈ܬܐ܂ ܕܙܚܘܪܝܬܐ ܘܕܐܪܓܘܢܐ
27:29	ܘܓܕܠܘ ܟܠܝܠܐ ܕܟܘ̈ܒܐ ܘܣܡܘ ܒܪܝܫܗ ܘܐܘܚܕܘ ܩܢܝܐ ܒܝܡܝܢܗ ܘܒܪܟܘ ܥܠ ܒܘܪܟܝܗܘܢ ܩܕܡܘܗܝ ܘܡܒܙܚܝܢ ܗܘܘ ܒܗ܂ ܘܐܡܪܝܢ ܫܠܡ ܠܟ ܡܠܟܐ ܕܝܗܘܕܝܐ܂
27:30	ܘܪ̈ܩܘ ܒܐܦ̈ܘܗܝ ܘܫܩܠܘ ܩܢܝܐ ܘܡܚܝܢ ܗܘܘ ܠܗ ܥܠ ܪܝܫܗ
27:31	ܘܟܕ ܒܙܚܘ ܒܗ ܐܫܠܚܘܗܝ ܢܚܬܐ ܗܢܘܢ ܕܠܒܝܫ ܗܘܐ ܘܐܠܒܫܘܗܝ ܢܚ̈ܬܘܗܝ ܘܕܒܪܘܗܝ ܘܐܙܠܘ ܠܡܙܩܦܗ܂
27:32	ܘܟܕ ܢܦܩܝܢ ܕܝܢ ܐܫܟܚܘ ܓܒܪܐ ܩܪܝܢܝܐ ܕܫܡܗ ܫܡܥܘܢ ܘܫܚܪܘܗܝ ܕܢܫܩܘܠ ܙܩܝܦܗ܂
27:33	ܘܐܬܘ ܠܐܬܪܐ ܕܡܬܩܪܐ ܓܓܘܠܬܐ
27:34	ܘܝܗܒܘ ܠܗ ܠܡܫܬܐ ܚܡܪܐ ܟܕ ܚܠܝܛ ܒܡܪܪܬܐ ܘܛܥܡܗ ܘܠܐ ܨܒܐ ܠܡܫܬܝܗ
27:35	ܘܟܕ ܙܩܦܘܗܝ ܦܠܓܘ ܠܒܘܫ̈ܘܗܝ ܘܢܦܣܘ ܥܠܝܗܘܢ
27:36	ܘܝܬܒܝܢ ܗܘܘ ܘܢܛܪܝܢ ܬܡܢ
27:37	ܟܕ ܗܢܘܢ ܝܬܒܝܢ܂ ܟܬܒܘ ܣܟܠܘܬܐ ܣܡܘ ܥܠ ܪܝܫܗ ܝܫܘܥ ܡܠܟܐ ܕܝܗ̈ܘܕܝܐ܀
27:38	ܗܝܕܝܢ ܐܙܕܩܦܘ ܥܡܗ ܬܪ̈ܝܢ ܥܒ̈ܕܝ ܒܝܫ̈ܬܐ ܚܕ ܡܢ ܝܡܝܢܗ ܘܚܕ ܡܢ ܣܡܠܗ
27:39	ܘܗܢܘܢ ܕܥܒܪܝܢ ܗܘܘ ܡܓܕܦܝܢ ܗܘܘ ܥܠܘܗܝ ܘܡܢܝܕܝܢ ܒܪ̈ܫܝܗܘܢ
27:40	ܘܐܡܪ̈ܝܢ ܣܬܪ ܗܝܟܠܐ ܘܒܢܐ ܠܗ ܠܬܠܬ̈ܐ ܝܘܡ̈ܝܢ ܐܢ ܒܪܗ ܐܢܬ ܕܐܠܗܐ ܐܚܐ ܢܦܫܟ ܘܚܘܬ ܡܢ ܙܩܝܦܐ܂
27:41	ܘܐܦ ܪ̈ܒܝ ܟܗܢ̈ܐ ܐܝܟ ܣܦܪ̈ܐ ܘܦܪ̈ܝܫܐ ܡܒܙܚܝܢ ܗܘܘ ܒܗ ܘܡܚ̈ܣܕܝܢ ܗܘܘ ܠܗ
