The Comprehensive Aramaic Lexicon

08:01	ܘܡܢ ܒܬܪ ܗܠܝܢ܂ ܡܬܟܪܟ ܗܘܐ ܒܩ̈ܘܪܝܐ ܘܒ̈ܡܕܝܢܬܐ܂ ܘܡܣܒܪ ܡܠܟܘܬܗ ܕܐܠܗܐ܂ ܐܦ ܬܪ̈ܥܣܪܬܗ ܥܡܗ܂
08:02	ܘܢܫ̈ܐ ܗܠܝܢ ܕܐܬܐܣܝ ܗܘܝ ܡܢ ܪ̈ܘܚܐ ܒܝܫ̈ܬܐ܂ ܘܡܢ ܟܘ̈ܪܗܢܐ܂ ܡܪܝܡ ܕܡܬܩܪܝܐ ܡܓܕܠܝܬܐ܂ ܗܝ ܕܫܒܥܐ ܫܐ̈ܕܝܢ ܐܦܩ ܗܘܐ ܡܢܗ݀܂
08:03	ܘܝܘܚܢ ܐܢܬܬ ܟܘܙܐ ܐܦܛܪܘܦܗ ܕܗܪܘܕܣ܂ ܘܫܘܫܢ܂ ܘܐ̈ܚܪܢܝܬܐ ܣܓ̈ܝܐܬܐ ܕܡܫܡܫܢ ܗܘܝ ܠܗܘܢ ܡܢ ܡܕܡ ܕܐܝܬ ܗܘܐ ܠܗܝܢ܀
08:04	ܘܟܕ ܐܬܟܢܫ ܟܢܫܐ ܣܓܝܐܐ܂ ܘܐܝܠܝܢ ܕܡܢ ܡܕܝ̈ܢܬܐ ܐܬܝܢ ܗܘܘ ܠܘܬܗ܂ ܐܡܪ ܠܗܘܢ ܒܡ̈ܬܠܐ܂
08:05	ܗܐ ܢܦܩ ܙܪܘܥܐ ܠܡܙܪܥ܂ ܘܟܕ ܙܪܥ܂ ܐܝܬ ܕܢܦܠ ܥܠ ܝܕ ܐܘܪܚܐ ܘܐܬܕܝܫ܂ ܘܐܟܠܬܗ ܦܪܚܬܐ܂
08:06	ܘܐܚܪܢܐ ܢܦܠ ܥܠ ܫܘܥܐ܂ ܘܡܛܠ ܕܠܝܬ ܗܘܬ ܠܗ ܛܠܬܐ ܒܨ ܘܝܒܫ܂
08:07	ܐܚܪܢܐ ܢܦܠ ܒܝܬ ܟܘܒ̈ܐ܂ ܘܝܥܘ ܥܡܗ ܘܚܢܩܘܗܝ܂
08:08	ܘܚܪܢܐ ܢܦܠ ܒܐܪܥܐ ܛܒܬܐ ܘܝܗܒܬ ܦܐܪ̈ܐ܂ ܘܝܥܐ ܘܝܗܒ ܦܐܪ̈ܐ܂ ܚܕ ܒܡܐܐ܂ ܘܟܕ ܐܡܪ ܗܠܝܢ܂ ܒܩܠܐ ܪܡܐ ܐܡܪ ܗܘܐ܂ ܕܡܢ ܕܐܝܬ ܠܗ ܐܕ̈ܢܐ ܕܢܫܡܥ ܢܫܡܥ܀
08:09	ܘܫܐܠܘܗܝ ܗܘܘ ܬܠܡ̈ܝܕܘܗܝ܂ ܡܢܘ ܡܬܠܐ ܗܢܐ܂
08:10	ܐܡܪ ܠܗܘܢ܂ ܠܟܘܢ ܗܘ ܝܗܝܒ ܠܡܕܥ ܐܪܙܐ ܕܡܠܟܘܬܗ ܕܐܠܗܐ܂ ܠܗܢܘܢ ܕܝܢ ܒܪ̈ܝܐ ܠܐ ܝܗܝܒ ܠܗܘܢ ܠܡܕܥ܂ ܡܛܠ ܗܢܐ ܒ̈ܦܠܐܬܐ ܡܬܐܡܪ ܠܗܘܢ܂ ܕܟܕ ܚܙܝܢ ܠܐ ܢܚܙܘܢ܂ ܘܟܕ ܫܡܥܝܢ ܠܐ ܢܣܬܟܠܘܢ܂
