The Comprehensive Aramaic Lexicon

12:01	ܘܟܕ ܟܢܫ ܥܠܘܗܝ ܟܢܫܐ ܣܓܝܐܐ܂ ܐܝܟܢܐ ܕܢܕܘܫܘܢ ܚܕ ܠܚܕ܂ ܫܪܝ ܗܘܐ ܠܡܐܡܪ ܠܬܠܡ̈ܝܕܘܗܝ܂ ܠܘܩܕܡ ܐܙܕܗܪܘ ܡܢ ܚܡܝܪܐ ܕܦܪ̈ܝܫܐ ܕܐܝܬܘܗܝ ܡܣܒ ܒܐ̈ܦܐ܂
12:02	ܠܝܬ ܓܝܪ ܡܕܡ ܕܟܣܐ ܕܠܐ ܢܬܓܠܐ܂ ܘܠܐ ܕܡܛܫܝ ܕܠܐ ܢܬܝܕܥ܂
12:03	ܐܝܠܝܢ ܓܝܪ ܕܒܚܫܘܟܐ ܐܡܪܬܘܢ ܒܢܘܗܪܐ ܢܫܬܡܥܢ܂ ܘܡܕܡ ܕܒ̈ܬܘܢܐ ܒܐܕ̈ܢܐ ܠܚܫܬܘܢ ܥܠ ܐ̈ܓܪܐ ܢܬܟܪܙ܀
12:04	ܐܡܪܢܐ ܠܟܘܢ ܕܝܢ ܪܚ̈ܡܝ܂ ܠܐ ܬܕܚܠܘܢ ܡܢ ܐܝܠܝܢ ܕܩܛܠܝܢ ܦܓܪܐ܂ ܘܡܢ ܒܬܪܟܢ ܡܕܡ ܠܐ ܡܫܟܚܝܢ ܠܡܥܒܕ܂
12:05	ܐܚܘܝܟܘܢ ܕܝܢ ܡܢ ܡܢܘ ܬܕܚܠܘܢ܂ ܕܚܠܘ ܡܢ ܗܘ ܕܡܢ ܒܬܪ ܕܩܛܠ ܫܠܝܛ ܠܗ ܠܡܪܡܝܘ ܒܓܗܢܐ܂ ܐܝܢ ܐܡܪܢܐ ܠܟܘܢ ܕܡܢ ܗܢܐ ܘܠܐ ܠܡܕܚܠ܂
12:06	ܚܡ̈ܫ ܨܦ̈ܪܝܢ ܡܙܕܒܢܢ ܒܐܣܪ܂ ܘܚܕܐ ܡܢܗܝܢ ܠܐ ܛܥܝܐ ܩܕܡ ܐܠܗܐ܂
12:07	ܐܦ ܡ̈ܢܐ ܓܝܪ ܕܣܥܪܐ ܕܪܫܟܘܢ ܡܢܝܢ ܐܢܝܢ ܠܗ܂ ܠܐ ܗܟܝܠ ܬܕܚܠܘܢ܂ ܡܛܠ ܕܡܢ ܣܘܓܐܐ ܕ̈ܨܦܪܐ ܣܓܝ ܝܬܝܪܝܢ ܐܢܬܘܢ܂
12:08	ܐܡܪܢܐ ܠܟܘܢ ܕܝܢ ܕܟܠ ܕܢܘܕܐ ܒܝ ܩܕܡ ܒ̈ܢܝ ܐܢܫܐ܂ ܐܦ ܒܪܗ ܕܐܢܫܐ ܢܘܕܐ ܒܗ ܩܕܡ ܡܠܐ̈ܟܘܗܝ ܩ̈ܕܝܫܐ܂
12:09	ܘܐܝܢܐ ܕܟܦܪ ܒܝ ܩܕܡ ܒ̈ܢܝ ܐܢܫܐ܂ ܢܬܟܦܪ ܒܗ ܩܕܡ ܡܠܐ̈ܟܘܗܝ ܕܐܠܗܐ܂
