The Comprehensive Aramaic Lexicon

09:01	ܘܩܪܐ ܐܢܘܢ ܝܫܘܥ ܠܬܪܥ̈ܣܪܬܗ܂ ܘܝܗܒ ܠܗܘܢ ܚܝܠܐ ܘܫܘܠܛܢܐ ܥܠ ܟܠ ܪ̈ܘܚܐ ܘܫܐ̈ܕܐ܂ ܘܟܪ̈ܝܗܐ ܠܡܐܣܝܘ܂
09:02	ܘܫܕܪ ܐܢܘܢ ܕܢܟܪܙܘܢ ܡܠܟܘܬܗ ܕܐܠܗܐ ܘܠܡܐܣܝܘ܂
09:03	ܘܐܡܪ ܠܗܘܢ ܡܕܡ ܠܐ ܬܫܩܠܘܢ ܠܟܘܢ ܠܐܘܪܚܐ܂ ܠܐ ܫܒܛܐ ܘܠܐ ܬܪܡܠܐ܂ ܘܠܐ ܠܚܡܐ ܘܠܐ ܟܣܦܐ܂ ܘܠܐ ܬܪ̈ܬܝܢ ܟܘ̈ܬܝܢܝܢ ܢܗܘܝܢ ܠܟܘܢ܂
09:04	ܘܠܒܝܬܐ ܐܝܢܐ ܕܥܠܝܢ ܐܢܬܘܢ ܬܡܢ ܗܘܘ܂ ܘܡܢ ܬܡܢ ܦܘܩܘ܂
09:05	ܘܐܝܠܝܢ ܕܠܐ ܡܩܒܠܝܢ ܠܟܘܢ܂ ܡܐ ܕܢܦܩܝܢ ܐܢܬܘܢ ܡܢ ܡܕܝܢܬܐ ܗܝ܂ ܘܐܦ ܚܠܐ ܕ̈ܪܓܠܝܟܘܢ ܦܨܘ܂ ܕܬܗܘܐ ܠܗܘܢ ܠܣܗܕܘܬܐ܀
09:06	ܘܟܕ ܢܦܩܘ ܫ̈ܠܝܚܘܗܝ܂ ܘܡܬܟܪܟܝܢ ܒܩ̈ܘܪܝܐ ܘܒ̈ܡܕܝܢܬܐ܂ ܘܡܣܒܪܝܢ ܗܘܘ ܘܡܐܣܝܢ ܒܟܘܠ ܕܘܟܐ܂
09:07	ܘܫܡܥ ܗܪܘܕܣ ܛܝܛܪܟܐ ܟܠܗܝܢ ܗܠܝܢ ܕܗܘܝ ܘܡܬܕܡܪ ܗܘܐ܂ ܡܛܠ ܕܐܡܪܝܢ ܗܘܘ ܐ̈ܢܫܝܢ ܡܢܗܘܢ܂ ܕܝܘܚܢܢ ܩܡ ܡܢ ܒܝܬ ܡ̈ܝܬܐ܂
09:08	ܘܐܚܪ̈ܢܐ ܐܡܪܝܢ ܕܐܠܝܐ ܐܬܚܙܝ܂ ܐܚ̈ܪܢܐ ܐܡܪܝܢ ܕܚܕ ܡܢ ܢܒ̈ܝܐ ܩܕ̈ܡܝܐ ܩܡ ܡܢ ܒܝܬ ܡ̈ܝܬܐ܂
09:09	ܘܐܡܪ ܗܘܐ ܗܪܘܕܣ܂ ܪܫܗ ܕܝܘܚܢܢ ܐܢܐ ܦܣܩܬ܂ ܡܢܘ ܗܢܐ ܕܗܠܝܢ ܫܡܥ ܐܢܐ ܥܠܘܗܝ܂ ܘܨܒܐ ܗܘܐ ܕܢܚܙܝܘܗܝ܀
09:10	ܘܗܦܟܘ ܗܢܘܢ ܫ̈ܠܝܚܐ܂ ܘܐܫܬܥܝܘ ܠܗ ܟܠܡܕܡ ܕܥܒܕܘ܂ ܘܕܒܪ ܐܢܘܢ ܒܠܚܘܕܝܗܘܢ܂ ܘܐܙܠ ܠܐܬܪܐ ܚܘܪܒܐ܂
