← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60042: OS Lk

Click on a word for lexical analysis
Click on a red-colored coordinate for comments and/or translations of the line

previous chapter


15:01 ܘܡ̈ܟܣܐ ܘܚ̈ܛܝܐ ܡܬܩܪܒܝܢ ܗܘܘ ܠܗ ܕܢܫܡܥܘܢܗ܂
15:02 ܘܣ̈ܦܪܐ ܘܦܪ̈ܝܫܐ ܪܛܢܝܢ ܗܘܘ ܘܐܡܪܝܢ܂ ܗܢܐ ܓܒܪܐ ܠܚܛ̈ܝܐ ܡܩܒܠ ܘܐܟܠ ܥܡܗܘܢ܂
15:03 ܐܡܪ ܠܗܘܢ ܗܘ ܡܬܠܐ ܗܢܐ܂
15:04 ܡܢܘ ܡܢܟܘܢ ܕܐܝܬ ܠܗ ܡ̈ܐܐ ܥܪܒ̈ܝܢ܂ ܘܢܐܒܕ ܚܕ ܡܢܗܘܢ܂ ܠܐ ܫܒܩ ܬܫܥܝܢ ܘܬܫܥܐ ܒܕܒܪܐ܂ ܘܐܙܠ ܒܥܐ ܠܗ݀ܘ ܕܐܒܕ ܥܕܡܐ ܕܢܫܟܚܝܘܗܝ܂
15:05 ܘܡܐ ܕܐܫܟܚܗ ܣܐܡ ܠܗ ܥܠ ܟܬ̈ܦܬܗ܂ ܘܚܕܐ
15:06 ܘܐܬܐ ܠܒܝܬܗ܂ ܘܩܪܐ ܠܪܚ̈ܡܘܗܝ ܐܦ ܠܫܒ̈ܒܘܗܝ ܘܐܡܪ ܠܗܘܢ܂ ܚܕܘ ܥܡܝ ܕܐܫܟܚܬ ܥܪܒܝ ܕܐܒܝܕ ܗܘܐ܂
15:07 ܐܡܪܢܐ ܠܟܘܢ ܕܝܢ ܕܗܟܢܐ ܬܗܘܐ ܚܕܘܬܐ ܒܫܡܝܐ ܥܠ ܚܕ ܚܛܝܐ ܕܬܐܒ܂ ܝܬܝܪ ܡܢ ܬܫ̈ܥܝܢ ܘܬ̈ܫܥܐ ܙܕܝ̈ܩܝܢ ܕܠܐ ܡܬܒܥܝܐ ܠܗܘܢ ܬܝܒܘܬܐ܂
15:08 ܐܘ ܐܝܕܐ ܗܝ ܐܢܬܬܐ ܕܐܝܬ ܠܗ݀ ܥ̈ܣܪܐ ܙܘ̈ܙܝܢ܂ ܘܬܘܒܕ ܚܕ ܡܢܗܘܢ܂ ܠܐ ܡܢܗܪܐ ܫܪܓܐ ܘܟܢܫܐ ܒܝܬܐ܂ ܘܒܥܝܐ ܠܗ ܒܛܝܠܐܝܬ ܥܕܡܐ ܕܬܫܟܚܝܘܗܝ܂
