The Comprehensive Aramaic Lexicon


11:01	ܘܟܕ ܡܨܠܐ ܗܘܐ ܕܝܢ ܒܕܘܟܬܐ ܚܕܐ܂ ܒܬܪ ܕܦܪܩ ܩܠܝܠ ܡܢ ܨܠܘܬܗ܂ ܐܡܪ ܠܗ ܚܕ ܡܢ ܬܠܡ̈ܝܕܘܗܝ܂ ܡܪܢ ܐܠܦܝܢ ܠܡܨܠܝܘ ܐܝܟܢܐ ܕܝܘܚܢܢ ܐܠܦ ܠܬܠܡ̈ܝܕܘܗܝ܂

11:02	ܐܡܪ ܠܗܘܢ ܐܡܬܝ ܕܡܨܠܝܢ ܐܢܬܘܢ ܗܘܝܬܘܢ ܐܡܪܝܢ܂ ܐܒܘܢ ܕܒܫܡܝܐ ܢܬܩܕܫ ܫܡܟ܂ ܘܬܐܬܐ ܡܠܟܘܬܟ܂
11:03	ܘܗܒ ܠܢ ܠܚܡܐ ܐܡܝܢܐ ܕܟܠܝܘܡ܂
11:04	ܘܫܒܘܩ ܠܢ ܚܛ̈ܗܝܢ܂ ܘܐܦ ܚܢܢ ܢܫܒܘܩ ܠܟܠ ܕܚܝܒ ܠܢ܂ ܘܠܐ ܬܥܠܢ ܠܢܣܝܘܢܐ܂ ܐܠܐ ܦܨܢ ܡܢ ܒܝܫܐ܂
11:05	ܘܐܡܪ ܠܗܘܢ ܝܫܘܥ܂ ܡܢܘ ܡܢܟܘܢ ܕܢܗܘܐ ܠܗ ܪܚܡܐ܂ ܘܢܐܙܠ ܠܘܬܗ ܒܦܠܓܘܬ ܠܠܝܐ܂ ܘܢܐܡܪ ܠܗ ܪܚܡܝ ܐܫܐܠܝܢܝ ܬܠܬ ܓܪܝ̈ܨܢ܂
11:06	ܡܛܘܠ ܕܪܚܡܝ ܐܬܐ ܠܘܬܝ ܡܢ ܐܘܪܚܐ܂ ܘܠܝܬ ܠܝ ܡܕܡ ܕܐܣܝܡ ܩܕܡܘܗܝ܂
11:07	ܘܢܥܢܐ ܡܢ ܠܓܘ ܘܢܐܡܪ ܠܗ ܠܐ ܬܗܪܢܝ܂ ܡܛܠ ܕܬܪܥܐ ܐܚܝܕ ܗܘ܂ ܘܛ̈ܠܝܐ ܥܡܝ ܒܥܪܣܐ܂ ܠܐ ܡܫܟܚܢܐ ܕܐܩܘܡ ܐܬܠ ܠܟ܂
11:08	ܐܡܪ ܐܢܐ ܠܟܘܢ ܕܐܢ ܡܛܠ ܪܚܡܘܬܐ ܠܐ ܢܩܘܡ ܢܬܠ ܠܗ܂ ܡܛܠ ܚܨܝܦܘܬܗ ܢܩܘܡ ܘܢܬܠ ܠܗ ܟܡܐ ܕܡܬܒܥܐ ܠܗ܂
11:09	ܘܐܦ ܐܢܐ ܐܡܪܢܐ ܠܟܘܢ ܫܐܠܘ ܘܢܬܝܗܒ ܠܟܘܢ܂ ܩܘܫܘ ܘܢܬܦܬܚ ܠܟܘܢ܂
11:10	ܟܠ ܐܢܫ ܓܝܪ ܕܫܐܠ ܢܣܒ܂ ܘܟܘܠ ܕܒܥܐ ܡܫܟܚ܂ ܘܟܘܠ ܕܢܩܫ ܡܬܦܬܚ ܠܗ܂
11:11	ܐܝܢܐ ܕܝܢ ܡܢܟܘܢ ܕܢܫܐܠܝܘܗܝ ܒܪܗ ܠܚܡܐ܂ ܠܡܐ ܗܘ ܟܐܦܐ ܡܘܫܛ ܠܗ܂ ܐܘ ܐܢ ܢܘܢܐ ܢܫܐܠܝܘܗܝ܂ ܕܠܡܐ ܚܠܦ ܢܘܢܐ ܚܘܝܐ ܝܗܒ ܠܗ܂