09:11	ܘܟܕ ܝܕܥܘ ܟܢ̈ܫܐ܂ ܐܙܠܘ ܠܗܘܢ ܒܬܪܗ ܒܪܓܠ܂ ܘܩܒܠ ܐܢܘܢ܂ ܘܡܡܠܠ ܗܘܐ ܥܡܗܘܢ ܥܠ ܡܠܟܘܬܐ ܕܐܠܗܐ܂ ܘܠܐܝܠܝܢ ܕܣܢܝܩܝܢ ܗܘܘ ܥܠ ܐܣܝܘܬܐ ܡܐܣܐ ܗܘܐ ܠܗܘܢ܀
09:12	ܘܟܕ ܩܪܝܒ ܗܘܐ ܠܡܥܡܕ ܝܘܡܐ܂ ܩܪܒܘ ܬܠܡ̈ܝܕܘܗܝ ܐܥܝܪܘܗܝ ܘܐܡܪܝܢ ܠܗ ܒܚܘܪܒܐ ܐܢܚܢܢ܂ ܫܪܝ ܠܟ̈ܢܫܐ ܗܠܝܢ ܕܢܐܙܠܘܢ ܠܩܘ̈ܪܝܐ ܗܠܝܢ ܕ̈ܚܕܪܝܢ ܘܠܟ̈ܦܪܘܢܐ ܕܢܫܪܘܢ ܒܗܝܢ܂ ܐܘ ܕܢܫܟܚܘܢ ܠܗܘܢ ܣܝܒܪܬܐ܂
09:13	ܐܡܪ ܠܗܘܢ ܝܫܘܥ ܐܢܬܘܢ ܗܒܘ ܠܗܘܢ ܠܡܠܥܣ܂ ܐܡܪܝܢ ܠܗ ܠܝܬ ܠܢ ܝܬܝܪ ܡܢ ܚܡ̈ܫܐ ܠܚ̈ܡܝܢ ܘܬ̈ܪܝܢ ܢܘ̈ܢܝܢ܂ ܐܠܐ ܢܐܙܠ ܐܢܚܢܢ ܢܙܒܢ ܣܝܒܪܬܐ ܠܗܢܐ ܟܠܗ ܟܢܫܐ܂
09:14	ܗܘܝܢ ܗܘܘ ܓܝܪ ܚܡ̈ܫܐ ܐ̈ܠܦܝܢ ܓܒ̈ܪܝܢ܂ ܐܡܪ ܠܬܠܡ̈ܝܕܘܗܝ ܐܣܡܟܘ ܐܢܘܢ ܚ̈ܡܫܝܢ ܚܡ̈ܫܝܢ ܓܒܪ̈ܝܢ ܒܣܡܟܐ܂
09:15	ܘܥܒܕܘ ܗܟܘܬ܂ ܘܐܣܡܟܘ ܐܢܘܢ ܠܟܠܗܘܢ܂
09:16	ܘܢܣܒ ܗܘ ܗܢܘܢ ܚܡ̈ܫܐ ܠܚ̈ܡܝܢ ܘܬܪ̈ܝܢ ܢܘ̈ܢܝܢ܂ ܘܚܪ ܒܫܡܝܐ ܘܒܪܟ ܥܠܝܗܘܢ ܘܩܨܐ ܘܝܗܒ ܠܬܠܡ̈ܝܕܘܗܝ ܕܢܣܝܡܘܢ ܩܕܡ ܟܢ̈ܫܐ܂
09:17	ܘܐܟܠܘ ܟܠܗܘܢ ܘܣܒܥܘ܂ ܘܫܩܠܘ ܩܨ̈ܝܐ ܡܕܡ ܕܐܘܬܪܘ ܡܠܐ ܬܪܥ̈ܣܪ ܩ̈ܘܦܝܢܝܢ܂ ܘܐܝܬܝܗܘܢ ܗܘܘ ܐܢܫܐ ܗܠܝܢ ܕܐܟܠܘ ܡܢ ܠܚܡܐ ܗܘ܂ ܐܝܟ ܚ̈ܡܫܐ ܐ̈ܠܦܝܢ܂ ܣܛܪ ܡܢ ܢܫ̈ܐ ܘܛ̈ܠܝܐ܀
09:18	ܘܟܕ ܗܘܐ ܒܠܚܘܕܘܗܝ ܘܬܠܡ̈ܝܕܘܗܝ ܥܡܗ܂ ܫܐܠ ܐܢܘܢ ܘܐܡܪ܂ ܡܢܐ ܐܡܪܝܢ ܥܠܝ ܟܢ̈ܫܐ ܕܐܝܬܝ܂