15:09 ܘܡܐ ܕܐܫܟܚܬܗ ܩܪܝܐ ܠܪܚ̈ܡܬܗ݀ ܘܠܫܒ̈ܒܬܗ܂ ܘܐܡܪܐ ܠܗܝܢ ܚܕܝܝܢ ܥܡܝ ܕܐܫܟܚܬ ܙܘܙܝ ܕܐܒܝܕ ܗܘܐ܂
15:10 ܐܡܪܢܐ ܠܟܘܢ ܕܗܟܢܐ ܬܗܘܐ ܚܕܘܬܐ ܩܕܡ ܟܠܗܘܢ ܡ̈ܠܐܟܐ ܕܐܠܗܐ܂ ܥܠ ܚܕ ܚܛܝܐ ܕܬܐܒ܀
15:11 ܐܡܪ ܗܘܐ ܠܗܘܢ ܬܘܒ܂ ܠܓܒܪܐ ܚܕ ܐܝܬ ܗܘܘ ܠܗ ܬܪ̈ܝܢ ܒ̈ܢܝܢ܂
15:12 ܐܡܪ ܠܗ ܙܥܘܪܐ܂ ܐܒܝ ܗܒ ܠܝ ܝܪܬܘܬܐ ܕܡܛܝܐ ܠܝ ܡܢ ܒܝܬܟ܂ ܘܦܠܓ ܠܗܘܢ ܟܠܗ ܩܢܝܢܗ܂
15:13 ܘܡܢ ܒܬܪ ܝܘܡ̈ܬܐ ܩܠܝܠ܂ ܟܢܫ ܗܘ ܒܪܗ ܙܥܘܪܐ ܟܠܡܕܡ ܕܡܛܝܗܝ܂ ܘܐܙܠ ܠܐܬܪܐ ܪܚܝܩܐ܂ ܘܬܡܢ ܒܕܪ ܩܢܝܢܗ ܒܣ̈ܝܒܪܬܐ ܐܝܠܝܢ ܕܠܐ ܘ̈ܠܝܢ܂ ܡܛܠ ܕܚܝܐ ܗܘܐ ܦܪܚܐܝܬ ܥܡ ܙܢܝ̈ܬܐ܂
15:14 ܘܟܕ ܓܡܪ ܟܠ ܡܕܡ ܕܐܝܬ ܠܗ܂ ܘܗܘܐ ܟܦܢܐ ܥܫܝܢܐ ܒܐܬܪܐ ܗܘ܂
15:15 ܐܙܠ ܢܩܦ ܠܗ ܠܚܕ ܡܢ ܒܢܝ ܐܬܪܐ ܗܘ܂ ܘܫܕܪܗ ܠܩܪܝܬܐ ܠܡܪܥܐ ܚܙ̈ܝܪܐ܂
15:16 ܘܡܬܪܓܪܓ ܗܘܐ ܠܡܐܟܠ ܡܢ ܚܪܘ̈ܒܐ ܗܢܘܢ ܕܝܡܐ ܕܐܟܠܝܢ ܗܘܘ ܚ̈ܙܝܪܐ܂ ܘܠܐ ܐܢܫ ܝܗܒ ܗܘܐ ܠܗ܂
15:17 ܘܟܕ ܐܬܐ ܠܘܬ ܢܦܫܗ ܐܡܪ܂ ܟܡܐ ܐܓ̈ܝܪܐ ܐܝܬ ܗܫܐ ܒܝܬ ܐܒܝ ܕܝܬܝܪ ܠܗܘܢ ܠܚܡܐ܂ ܘܐܢܐ ܐܒܕ ܐܢܐ ܗܪܟܐ ܡܢ ܟܦܢܝ܂
15:18 ܐܠܐ ܐܩܘܡ ܐܙܠ ܠܘܬ ܐܒܝ ܘܐܡܪ ܠܗ܂ ܐܒܝ ܚܛܝܬ ܒܫܡܝܐ ܘܩܕܡܝܟ܂
15:19 ܘܠܐ ܫܘܐ ܐܢܐ ܡܟܝܠ ܕܒܪܟ ܐܬܩܪܐ܂ ܥܒܕܝܢܝ ܐܝܟ ܚܕ ܡܢ ܐܓ̈ܝܪܝܟ܂