11:12	ܘܐܢ ܒܪܬܐ ܢܫܐܠܝܘܗܝ ܕܠܡܐ ܥܩܪܒܐ ܡܘܫܛ ܠܗ܂
11:13	ܘܐܢ ܐܢܬܘܢ ܕܒ̈ܝܫܐ ܐܢܬܘܢ܂ ܝܕܥܝܢ ܐܢܬܘܢ ܡܘ̈ܗܒܬܐ ܛܒ̈ܬܐ ܠܡܬܠ ܠܒ̈ܢܝܟܘܢ܂ ܟܡܐ ܝܬܝܪܐܝܬ ܐܒܐ ܡܢ ܫܡܝܐ܂ ܢܬܠ ܪܘܚܐ ܩܕܝܫܬܐ ܠܐܝܠܝܢ ܕܫܐܠܝܢ ܠܗ܀
11:14	ܘܗܘܐ ܟܕ ܡܦܩ ܗܘܐ ܫܐܕܐ ܡܢ ܚܪܫܐ܂ ܘܟܕ ܢܦܩ ܗܘ ܫܐܕܐ ܡܠܠ ܗܘ ܚܪܫܐ܂ ܘܐܬܕܡܪܘ ܗܘܘ ܟܢ̈ܫܐ ܗܢܘܢ܂
11:15	ܘܐ̈ܢܫܝܢ ܡܢ ܦܪ̈ܝܫܐ ܐܡܪܘ܂ ܒܒܥܠܙܒܘܒ ܪܫܐ ܕܕ̈ܝܘܐ ܡܦܩ ܗܢܐ ܫܐ̈ܕܐ܂
11:16	ܐܚ̈ܪܢܐ ܕܝܢ ܟܕ ܡܢܣܝܢ ܗܘܘ ܠܗ ܐܬܐ ܡܢ ܫܡܝܐ ܫܐܠܝܢ ܗܘܘ ܠܗ܂
11:17	ܗܘ ܕܝܢ ܟܕ ܝܕܥ ܬܪܥܝܬܗܘܢ ܐܡܪ ܠܗܘܢ܂ ܟܠ ܡܠܟܘ ܕܬܬܦܠܓ ܥܠ ܢܦܫܗ݀ ܬܚܪܒ܂ ܘܟܘܠ ܒܝܬܐ ܕܥܠ ܒܝܬܐ ܡܬܦܠܓ ܢܦܠ ܠܗ܂
11:18	ܘܐܢ ܣܛܢܐ ܥܠ ܢܦܫܗ ܐܬܦܠܓ ܐܝܟܢܐ ܬܩܘܡ ܡܠܟܘܬܗ܂ ܕܐܡܪܝܢ ܐܢܬܘܢ ܕܒܒܥܠܙܒܘܒ ܡܦܩ ܐܢܐ ܫܐܕ̈ܐ܂
11:19	ܘܐܢ ܕܝܢ ܐܢܐ ܒܒܥܠܙܒܘܒ ܡܦܩ ܐܢܐ ܫܐܕ̈ܐ ܡܢ ܒܢ̈ܝܟܘܢ܂ ܒܢ̈ܝܟܘܢ ܒܡܢܐ ܡܦܩܝܢ ܠܗܘܢ܂ ܡܛܠ ܗܢܐ ܗܢܘܢ ܢܗܘܘܢ ܠܟܘܢ ܕܝ̈ܢܐ܂
11:20	ܐܢ ܕܝܢ ܒܨܒܥܐ ܕܐܠܗܐ ܡܦܩ ܐܢܐ ܫܐܕ̈ܐ܂ ܡܟܝܠ ܩܪܒܬ ܥܠܝܟܘܢ ܡܠܟܘܬܗ ܕܐܠܗܐ܂
11:21	ܐܡܬܝ ܕܝܢ ܕܚܣܝܢܐ ܟܕ ܡܙܝܢ ܢܛܪ ܕܪܬܗ ܒܫܝܢܐ ܗܘ ܩܢܝܢܗ܂
11:22	ܐܢ ܕܝܢ ܢܐܬܐ ܡܢ ܕܚܣܝܢ ܡܢܗ ܘܢܙܟܝܘܗܝ܂ ܘܢܫܩܘܠ ܙܝܢܗ ܗܘ ܕܬܟܝܠ ܗܘܐ ܥܠܘܗܝ܂ ܘܐܦ ܬܚܠܘܨܗ ܡܦܠܓ ܠܗ܂