08:11	ܗܢܐ ܕܝܢ ܡܬܠܐ ܐܝܬܘܗܝ܂ ܙܪܥܐ ܡܠܬܗ ܗܝ ܕܐܠܗܐ܂
08:12	ܘܗܢܘܢ ܕܥܠ ܝܕ ܐܘܪܚܐ܂ ܗܠܝܢ ܐܢܘܢ ܕܫܡܥܝܢ ܡܠܬܐ ܕܐܠܗܐ܂ ܘܐܬܐ ܒܥܠܕܒܒܐ ܫܩܠ ܠܗ݀ ܡܠܬܐ ܡܢ ܠܒܗܘܢ܂ ܕܠܐ ܢܗܝܡܢܘܢ ܘܢܚܘܢ܂
08:13	ܘܗܘ ܕܥܠ ܫܘܥܐ܂ ܗܠܘܟ ܐܢܘܢ ܕܡܐ ܕܫܡܥܘ ܡܠܬܐ܂ ܥܓܠ ܒܚܕܘܬܐ ܡܩܒܠܝܢ ܠܗ݀܂ ܘܥܩܪܐ ܠܝܬ ܠܗܘܢ ܒܗ݀܂ ܘܒܙܒܢ ܡܗܝܡܢܝܢ܂ ܘܒܙܒܢ ܢܣܝܘܢܐ ܡܬܟܫܠܝܢ܂
08:14	ܘܗܘ ܕܢܦܠ ܒܝܬ ܟܘܒ̈ܐ܂ ܗܠܝܢ ܐܢܘܢ ܐܝܠܝܢ ܕܫܡܥܝܢ ܡܠܬܐ܂ ܘܒܨܦܬܐ ܐܢܘܢ܂ ܘܒܥܘܬܪܐ ܕܥܠܡܐ܂ ܘܒܒܣܝܡܘܬܐ ܕܥܘܡܪܐ ܡܬܚܫܚܝܢ܂ ܘܡܬܚܢܩܝܢ ܘܦܐ̈ܪܐ ܠܐ ܝܗܒܝܢ܂
08:15	ܘܗܘ ܕܢܦܠ ܒܐܪܥܐ ܛܒܬܐ܂ ܗܢܘܢ ܐܢܘܢ ܕܒܠܒܐ ܫܦܝܐ ܘܛܒܐ ܫܡܥܘ ܡܠܬܐ܂ ܘܐܚܕܘ܂ ܘܝܗܒܝܢ ܦܐܪ̈ܐ ܒܡܣܝܒܪܢܘܬܐ܀
08:16	ܡܬܠܐ ܐܚܪܢܐ ܐܡܪ ܗܘܐ܂ ܠܐ ܐܢܫ ܡܢܗܪ ܫܪܓܐ ܘܡܚܦܐ ܠܗ ܒܡܐܢܐ܂ ܐܘ ܣܐܡ ܠܗ ܬܚܝܬ ܥܪܣܐ܂ ܐܘ ܒܐܬܪܐ ܡܛܫܝܐ܂ ܐܠܐ ܣܐܡ ܠܗ ܠܥܠ ܡܢ ܡܢܪܬܐ܂ ܕܟܠ ܐܢܫ ܕܥܐܠ ܢܚܙܐ ܢܘܗܪܗ܂
08:17	ܠܝܬ ܓܝܪ ܡܕܡ ܕܟܣܐ ܕܠܐ ܢܬܓܠܐ܂ ܘܐܦܠܐ ܕܡܛܫܝ ܕܠܐ ܢܬܝܕܥ ܘܢܐܬܐ ܠܓܠܝܐ܂
08:18	ܚܙܘ ܡܢܐ ܫܡܥܬܘܢ܂ ܡܢ ܕܐܝܬ ܠܗ ܓܝܪ ܢܬܝܗܒ ܠܗ ܘܢܬܘܣܦ ܠܗ܂ ܘܗܘ ܕܠܝܬ ܠܗ܂ ܐܦ ܗܘ ܡܕܡ ܕܣܒܪ ܗܘܐ ܕܐܝܬ ܠܗ ܢܫܬܩܠ ܠܗ ܡܢܗ܀
