The Comprehensive Aramaic Lexicon

13:01	ܘܒܗ ܒܗ݀ܘ ܙܒܢܐ܂ ܐܬܘ ܐ̈ܢܫܝܢ ܘܐܡܪܘ ܠܗ ܥܠ ܓ̈ܠܝܠܝܐ܂ ܗܢܘܢ ܕܦܝܠܛܘܣ ܚܠܛ ܕܡܗܘܢ ܥܡ ܕܒ̈ܚܝܗܘܢ܂
13:02	ܥܢܐ ܘܐܡܪ ܠܗܘܢ ܝܫܘܥ܂ ܣܒܪܝܢ ܐܢܬܘܢ ܕܗܠܝܢ ܓ̈ܠܝܠܝܐ ܚܛܝܝܢ ܗܘܘ ܝܬܝܪ ܡܢ ܟܠܗܘܢ ܓ̈ܠܝܠܝܐ ܕܗܟܢܐ ܓܕܫ ܠܗܘܢ܂
13:03	ܐܡܪܢܐ ܠܟܘܢ ܕܠܐ܂ ܐܠܐ ܐܦ ܐܢܬܘܢ ܐܠܐ ܬܬܘܒܘܢ ܗܟܢܐ ܬܐܒܕܘܢ ܟܠܟܘܢ܂
13:04	ܘܗܢܘܢ ܬܡܢܬܥܣܪ ܕܢܦܠ ܥܠܝܗܘܢ ܡܓܕܠܐ ܒܫܝܠܘܚܐ ܘܩܛܠ ܐܢܘܢ܂ ܣܒܪܝܢ ܐܢܬܘܢ ܕܚܛܝܝܢ ܗܘܘ ܝܬܝܪ ܡܢ ܟܠܗܘܢ ܒ̈ܢܝ ܐܢܫܐ ܕܥܡܪܝܢ ܒܐܪܫܠܡ܂
13:05	ܐܡܪܢܐ ܠܟܘܢ ܕܠܐ܂ ܐܠܐ ܐܦ ܐܢܬܘܢ ܐܠܐ ܬܬܘܒܘܢ ܗܟܢܐ ܬܐܒܕܘܢ܀
13:06	ܘܐܡܪ ܗܘܐ ܡܬܠܐ ܗܢܐ܂ ܓܒܪܐ ܚܕ ܐܝܬ ܗܘܬ ܠܗ ܬܬܐ ܒܟܪܡܗ܂ ܘܐܬܐ ܒܥܐ ܒܗ݀ ܦܐܪ̈ܐ ܘܠܐ ܐܫܟܚ܂
13:07	ܐܡܪ ܠܦܠܚܐ ܗܐ ܬܠܬ ܫ̈ܢܝܢ ܗܐ ܡܢ ܕܐܬܐ ܐܢܐ ܒܥܐ ܐܢܐ ܒܗ݀ ܦܐ̈ܪܐ ܒܬܬܐ ܗܕܐ ܘܠܐ ܡܫܟܚ ܐܢܐ܂ ܦܣܘܩܝܗ ܠܡܢܐ ܡܒܛܠܐ ܐܪܥܐ܂
13:08	ܐܡܪ ܠܗ ܗܘ ܦܠܚܐ܂ ܡܪܝ ܫܒܘܩܝܗ ܐܦ ܗܕܐ ܫܢܬܐ܂ ܥܕ ܐܦܠܚܝܗ ܘܐܙܒܠܝܗ܂
13:09	ܘܐܢ ܥܒܕܬ ܦܐ̈ܪܐ ܘܐܠܐ ܠܡܢܚܝ ܬܦܣܩܝܗ܀
13:10	ܘܟܕ ܡܠܦ ܗܘܐ ܒܫ̈ܒܐ ܒܚܕܐ ܡܢ ܟܢܘ̈ܫܬܐ܂
13:11	ܘܐܝܬ ܗܘܬ ܬܡܢ ܐܢܬܬܐ ܚܕܐ ܕܐܝܬ ܗܘܬ ܠܗ݀ ܪܘܚܐ ܫ̈ܢܝܢ ܬܡܢܥܣܪܐ܂ ܘܟܦܝܦܐ ܗܘܬ ܘܠܐ ܡܫܟܚܐ ܗܘܬ ܕܬܬܦܫܛ ܠܓܡܪ܂
13:12	ܘܚܙܗ݀ ܝܫܘܥ ܘܩܪܗ݀ ܘܐܡܪ ܠܗ݀܂ ܐܢܬܬܐ ܫܪܝܬܝ ܡܢ ܟܘܪܗܢܟܝ܂
13:13	ܘܣܡ ܐ̈ܝܕܘܗܝ ܥܠܝܗ܂ ܘܒܪ ܫܥܬܗ ܐܬܦܫܛܬ ܩܘܡܬܗ݀܂ ܘܡܫܒܚܐ ܗܘܬ ܠܐܠܗܐ܂

