The Comprehensive Aramaic Lexicon

10:01	ܘܡܢ ܒܬܪ ܗܠܝܢ ܦܪܫ ܐܦ ܠܐܚ̈ܪܢܐ ܫܒܥܝܢ ܘܬܪ̈ܝܢ܂ ܘܫܕܪ ܐܢܘܢ ܬܪ̈ܝܢ ܬܪ̈ܝܢ ܩܕܡ ܐ̈ܦܘܗܝ܂ ܠܟܠ ܐܬܪ ܘܡܕܝܢܐ ܕܥܬܝܕ ܗܘܐ ܠܡܐܙܠ܂

10:02	ܐܡܪ ܠܗܘܢ ܚܨܕܐ ܣܓܝ ܘ̈ܦܥܠܐ ܙܥ̈ܘܪܝܢ܂ ܒܥܘ ܗܟܝܠ ܡܢ ܡܪܗ ܕܚܨܕܐ ܐܝܟ ܕܢܦܩ ܦܥ̈ܠܐ ܠܚܨܕܗ܂

10:03	ܙܠܘ ܗܫܐ ܗܐ ܡܫܕܪ ܐܢܐ ܠܟܘܢ ܐܝܟ ܐܡ̈ܪܐ ܒܝܢܝ ܕܐ̈ܒܐ܂
10:04	ܠܐ ܬܫܩܠܘܢ ܠܟܘܢ ܟܝ̈ܣܐ ܘܠܐ ܬܪ̈ܡܠܐ܂ ܘܠܐ ܡܣ̈ܢܐ܂ ܘܒܫܠܡܐ ܕܐܢܫ ܒܐܘܪܚܐ ܠܐ ܬܫܐܠܘܢ܂
10:05	ܘܠܐܝܢܐ ܒܝܬܐ ܩܕܡܝܐ ܕܥܠܝܢ ܐܢܬܘܢ ܠܗ܂ ܗܘܝܬܘܢ ܐܡܪܝܢ ܫܠܡܐ ܒܒܝܬܐ ܗܢܐ܂
10:06	ܘܐܢ ܐܝܬ ܬܡܢ ܒܪ ܫܠܡܐ ܢܬܢܝܚ ܥܠܘܗܝ ܫܠܡܟܘܢ܂ ܘܐܢ ܕܝܢ ܠܐ ܥܠܝܟܘܢ ܢܗܦܘܟ܂
10:07	ܘܒܗ ܒܒܝܬܐ ܗܘܝܬܘܢ ܠܥܣܝܢ ܘܫܬܝܢ ܡܢ ܕܝܠܗܘܢ܂ ܫܘܐ ܗܘ ܦܥܠܐ ܣܝܒܪܬܗ܂ ܘܠܐ ܬܫܢܘܢ ܡܢ ܒܝܬܐ ܠܚܒܪܗ܂
10:08	ܘܠܐܝܕܐ ܡܕܝܢܬܐ ܕܥܠܝܢ ܐܢܬܘܢ ܠܗ݀ ܘܡܩܒܠܝܢ ܠܟܘܢ܂ ܠܥܣܘ ܟܘܠ ܡܕܡ ܕܡܬܣܝܡ ܩܕܡܝܟܘܢ܂
10:09	ܘܐܣܘ ܡܪ̈ܥܐ ܕܐܝܬ ܒܗ܂ ܘܗܘܝܬܘܢ ܐܡܪܝܢ ܕܩܪܒܬ ܥܠܝܟܘܢ ܡܠܟܘܬܗ ܕܐܠܗܐ܂
10:10	ܠܐܝܕܐ ܡܕܝܢܬܐ ܕܝܢ ܕܥܠܝܢ ܐܢܬܘܢ ܠܗ ܘܠܐ ܢܩܒܠܘܢܟܘܢ ܒܗ݀܂ ܦܘܩܘ ܘܐܡܪܘ ܒܫܘ̈ܩܝܗ܂
