The Comprehensive Aramaic Lexicon

08:01	ܘܒܗܘܢ ܕܝܢ ܒܝܘܡܬܐ ܗܢܘܢ ܬܘܒ ܟܕ ܟܢܫܐ ܣܓܝܐܐ ܐܝܬ ܗܘܐ ܘܠܐ ܐܝܬ ܗܘܐ ܠܗܘܢ ܡܐ ܕܢܐܟܠܘܢ ܩܪܐ ܠܬܠܡܝܕܘܗܝ ܘܐܡܪ ܠܗܘܢ
08:02	ܡܬܪܚܡ ܐܢܐ ܥܠ ܟܢܫܐ ܗܢܐ ܕܗܐ ܬܠܬܐ ܝܘܡܝܢ ܩܘܝ ܠܘܬܝ ܘܠܝܬ ܡܐ ܢܐܟܠܘܢ
08:03	ܘܐܢ ܗܘ ܕܫܪܢܐ ܠܗܘܢ ܟܕ ܨܝܡܝܢ ܠܒܬܝܗܘܢ ܥܝܦܝܢ ܢܗܘܘܢ ܒܐܘܪܚܐ ܘܐܢܫܐ ܡܢܗܘܢ ܡܢ ܪܘܚܩ ܐܬܘ
08:04	ܐܡܪܝܢ ܠܗ ܬܠܡܝܕܘܗܝ ܐܝܡܟܐ ܡܫܟܚ ܐܢܬ ܗܪܟܐ ܕܬܣܒܥ ܐܢܘܢ ܠܚܡܐ ܒܚܘܪܒܐ
08:05	ܘܫܐܠ ܐܢܘܢ ܘܐܡܪ ܠܗܘܢ ܟܡܐ ܠܚܡ̈ܝܢ ܐܝܬ ܠܟܘܢ ܐܡܪ̈ܝܢ ܠܗ ܫܘܒܥܐ
08:06	ܘܦܩܕ ܠܟܢܫܐ ܕܢܣܬܡܟܘܢ ܥܠ ܐܪܥܐ ܘܢܣܒ ܗܢܘܢ ܫܘܒܥܐ ܠܚܡ̈ܝܢ ܘܒܪܟ ܘܩܨܐ ܘܝܗܒ ܠܬܠܡ̈ܝܕܘܗܝ ܕܢܣܝܡܘܢ ܩܕܡܝܗܘܢ ܘܣܡܘ ܩܕܡ ܟܢܫܐ
08:07	ܘܐܝܬ ܗܘܘ ܢܘܢܐ ܩܠܝܠ ܘܐܦ ܥܠܝܗܘܢ ܟܕ ܒܪܟ ܐܡܪ ܕܢܣܝܡܘܢ ܩܕܡܝܗܘܢ
08:08	ܘܐܟܠܘ ܘܣܒܥܘ ܘܫܩܠܘ ܝܘܬܪܢܐ ܕܩܨܝܐ ܫܒܥܐ ܣܦܪܝܕܝܢ
08:09	ܗܘܝܢ ܗܘܘ ܐܢܫܐ ܕܐܟܠܘ ܐܝܟ ܐܪܒܥܐ ܐܠܦܝܢ܂
08:10	ܘܫܪܐ ܐܢܘܢ܂ ܘܣܠܩ ܝܬܒ ܠܗ ܒܣܦܝܢܬܐ ܥܡ ܬܠܡܝ̈ܕܘܗܝ ܘܐܬܘ ܠܗܘܢ ܠܛܘܪܐ ܕܡܓܕܢ܂
08:11	ܘܢܦܩܘ ܦܪ̈ܝܫܐ ܘܫܪ̈ܝܘ ܒܥܝܢ ܡܢܗ ܘܫܐܠܝܢ ܠܗ ܐܬܐ ܡܢ ܫܡܝܐ ܟܕ ܡܢܣܝܢ ܠܗ
08:12	ܐܬܥܙܙ ܒܪܘܚܗ ܘܐܡܪ ܡܢܐ ܒܥܝܐ ܐܬܐ ܫܪܒܬܐ ܗܕܐ܂ ܐܡܝܢ ܐܡܪܢܐ ܠܟܘܢ ܕܠܐ ܬܬܝܗܒ ܠܗ ܐܬܐ ܠܫܪܒܬܐ ܗܕܐ܂
08:13	ܘܫܒܩ ܐܢܘܢ ܬܘܒ ܘܝܬܒ ܒܣܦܝܢܬܐ܂ ܘܐܙܠ ܠܗܘ ܥܒܪܐ ܕܝܡܬܐ܂
