The Comprehensive Aramaic Lexicon


03:01	ܒܫܢܬ ܚܡ̈ܫܥܣܪܐ ܕܝܢ܂ ܒܡܕܒܪܢܘܬܐ ܕܛܒܪܝܢܘܣ ܩܣܪ܂ ܒܗܓܡܘܢܘܬܐ ܕܦܢܛܘܣ ܦܝܠܛܘܣ ܒܝܗܘܕ܂ ܟܕ ܪܫܐ ܐܪܒܝܥܝܐ ܗܪܘܕܣ ܒܓܠܝܠܐ܂ ܘܦܝܠܝܦܘܣ ܐܚܘܗܝ ܪܫܐ ܪܒܝܥܝܐ ܒܐܬܪܐ ܕܐܝܛܘܪܝܐ܂ ܘܒܟܘܪ ܕܛܪܟܘܢܐ܂ ܘܠܘܣܢܝܐ ܪܫܐ ܪܒܝܥܝܐ ܒܐܬܪܐ ܕܗܒ̈ܠܢܝܐ܂

03:02	ܒܪܒܘܬ ܟܗܢܘܬܐ ܕܚܢܢ ܘܕܩܝܦܐ܂ ܗܘܬ ܡܠܬܐ ܕܐܠܗܐ ܥܠ ܝܘܚܢܢ ܒܪ ܙܟܪܝܐ܂
03:03	ܘܡܟܪܙ ܗܘܐ ܒܡܕܒܪܐ ܘܒܟܠܗ ܐܬܪܐ ܕ̈ܚܕܪܝ ܝܘܪܕܢܢ܂ ܡܥܡܘܕܝܬܐ ܕܬܝܒܘܬܐ ܠܫܘܒܩܢܐ ܕܚ̈ܛܗܐ܂
03:04	ܐܝܟܢܐ ܕܟܬܝܒ ܒܢܒܝܘܬܗ ܕܐܫܥܝܐ ܢܒܝܐ܂ ܩܠܐ ܕܩܪܐ ܒܡܕܒܪܐ܂ ܦܢܘ ܐܘܪܚܐ ܠܡܪܝܐ܂ ܘܬܪܘܨ ܒܦܩܥܬܐ ܫ̈ܒܝܠܐ ܠܐܠܗܢ܂
03:05	ܟܠܗܘܢ ܢܚ̈ܠܐ ܢܬܡܠܘܢ܂ ܘܟܠܗܘܢ ܛܘܪ̈ܐ ܘܪ̈ܡܬܐ ܢܬܡܟܟܘܢ܂ ܘܢܗܘܐ ܥܪܡܐ ܠܫܦܝܐ܂ ܘܐܬܪܐ ܥܣܩܐ ܠܦܩܥܬܐ܂
03:06	ܘܢܬܓܠܐ ܐܝܩܪܗ ܕܡܪܝܐ܂ ܘܢܚܙܘܢܗ ܐܟܚܕܐ ܟܘܠ ܒܣܪ܂ ܡܛܠ ܕܦܘܡܗ ܕܡܪܝܐ ܡܠܠ܀
03:07	ܘܐܡܪ ܗܘܐ ܠܟܢ̈ܫܐ ܐܝܠܝܢ ܕܐܬܝܢ ܗܘܘ ܠܘܬܗ܂ ܝܠܕܐ ܕܐ̈ܟܕܢܐ ܡܢܘ ܚܘܝܟܘܢ ܠܡܥܪܩ ܡܢ ܪܘܓܙܐ ܕܐܬܐ܂
03:08	ܥܒܕܘ ܗܟܝܠ ܦܐܪ̈ܐ ܕܫܘܝܢ ܠܬܝܒܘܬܐ܂ ܘܠܐ ܬܫܪܘܢ ܠܡܐܡܪ ܕܐܒܐ ܐܝܬ ܠܢ ܐܒܪܗܡ܂ ܐܡܪܢܐ ܠܟܘܢ ܓܝܪ ܕܡܫܟܚ ܐܠܗܐ ܕܡܢ ܗܠܝܢ ܟܐ̈ܦܐ ܠܡܩܡܘ ܒ̈ܢܝܐ ܠܐܒܪܗܡ܂
03:09	ܘܗܐ ܡܛܝ ܠܗ ܢܪܓܐ ܠܘܬ ܥܩܪܗܘܢ ܕܐ̈ܝܠܢܐ܂ ܟܘܠ ܐܝܠܢܐ ܕܝܢ ܕܦܐ̈ܪܐ ܛܒ̈ܐ ܠܐ ܥܒܕ ܡܬܦܣܩ ܘܒܢܘܪܐ ܢܦܠ܀
03:10	ܘܡܫܐܠܝܢ ܗܘܘ ܠܗ ܟܢ̈ܫܐ܂ ܡܢܐ ܢܥܒܕ ܘܢܚܐ܂
03:11	ܐܡܪ ܠܗܘܢ ܡܢ ܕܐܝܬ ܠܗ ܬܪ̈ܬܝܢ ܟܘ̈ܬܝܢܝܢ ܢܬܠ ܚܕܐ ܡܢܗܝܢ ܠܡܢ ܕܠܝܬ ܠܗ܂ ܘܡܢ ܕܐܝܬ ܠܗ ܣܝܒܪܬܐ ܗܟܢܐ ܢܥܒܕ܂
03:12	ܘܐܬܘ ܐܦ ܡ̈ܟܣܐ ܠܡܥܡܕ܂ ܐܡܪܝܢ ܠܗ ܡܢܐ ܢܥܒܕ܂
03:13	ܐܡܪ ܠܗܘܢ ܠܐ ܬܓܒܘܢ ܡܕܡ ܝܬܝܪ ܥܠ ܡܕܡ ܕܦܣܝܩ ܠܟܘܢ܂
03:14	ܘܫܐܠܘܗܝ ܗܘܘ ܐܦ ܐ̈ܣܛܪܛܝܘܛܐ ܘܐܡܪܝܢ ܠܗ܂ ܡܢܐ ܢܥܒܕ ܐܦ ܐܢܚܢܢ܂ ܐܡܪ ܠܗܘܢ ܠܐܢܫ ܠܐ ܬܥܫܩܘܢ܂ ܘܒܐܢܫ ܠܐ ܬܬܛܓܪܘܢ܂ ܣܦܩܢ ܠܟܘܢ ܐܦ̈ܣܘܢܝܬܟܘܢ܂
03:15	ܘܐܢܫܐ ܕܫܡܥܝܢ ܗܘܘ ܠܗ ܡܬܪܥܝܢ ܗܘܘ ܒܢܦܫܗܘܢ ܘܐܡܪܝܢ ܠܡܐ ܟܝ ܗܘܝܘ ܡܫܝܚܐ܂
03:16	ܐܡܪ ܠܗܘܢ ܐܢܐ ܗܐ ܡܥܡܕܢܐ ܠܟܘܢ ܒ̈ܡܝܐ