The Comprehensive Aramaic Lexicon

07:01	ܘܐܬܟܢܫܘ ܠܘܬܗ ܦܪܝܫܐ ܘܣܦܪ̈ܐ ܕܐܬܘ ܡܢ ܐܘܪܫܠܡ܂

07:02	ܘܚܙܘ ܠܬܠܡܝܕܘܗܝ ܟܕ ܐܟܠܝܢ ܠܚܡܐ܂ ܟܕ ܠܐ ܡܫܓ̈ܢ ܐܝܕܝܗܘܢ܂

07:03	ܡܛܠ ܕܟܘܠܗܘܢ ܝܗܘ̈ܕܝܐ ܘܦܪ̈ܝܫܐ ܐܠܐ ܡܫܝܓܝܢ ܐܝܕܝܗܘܢ ܠܐ ܐܟܠܝܢ ܠܚܡܐ܂ ܕܐܚܝܕܝܢ ܡܫܠܡܢܘܬܐ ܕܩܫܝ̈ܫܐ
07:04	ܘܡܢ ܫܘܩܐ ܐܠܐ ܥܡܕܝܢ ܠܐ ܐܟܠܝܢ ܘܣܓܝ̈ܐܬܐ ܐܝܠܝܢ ܕܩܒܠܘ ܢܛܪ̈ܝܢ ܗܘܘ܂ ܘܡܥܡܘܕܝܬܐ ܕܟܣ̈ܐ ܘܩܣܛܐ܂
07:05	ܘܒܬܪ ܗܠܝܢ ܫܐܠܘܗܝ ܣܦܪ̈ܐ ܘܦܪ̈ܝܫܐ ܘܐܡܪ̈ܝܢ ܠܗ ܕܠܡܢܐ ܬܠܡܝܕܝܟ ܠܐ ܢܛܪ̈ܝܢ ܦܘܩܕܢܐ ܕܣܒ̈ܝܢ ܠܐ ܓܝܪ ܡܫܝܓܝܢ ܐܝܕܝܗܘܢ ܘܐܟܠܝܢ ܠܚܡܐ
07:06	ܐܡܪ ܠܗܘܢ ܝܫܘܥ ܫܦܝܪ ܐܬܢܒܝ ܥܠܝܟܘܢ ܐܫܥܝܐ ܢܒܝܐ ܐܝܟܢܐ ܕܟܬܝܒ ܕܐܡܪ ܗܘܐ ܕܥܡܐ ܗܢܐ ܒܣܦܘ̈ܬܗ ܡܝܩܪ ܠܝ܂ ܒܠܒܗ ܕܝܢ ܪܚܝܩ ܡܢܝ܂
07:07	ܣܪܝܩܐܝܬ ܕܝܢ ܕܚܠܝܢ ܠܝ܂ ܕܡܠܦܝܢ ܝܘܠܦܢܐ ܕܦܘܩ̈ܕܢܐ ܕܒܢܝ ܐܢܫܐ
07:09	ܫܦܝܪ ܥܒܕܝܢ ܐܢܬܘܢ ܕܫܒܩܝܢ ܐܢܬܘܢ ܦܘܩܕܢܐ ܕܐܠܗܐ ܕܬܩܝܡܘܢ ܦܘܩܕܢܝܟܘܢ܂
07:10	ܡܘܫܐ ܓܝܪ ܐܡܪ ܕܝܩܪ ܐܒܘܟ ܘܐܡܟ ܘܡܢ ܕܡܨܚܐ ܠܐܒܘܗܝ ܘܠܐܡܗ ܡܡܬ ܢܡܘܬ
07:11	ܐܢܬܘܢ ܕܝܢ ܐܡܪܝܢ ܐܢܬܘܢ ܕܐܢ ܢܐܡܪ ܠܐܒܘܗܝ ܘܠܐܡܗ ܩܘܪܒܢ ܕܬܬܗܢܐ ܡܢܝ܂
07:12	ܘܠܐ ܫܒܩܝܢ ܐܢܬܘܢ ܠܗ ܕܢܝܩܪ ܠܐܒܘܗܝ ܐܘ ܠܐܡܗ܂