12:10	ܘܟܠ ܕܢܐܡܪ ܡܠܬܐ ܥܠ ܒܪܗ ܕܐܢܫܐ ܢܫܬܒܩ ܠܗ܂ ܡܢ ܕܥܠ ܪܘܚܐ ܕܝܢ ܕܩܘܕܫܐ ܢܓܕܦ ܠܐ ܢܫܬܒܩ ܠܗ܂
12:11	ܡܐ ܕܡܩܪܒܝܢ ܠܟܘܢ ܕܝܢ ܠܟܢܘ̈ܫܬܐ ܩܕܡ ܐܪ̈ܟܣ ܘܫ̈ܠܝܛܢܐ܂ ܠܐ ܬܐܨܦܘܢ ܕܐܝܟܢܐ ܬܦܩܘܢ ܪܘܚܐ܂ ܐܘ ܡܢܐ ܬܡܠܠܘܢ܂
12:12	ܪܘܚܐ ܓܝܪ ܕܩܘܕܫܐ ܬܠܦܟܘܢ ܒܗܝ ܫܥܬܐ ܡܕܡ ܕܘܠܐ ܕܬܐܡܪܘܢ܀
12:13	ܘܐܡܪ ܠܗ ܓܒܪܐ ܚܕ ܡܢ ܗܘ ܟܢܫܐ܂ ܡܠܦܢܐ܂ ܐܡܪ ܠܐܚܝ ܦܠܓ ܥܡܝ ܐܪܥܐ ܘܝܪܬܘܬܐ܂
12:14	ܗܘ ܕܝܢ ܐܡܪ ܠܗ܂ ܓܒܪܐ ܡܢ ܐܩܝܡܢܝ ܥܠܝܟܘܢ ܕܝܢܐ܂
12:15	ܘܐܡܪ ܠܟܢ̈ܫܐ܂ ܐܙܕܗܪܘ ܡܢ ܟܘܠܗ݀ ܝܥܢܘܬܐ܂ ܡܛܠ ܕܠܐ ܗܘܐ ܒܝܘ̈ܬܪܢܐ ܕܢ̈ܟܣܐ ܣ̈ܓܝܐܐ ܗܘܝܢ ܚ̈ܝܐ ܠܒ̈ܢܝ ܐ̈ܢܫܐ܀
12:16	ܘܐܡܪ ܗܘܐ ܡܬܠܐ ܗܢܐ ܠܘܬܗܘܢ܂ ܓܒܪܐ ܚܕ ܥܬܝܪܐ ܐܥܠܬ ܗܘܬ ܠܗ ܐܪܥܗ ܥ̈ܠܠܬܐ ܣ̈ܓܝܐܬܐ܂
12:17	ܘܡܬܚܫܒ ܗܘܐ ܒܢܦܫܗ ܘܐܡܪ܂ ܡܢܐ ܐܥܒܕ ܕܠܝܬ ܠܝ ܐܝܟܐ ܕܐܚܡܘܠ ܥ̈ܠܠܬܝ܂
12:18	ܐܣܬܘܪ ܒܝܬ ܩ̈ܦܣܝ ܘܐܒܢܐ ܐܘܪܒ ܐܢܘܢ܂ ܘܐܟܢܫ ܒܗܘܢ ܥ̈ܠܠܬܝ܂
12:19	ܘܐܡܪ ܠܢܦܫܗ܂ ܕܗܐ ܛܒ̈ܬܐ ܣܓܝܐ̈ܬܐ ܣܝ̈ܡܢ ܠܟܝ ܠܫ̈ܢܝܐ ܣܓ̈ܝܐܬܐ܂ ܐܬܢܝܚܝ ܘܠܥܣܝ ܘܐܫܬܝ ܘܐܬܒܣܡܝ܂