27:42	ܘܐܡܪ̈ܝܢ ܕܠܐܚܪ̈ܢܐ ܡܚܐ܂ ܢܦܫܗ ܠܐ ܡܫܟܚ ܗܘܐ ܠܡܚܝܘ ܐܢ ܡܠܟܐ ܗܘ ܕܐܝܣܪܐܝܠ ܢܚܘܬ ܗܫܐ ܡܢ ܙܩܝܦܐ ܘܢܗܝܡܢ ܒܗ
27:43	ܗܐ ܬܟܝܠ ܗܘܐ ܥܠ ܐܠܗܐ ܢܦܠܛܝܘܗܝ ܗܫܐ ܐܢ ܨܒܐ ܒܗ ܐܡܪ ܓܝܪ ܕܒܪܗ ܐܢܐ ܕܐܠܗܐ܂
27:44	ܘܐܦ ܗܢܘܢ ܥܒ̈ܕܝ ܒܝܫܬܐ ܕܐܙܕܩܦܘ ܥܡܗ ܐܝܟ ܫܪܟܐ ܡܚܣܕܝܢ ܗܘܘ ܠܗ܂
27:45	ܘܡܢ ܫܬ ܫܥ̈ܝܢ ܗܘܐ ܚܫܘܟܐ ܥܠ ܟܘܠܗ ܐܪܥܐ ܥܕܡܐ ܠܫ̈ܥܐ ܬܫ̈ܥ܂
27:46	ܘܒܬܫ̈ܥ ܫ̈ܥܝܢ ܓܥܐ ܝܫܘܥ ܒܩܠܐ ܪܒܐ ܘܐܡܪ ܐܠܝ ܐܠܝ ܠܡܢܐ ܫܒܩܬܢܝ܀
27:47	ܘܐܢܫܐ ܗܢܘܢ ܕܩܝܡܝܢ ܗܘܘ ܬܡܢ ܟܕ ܫܡܥܘ ܐܡܪܝܢ ܗܢܐ ܠܐܠܝܐ ܩܪܐ܂
27:48	ܘܒܗ ܒܫܥܬܐ ܪܗܛ ܚܕ ܡܢܗܘܢ ܘܢܣܒ ܣܦܘܓܐ ܘܨܒܥܗ ܒܚܠܐ ܘܩܛܪ ܒܩܢܝܐ ܘܐܘܫܛ ܠܗ ܠܡܫܬܐ܂
27:49	ܐܚܪܢܐ ܕܝܢ ܐܡܪܝܢ ܫܒܘܩܘ ܢܚܙܐ ܐܢ ܐܬܐ ܐܠܝܐ ܘܡܚܐ ܠܗ
27:50	ܝܫܘܥ ܕܝܢ ܩܥܐ ܒܩܠܐ ܪܡܐ ܘܣܠܩܬ ܪܘܚܗ
27:51	ܘܒܗ ܒܫܥܬܐ ܐܨܛܪܝ ܐ̈ܦܝ ܬܪܥܐ ܕܒܝܬ ܡܩܕܫܐ ܡܢ ܕܥܠ ܪܝܫ܂ ܘܐܬܙܝܥܬ ܐܪܥܐ ܘܐܨܛܪܝ ܟܐܦ̈ܐ
27:52	ܘܐܬܦܬܚܘ ܒܝܬ ܩܒܘܪ̈ܐ܂ ܘܣ̈ܓܝܐܐ ܦܓܪ̈ܐ ܕܙܕܝܩܐ ܐܝܠܝܢ ܕܫܟܝܒܝܢ ܩܡܘ
27:53	ܘܢܦܩܘ ܡܢ ܒܝܬ ܩܒܘܪ̈ܐ ܡܢ ܒܬܪ ܩܝܡܬܗ ܐܬܘ ܠܡܕܝܢܬ ܩܘܕܫܐ ܘܐܬܚܙܝܘ ܠܣ̈ܓܝܐܐ܀
27:54	ܩܢܛܪܘܢܐ ܕܝܢ ܘܐܝܠܝܢ ܕܢܛܪܝܢ ܗܘܘ ܥܡܗ ܠܝܫܘܥ ܟܕ ܚܙܘ ܙܘܥܐ ܘܐܝܠܝܢ ܕܗܘܝ ܕܚܠܘ ܛܒ܂ ܘܐܡܪ̈ܝܢ ܫܪܝܪܐܝܬ ܗܢܐ ܒܪܗ ܗܘ ܕܐܠܗܐ܀