08:19	ܘܐܬܘ ܗܘܘ ܠܘܬܗ ܕܝܫܘܥ ܐܡܗ ܘܐ̈ܚܘܗܝ܂ ܘܩܝܡܝܢ ܗܘܘ ܠܒܪ܂ ܘܠܐ ܡܫܟܚܝܢ ܗܘܘ ܕܢܚܙܘܢܗ܂ ܡܛܠ ܟܢܫܐ ܕܐܢܫܐ܂
08:20	ܘܐܡܪܘ ܠܗ ܐܡܟ ܘܐܚ̈ܝܟ ܩܝܡܝܢ ܠܒܪ܂ ܘܨܒܝܢ ܠܡܚܙܝܟ܂
08:21	ܗܘ ܕܝܢ ܥܢܐ ܘܐܡܪ ܠܗܘܢ܂ ܗܠܝܢ ܐܢܘܢ ܐܡܝ ܘܐ̈ܚܝ܂ ܐܝܠܝܢ ܕܫܡܥܝܢ ܕܐܠܗܐ ܘܥܒܕܝܢ ܠܗ݀܀
08:22	ܘܗܘܐ ܗܘܐ ܒܚܕ ܡܢ ܝܘܡ̈ܬܐ ܗܢܘܢ܂ ܣܠܩ ܝܫܘܥ ܝܬܒ ܒܣܦܝܢܬܐ܂ ܗܘ ܘܬܠܡ̈ܝܕܘܗܝ ܥܡܗ܂ ܘܐܡܪ ܠܗܘܢ ܢܥܒܪ ܠܢ ܠܗ݀ܘ ܥܒܪܐ ܕܝܡܬܐ܂

08:23	ܘܟܕ ܪܕܝܢ ܗܘܘ ܒܝܡܐ ܕܡܟ ܠܗ܂ ܘܗܘܬ ܥܠܥܠܐ ܕܪܘܚܐ ܒܝܡܬܐ܂ ܘܐܬܡܠܝܬ ܣܦܝܢܬܗܘܢ ܡܢ ܓ̈ܠܠܐ܂ ܘܩܪܝܒܐ ܗܘܬ ܠܡܛܒܥ܂

08:24	ܘܩܪܒܘ ܐܥܝܪܘܗܝ ܘܐܡܪܝܢ ܠܗ ܡܪܢ ܐܒܕܝܢ ܐܢܚܢܢ܂ ܘܩܡ ܘܟܐܐ ܒܪܘܚܐ ܘܒܡܚܫܘܠܐ ܕܡ̈ܝܐ܂ ܘܗܘܐ ܫܠܝܐ܂
08:25	ܘܐܡܪ ܠܗܘܢ ܐܝܟܐ ܗܝ ܗܝܡܢܘܬܟܘܢ܂ ܗܢܘܢ ܕܝܢ ܟܕ ܕܚܝܠܝܢ܂ ܡܬܕܡܪܝܢ ܗܘܘ ܘܐܡܪܝܢ ܚܕ ܠܚܕ܂ ܡܢܘ ܟܝ ܗܢܐ ܕܐܦ ܠܪܘ̈ܚܐ ܘܠܝܡܐ ܦܩܕ ܘܡܫܬܡܥܝܢ ܠܗ܀
08:26	ܘܪܕܘ ܗܘܘ ܠܐܬܪܐ ܕܓܕ̈ܪܝܐ܂ ܗܘ ܕܐܝܬܘܗܝ ܠܘܩܒܠ ܥܒܪܐ ܕܓܠܝܠܐ܂
08:27	ܟܕ ܢܦܩ ܕܝܢ ܠܐܪܥܐ܂ ܦܓܥ ܒܗ ܓܒܪܐ ܚܕ ܕܐܝܬ ܗܘܐ ܥܠܘܗܝ ܫܐܕܐ ܡܢ ܙܒܢܐ ܣܓܝܐܐ܂ ܘ̈ܢܚܬܐ ܠܐ ܠܒܫ ܗܘܐ܂ ܘܒܒܝܬܐ ܠܐ ܥܡܪ ܗܘܐ܂ ܐܠܐ ܒܝܬ ܩܒܘܪܐ܂ ܘܟܘܠ ܡܩܥܐ ܩܥܐ ܗܘܐ܂ ܘܡܡܚܐ ܗܘܐ ܢܦܫܗ ܒܟܐ̈ܦܐ܂