12:20	ܐܡܪ ܠܗ ܐܠܗܐ ܚܣܝܪ ܪܥܝܢܐ܂ ܗܐ ܒܗܢܐ ܠܠܝܐ ܢܦܫܟ ܬܒܥܝܢ ܠܗ݀ ܡܢܟ܂ ܗܠܝܢ ܕܛܝܒܬ ܠܡܢ ܢܗܘܝܢ܂
12:21	ܗܟܢܐ ܗܘ ܡܢ ܕܣܐܡ ܠܗ ܣܝܡ̈ܬܐ ܘܒܐܠܗܐ ܠܐ ܥܬܝܪ܀
12:22	ܘܐܡܪ ܠܬܠܡ̈ܝܕܘܗܝ܂ ܡܛܠ ܗܢܐ ܐܡܪ ܐܢܐ ܠܟܘܢ܂ ܠܐ ܬܐܨܦܘܢ ܕܢܦܫܟܘܢ ܡܢܐ ܬܐܟܠܘܢ܂ ܘܐܦܠܐ ܕܦܓܪܐ ܡܢܐ ܬܠܒܫܘܢ܂
12:23	ܢܦܫܐ ܓܝܪ ܝܬܝܪܐ ܗܝ ܡܢ ܣܝܒܪܬܐ ܘܦܓܪܐ ܡܢ ܠܒܘܫܐ܂
12:24	ܐܬܒܩܘ ܒܢܥܒ̈ܐ ܕܠܐ ܙܪܥܝܢ ܘܠܐ ܚܨܕܝܢ܂ ܘܠܝܬ ܠܗܘܢ ܬܘ̈ܢܐ܂ ܘܐܦܠܐ ܒܝܬ ܩܦܣ̈ܐ܂ ܘܐܠܗܐ ܡܬܪܣܐ ܠܗܘܢ܂ ܟܡܐ ܗܟܝܠ ܐܢܬܘܢ ܡܝܬܪܝܢ ܡܢܗܘܢ܂
12:25	ܐܝܢܐ ܓܝܪ ܡܢܟܘܢ ܟܕ ܝܨܦ܂ ܡܫܟܚ ܠܡܘܣܦܘ ܥܠ ܩܘܡܬܗ ܐܡܬܐ ܚܕܐ܂
12:26	ܐܢ ܕܝܢ ܐܦ ܠܐ ܙܥܘܪܬܐ ܡܫܟܚܝܢ ܐܢܬܘܢ ܠܡܥܒܕ܂ ܡܢܐ ܝܨܦܝܢ ܐܢܬܘܢ ܥܠ ܫܪܟܐ܂
12:27	ܐܬܒܩܘ ܒܫ̈ܘܫܢܐ ܕܕܒܪܐ ܐܝܟܢܐ ܠܐ ܥܙܠܢ ܘܠܐ ܙܩܪܢ܂ ܘܐܡܪ ܐܢܐ ܠܟܘܢ ܕܐܦ ܠܐ ܫܠܝܡܘܢ ܒܟܠܗ݀ ܬܫܒܘܚܬܗ ܐܬܟܣܝ ܐܟܘܬܗܝܢ܂
12:28	ܐܢ ܕܝܢ ܠܥܡܝܪܐ ܕܛ̈ܘܪܐ ܕܝܘܡܢܐ ܐܝܬܘܗܝ ܒ̈ܛܘܪܐ܂ ܘܡܚܪ ܝܒܫ ܘܢܦܠ ܒܬܢܘܪܐ ܐܠܗܐ ܡܠܒܫ܂ ܟܡܐ ܗܟܝܠ ܝܬܝܪܐܝܬ ܠܟܘܢ ܚܣ̈ܝܪܝ ܗܝܡܢܘܬܐ܂
12:29	ܠܐ ܗܟܝܠ ܬܒܥܘܢ ܡܢܐ ܬܠܥܣܘܢ܂ ܘܡܢܐ ܬܫܬܘܢ܂ ܘܡܢܐ ܬܬܟܣܘܢ܂ ܘܬܬܥܢܘܢ ܒܗܠܝܢ܂