11:23	ܡܢ ܕܠܐ ܗܘܐ ܥܡܝ ܠܘܩܒܠܝ ܗܘ܂ ܘܡܢ ܕܠܐ ܟܢܫ ܥܡܝ ܡܒܕܪܘ ܡܒܕܪ܀
11:24	ܪܘܚܐ ܛܢܦܬܐ ܡܐ ܕܢܦܩܬ ܡܢ ܒܪ ܐܢܫܐ܂ ܐܙܠܐ ܡܬܟܪܟܐ ܒܐܬ̈ܪܘܬܐ ܕܡ̈ܝܐ ܠܝܬ ܒܗܘܢ ܕܬܫܟܚ ܠܗ݀ ܢܝܚܐ܂ ܘܡܐ ܕܠܐ ܐܫܟܚܬ ܐܡܪܐ܂ ܐܗܦܘܟ ܐܙܠ ܠܒܝܬܝ ܡܢ ܐܝܡܟܐ ܕܢܦܩܬ܂
11:25	ܘܡܐ ܕܐܬܬ ܘܐܫܟܚܬ ܕܚܡܝܡ ܘܡܨܒܬ܂
11:26	ܐܙܠܐ ܕܒܪܐ ܫܒܥ ܪܘ̈ܚܝܢ ܐܚ̈ܪܢܝܢ ܕܒܝܫܢ ܡܢܗ݀܂ ܘܥܠܢ ܘܥܡܪܢ ܒܗ܂ ܘܗܘܝܐ ܐܚܪܝܬܗ ܕܗܘ ܒܪܢܫܐ ܒܝܫܐ ܡܢ ܩܕܡܝܬܗ܀
11:27	ܘܟܕ ܐܡܪ ܗܠܝܢ܂ ܐܢܬܬܐ ܚܕܐ ܡܢ ܓܘ ܟܢܫܐ܂ ܒܩܠܐ ܪܡܐ ܐܡܪܬ ܠܗ܂ ܛܘܒܝܗ ܠܟܪܣܐ ܕܫܩܠܬܟ܂ ܘܠ̈ܬܕܝܐ ܕܐܝܢܩܘܟ܂
11:28	ܐܡܪ ܠܗ݀ ܝܫܘܥ܂ ܛܘܒܝܗܘܢ ܠܐܝܠܝܢ ܕܫܡܥܝܢ ܡܠܬܗ ܕܐܠܗܐ ܘܢܛܪܝܢ ܠܗ݀܀
11:29	ܘܟܕ ܡܬܟܢܫܝܢ ܗܘܘ ܟ̈ܢܫܐ܂ ܫܪܝ ܠܡܐܡܪ܂ ܫܪܒܬܐ ܗܕܐ ܫܪܒܬܐ ܗܝ ܒܝܫܬܐ܂ ܐܬܐ ܒܥܝܐ ܘܐܬܐ ܠܐ ܬܬܝܗܒ ܠܗ݀܂
11:30	ܐܠܐ ܐܝܟܢܐ ܕܗܘܐ ܝܘܢܢ ܐܬܐ ܠܢܝ̈ܢܘܝܐ܂ ܗܟܢܐ ܘܐܦ ܒܪܗ ܕܐܢܫܐ ܠܫܪܒܬܐ ܗܕܐ܂
11:31	ܡܠܟܬܐ ܕܬܝܡܢܐ ܬܩܘܡ ܒܕܝܢܐ ܥܡ ܫܪܒܬܐ ܗܕܐ ܘܬܚܝܒ ܐܢܘܢ܂ ܕܐܬܬ ܡܢ ܥ̈ܒܪܝܗ ܕܐܪܥܐ܂ ܕܬܫܡܥ ܚܟܡܬܗ ܕܫܠܝܡܘܢ܂ ܘܗܐ ܕܪܒ ܡܢ ܫܠܝܡܘܢ ܗܪܟܐ܂
11:32	ܓ̈ܒܪܐ ܒ̈ܢܝ ܢܝܢܘܐ ܢܩܘܡܘܢ ܒܕܝܢܐ ܥܡ ܫܪܒܬܐ ܗܕܐ ܘܢܚܝܒܘܢܗ݀܂ ܕܗܢܘܢ ܬܒܘ ܒܟܪܘܙܘܬܗ ܕܝܘܢܢ܂ ܘܗܐ ܕܪܒ ܡܢ ܝܘܢܢ ܗܪܟܐ܀