08:28	ܘܟܕ ܚܙܐ ܠܝܫܘܥ܂ ܩܥܐ ܘܢܦܠ ܣܓܕ ܠܗ܂ ܘܒܩܠܐ ܪܡܐ ܐܡܪ܂ ܡܐ ܠܝ ܘܠܟ ܝܫܘܥ ܒܪܗ ܕܐܠܗܐ ܪܡܐ܂ ܒܥܐ ܐܢܐ ܡܢܟ ܠܐ ܬܫܢܩܢܝ܂
08:29	ܦܩܕ ܗܘܐ ܠܗ ܓܝܪ ܠܗ݀ܘ ܪܘܚܐ ܛܢܦܐ ܠܡܦܩ ܡܢ ܒܪ ܐܢܫܐ܂ ܣܓܝ ܓܝܪ ܙܒܢܐ ܢܩܝܦ ܗܘܐ ܠܗ܂ ܘܡܬܐܣܪ ܗܘܐ ܒܫܫ̈ܠܬܐ ܘܒ̈ܟܒܠܐ ܕܢܬܢܛܪ܂ ܘܡܬܒܪ ܗܘܐ ܐܣ̈ܘܪܘܗܝ ܘܡܦܣܩ ܗܘܐ܂ ܘܡܬܕܒܪ ܗܘܐ ܡܢܗ ܡܢ ܫܐܕܐ ܠܚܘܪܒܐ܂
08:30	ܫܐܠܗ ܕܝܢ ܝܫܘܥ ܘܐܡܪ ܡܢ ܫܡܟ܂ ܘܐܡܪ ܠܗ ܠܓܝܘܢ܂ ܡܛܠ ܕܣ̈ܓܝܐܐ ܐܢܚܢܢ ܒܗ܂
08:31	ܘܒܥܝܢ ܗܘܘ ܡܢܗ ܗܢܘܢ ܫܐܕ̈ܐ ܕܠܐ ܢܫܕܪ ܐܢܘܢ ܠܓܗܢܐ ܘܠܐ ܢܦܩ ܐܢܘܢ܂
08:32	ܐܝܬ ܗܘܬ ܕܝܢ ܬܡܢ ܒܛܘܪܐ ܒܩܪܐ ܚܕܐ ܕ̈ܚܙܝܪܐ ܣܓ̈ܝܐܐ ܕܪܥܝܢ ܗܘܘ ܬܡܢ܂ ܘܒܥܝܢ ܗܘܘ ܡܢܗ ܗܢܘܢ ܫܐ̈ܕܐ ܕܢܦܣ ܠܗܘܢ ܠܡܥܠ ܒܗܝ ܒܩܪܐ ܕܚ̈ܙܝܪܐ܂ ܘܐܦܣ ܠܗܘܢ܂
08:33	ܘܢܦܩܘ ܫܐ̈ܕܐ ܡܢ ܓܒܪܐ ܗܘ ܘܥܠܘ ܒ̈ܚܙܝܪܐ܂ ܘܬܪܨܬ ܗܝ ܟܠܗ݀ ܒܩܪܐ ܠܫܩܝܦܐ܂ ܘܢܦܠܘ ܒܝܡܐ ܘܐܬܚܢܩܘ܂
08:34	ܟܕ ܚܙܘ ܕܝܢ ܗܢܘܢ ܪ̈ܥܘܬܐ ܡܕܡ ܕܗܘܐ ܥܪܩܘ܂ ܘܐܫܬܥܝܘ ܒܡ̈ܕܝܢܬܐ ܘܒ̈ܩܘܪܝܐ܂
08:35	ܘܢܦܩܘ ܐܢܫܐ ܕܢܚܙܘܢ ܡܕܡ ܕܗܘܐ܂ ܘܐܬܘ ܠܘܬ ܝܫܘܥ܂ ܘܐܫܟܚܘ ܠܗ݀ܘ ܓܒܪܐ ܕܢܦܩܘ ܡܢܗ ܗܢܘܢ ܫܐܕ̈ܐ܂ ܟܕ ܠܒܝܫ ܘܡܢܟܦ ܘܝܬܒ ܠܘܬ ܪ̈ܓܠܘܗܝ ܕܝܫܘܥ ܘܕܚܠܘ܂
08:36	ܘܐܫܬܥܝܘ ܠܗܘܢ ܐܝܟܢܐ ܚܝܐ ܓܒܪܐ ܗܘ܂ ܘܐܝܠܝܢ ܕܚܙܘ ܬܘܒ