12:30	ܗܠܝܢ ܓܝܪ ܟܠܗܝܢ ܥܡ̈ܡܐ ܗܘ ܕܐܪܥܐ ܒܥܝܢ ܠܗܝܢ܂ ܐܒܘܟܘܢ ܕܝܢ ܝܕܥ ܕܐܦ ܠܟܘܢ ܡܬܒܥܝܢ܂
12:31	ܐܢܬܘܢ ܡܟܝܠ ܒܥܘ ܡܠܟܘܬܗ ܕܐܠܗܐ܂ ܘܗܠܝܢ ܡܢ ܝܬܝܪ ܢܬܘܣܦܢ ܠܟܘܢ܀
12:32	ܠܐ ܬܕܚܠ ܓܙܪܐ ܙܥܘܪܐ܂ ܕܨܒܐ ܐܒܘܟܘܢ ܕܢܬܠ ܠܟܘܢ ܡܠܟܘܬܐ܂
12:33	ܙܒܢܘ ܟܠܡܕܡ ܕܐܝܬ ܠܟܘܢ ܘܗܒܘ ܙܕܩܬܐ܂ ܘܥܒܕܘ ܠܟܘܢ ܟܝ̈ܣܐ ܕܠܐ ܒܠܝܢ ܘܐܦ ܣܝܡܬܐ ܕܠܐ ܓܡܪܐ ܒܫܡܝܐ܂ ܐܬܪ ܕܠܐ ܓܢܒܐ ܡܛܐ܂ ܘܐܦܠܐ ܣܣܐ ܡܚܒܠ܂
12:34	ܘܐܬܪ ܕܣܝܡܬܟܘܢ ܬܗܘܐ ܘܐܦ ܠܒܟܘܢ ܬܡܢ ܢܗܘܐ܂
12:35	ܢܗܘܘܢ ܐܣܝܪܝܢ ܚܨ̈ܝܟܘܢ ܘܡܢܗܪܝܢ ܫ̈ܪܓܝܟܘܢ܂
12:36	ܘܬܗܘܘܢ ܕܡܝܢ ܠܐܢܫܐ ܕܡܣܟܝܢ ܠܡܪܗܘܢ܂ ܐܡܬܝ ܢܦܛܪ ܡܢ ܒܝܬ ܡܫܬܘܬܐ܂ ܕܡܐ ܕܐܬܐ ܘܢܩܫ ܒܪܫܥܬܗ ܢܦܬܚܘܢ ܠܗ܂
12:37	ܛܘܒܝܗܘܢ ܠܥܒ̈ܕܐ ܗܠܘܟ ܐܝܠܝܢ ܕܢܐܬܐ ܡܪܗܘܢ ܢܫܟܚ ܐܢܘܢ ܟܕ ܥܝܪܝܢ܂ ܐܡܝܢ ܐܡܪܢܐ ܠܟܘܢ ܕܢܚܙܘܩ ܚܨ̈ܘܗܝ ܘܢܣܡܟ ܐܢܘܢ ܘܢܫܡܫ܂
12:38	ܘܐܢ ܒܡܛܪܬܐ ܩܕܡܝܬܐ ܢܐܬܐ ܘܢܫܟܚ ܐܢܘܢ ܟܕ ܥܝܪܝܢ܂ ܛܘܒܝܗܘܢ ܕܢܣܡܟ ܐܢܘܢ ܘܢܫܡܫ܂ ܐܘ ܐܢ ܒܡܛܪܬܐ ܕܬ̈ܪܬܝܢ ܐܘ ܕܬܠܬ ܢܐܬܐ ܘܢܫܟܚ ܐܢܘܢ ܟܕ ܥܝܪܝܢ܂ ܛܘܒܝܗܘܢ ܠܗܢܘܢ܂
12:39	ܗܕܐ ܕܝܢ ܕܥܘ܂ ܕܐܠܘ ܝܕܥ ܗܘܐ ܡܪܐ ܒܝܬܐ ܒܐܝܕܐ ܫܥܬܐ ܐܬܐ ܓܢܒܐ܂ ܠܐ ܫܒܩ ܗܘܐ ܕܢܬܦܠܫ ܒܝܬܗ܂