09:19	ܐܡܪܝܢ ܠܗ܂ ܐܝܬ ܕܐܡܪܝܢ ܕܝܘܚܢܢ ܗܘ ܡܥܡܕܢܐ܂ ܐܚ̈ܪܢܐ ܐܡܪܝܢ ܕܐܠܝܐ ܗܘ܂
09:20	ܐܡܪ ܠܗܘܢ ܗܘ ܘܐܢܬܘܢ ܡܢܐ ܐܡܪܝܢ ܐܢܬܘܢ ܕܐܝܬܝ܂ ܥܢܐ ܫܡܥܘܢ ܟܐܦܐ ܘܐܡܪ ܠܗ܂ ܐܢܬ ܗܘ ܡܫܝܚܐ܂
09:21	ܘܗܘ ܟܐܐ ܒܗܘܢ ܘܦܩܕ ܐܢܘܢ ܕܗܕܐ ܠܐܢܫ ܠܐ ܢܐܡܪܘܢ܂
09:22	ܘܐܡܪ ܕܥܬܝܕ ܗܘ ܠܗ ܠܒܪܗ ܕܐܢܫܐ ܕܣܓܝ ܢܚܫ܂ ܘܢܣܬܠܐ ܡܢ ܩܫ̈ܝܫܐ ܘ̈ܣܦܪܐ ܘܟܗ̈ܢܐ܂ ܘܢܬܩܛܠ ܘܠܝܘܡܐ ܕܬ̈ܠܬܐ ܢܩܘܡ܀
09:23	ܘܐܡܪ ܗܘܐ ܟܠ ܡܢ ܕܨܒܐ ܕܢܐܬܐ ܒܬܪܝ ܢܟܦܘܪ ܒܢܦܫܗ܂ ܘܢܫܩܠ ܨܠܝܒܗ ܒܟܠܝܘܡ ܘܢܐܬܐ ܒܬܪܝ܂
09:24	ܡܢ ܕܨܒܐ ܓܝܪ ܕܢܚܐ ܢܦܫܗ ܢܘܒܕܝܗ܂ ܘܡܢ ܕܢܘܒܕ ܢܦܫܗ ܡܛܠܬܝ ܢܚܝܗ܂
09:25	ܡܢܐ ܓܝܪ ܢܐܬܪ ܒܪ ܐܢܫܐ ܐܢ ܥܠܡܐ ܟܠܗ ܢܩܢܐ ܘܢܦܫܗ ܢܚܣܪ܂
09:26	ܡܢ ܕܢܒܗܬ ܒܝ ܓܝܪ ܩܕܡ ܒܢ̈ܝܢܫܐ ܘܒܐܝܠܝܢ ܕܕܝܠܝ ܐܢܘܢ܂ ܢܒܗܬ ܒܗ ܒܪܗ ܕܓܒܪܐ ܡܐ ܕܐܬܐ ܒܬܫܒܘܚܬܐ ܕܐܒܘܗܝ ܘܕܡ̈ܠܐܟܘܗܝ ܩܕܝ̈ܫܐ܂
09:27	ܐܡܪܢܐ ܠܟܘܢ ܕܝܢ ܫܪܝܪܐܝܬ܂ ܕܐܝܬ ܐܢܫܐ ܕܩܝܡܝܢ ܗܪܟܐ܂ ܕܠܐ ܢܛܥܡܘܢ ܡܘܬܐ܂ ܥܕܡܐ ܕܢܚܙܘܢ ܡܠܟܘܬܗ ܕܐܠܗܐ ܕܐܬܝܐ ܒܫܘܒܚܐ܀
09:28	ܘܗܘܐ ܒܬܪ ܡ̈ܠܐ ܗܠܝܢ ܐܝܟ ܬܡ̈ܢܝܐ ܝܘ̈ܡܝܢ܂ ܘܕܒܪ ܠܟܐܦܐ ܘܠܝܥܩܘܒ ܘܠܝܘܚܢܢ܂ ܘܣܠܩܘ ܠܛܘܪܐ ܠܡܨܠܝܘ܂
09:29	ܘܟܕ ܡܨܠܐ ܐܫܬܚܠܦ ܚܙܘܐ ܕܐ̈ܦܘܗܝ܂ ܘܢܚ̈ܬܘܗܝ ܚ̈ܘܪܝܢ ܘܡܒܪܩܝܢ ܗܘܘ ܐܝܟ ܬܠܓܐ܂