10:11	ܘܗܐ ܐܦ ܚܠܐ ܕܕܒܩ ܒܪ̈ܓܠܝܢ ܢܦܨܝܢ ܐܢܚܢܢ ܠܗ܂ ܒܪܡ ܕܝܢ ܗܕܐ ܕܥܘ܂ ܕܩܪܒܬ ܠܗ ܡܠܟܘܬܗ ܕܐܠܗܐ܂
10:12	ܐܡܪܢܐ ܠܟܘܢ ܕܠܣܕܘܡ ܢܗܘܐ ܦܫܝܚ ܒܝܘܡܐ ܕܕܝܢܐ ܛܒ ܡܢ ܕܠܗܝ ܡܕܝܢܬܐ܀
10:13	ܘܝ ܠܟܝ ܟܘܪܙܝܢ܂ ܘܝ ܠܟܝ ܒܝܬ ܨܝܕܐ܂ ܕܐܠܘ ܒܨܘܪ ܘܒܨܝܕܢ ܗܘܘ ܚܝ̈ܠܐ ܕܗܘܘ ܒܟܝܢ܂ ܟܒܪ ܕܝܢ ܒܣܩ̈ܐ ܘܒܩܛܡܐ ܬܒܘ܂
10:14	ܒܪܡ ܠܨܘܪ ܘܠܨܝܕܢ ܢܗܘܐ ܦܫܝܚ ܒܝܘܡܐ ܕܕܝܢܐ܂ ܝܬܝܪ ܡܢ ܕܠܟܝܢ܂
10:15	ܘܐܦ ܐܢܬܝ ܟܦܪܢܚܘܡ ܠܐ ܥܕܡܐ ܠܫܡܝܐ ܬܬܪܝܡܝܢ܂ ܐܠܐ ܥܕܡܐ ܠܫܝܘܠ ܬܚܬܝܢ܂
10:16	ܡܢ ܕܠܟܘܢ ܫܡܥ ܠܝ ܗܘ ܫܡܥ܂ ܘܡܢ ܕܠܟܘܢ ܓܠܙ ܠܝ ܗܘ ܓܠܙ܂ ܘܡܢ ܕܠܝ ܓܠܙ ܠܡܢ ܕܫܕܪܢܝ ܓܠܙ܂ ܘܡܢ ܕܠܝ ܫܡܥ ܠܡܢ ܕܫܕܪܢܝ ܫܡܥ܀
10:17	ܘܗܦܟܘ ܗܘܘ ܗܢܘܢ ܫܒܥܝܢ ܕܫܕܪ ܒܚܕܘܬܐ ܘܐܡܪܝܢ܂ ܡܪܢ ܘܐܦ ܫܐ̈ܕܐ ܡܫܬܥܒܕܝܢ ܠܢ ܒܫܡܟ܂
10:18	ܐܡܪ ܠܗܘܢ ܝܫܘܥ܂ ܚܙܐ ܗܘܝܬ ܠܗ ܠܣܛܢܐ ܕܢܦܠ ܐܝܟ ܒܪܩܐ ܕܢܦܠ ܡܢ ܫܡܝܐ܂
10:19	ܗܐ ܝܗܒ ܐܢܐ ܠܟܘܢ ܫܘܠܛܢܐ܂ ܕܬܗܘܘܢ ܕܝܫܝܢ ܚܘܘ̈ܬܐ ܘܥܩܪ̈ܒܐ܂ ܘܟܠܗ ܚܝܠܗ ܕܒܥܠܕܒܒܐ܂ ܘܡܕܡ ܠܐ ܢܗܪܟܘܢ܂
10:20	ܒܪܡ ܒܗܕܐ ܠܐ ܬܚܕܘܢ ܕܫ̈ܕܐ ܡܫܬܥܒܕܝܢ ܠܟܘܢ܂ ܐܠܐ ܚܕܘ ܒܫܡ̈ܗܝܟܘܢ ܕܟܬܝܒܝܢ ܒܫܡܝܐ܂
10:21	ܘܒܗ݀ ܒܫܥܬܐ ܐܪܘܙ ܒܪܘܚܐ ܕܩܘܕܫܐ ܘܐܡܪ܂ ܡܘܕܐ ܐܢܐ ܠܟ ܐܒܐ ܡܪܗ ܕܫܡܝܐ ܘܕܐܪܥܐ܂ ܕܟܣܝܬ ܗܠܝܢ ܡܢ ܚ̈ܟܝܡܐ ܘܡܢ ܣܟ̈ܘܠܬܢܐ܂ ܘܓܠܝܬ ܐܢܝܢ ܠܛ̈ܠܝܐ܂ ܐܝܢ ܐܒܝ ܕܗܟܢܐ ܗܘܐ ܨܒܝܢܐ ܩܕܡܝܟ܂