08:37	ܒܥܝܢ ܗܘܘ ܡܢܗ ܟܠܗ ܟܢܫܐ ܗܘ ܕܓ̈ܕܪܝܐ܂ ܕܢܐܙܠ ܠܗ ܡܢ ܠܘܬܗܘܢ܂ ܡܛܘܠ ܕܕܚܠܬܐ ܪܒܬܐ ܐܚܕܬ ܗܘܬ ܐܢܘܢ܂ ܗܘ ܕܝܢ ܣܠܩ ܠܗ ܠܣܦܝܢܬܐ ܘܗܦܟ ܡܢ ܠܘܬܗܘܢ܂
08:38	ܗܘ ܕܝܢ ܓܒܪܐ ܕܢܦܩܘ ܗܘܘ ܡܢܗ ܗܢܘܢ ܫܐ̈ܕܐ܂ ܒܥܐ ܗܘܐ ܡܢܗ ܕܠܘܬܗ ܢܗܘܐ܂ ܘܫܪܝܗܝ ܝܫܘܥ ܘܐܡܪ ܠܗ܂
08:39	ܗܦܘܟ ܠܒܝܬܟ ܘܠܒܝܬ ܐ̈ܢܫܝܟ܂ ܘܐܫܬܥܐ ܠܗܘܢ ܐܝܠܝܢ ܕܥܒܕ ܠܟ ܡܪܝܐ܂ ܘܐܙܠ ܗܘܐ ܘܡܟܪܙ ܗܘܐ ܒܟܘܠܗ݀ ܡܕܝܢܬܐ ܡܕܡ ܕܥܒܕ ܠܗ ܝܫܘܥ܂
08:40	ܘܟܕ ܗܦܟ ܝܫܘܥ ܩܒܠܗ ܟܢܫܐ ܣܓܝܐܐ܂ ܠܗ ܓܝܪ ܚܝܪܝܢ ܗܘܘ܀
08:41	ܘܐܬܐ ܓܒܪܐ ܚܕ ܝܘܐܪܫ ܫܡܗ ܗܘܐ܂ ܘܪܝܫ ܟܢܘܫܬܐ ܗܘܐ܂ ܘܢܦܠ ܩܕܡ ܪ̈ܓܠܘܗܝ ܕܝܫܘܥ܂ ܘܒܥܐ ܗܘܐ ܡܢܗ ܕܢܥܘܠ ܠܒܝܬܗ܂
08:42	ܒܪܬܐ ܓܝܪ ܝܚܝܕܝܬܐ ܐܝܬ ܗܘܬ ܠܗ܂ ܘܐܝܬܝܗ ܗܘܬ ܐܝܟ ܒܪܬ ܫ̈ܢܝܢ ܬܪ̈ܬܥܣܪܐ܂ ܘܩܪܝܒܐ ܗܘܬ ܠܡܡܬ܂ ܘܟܕ ܐܙܠ ܝܫܘܥ ܟܢܫܐ ܚܒܨ ܗܘܐ ܠܗ܂
08:43	ܘܐܢܬܬܐ ܚܕܐ ܕܪܕܐ ܗܘܐ ܕܡܗ݀ ܫ̈ܢܝܢ ܬܪ̈ܬܥܣܪܐ܂ ܘܟܘܠܗ ܩܢܝܢܗ݀ ܐܦܩܬ ܥܠ ܐܣ̈ܘܬܐ܂ ܘܠܐ ܐܫܟܚܬ ܕܬܬܐܣܐ ܡܢ ܐܢܫ܂ ܘܐܬܪܥܝܬ ܒܢܦܫܗ݀ ܘܐܡܪܐ܂ ܐܦܢ ܠܢܚܬ̈ܘܗܝ ܕܝܫܘܥ ܐܙܠܐ ܐܢܐ ܩܪܒܐ ܐܢܐ ܡܬܐܣܝܐ ܐܢܐ܂
08:44	ܘܩܪܒܬ ܡܢ ܒܣܬܪܗ܂ ܘܐܚܕܬ ܒܟܢܦܐ ܕܢܚܬܗ܂ ܘܩܡܬ ܡܪܕܝܬܐ ܕܕܡܗ݀܂
08:45	ܘܐܬܦܢܝ ܝܫܘܥ ܘܐܡܪ ܡܢܘ ܩܪܒ ܠܝ܂ ܘܟܕ ܟܠܗܘܢ ܟܦܪܝܢ ܗܘܘ܂ ܐܡܪ ܠܗ ܟܐܦܐ܂ ܪܒܢ ܟ̈ܢܫܐ ܚܒܨܝܢ ܠܟ ܘܐܬܝܢ܂ ܘܐܡܪ ܐܢܬ ܡܢܘ ܩܪܒ ܠܝ܂