08:14	ܘܛܥܘ ܕܢܣܒܘܢ ܥܡܗܘܢ ܠܚܡܐ ܚܕܐ ܓܝܪ ܓܪܝܨܬܐ ܠܝܬ ܗܘܬ ܥܡܗܘܢ ܒܣܦܝܢܬܐ
08:15	ܘܦܩܕ ܐܢܘܢ ܘܐܡܪ ܠܗܘܢ ܐܙܕܗܪܘ ܡܢ ܚܡܝܪܐ ܕܦܪܝܫܐ ܘܡܢ ܚܡܝܪܗ ܕܗܪܘܕܣ
08:16	ܘܡܬܚܫܒܝܢ ܗܘܘ ܚܕ ܥܡ ܚܕ ܘܐܡܪܝܢ ܕܠܝܬ ܠܚܡܐ
08:17	ܝܫܘܥ ܕܝܢ ܝܕܥ ܘܐܡܪ ܠܗܘܢ ܡܢܐ ܡܬܚܫܒܝܢ ܐܢܬܘܢ ܕܠܚܡܐ ܠܝܬ ܠܟܘܢ ܠܐ ܥܕܡܐ ܠܗܫܐ ܝܕܥܝܢ ܐܢܬܘܢ ܘܠܐ ܡܣܬܟܠܝܢ ܐܢܬܘܢ ܥܕܡܐ ܠܗܫܐ ܡܥܘܪ ܠܒܟܘܢ
08:18	ܘܥܝܢܐ ܐܝܬ ܠܟܘܢ ܘܠܐ ܚܙܝܢ ܐܢܬܘܢ ܘܐܕܢܐ ܐܝܬ ܠܟܘܢ ܘܠܐ ܫܡܥܝܢ ܐܢܬܘܢ ܘܠܐ ܥܗܕܝܢ ܐܢܬܘܢ
08:19	ܗܢܘܢ ܚܡܫܐ ܠܚܡܝܢ ܕܚܡܫܐ ܐܠܦܝܢ ܐܟܠܘ ܡܢܗܘܢ ܘܟܡܐ ܩܘܦܝܢܝܢ ܕܩܨܝܐ ܟܕ ܡܠܝܢ ܫܩܠܬܘܢ ܐܡܪܝܢ ܠܗ ܬܪܥܣܪ
08:20	ܐܡܪ ܠܗܘܢ ܘܟܕ ܫܒܥܐ ܠܐܪܒܥܐ ܐܠܦܝܢ ܟܡܐ ܐܣܦܪܝܕܝܢ ܕܩܨܝܐ ܫܩܠܬܘܢ ܐܡܪܝܢ ܠܗ ܫܒܥܐ
08:21	ܐܡܪ ܠܗܘܢ ܠܐ ܥܕܡܐ ܠܗܫܐ ܡܣܬܟܠܝܢ ܐܢܬܘܢ
08:22	ܘܐܬܐ ܠܒܝܬ ܨܝܕܐ ܘܐܝܬܝܘ ܠܗ ܣܡܝܐ ܘܒܥܝܢ ܗܘܘ ܡܢܗ ܕܢܩܪܘܒ ܠܗ
08:23	ܘܐܚܕܗ ܒܐܝܕܗ ܕܣܡܝܐ ܘܐܦܩܗ ܠܒܪ ܡܢ ܩܪܝܬܐ ܘܪܩ ܒܥܝܢܘܗܝ ܘܣܡ ܐܝܕܗ ܘܫܐܠܗ ܘܐܡܪ ܠܗ ܡܢܐ ܐܢܬ ܬܚܙܐ
08:24	ܘܐܡܪ ܚܙܝܬ ܠܒܢܝ ܐܢܫܐ ܐܝܟ ܐܝܠܢܐ ܕܡܗܠܟܝܢ
08:25	ܘܬܘܒ ܣܡ ܐܝܕܗ ܥܠ ܥܝܢܘܗܝ ܕܣܡܝܐ ܘܬܩܢ ܘܚܙܐ ܗܘܐ ܟܠ ܡܕܡ ܢܗܝܪܐܝܬ
08:26	ܘܫܕܪܗ ܠܒܝܬܗ ܘܐܡܪ ܠܗ ܕܐܦܠܐ ܠܩܪܝܬܐ ܬܥܘܠ܀