10:22	ܟܘܠ ܡܕܡ ܐܫܬܠܡ ܠܝ ܡܢ ܐܒܝ܂ ܘܠܐ ܐܢܫ ܝܕܥ ܡܢܘ ܒܪܐ ܐܠܐ ܐܢ ܐܒܐ܂ ܘܠܐ ܡܢܘ ܐܒܐ ܐܠܐ ܐܢ ܒܪܐ܂ ܘܠܡܢ ܕܢܨܒܐ ܒܪܐ ܕܢܓܠܐ ܠܗ܂
10:23	ܘܐܬܦܢܝ ܠܘܬ ܬܠܡ̈ܝܕܘܗܝ ܘܐܡܪ ܠܗܘܢ܂ ܛܘܒܝܗܝܢ ܠܥܝ̈ܢܐ ܕܚܙܝܢ ܡܕܡ ܕܚܙܝܬܘܢ܂
10:24	ܐܡܪܢܐ ܠܟܘܢ ܕ̈ܣܓܝܐܐ ܢܒ̈ܝܐ ܘܡ̈ܠܟܐ ܨܒܘ ܕܢܚܙܘܢ ܡܕܡ ܕܚܙܝܢ ܐܢܬܘܢ ܘܠܐ ܚܙܘ܂ ܘܠܡܫܡܥ ܡܕܡ ܕܫܡܥܝܢ ܐܢܬܘܢ ܘܠܐ ܫܡܥܘ܂
10:25	ܘܟܕ ܐܡܪ ܗܠܝܢ܂ ܩܪܒ ܡܠܦ ܢܡܘܣܐ ܚܕ ܕܩܐܡ ܗܘܐ ܕܢܢܣܝܘܗܝ܂ ܐܡܪ ܠܗ ܡܠܦܢܐ ܡܢܐ ܐܥܒܕ ܕܐܪܬ ܚ̈ܝܐ ܕܠܥܠܡ܂
10:26	ܐܡܪ ܠܗ ܝܫܘܥ ܒܢܡܘܣܐ ܐܝܟܢܐ ܟܬܝܒ ܘܐܝܟܢܐ ܩܪܝܬ܂
10:27	ܐܡܪ ܠܗ ܕܬܪܚܡ ܠܡܪܝܐ ܐܠܗܟ ܡܢ ܟܠܗ ܠܒܟ܂ ܘܡܢ ܟܘܠܗ ܚܝܠܟ܂ ܘܡܢ ܟܠܗ݀ ܢܦܫܟ܂ ܘܡܢ ܟܘܠܗ ܪܥܝܢܟ܂ ܘܠܩܪܝܒܟ ܐܝܟ ܢܦܫܟ܂
10:28	ܐܡܪ ܠܗ ܝܫܘܥ ܬܪܝܨܐܝܬ ܐܡܪܬ܂ ܗܠܝܢ ܥܒܕ ܘܚܝܐ ܐܢܬ܂
10:29	ܗܘ ܕܝܢ ܨܒܐ ܗܘܐ ܠܡܙܕܩܘ ܢܦܫܗ܂ ܐܡܪ ܠܝܫܘܥ ܘܡܢܘ ܩܪܝܒܝ܂
10:30	ܐܡܪ ܠܗ ܝܫܘܥ܂ ܓܒܪܐ ܚܕ ܢܚܬ ܗܘܐ ܡܢ ܐܘܪܫܠܡ ܠܐܝܪܝܚܘ܂ ܘܢܦܠ ܒܐ̈ܝܕܝ ܓܝ̈ܣܐ܂ ܘܐܫܠܚܘܗܝ ܘܡܚܘܘܗܝ܂ ܘܫܒܩܘܗܝ ܒܝܬ ܡܝܬ ܠܚܝ܂ ܘܐܙܠܘ ܠܗܘܢ܂
10:31	ܘܓܕܫ ܟܗܢܐ ܚܕ ܢܚܬ ܗܘܐ ܒܐܘܪܚܐ ܗܝ ܘܚܙܝܗܝ ܘܥܒܪܗ܂