11:33	ܠܐ ܐܢܫ ܡܢܗܪ ܫܪܓܐ ܘܣܐܡ ܠܗ ܬܚܝܬ ܣܐܬܐ܂ ܐܘ ܒܐܬܪܐ ܛܫܝܐ܂ ܐܠܐ ܣܐܡ ܠܗ ܠܥܠ ܡܢ ܡܢܪܬܐ܂ ܕܐܝܠܝܢ ܕܥܠܝܢ ܢܚܙܘܢ ܢܘܗܪܗ܂
11:34	ܫܪܓܗ ܓܝܪ ܕܦܓܪܐ ܥܝܢܐ ܗܝ܂ ܐܡܬܝ ܕܥܝܢܟ ܗܟܝܠ ܬܗܘܐ ܦܫܝܛܐ ܐܦ ܦܓܪܟ ܟܠܗ ܢܗܝܪ ܗܘ܂ ܐܢ ܕܝܢ ܥܝܢܟ ܬܗܘܐ ܒܝܫܐ ܐܦ ܦܓܪܟ ܟܠܗ ܚܫܘܟ ܗܘ܂
11:35	ܬܗܘܐ ܗܟܝܠ ܙܗܝܪ ܕܠܡܐ ܢܘܗܪܐ ܕܒܟ ܢܚܫܟ ܠܗ܂
11:36	ܘܐܢ ܢܘܗܪܐ ܕܒܟ ܚܫܘܟ ܗܘ܂ ܚܫܘܟܟ ܟܡܐ ܢܗܘܐ܀
11:37	ܘܒܥܐ ܗܘܐ ܡܢܗ ܦܪܝܫܐ ܚܕ ܕܢܫܬܪܐ ܠܘܬܗ܂ ܘܥܠ ܐܣܬܡܟ܂
11:38	ܘܫܪܝ ܗܘܐ ܦܪܝܫܐ ܗܘ ܐܡܪ ܒܪܥܝܢܗ܂ ܕܠܡܢܐ ܠܐ ܥܡܕ ܡܢ ܩܕܡ ܫܪܘܬܗ܂
11:39	ܐܡܪ ܠܗ ܡܪܢ ܐܢܬܘܢ ܦܪ̈ܝܫܐ ܒܪܗ ܗܘ ܕܟܣܐ ܘܕܦܝܢܟܐ ܡܕܟܝܢ ܐܢܬܘܢ܂ ܘܓܘܟܘܢ ܡܠܐ ܚܛܘܦܝܐ ܘܒܝܫܬܐ܂
11:40	ܚܣ̈ܝܪܝ ܪܥܝܢܐ ܠܐ ܗܘܐ ܡܢ ܕܥܒܕ ܕܠܒܪ ܘܐܦ ܕܠܓܘ ܗܘ ܥܒܕ܂
11:41	ܐܠܐ ܡܕܡ ܕܐܝܬ ܠܓܘ ܡܢܟܘܢ ܗܒܘܗܝ ܙܕܩܬܐ܂ ܘܗܐ ܟܘܠ ܡܕܡ ܕܟܐ ܗܘ ܠܟܘܢ܂
11:42	ܐܠܐ ܘܝ ܠܟܘܢ ܣ̈ܦܪܐ ܘܦܪ̈ܝܫܐ ܕܡܥܣܪܝܢ ܐܢܬܘܢ ܢܢܥܐ ܘܦܓܢܐ ܘܟܠܗܘܢ ܝܪܩ̈ܘܢܐ܂ ܘܥܒܪܝܢ ܐܢܬܘܢ ܥܠ ܕܝܢܐ ܘܥܠ ܚܘܒܐ ܕܐܠܗܐ܂ ܗܠܝܢ ܕܝܢ ܥܒܕܬܘܢ ܘܗܠܝܢ ܕܝܢ ܠܐ ܫܒܩܬܘܢ܀
11:43	ܘܝ ܠܟܘܢ ܣܦ̈ܪܐ ܘܦܪ̈ܝܫܐ܂ ܕܪܚܡܝܢ ܐܢܬܘܢ ܡܘ̈ܬܒܐ ܡܝ̈ܩܪܐ ܒܟܢ̈ܘܫܬܐ܂ ܘܫܠܡܐ ܒ̈ܫܘܩܐ܂