08:27	ܘܢܦܩ ܝܫܘܥ ܘܬܠܡ̈ܝܕܘܗܝ ܠܩܘܪ̈ܝܐ ܕܩܣܪܝܐ ܕܦܝܠܝܦܘܣ ܘܡܫܐܠ ܗܘܐ ܠܗܘܢ ܠܬܠܡܝܕܘܗܝ ܒܐܘܪܚܐ ܘܐܡܪ ܠܗܘܢ ܕܡܢܐ ܐܡܪ̈ܝܢ ܐܢܫܐ ܥܠܝ ܕܐܝܬܝ܂
08:28	ܐܡܪ̈ܝܢ ܠܗ ܐܝܬ ܕܐܡܪ̈ܝܢ ܕܝܘܚܢܢ ܗܘ ܡܥܡܕܢܐ܂ ܘܐܚܪ̈ܢܐ ܐܡܪ̈ܝܢ ܕܐܠܝܐ܂ ܘܐܚܪ̈ܢܐ ܕܚܕ ܡܢ ܢܒ̈ܝܐ܂
08:29	ܐܡܪ ܠܗܘܢ ܘܐܢܬܘܢ ܡܢܐ ܐܡܪܝܢ ܐܢܬܘܢ ܕܐܝܬܝ܂ ܐܡܪ ܠܗ ܟܐܦܐ ܐܢܬ ܗܘ ܡܫܝܚܐ
08:30	ܘܟܐܐ ܒܗܘܢ ܕܠܐܢܫ ܠܐ ܢܐܡܪܘܢ ܥܠܘܗܝ܂
08:31	ܘܫܪܝ ܗܘܐ ܠܡܠܦܘ ܐܢܘܢ ܕܥܬܝܕ ܗܘ ܒܪܗ ܕܐܢܫܐ ܕܢܚܫ ܣܓܝ܂ ܘܕܢܣܬܠܐ ܡܢ ܩܫ̈ܝܫܐ ܘܡܢ ܪ̈ܒܝ ܟܗܢܐ ܘܡܢ ܣܦܪ̈ܐ ܘܢܩܛܠܘܢܗ ܘܠܝܘܡܐ ܕ̈ܬܠܬܐ ܢܩܘܡ
08:32	ܘܥܝܢܒܓܠܐ ܡܠܬܐ ܢܡܠܠ ܫܡܥܘܢ ܕܝܢ ܟܐܦܐ ܐܝܟ ܕܚܐܣ ܥܠܘܗܝ ܐܡܪ ܠܗ ܕܚܣ ܠܟ܂
08:33	ܘܟܕ ܐܬܗܦܟ ܚܪ ܒܬܠܡ̈ܝܕܘܗܝ܂ ܘܟܐܐ ܒܟܐܦܐ ܘܐܡܪ ܙܠ ܠܒܣܬܪܝ ܣܛܢܐ ܕܠܐ ܪܢܐ ܐܢܬ ܕܐܠܗܐ܂ ܐܠܐ ܕܒ̈ܢܝ ܐܢܫܐ܀
08:34	ܘܩܪܐ ܠܟܢܫܐ ܥܡ ܬܠܡ̈ܝܕܘܗܝ ܘܐܡܪ ܠܗܘܢ ܡܢ ܕܨܒܐ ܕܢܐܬܐ ܒܬܪܝ ܢܟܦܘܪ ܒܢܦܫܗ ܘܢܫܩܘܠ ܙܩܝܦܗ ܘܢܐܬܐ܂
08:35	ܟܘܠ ܓܝܪ ܕܨܒܐ ܕܢܚܐ ܢܦܫܗ ܢܘܒܕܝܗ܂ ܘܟܠ ܕܢܘܒܕ ܢܦܫܗ ܡܛܠ ܣܒܪܬܝ ܢܚܝܗ

08:36	ܡܢܐ ܓܝܪ ܢܬܗܢܐ ܒܪ ܐܢܫܐ ܐܢ ܗܘ ܕܥܠܡܐ ܟܘܠܗ ܢܐܪܬ ܘܢܦܫܗ ܢܚܣܪ܂

08:37	ܘܡܢܐ ܢܬܠ ܒܪ ܐܢܫܐ ܬܘܚܠܘܦܐ ܕܢܦܫܗ
08:38	ܟܠ ܕܢܒܗܬ ܒܝ ܓܝܪ ܘܒܡ̈ܠܝ ܒܒ̈ܢܝ ܫܪܒܬܐ ܗܕܐ ܓܝܪܬܐ ܘܚܛܝܬܐ܂ ܐܦ ܒܪܗ ܕܓܒܪܐ ܢܒܗܬ ܒܗ ܡܐ ܕܐܬܐ ܒܫܘܒܚܗ ܕܐܒܘܗܝ ܘܡܠ̈ܐܟܐ ܩܕܝ̈ܫܐ