07:13	ܘܡܣܠܝܢ ܐܢܬܘܢ ܡܠܬܐ ܕܐܠܗܐ ܡܛܠ ܦܘܩܕܢܝܟܘܢ܀ ܘܣܓܝܐܬܐ ܐܝܟ ܗܠܝܢ ܥܒܕܝܢ ܐܢܬܘܢ܂
07:14	ܘܩܪܐ ܠܟܘܠܗ ܟܢܫܐ ܘܐܡܪ ܠܗܘܢ ܫܡܥܘ ܟܘܠܟܘܢ ܘܐܬܛܦܝܣܘ܂
07:15	ܠܝܬ ܡܕܡ ܕܠܒܪ ܡܢ ܒܪ ܐܢܫܐ ܘܥܐܠ ܠܗ ܘܡܫܟܚ ܠܡܣܝܒܘܬܗ ܐܠܐ ܡܕܡ ܕܢܦܩ ܡܢ ܒܪ ܐܢܫܐ ܗܘ ܗܘ ܡܣܝܒ ܠܗ ܠܒܪ ܐܢܫܐ܂
07:16	ܡܢ ܕܐܝܬ ܠܗ ܐܕܢܐ ܕܢܫܡܥ ܢܫܡܥ܀
07:17	ܘܟܕ ܥܐܠ ܗܘܐ ܠܒܝܬܐ ܡܢ ܟܢܫܐ܂ ܫܐܠܘܗܝ ܗܘܘ ܬܠܡܝܕܘܗܝ ܥܠ ܡܬܠܐ܂
07:18	ܗܘ ܕܝܢ ܐܡܪ ܠܗܘܢ܂ ܗܟܢܐ ܐܦ ܐܢܬܘܢ ܥܛܠܝܢ ܐܢܬܘܢ ܠܐ ܡܣܬܟܠܝܢ ܐܢܬܘܢ ܡܕܡ ܕܠܐ ܗܘܐ ܟܘܠ ܡܕܡ ܕܥܐܠ ܠܒܪ ܐܢܫܐ ܡܣܝܒ ܠܗ
07:19	ܡܛܠ ܕܠܐ ܗܘܐ ܓܝܪ ܠܠܒܐ ܥܐܠ ܐܠܐ ܠܟܪܣܐ ܘܡܫܬܕܐ ܠܒܪ ܘܡܬܕܟܐ܂ ܟܘܠܗ ܡܐܟܠܐ܂
07:20	ܐܠܐ ܡܕܡ ܕܢܦܩ ܡܢ ܒܪ ܐܢܫܐ ܗܘ ܗܘ ܡܣܝܒ ܠܗ ܠܒܪ ܐܢܫܐ
07:21	ܡܢ ܠܒܐ ܗܘ ܓܝܪ ܢܦܩܢ ܡܚܫܒܬܐ ܒܝܫܬܐ܂ ܕܒܢ̈ܝ ܐܢܫܐ ܓܘܪܐ ܙܢܝܘܬܐ ܩܛܠܐ ܓܢܒܘܬܐ܂
07:22	ܥܘܠܘܒܘܬܐ ܒܝܫܬܐ ܢܟܠܐ ܨܚܢܘܬܐ ܥܝܢܐ ܒܝܫܬܐ ܓܘܕܦܐ ܫܒܗܪܢܘܬܐ ܣܟܠܘܬܐ܂
07:23	ܟܘܠܗܝܢ ܒܝܫܬܐ܂ ܡܢ ܠܓܘ ܢܦܩܢ ܘܡܣܝܒܢ ܠܗ ܠܒܪ ܐܢܫܐ܂
07:24	ܘܩܡ ܘܐܙܠ ܠܗ ܠܬܚܘܡܐ ܕܨܘܪ ܘܟܕ ܥܠ ܠܒܝܬܐ܂ ܠܐ ܨܒܐ ܗܘܐ ܕܐܢܫ ܢܕܥ ܒܗ ܘܠܐ ܡܫܟܚ ܗܘܐ ܠܡܬܛܫܝܘ܂