09:30	ܘܗܐ ܬܪ̈ܝܢ ܓ̈ܒܪܝܢ ܡܡܠܠܝܢ ܥܡܗ܂ ܡܘܫܐ ܘܐܠܝܐ
09:31	ܕܐܬܚܙܝܘ ܒܬܫܒܘܚܬܐ܂ ܘܐܡܪܝܢ ܗܘܘ ܥܠ ܥܘܢܕܢܗ ܕܥܬܝܕ ܗܘܐ ܕܢܫܬܠܡ ܒܐܘܪܫܠܡ܂
09:32	ܘܫܡܥܘܢ ܟܐܦܐ ܘܗܢܘܢ ܕܥܡܗ ܝܩܪܘ ܗܘܘ ܠܗܘܢ ܒܫܢܬܐ ܣܓܝܐܬܐ܂ ܘܟܕ ܐܬܥܝܪܘ ܚܙܘ ܬܫܒܘܚܬܗ܂ ܘܠܗܢܘܢ ܬܪ̈ܝܢ ܐܢܫܝܢ ܕܩܝܡܝܢ ܗܘܘ ܠܘܬܗ܂
09:33	ܘܟܕ ܫܪܝܘ ܠܡܦܪܫ ܡܢܗ܂ ܐܡܪ ܟܐܦܐ ܠܝܫܘܥ܂ ܪܒܝ ܫܦܝܪ ܗܘ ܕܢܗܘܐ ܗܪܟܐ܂ ܘܢܥܒܕ ܬܢܢ ܬܠܬ ܡ̈ܛܠܝܢ܂ ܠܟ ܚܕܐ܂ ܘܠܡܘܫܐ ܚܕܐ܂ ܘܠܐܠܝܐ ܚܕܐ܂ ܘܠܐ ܝܕܥ ܗܘܐ ܡܢܐ ܐܡܪ ܗܘܐ܂

09:34	ܘܟܕ ܐܡܪ ܗܠܝܢ܂ ܗܘܬ ܥܢܢܐ ܘܛܠܠܬ ܥܠܝܗܘܢ܂ ܘܟܕ ܚܙܘ ܠܗܠܝܢ ܕܥܠܝܢ ܒܥܢܢܐ ܕܚܠܘ܂

09:35	ܘܩܠܐ ܐܫܬܡܥ ܡܢ ܥܢܢܐ ܗܝ ܕܐܡܪ܂ ܗܢܘ ܒܪܝ ܘܚܒܝܒܝ ܠܗ ܫܡܥܘ܂
09:36	ܘܟܕ ܗܘܐ ܩܠܐ ܐܫܬܟܚ ܝܫܘܥ ܒܠܚܘܕܘܗܝ܂ ܘܗܢܘܢ ܫܬܩܘ ܠܗܘܢ܂ ܘܠܥܝܢ ܐܢܫ ܠܐ ܐܡܪܘ ܡܕܡ ܕܚܙܘ ܗܘܘ ܒܗܢܘܢ ܝܘ̈ܡܬܐ܂
09:37	ܘܒܗܘ ܝܘܡܐ ܬܘܒ ܟܕ ܢܚܬܝܢ ܡܢ ܛܘܪܐ܂ ܦܓܥ ܒܗ ܟܢܫܐ ܣܓܝܐܐ܂
09:38	ܘܓܒܪܐ ܚܕ ܡܢ ܟܢܫܐ ܗܘ ܩܥܐ ܘܐܡܪ܂ ܡܠܦܢܐ ܒܥܐ ܐܢܐ ܡܢܟ ܐܬܪܚܡ ܥܠ ܒܪܝ܂ ܝܚܝܕܝܐ ܗܘ ܠܝ܂
09:39	ܘܪܘܚܐ ܗܘܝܐ ܠܗ܂ ܘܡܢ ܬܚܝܬ ܫܠܝܐ ܪܡܝܐ ܠܗ ܘܡܪܥܬ܂ ܘܠܡܚܣܢ ܦܪܩܐ ܡܢܗ ܡܐ ܕܫܚܩܬܗ܂
09:40	ܘܒܥܝܬ ܡܢ ܬܠܡ̈ܝܕܝܟ ܘܠܐ ܐܫܟܚܘ ܠܡܐܣܝܘܬܗ ܘܠܡܦܩܘܬܗ݀܂