13:14	ܘܥܢܐ ܪܒ ܟܢܘܫܬܐ ܟܕ ܡܬܚܡܬ ܗܘܐ ܥܠ ܕܡܐܣܐ ܗܘܐ ܝܫܘܥ ܒܫܒܬܐ ܘܐܡܪ ܠܟ̈ܢܫܐ܂ ܫܬܐ ܐܢܘܢ ܝܘܡ̈ܝܢ ܕܒܗܘܢ ܘܠܐ ܠܡܦܠܚ܂ ܒܗܘܢ ܗܘܝܬܘܢ ܐܬܝܢ ܘܡܬܐܣܝܢ ܘܠܐ ܒܝܘܡܐ ܕܫܒܬܐ܀

13:15	ܥܢܐ ܝܫܘܥ ܘܐܡܪ ܠܗ܂ ܢܣܒ ܒܐ̈ܦܐ܂ ܚܕ ܚܕ ܡܢܟܘܢ ܠܐ ܫܪܐ ܬܘܪܗ ܐܘ ܚܡܪܗ ܡܢ ܐܘܪܝܐ ܒܝܘܡܐ ܕܫܒܬܐ ܘܐܙܠ ܡܫܩܐ ܠܗ܂
13:16	ܗܕܐ ܕܝܢ ܕܒܪܬܗ ܗܝ ܕܐܒܪܗܡ܂ ܕܐܣܪܗ݀ ܐܟܠ ܩܪܨܐ ܗܐ ܬܡܢܥܣܪܐ ܫ̈ܢܝܢ܂ ܠܐ ܘܠܐ ܗܘܐ ܕܬܫܬܪܐ ܡܢ ܗܢܐ ܐܣܘܪܝܐ ܒܝܘܡܐ ܕܫܒܬܐ܂
13:17	ܘܟܕ ܗܠܝܢ ܐܡܪ ܗܘܐ܂ ܒܗܬܝܢ ܗܘܘ ܟܠܗܘܢ ܐܝܠܝܢ ܕܩܝܡܝܢ ܗܘܘ ܠܩܘܒܠܗ܂ ܘܟܠܗ ܥܡܐ ܚܕܐ ܗܘܐ ܒܟܠܗܝܢ ܬܡ̈ܝܗܬܐ ܕܗܘܝܢ ܗܘܝ ܒܐܝܕܗ܀
13:18	ܘܐܡܪ ܗܘܐ ܠܡܢܐ ܕܡܝܐ ܡܠܟܘܬܐ ܕܐܠܗܐ ܘܠܡܢܐ ܐܕܡܝܗ܂
13:19	ܕܡܝܐ ܠܦܪܕܬܐ ܕܚܪܕܠܐ ܕܢܣܒ ܓܒܪܐ ܐܪܡܝܗ ܒܓܢܬܗ܂ ܘܪܒܬ ܘܗܘܬ ܐܝܠܢܐ܂ ܘܐܩܢܬ ܦܪܚܬܐ ܕܫܡܝܐ ܒܣ̈ܘܟܝܗ܀
13:20	ܬܘܒ ܐܡܪ ܠܡܢܐ ܐܕܡܝܗ ܡܠܟܘܬܐ ܕܐܠܗܐ܂
13:21	ܕܡܝܐ ܠܚܡܝܪܐ ܕܢܣܒܬ ܐܢܬܬܐ ܘܛܡܪܬ ܒܬܠܬ ܣܐ̈ܝܢ ܩܡܚܐ܂ ܥܕܡܐ ܕܟܘܠܗ ܢܚܡܥ܂
13:22	ܘܪܕܐ ܗܘܐ ܒܩ̈ܘܪܝܐ ܘܒܡ̈ܕܝܢܬܐ܂ ܘܡܠܦ ܗܘܐ܀ ܘܟܕ ܐܙܠ ܠܐܘܪܫܠܡ܂
13:23	ܐܬܐ ܚܕ ܘܡܫܐܠ ܗܘܐ ܠܗ ܘܐܡܪ܂ ܡܪܝ ܙܥܘܪ̈ܝܢ ܐܢܘܢ ܕܚ̈ܝܝܢ܂
13:24	ܐܡܪ ܠܗ ܝܫܘܥ܂ ܐܬܟܬܫ ܠܡܥܠ ܒܬܪܥܐ ܐܠܝܨܐ܂ ܐܡܪܢܐ ܠܟܘܢ ܓܝܪ ܕܣܓ̈ܝܐܐ ܢܒܥܘܢ ܠܡܥܠ ܘܠܐ ܢܫܟܚܘܢ܂
13:25	ܡܢ ܫܥܬܐ ܕܢܩܘܡ ܡܪܐ ܒܝܬܐ ܘܢܐܚܘܕ ܬܪܥܐ܂ ܘܬܗܘܘܢ ܩܝܡܝܢ ܠܒܪ ܘܢܩܫܝܢ ܒܬܪܥܐ܂ ܘܐܡܪܝܢ ܡܪܢ ܡܪܢ ܦܬܚ ܠܢ܂ ܘܢܥܢܐ ܘܢܐܡܪ ܠܟܘܢ ܠܐ ܝܕܥ ܐܢܐ ܠܟܘܢ ܐܝܡܟܐ ܐܢܬܘܢ܂