08:46	ܐܡܪ ܠܗ ܝܫܘܥ܂ ܐܢܫ ܩܪܒ ܠܝ܂ ܐܢܐ ܓܝܪ ܝܕܥ ܐܢܐ ܕܚܝܠܐ ܢܦܩ ܡܢܝ܂
08:47	ܟܕ ܚܙܬ ܕܝܢ ܗܝ ܐܢܬܬܐ ܕܐܦܠܐ ܗܕܐ ܛܥܬܗ܂ ܐܬܬ ܟܕ ܕܚܝܠܐ ܘܪܬܝܬܐ ܢܦܠܬ ܣܓܕܬ ܠܗ܂ ܘܐܡܪܬ ܠܥܝܢ ܥܡܐ ܗܘ ܟܘܠܗ ܡܛܠ ܐܝܕܐ ܨܒܘ ܩܪܒܬ܂ ܘܐܝܟܢܐ ܒܪ ܫܥܬܗ ܐܬܐܣܝܬ ܩܕܡ ܟܠ ܐܢܫ ܐܘܕܝܬ܂
08:48	ܗܘ ܕܝܢ ܐܡܪ ܠܗ݀ ܒܪܬܝ ܗܝܡܢܘܬܟܝ ܐܚܝܬܟܝ ܙܠܝ ܒܫܠܡܐ܂
08:49	ܘܟܕ ܡܠܠ܂ ܐܬܘ ܡܢ ܕܒܝܬ ܪܒ ܟܢܘܫܬܐ ܘܐܡܪܝܢ ܠܗ܂ ܡܝܬܬ ܠܗ݀ ܒܪܬܟ ܠܐ ܬܥܡܠ ܠܡܠܦܢܐ܂
08:50	ܟܕ ܫܡܥ ܕܝܢ ܝܫܘܥ ܕܗܟܘܬ ܐܡܪܘ܂ ܐܡܪ ܠܗ ܠܐ ܬܕܚܠ܂ ܒܠܚܘܕ ܡܗܝܡܢܘ ܗܝܡܢ ܘܬܚܐ ܒܪܬܟ܂
08:51	ܘܟܕ ܐܬܐ ܠܒܝܬܗ ܕܗܘ ܓܒܪܐ܂ ܠܐ ܫܒܩ ܠܐܢܫ ܕܢܥܘܠ܂ ܐܠܐ ܠܟܐܦܐ ܘܠܝܥܩܘܒ ܘܠܝܘܚܢܢ܂ ܘܠܐܒܘܗ݀ ܘܠܐܡܗ ܕܛܠܝܬܐ܂
08:52	ܘܟܠܗܘܢ ܐܢܫܐ ܒܟܝܢ ܗܘܘ ܥܠܝܗ ܘܡܪܩܕܝܢ ܗܘܘ܂ ܐܡܪ ܠܗܘܢ ܝܫܘܥ ܠܐ ܬܒܟܘܢ܂ ܛܠܝܬܐ ܓܝܪ ܠܐ ܡܝܬܬ܂ ܡܕܡܟ ܗܘ ܕܡܟܐ܂
08:53	ܗܢܘܢ ܕܝܢ ܓܚܟܝܢ ܗܘܘ ܥܠܘܗܝ ܕܝܕܥܝܢ ܗܘܘ ܕܡܝܬܬ ܠܗ݀܂
08:54	ܘܗܘ ܐܚܕܗ݀ ܒܐܝܕܗ݀ ܘܩܪܗ݀ ܘܐܡܪ ܠܗ݀܂ ܛܠܝܬܐ ܩܘܡܝ܂
08:55	ܘܗܦܟܬ ܪܘܚܗ݀܂ ܘܒܪܫܥܬܗ ܩܡܬ܂ ܘܦܩܕ ܕܢܬܠܘܢ ܠܗ݀ ܠܡܐܟܠ܂
08:56	ܘܬܡܗܘ ܗܘܘ ܐܒ̈ܗܝܗ܂ ܘܗܘ ܦܩܕ ܐܢܘܢ ܕܠܐܢܫ ܠܐ ܢܐܡܪܘܢ ܡܐ ܕܗܘܐ܀