09:41	ܘܥܢܐ ܝܫܘܥ ܘܐܡܪ܂ ܐܘܢ ܫܪܒܬܐ ܡܥܩܠܬܐ ܘܕܠܐ ܗܝܡܢܘ܂ ܥܕܡܐ ܠܐܡܬܝ ܐܗܘܐ ܠܘܬܟܘܢ ܘܐܣܝܒܪܟܘܢ܂ ܩܪܒܝܗܝ ܠܝ ܠܒܪܟ ܠܟܐ܂
09:42	ܘܟܕ ܡܩܪܒ ܠܗ ܐܪܡܝܗ ܫܐܕܐ ܗܘ܂ ܘܡܒܥܩ ܗܘܐ ܠܗ܂ ܘܟܐܐ ܒܗ݀ ܝܫܘܥ ܒܪܘܚܐ ܗܝ ܛܢܦܬܐ܂ ܘܐܣܝܗ ܠܛܠܝܐ ܘܐܫܠܡܗ ܠܐܒܘܗܝ܂
09:43	ܘܐܬܕܡܪܘ ܟܠܗܘܢ ܥܠ ܪܒܘܬܗ ܕܐܠܗܐ܂ ܘܟܕ ܟܘܠܢܫ ܡܬܕܡܪ ܗܘܐ ܥܠ ܟܠ ܕܥܒܕ ܗܘܐ܂ ܐܡܪ ܠܬܠܡ̈ܝܕܘܗܝ܂
09:44	ܣܝܡܘ ܐܢܬܘܢ ܡ̈ܠܐ ܗܠܝܢ ܒܐܕ̈ܢܝܟܘܢ܂ ܒܪܗ ܓܝܪ ܕܐܢܫܐ ܥܬܝܕ ܗܘ ܕܢܫܬܠܡ ܒܐ̈ܝܕܝ ܒܢ̈ܝ ܐܢܫܐ܂
09:45	ܘܗܢܘܢ ܠܐ ܡܫܬܘܕܥܝܢ ܗܘܘ ܠܗ݀ ܠܡܠܬܐ ܗܕܐ܂ ܡܛܠ ܕܡܟܣܝܐ ܗܘܬ ܡܢܗܘܢ ܕܠܐ ܢܫܬܘܕܥܘܢܗ݀܂ ܘܗܢܘܢ ܕܚܠܝܢ ܗܘܘ ܕܢܫܐܠܘܢܝܗܝ ܥܠܝܗ ܥܠ ܗܕܐ ܡܠܬܐ܂
09:46	ܘܥܠܬ ܗܘܬ ܒܗܘܢ ܡܚܫܒܬܐ ܗܕܐ ܕܡܢܘ ܢܗܘܐ ܪܒ ܒܗܘܢ܂
09:47	ܝܫܘܥ ܕܝܢ ܟܕ ܝܕܥ ܡܚ̈ܫܒܬܗܘܢ܂ ܐܚܕ ܛܠܝܐ ܚܕ ܘܐܩܝܡܗ ܠܘܬܗ
09:48	ܘܐܡܪ܂ ܡܢ ܕܡܩܒܠ ܛܠܝܐ ܗܢܐ ܒܫܡܝ ܠܝ ܗܘ ܡܩܒܠ܂ ܘܡܢ ܕܠܝ ܡܩܒܠ ܠܡܢ ܕܫܕܪܢܝ ܡܩܒܠ܂ ܐܝܢܐ ܕܙܥܘܪ ܓܝܪ ܒܟܘܢ ܐܝܟ ܗܢܐ ܛܠܝܐ ܗܢܘ ܪܒ܂
09:49	ܘܥܢܐ ܝܘܚܢܢ ܘܐܡܪ ܠܗ܂ ܚܙܝܢ ܓܒܪܐ ܚܕ ܕܡܦܩ ܫܐ̈ܕܐ ܒܫܡܟ ܘܟܠܝܢܝܗܝ܂ ܥܠ ܕܠܐ ܐܬܐ ܥܡܢ ܒܬܪܟ܂
09:50	ܐܡܪ ܠܗ ܝܫܘܥ ܠܐ ܬܟܠܘܢ܂ ܡܢ ܕܠܐ ܗܘܐ ܓܝܪ ܠܘܩܒܠܟܘܢ ܥܡܟܘܢ ܗܘ܀