12:40	ܐܦ ܐܢܬܘܢ ܗܘܝܬܘܢ ܡܛܝܒܝܢ܂ ܕܒܫܥܬܐ ܕܠܐ ܝܕܥܝܢ ܐܢܬܘܢ ܢܐܬܐ ܒܪܗ ܕܐܢܫܐ܂
12:41	ܐܡܪ ܠܗ ܟܦܐ܂ ܡܪܝ ܠܢ ܗܘ ܐܡܪ ܐܢܬ ܠܗ ܡܬܠܐ ܗܢܐ܂ ܐܘ ܐܦ ܠܟܠܢܫ܂
12:42	ܐܡܪ ܠܗ ܡܪܢ܂ ܐܝܢܐ ܗܘ ܫܠܝܛܐ ܡܗܝܡܢܐ ܘܚܟܝܡܐ ܘܛܒܐ܂ ܕܢܩܝܡܝܘܗܝ ܡܪܗ ܥܠ ܥܒ̈ܕܘܗܝ܂ ܕܢܬܠ ܠܗܘܢ ܦܪܣܐ ܒܙܒܢܗ܂
12:43	ܛܘܒܘܗܝ ܠܗܘ ܥܒܕܐ ܟܕ ܢܐܬܐ ܡܪܗ ܢܫܟܚܝܘܗܝ ܕܥܒܕ ܗܟܢܐ܂
12:44	ܫܪܝܪܐܝܬ ܐܡܪ ܐܢܐ ܠܟܘܢ ܕܢܩܝܡܝܘܗܝ ܥܠ ܟܘܠܗ ܩܢܝܢܗ܂
12:45	ܐܢ ܕܝܢ ܢܐܡܪ ܗܘ ܥܒܕܐ ܒܠܒܗ܂ ܕܡܪܝ ܡܘܚܪ ܠܡܐܬܐ܂ ܘܢܫܪܐ ܠܡܡܚܐ ܠܥܒ̈ܕܐ ܗܢܘܢ ܘܠܐ̈ܡܗܬܐ܂ ܘܠܡܠܥܣ ܘܠܡܫܬܐ ܘܠܡܪܘܐ܂

12:46	ܘܢܐܬܐ ܡܪܗ ܕܥܒܕܐ ܗܘ ܒܝܘܡܐ ܕܠܐ ܣܒܪ܂ ܘܒܫܥܬܐ ܕܠܐ ܝܕܥ܂ ܘܢܦܠܓܝܘܗܝ܂ ܘܢܣܝܡ ܡܢܬܗ ܥܡ ܐܝܠܝܢ ܕܠܐ ܡܗܝܡܢܝܢ܂

12:47	ܥܒܕܐ ܕܝܕܥ ܨܒܝܢܐ ܕܡܪܗ ܘܠܐ ܬܩܢ ܠܗ ܐܝܟ ܨܒܝܢܗ܂ ܢܒܠܥ ܡܚ̈ܘܬܐ ܣ̈ܓܝܐܬܐ܂
12:48	ܘܗܘ ܕܠܐ ܝܕܥ ܘܥܒܕ ܡܕܡ ܕܫܘܐ ܠܡܚ̈ܘܬܐ ܢܒܠܥ ܡܚ̈ܘܬܐ ܙܥܘܪ̈ܝܬܐ܂ ܟܠ ܕܢܬܝܗܒ ܠܗ ܓܝܪ ܣܓܝ ܣܓܝ ܢܬܒܥ ܒܐܝܕܗ܂ ܘܠܗܘ ܕܐܓܥܠܘ ܠܗ ܣܓܝ ܝܬܝܪܐܝܬ ܢܬܒܥܘܢܝܗܝ܂
12:49	ܢܘܪܐ ܗܘ ܓܝܪ ܐܬܝܬ ܕܐܪܡܐ ܒܐܪܥܐ܂ ܘܡܐ ܨܒܐ ܐܢܐ ܐܠܘ ܡܢ ܟܕܘ ܚܒܬ܂