13:26	ܗܝܕܝܢ ܬܫܪܘܢ ܠܡܐܡܪ܂ ܩܕܡܝܟ ܠܥܣܢ ܘܐܫܬܝܢ܂ ܘܒ̈ܫܘܩܝܢ ܗܠܟܬ܂
13:27	ܗܝܕܝܢ ܢܐܡܪ ܠܟܘܢ܂ ܐܡܝܢ ܐܡܪܢܐ ܠܟܘܢ ܕܠܐ ܝܕܥܢܐ ܠܟܘܢ ܐܝܡܟܐ ܐܢܬܘܢ܂ ܦܪܘܩܘ ܠܟܘܢ ܡܢܝ܂ ܟܠܟܘܢ ܓܝܪ ܐܝܬܝܟܘܢ ܦܥ̈ܠܐ ܕܫܘܩܪܐ܂
13:28	ܬܡܢ ܢܗܘܐ ܒܟܝܐ ܘܚܘܪܩ ܫ̈ܢܐ܂ ܟܕ ܬܚܙܘܢ ܠܐܒܪܗܡ ܘܠܐܝܣܚܩ ܘܠܝܥܩܘܒ܂ ܘܠܟܠܗܘܢ ܢܒ̈ܝܐ܂ ܒܡܠܟܘܬܐ ܕܐܠܗܐ܂ ܘܐܢܬܘܢ ܬܗܘܘܢ ܡܦܩܝܢ ܠܒܪ܂
13:29	ܘܢܐܬܘܢ ܡܢ ܡܕܢܚܐ ܘܡܢ ܡܥܪܒܐ܂ ܘܡܢ ܬܝܡܢܐ ܘܡܢ ܓܪܒܝܐ܂ ܘܢܣܬܡܟܘܢ ܒܡܠܟܘܬܗ ܕܐܠܗܐ܂
13:30	ܘܐܝܬ ܐܚ̈ܪܝܐ ܕܢܗܘܘܢ ܩܕ̈ܡܝܐ܂ ܘܩ̈ܕܡܝܐ ܐܚ̈ܪܝܐ܀
13:31	ܘܒܗܘܢ ܒܝ̈ܘܡܬܐ ܗܢܘܢ܂ ܩܪܒܘ ܐܢ̈ܫܐ ܡܢ ܦܪܝ̈ܫܐ ܘܐܡܪܝܢ ܠܗ܂ ܦܘܩ ܙܠ ܠܟ ܡܟܐ܂ ܡܛܠ ܕܗܪܘܕܣ ܒܥܐ ܠܡܩܛܠܟ܂
13:32	ܐܡܪ ܠܗܘܢ ܙܠܘ ܐܡܪܘ ܠܗ ܠܬܥܠܐ ܗܢܐ܂ ܗܐ ܡܦܩ ܐܢܐ ܫܐ̈ܕܐ܂ ܘܐܣܝܘܬܝ ܡܫܠܡ ܐܢܐ ܝܘܡܢܐ ܘܡܚܪ܂ ܘܠܝܘܡܐ ܕܬܠܬܐ ܡܫܬܠܡ ܐܢܐ܂
13:33	ܒܪܡ ܘܠܐ ܠܝ ܕܝܘܡܢܐ ܘܡܚܪ܂ ܘܒܬܪ ܡܚܪ ܐܪܕܐ܂ ܡܛܠ ܕܠܐ ܡܫܟܚܐ ܕܢܒܝܐ ܢܐܒܕ ܠܒܪ ܡܢ ܐܘܪܫܠܡ܂
13:34	ܐܘܪܫܠܡ ܐܘܪܫܠܡ ܕܩܛܠܬ ܠܢܒ̈ܝܐ܂ ܘܪܓܡܬܝ ܠܐܝܠܝܢ ܕܐܫܬܠܚܘ ܠܘܬܟܝ܂ ܟܡܐ ܙܒ̈ܢܝܢ ܨܒܝܬ ܠܡܟܢܫܘ ܠܒ̈ܢܝܟܝ܂ ܐܝܟ ܬܪܢܓܘܠܬܐ ܕܟܢܫܐ ܦܪܘ̈ܓܝܗ ܬܚܝܬ ܓܦܝ̈ܗ ܘܠܐ ܨܒܝܬܘܢ܂
13:35	ܗܐ ܫܒܝܩ ܠܟܘܢ ܒܝܬܟܘܢ ܚܪܒ܂ ܐܡܪܢܐ ܠܟܘܢ ܕܠܐ ܬܚܙܘܢܢܝ ܥܕܡܐ ܕܢܐܬܐ ܝܘܡܐ ܕܬܐܡܪܘܢ ܒܪܝܟ ܗܘ ܕܐܬܐ ܒܫܡܗ ܕܡܪܝܐ܂