27:55	ܘܐܝܬ ܗ̈ܘܝ ܬܡܢ ܢܫ̈ܐ ܣܓܝܐ̈ܬܐ ܘܡܢ ܪܘܚܩܐ ܚܙܝܢ ܗܘܝ ܐܝܠܝܢ ܕܐܬܝܢ ܗܘܝ ܒܬܪ ܝܫܘܥ ܡܢ ܓܠܝܠܐ ܘܡܫܡ̈ܫܢ ܗܘܝ ܠܗ
27:56	ܡܪܝܡ ܡܓܕܠܝܬܐ ܘܡܪܝܡ ܒܪܬ ܝܥܩܘܒ ܘܐܡܗ ܕܝܘܣܦ ܘܐܡܗܘܢ ܕܒ̈ܢܝ ܙܒܕܝ
27:57	ܘܟܕ ܗܘܐ ܪܡܫܐ ܩܪܒ ܓܒܪܐ ܚܕ ܥܬܝܪܐ ܡܢ ܪܡܬܐ ܘܫܡܗ ܝܘܣܦ ܘܐܦ ܗܘ ܬܠܡܝܕܐ ܗܘܐ ܕܝܫܘܥ
27:58	ܗܢܐ ܩܪܒ ܠܦܝܠܛܘܣ ܘܫܐܠ ܦܓܪܗ ܕܝܫܘܥ ܘܦܩܕ ܦܝܠܛܘܣ ܕܢܬܝܗܒ ܠܗ܂
27:59	ܘܟܕ ܫܩܠ ܝܘܣܦ ܦܓܪܐ ܟܪܟܗ ܒܟܬܢܐ ܚܕܬܐ
27:60	ܘܣܡܗ ܒܝܬ ܩܒܘܪܐ ܚܕܬܐ ܕܝܠܗ ܢܩܝܪܐ ܕܢܩܝܪ ܗܘܐ ܠܗ ܒܫܘܥܐ ܘܐܪܡܝ ܟܐܦܐ ܚܕܐ ܪܒܬܐ ܥܠ ܬܪܥܐ ܕܒܝܬ ܩܒܘܪܐ ܘܐܙܠ܀
27:61	ܘܐܝܬ ܗܘܝ ܬܡܢ ܡܪܝܡ ܡܓܕܠܝܬܐ ܘܡܪܝܡ ܐܚܪܬܐ ܝܬܒܢ ܗܘܝ ܠܩܒܠܗ ܕܒܝܬ ܩܒܘܪܐ܂
27:62	ܠܝܘܡܐ ܕܝܢ ܐܚܪܢܐ ܕܒܬܪ ܥܪܘܒܬܐ ܐܬܟܢܫܘ ܪ̈ܒܝ ܟܗ̈ܢܐ ܘܦܪ̈ܝܫܐ ܠܘܬ ܦܝܠܛܘܣ

27:63	ܘܐܡܪܝܢ ܠܗ ܡܪܢ ܐܬܕܟܪܢ ܕܗܘ ܡܛܥܝܢܐ ܐܡܪ ܗܘܐ ܟܕ ܗܘ ܚܝ ܕܒܬܪ ܬܠܬܐ ܝܘܡܝܢ ܩܐܡ ܐܢܐ܂

27:64	ܐܠܐ ܦܩܕ ܡܙܕܗܪܝܢ ܒܩܒܪܐ ܥܕܡܐ ܠܬܠܬܐ ܝܘܡܝܢ܂ ܕܠܐ ܢܐܬܘܢ ܬܠܡܝܕܘܗܝ ܒܠܠܝܐ ܘܢܓܒܘܢܗ ܘܢܐܡܪܘܢ ܠܥܡܐ ܕܩܡ ܠܗ ܡܢ ܒܝܬ ܡܝ̈ܬܐ ܘܬܗܘܐ ܒܝܫܐ ܛܘܥܝܝ ܐܚܪܝܬܐ ܡܢ ܩܕܡܝܬܐ܀
27:65	ܐܡܪ ܠܗܘܢ ܦܝܠܛܘܣ ܐܝܬ ܠܟܘܢ ܩܣܛܘܕܝ ܙܠܘ ܐܙܕܗܪܘ ܒܗ ܒܩܒܪܐ ܐܝܟ ܕܝܕܥܝܢ ܐܢܬܘܢ܂
27:66	ܐܙܠܘ ܐܙܕܗܪܘ ܒܩܒܪܗ ܘܚܬܡܘ ܟܐܦܐ ܗܝ ܥܡ ܩܣܛܘܕܝܐ