09:51	ܘܗܘܐ ܟܕ ܡܬܡܠܝܢ ܗܘܘ ܝܘܡ̈ܬܐ ܕܡܣܩܢܗ܂ ܐܬܩܢ ܦܪܨܘܦܗ ܕܢܐܙܠ ܠܗ ܠܐܘܪܫܠܡ܂
09:52	ܘܫܕܪ ܗܘܐ ܡܠܐ̈ܟܐ ܩܕܡ ܐ̈ܦܘܗܝ܂ ܘܐܙܠܘ ܘܥܠܘ ܠܩܪܝܬܐ ܚܕܐ ܕܫ̈ܡܪܝܐ ܕܢܬܩܢܘܢ ܠܗ܂
09:53	ܘܠܐ ܩܒܠܘ ܐܢܘܢ܂ ܡܛܘܠ ܕܦܪܨܘܦܗ ܠܐܘܪܫܠܡ ܣܝܡ ܗܘܐ ܠܡܐܙܠ܂
09:54	ܘܟܕ ܕܝܢ ܚܙܘ ܬܠܡ̈ܝܕܘܗܝ ܝܥܩܘܒ ܘܝܘܚܢܢ܂ ܐܡܪܘ ܠܗ ܡܪܢ ܨܒܐ ܐܢܬ ܕܢܐܡܪ܂ ܕܬܚܘܬ ܢܘܪܐ ܡܢ ܫܡܝܐ ܘܬܣܝܦ ܐܢܘܢ܂
09:55	ܘܗܘ ܐܬܦܢܝ ܘܟܐܐ ܒܗܘܢ ܘܐܡܪ ܠܗܘܢ܂ ܠܐ ܝܕܥܝܢ ܐܢܬܘܢ ܕܐܝܕܐ ܐܢܬܘܢ ܪܘܚܐ܂
09:56	ܒܪܗ ܓܝܪ ܕܐܢܫܐ ܠܐ ܐܬܐ ܠܡܘܒܕܘ ܢܦܫ̈ܬܐ܂ ܐܠܐ ܠܡܚܝܘ܂ ܘܐܙܠܘ ܠܗܘܢ ܠܩܪܝܬܐ ܐܚܪܬܐ܀
09:57	ܘܟܕ ܐܙܠܝܢ ܒܐܘܪܚܐ܂ ܐܬܐ ܓܒܪܐ ܚܕ ܐܡܪ ܠܗ܂ ܐܬܐ ܒܬܪܟ ܠܐܬܪ ܕܐܙܠ ܐܢܬ܂
09:58	ܐܡܪ ܠܗ ܝܫܘܥ ܠܬܥ̈ܠܐ ܢܩ̈ܥܐ ܐܝܬ ܠܗܘܢ܂ ܘܠܦܪܚܬܐ ܕܫܡܝܐ ܡܛܠܠܐ܂ ܠܒܪܗ ܕܝܢ ܕܐܢܫܐ ܠܝܬ ܠܗ ܐܬܪ ܕܢܣܡܘܟ ܪܫܗ܂
09:59	ܘܐܡܪ ܠܐܚܪܢܐ ܬܐ ܒܬܪܝ܂ ܐܡܪ ܠܗ ܡܪܝ ܐܦܣ ܠܝ ܠܘܩܕܡ ܐܙܠ ܐܩܒܘܪ ܠܐܒܝ ܘܐܬܐ܂
09:60	ܐܡܪ ܠܗ ܝܫܘܥ ܫܒܘܩ ܡ̈ܝܬܐ ܩܒܪܝܢ ܡ̈ܝܬܝܗܘܢ܂ ܘܐܢܬ ܙܠ ܣܒܪ ܡܠܟܘܬܗ ܕܐܠܗܐ܂
09:61	ܐܡܪ ܠܗ ܐܚܪܢܐ ܐܬܐ ܒܬܪܟ܂ ܡܪܝ ܠܘܩܕܡ ܕܝܢ ܐܦܣ ܠܝ ܐܙܠ ܐܚܘܐ ܠܒ̈ܢܝ ܒܝܬܝ ܘܐܬܐ܂
09:62	ܐܡܪ ܠܗ ܝܫܘܥ܂ ܠܐ ܐܢܫ ܪܡܐ ܐܝܕܗ ܥܠ ܚܪܒܐ ܕܦܕܢܐ ܘܚܐܪ ܠܒܣܬܪܗ܂ ܘܗܘܐ ܬܘܒ ܚܫܚ ܠܡܠܟܘܬܐ ܕܐܠܗܐ܀