12:50	ܘܡܥܡܘܕܝܬܐ ܐܝܬ ܠܝ ܕܐܥܡܕ܂ ܘܟܡܐ ܐܠܝܨ ܐܢܐ ܥܕܡܐ ܕܬܛܠܩ܂
12:51	ܣܒܪܝܢ ܐܢܬܘܢ ܕܫܝܢܐ ܐܬܝܬ ܕܐܥܒܕ ܒܐܪܥܐ܂ ܐܡܪ ܐܢܐ ܠܟܘܢ ܕܠܐ܂ ܐܠܐ ܦܠܓܘ̈ܬܐ܂
12:52	ܡܢ ܗܫܐ ܓܝܪ ܢܗܘܘܢ ܚܡܫܐ ܒܚܕ ܒܝܬܐ܂ ܢܬܦܠܓܘܢ ܬܠܬܐ ܥܠ ܬܪܝ̈ܢ܂ ܘܬܪ̈ܝܢ ܥܠ ܬܠܬܐ܂
12:53	ܢܬܦܠܓ ܐܒܐ ܥܠ ܒܪܗ܂ ܘܒܪܐ ܥܠ ܐܒܘܗܝ܂ ܐܢܬܬܐ ܥܠ ܒܪܬܗ݀܂ ܘܒܪܬܐ ܥܠ ܐܡܗ݀܂ ܘܚܡܬܐ ܥܠ ܟܠܬܗ݀܂ ܘܟܠܬܐ ܥܠ ܚܡܬܗ݀܀
12:54	ܘܐܡܪ ܗܘܐ ܠܟ̈ܢܫܐ܂ ܡܐ ܕܚܙܝܬܘܢ ܥܢܢܐ ܕܣܠܩܐ ܡܢ ܡܥܪܒܐ܂ ܐܡܪܝܢ ܐܢܬܘܢ ܕܡܛܪܐ ܗܘܐ ܘܗܘܐ ܗܟܢܐ܂
12:55	ܘܡܐ ܕܢܫܒܐ ܬܝܡܢܐ܂ ܐܡܪܝܢ ܐܢܬܘܢ ܕܟܘܪܢܐ ܗܘܐ ܘܗܘܐ܂
12:56	ܢܣ̈ܒܝ ܒܐ̈ܦܐ ܦܪܨܘܦܐ ܕܫܡܝܐ ܘܕܐܪܥܐ ܝܕܥܝܢ ܐܢܬܘܢ ܠܡܢܣܝܘ܂ ܙܒܢܐ ܗܢܐ ܘܐܬ̈ܘܬܗ ܠܐ ܒܨܝܢ ܐܢܬܘܢ܂
12:57	ܘܒ̈ܢܦܫܬܟܘܢ ܠܐ ܕܝܢܝܢ ܐܢܬܘܢ ܩܘܫܬܐ܂
12:58	ܡܐ ܕܐܙܠ ܐܢܬ ܥܡ ܒܥܠ ܕܝܢܟ ܠܘܬ ܐܪܟܘܢܐ܂ ܥܕ ܥܡܗ ܐܢܬ ܒܐܘܪܚܐ ܗܒ ܠܗ ܗܢܝܢܗ ܕܬܬܦܪܩ ܡܢܗ܂ ܕܠܡܐ ܢܚܝܒܟ ܩܕܡ ܕܝܢܐ܂ ܘܕܝܢܐ ܢܫܠܡܟ ܠܓܒܝܐ܂ ܘܓܒܝܐ ܢܪܡܝܟ ܒܝܬ ܐܣܝܪܐ܂
12:59	ܐܡܪܢܐ ܠܟ ܕܠܐ ܬܦܘܩ ܡܢ ܬܡܢ ܥܕܡܐ ܕܬܦܪܘܥ ܫܡܘܢܐ ܐܚܪܝܐ܀