11:44	ܘܝ ܠܟܘܢ ܕܐܝܬܝܟܘܢ ܩ̈ܒܪܐ܂ ܘܒ̈ܢܝ ܐܢܫܐ ܡܗܠܟܝܢ ܠܥܠ ܡܢܟܘܢ ܘܠܐ ܝܕܥܝܢ܂
11:45	ܘܥܢܐ ܚܕ ܡܢ ܣ̈ܦܪܐ ܘܐܡܪ ܠܗ܂ ܡܠܦܢܐ܂ ܟܕ ܗܠܝܢ ܐܡܪ ܐܢܬ ܘܐܦ ܠܢ ܡܨܥܪ ܐܢܬ܂
11:46	ܐܡܪ ܠܗ ܐܦ ܠܟܘܢ ܘܝ ܣ̈ܦܪܐ܂ ܕܫܩܠܝܢ ܐܢܬܘܢ ܡܘ̈ܒܠܐ ܝܩ̈ܝܪܬܐ܂ ܘܣܝܡܝܢ ܐܢܬܘܢ ܥܠ ܟܬ̈ܦܬܐ ܕܒ̈ܢܝ ܐܢܫܐ܂ ܘܐܢܬܘܢ ܐܦܠܐ ܒܚܕܐ ܡܢ ܨܒ̈ܥܬܟܘܢ ܩܪܒܝܢ ܐܢܬܘܢ ܠܗܝܢ܂
11:47	ܘܝ ܠܟܘܢ ܕܒܢܝܢ ܐܢܬܘܢ ܩ̈ܒܪܐ ܕܢ̈ܒܝܐ܂ ܕܐ̈ܒܗܝܟܘܢ ܩܛܠܘ ܐܢܘܢ܂
11:48	ܡܟܝܠ ܣܗܕܝܢ ܐܢܬܘܢ ܘܡܫܬܘܕܝܢ ܐܢܬܘܢ ܒܥܒܕܐ ܕܐ̈ܒܗܝܟܘܢ܂ ܘܐܢܬܘܢ ܒܢ̈ܝܐ ܐܢܬܘܢ ܕܗܢܘܢ ܩܛ̈ܘܠܐ܂
11:49	ܡܛܠ ܗܢܐ ܚܟܡܬܐ ܕܐܠܗܐ ܐܡܪܬ܂ ܐܫܕܪ ܒܗܘܢ ܢܒ̈ܝܐ ܘܫ̈ܠܝܚܐ܂ ܡܢܗܘܢ ܢܩܛܠܘܢ ܘܢܪܕܦܘܢ܂
11:50	ܕܢܬܬܒܥ ܕܡܐ ܕܟܠܗܘܢ ܢܒ̈ܝܐ ܕܐܬܐܫܕ܂ ܗܐ ܡܢ ܕܐܬܒܪܝ ܥܠܡܐ܂ ܥܕܡܐ ܠܗܕܐ ܫܪܒܬܐ܂
11:51	ܡܢ ܕܡܗ ܕܗܒܝܠ ܘܥܕܡܐ ܠܕܡܗ ܕܙܟܪܝܐ ܒܪ ܒܪܟܝܐ܂ ܗܘ ܕܐܬܩܛܠ ܒܝܢܝ ܡܕܒܚܐ ܠܗܝܟܠܐ܂ ܐܡܝܢ ܐܡܪܢܐ ܠܟܘܢ ܕܢܬܬܒܥ ܡܢܗ݀ ܡܢ ܫܪܒܬܐ ܗܕܐ܀
11:52	ܘܝ ܠܟܘܢ ܣ̈ܦܪܐ ܕܛܫܝܬܘܢ ܐܩ̈ܠܝܕܐ ܕܐܝܕܥܬܐ܂ ܐܢܬܘܢ ܠܐ ܥܠܬܘܢ ܘܠܐܝܠܝܢ ܕܥܠܝܢ ܟܠܝܬܘܢ܂
11:53	ܘܟܕ ܐܡܪ ܗܘܐ ܗܠܝܢ ܠܩܘܒܠܗܘܢ ܠܥܝܢ ܟܘܠܗ ܥܡܐ܂ ܫܪܝ ܡܬܒܐܫ ܗܘܐ ܠܣܦ̈ܪܐ ܘܦܪ̈ܝܫܐ܂
11:54	ܘܕܪܫܝܢ ܗܘܘ ܥܡܗ ܥܠ ܣܓܝܐ̈ܬܐ܂ ܘܒܥܝܢ ܗܘܘ ܠܡܐܚܕ ܥܠܘܗܝ ܥܠܬܐ ܕܢܫܟܚܘܢ ܢܐܟܠܘܢ ܩܪ̈ܨܘܗܝ܂