10:32	ܘܐܦ ܠܘܝܐ ܟܕ ܡܛܐ ܗܝ ܕܘܟܬܐ ܚܙܝܗܝ ܘܥܒܪܗ܂
10:33	ܫܡܪܝܐ ܕܝܢ ܚܕ ܟܕ ܪܕܐ ܗܘܐ ܒܗ݀ ܒܐܘܪܚܐ ܘܡܛܝ ܠܘܬܗ܂ ܚܙܝܗܝ ܘܐܬܪܚܡ ܥܠܘܗܝ܂
10:34	ܘܐܬܩܪܒ ܘܥܨܒ ܡܚ̈ܘܬܗ܂ ܘܢܨܠ ܥܠܝܗܝܢ ܚܡܪܐ ܘܡܫܚܐ܂ ܘܐܪܟܒܗ ܥܠ ܚܡܪܗ܂ ܘܐܝܬܝܗ ܠܦܘܬܩܐ ܘܬܪܣܝܗ܂
10:35	ܘܠܨܦܪܗ ܕܝܘܡܐ ܐܦܩ ܬܪ̈ܝܢ ܕܝ̈ܢܪܝܢ ܝܗܒ ܠܦܘܬܩܝܐ܂ ܘܐܡܪ ܬܪܣܝܗܝ܂ ܘܡܐ ܕܗܦܟܬ ܡܕܡ ܕܢܦܩ ܠܟ ܬܘܒ ܦܪܥ ܐܢܐ ܠܟ܂
10:36	ܡܢܘ ܡܢ ܗܠܝܢ ܬܠܬܐ ܡܬܚܙܐ ܠܟ ܕܗܘܐ ܩܪܝܒܐ ܕܗܘ ܕܢܦܠ ܒܐ̈ܝܕܝ ܓ̈ܝܣܐ܂
10:37	ܐܡܪ ܠܗ ܗܘ ܕܐܬܪܚܡ ܥܠܘܗܝ܂ ܐܡܪ ܠܗ ܝܫܘܥ܂ ܙܠ ܘܐܦ ܐܢܬ ܗܟܢܐ ܗܘܝܬ ܥܒܕ܀
10:38	ܘܟܕ ܐܙܠܝܢ ܗܘܘ ܒܐܘܪܚܐ܂ ܥܠ ܠܩܪܝܬܐ ܚܕܐ܂ ܘܐܢܬܬܐ ܚܕܐ ܕܫܡܗ݀ ܡܪܬܐ ܩܒܠܬܗ ܒܒܝܬܗ݀܂
10:39	ܘܐܝܬ ܗܘܬ ܠܗ݀ ܚܬܐ ܕܫܡܗ݀ ܡܪܝܡ܂ ܘܐܬܬ ܝܬܒܬ ܠܘܬ ܪܓ̈ܠܘܗܝ ܕܡܪܢ܂ ܘܫܡܥܐ ܗܘܬ ܡ̈ܠܘܗܝ܂
10:40	ܡܪܬܐ ܕܝܢ ܥܢܝܐ ܗܘܬ ܒܬܫܡܫܬܐ ܣܓܝܐܬܐ܂ ܘܐܬܬ ܐܡܪܐ ܠܗ܂ ܡܪܝ ܠܐ ܒܛܝܠ ܠܟ ܥܠܝ ܕܚܬܝ ܫܒܩܬܢܝ ܒܠܚܘܕܝ ܕܐܫܡܫ܂ ܐܡܪ ܠܗ݀ ܡܥܕܪܐ ܠܝ܂
10:41	ܐܡܪ ܠܗ݀ ܡܪܬܐ ܡܪܬܐ ܨܦܬܝ ܘܛܘܪܒܐ ܕܝܠܝ ܐܝܬ ܠܘܬܟܝ ܥܠ ܣܓ̈ܝܐܬܐ܂
10:42	ܚܕܐ ܗܘ ܕܝܢ ܡܬܒܥܝܐ܂ ܡܪܝܡ ܡܢܬܐ ܛܒܬܐ ܓܒܬ ܠܗ݀ ܘܠܐ ܬܫܬܩܠ ܡܢܗ݀܀