07:25	ܘܟܕ ܫܡܥܬ ܐܢܬܬܐ ܕܐܝܬ ܗܘܬ ܠܒܪܬܗ ܪܘܚܐ ܛܢܦܬܐ ܐܬܬ ܢܦܠܬ ܩܕܡܘܗܝ܂
07:26	ܗܝ ܐܢܬܬܐ ܐܪܡܠܬܐ ܗܘܬ ܡܢ ܬܚܘܡܐ ܕܨܘܪ ܕܦܝܢܝܩܐ ܘܒܥܝܐ ܗܘܬ ܡܢܗ ܕܢܦܩ ܪܘܚܐ ܡܢ ܒܪܬܗ
07:27	ܐܡܪ ܠܗ ܝܫܘܥ ܫܒܘܩܝ ܠܘܩܕܡ ܢܣܒܥܘܢ ܒܢܝܐ ܠܐ ܫܦܝܪ ܠܡܣܒ ܠܚܡܐ ܕܒܢܝܐ ܘܠܡܪܡܝܘ ܠܟܠܒܐ
07:28	ܐܡܪܐ ܠܗ ܗܝ ܐܢܬܬܐ ܡܪܝ ܐܦ ܟܠܒ̈ܐ ܐܟܠܝܢ ܡܢ ܦܪ̈ܬܘܬܐ ܕܢܬܪ̈ܝܢ ܡܢ ܦܬܘܪ̈ܐ ܕܒܢܝ̈ܐ܂
07:29	ܐܡܪ ܠܗ ܡܛܠ ܗܕܐ ܡܠܬܐ ܐܙܠܝ ܗܐ ܢܦܩ ܫܐܕܐ ܡܢ ܒܪܬܟܝ܂
07:30	ܘܟܕ ܐܙܠܬ ܠܒܝܬܗ ܐܫܟܚܬܗ܂ ܠܒܪܬܗ ܘܢܦܝܩ ܡܢܗ ܫܐܕܐ ܘܪܡܝܐ ܒܥܪܣܐ
07:31	ܘܬܘܒ ܟܕ ܢܦܩ ܡܢ ܬܚܘܡܐ ܕܨܘܪ ܘܨܝܕܘܢ ܐܬܐ ܠܝܡܬܐ ܕܓܠܝܠܐ ܒܝܢܬ ܬܚܘܡܐ ܕܥܣܪ̈ܬ ܡܕܝܢ̈ܬܐ
07:32	ܘܐܝܬܝܘ ܠܗ ܚܪܫܐ ܚܕ ܦܐܩܐ ܘܒܥܝܢ ܗܘܘ ܡܢܗ ܕܢܣܝܡ ܥܠܘܗܝ ܐܝܕܗ
07:33	ܘܢܓܕܗ ܡܢ ܟܢܫܐ ܘܣܡ ܨܒܥܬܗ ܘܪܩ ܒܐܕܢܘܗܝ ܘܩܪܒ ܠܠܫܢܗ
07:34	ܘܚܪ ܒܫܡܝܐ ܘܐܬܬܢܚ ܘܐܡܪ ܠܗ ܐܬܦܬܚ
07:35	ܘܒܗ ܒܫܥܬܐ ܐܬܦܬܚ ܐܕܢܘܗܝ ܘܐܫܬܪܝ ܐܣܘܪܐ ܕܠܫܢܗ ܘܡܠܠ ܗܘܐ ܦܫܝܩܐܝܬ܂
07:36	ܘܦܩܕ ܐܢܘܢ ܕܠܐܢܫ ܠܐ ܢܐܡܪܘܢ܂ ܘܟܡܐ ܕܗܘ ܡܦܩܕ ܗܘܐ ܠܗܘܢ ܗܢܘܢ ܝܬܝܪܐܝܬ ܡܟܪܙܝܢ ܗܘܘ ܠܗ
07:37	ܘܡܢ ܝܬܝܪ ܡܬܕܡܪ̈ܝܢ ܗܘܘ ܘܐܡܪ̈܂ܝܢ ܕܟܠܡܕܡ ܫܦܝܪ ܥܒܕ ܘܠܚܪ̈ܫܐ ܥܒܕ ܕܢܫܡܥܘܢ ܘܢܡܠܠܘܢ