15:20 ܘܩܡ ܐܬܐ ܠܘܬ ܐܒܘܗܝ܂ ܘܥܕ ܗܘ ܪܚܝܩ܂ ܚܙܝܗܝ ܐܒܘܗܝ ܘܐܬܪܚܡ ܥܠܘܗܝ܂ ܘܪܗܛ ܢܦܠ ܥܠ ܨܘܪܗ ܘܢܫܩܗ܂
15:21 ܘܐܡܪ ܠܗ ܒܪܗ܂ ܐܒܝ ܚܛܝܬ ܒܫܡܝܐ ܘܩܕܡܝܟ܂ ܘܡܟܝܠ ܠܐ ܫܘܐ ܐܢܐ ܕܒܪܟ ܐܬܩܪܐ܂
15:22 ܐܡܪ ܐܒܘܗܝ ܠܥܒ̈ܕܘܗܝ܂ ܐܦܩܘ ܥܓܠ ܐܣܛܠܐ ܪܫܝܬܐ ܐܠܒܫܘܗܝ܂ ܘܣܝܡܘ ܥܙܩܬܐ ܒܐܝܕܗ܂ ܘܐܣܐܢܘܗܝ ܡ̈ܣܢܐ܂
15:23 ܘܐܝܬܘ ܩܛܘܠܘ ܥܓܠܐ ܗܘ ܕܦܛܡܐ܂ ܢܐܟܘܠ ܘܢܬܒܣܡ܂
15:24 ܕܗܢܐ ܒܪܝ ܡܝܬܐ ܗܘܐ ܘܚܝܐ܂ ܘܐܒܝܕܐ ܗܘܐ ܘܐܫܬܟܚ܂ ܘܫܪܝܘ ܠܡܬܒܣܡܘ܂
15:25 ܘܗܘ ܒܪܗ ܩܫܝܫܐ ܒܩܪܝܬܐ ܗܘܐ܂ ܘܟܕ ܐܬܐ ܩܪܒ ܠܘܬ ܒܝܬܐ܂ ܫܡܥ ܩܠ ܙܡܪܐ ܘܨܦܘܢܝܐ܂
15:26 ܘܩܪܐ ܠܚܕ ܡܢ ܛ̈ܠܝܐ ܘܫܐܠܗ܂ ܡܢܘ ܗܢܐ ܩܠܐ ܕܙܡܪܐ ܫܡܥ ܐܢܐ܂
15:27 ܘܐܡܪ ܠܗ ܐܚܘܟ ܐܬܐ܂ ܘܩܛܠ ܐܒܘܟ ܥܓܠܐ ܗܘ ܕܦܛܡܐ ܕܟܕ ܚܠܝܡ ܩܒܠܗ܂
15:28 ܘܪܓܙ ܘܠܐ ܨܒܐ ܗܘܐ ܠܡܥܠ܂ ܘܢܦܩ ܐܒܘܗܝ ܘܒܥܐ ܗܘܐ ܡܢܗ܂
15:29 ܐܡܪ ܠܗ ܠܐܒܘܗܝ܂ ܗܐ ܟܡܐ ܫ̈ܢܝܢ ܦܠܚ ܐܢܐ ܠܟ ܥܒܕܘܬܐ܂ ܘܠܐ ܥܒܪܬ ܥܠ ܦܘܩ̈ܕܢܝܟ܂ ܘܡܡܬܘܡ ܓܕܝܐ ܚܕ ܠܐ ܝܗܒܬ ܠܝ ܕܐܬܒܣܡ ܥܡ ܪ̈ܚܡܝ܂
15:30 ܘܗܢܐ ܒܪܟ ܟܕ ܦܪܚ ܩܢܝܢܟ ܥܡ ܙܢܝ̈ܬܐ܂ ܢܟܣܬ ܠܗ ܥܓܠܐ ܗܘ ܕܦܛܡܐ܂
15:31 ܐܡܪ ܠܗ ܒܪܝ܂ ܐܢܬ ܒܟܠܙܒܢ ܥܡܝ ܐܢܬ܂ ܘܟܠܡܕܡ ܕܝܠܝ ܕܝܠܟ ܗܘ܂
15:32 ܠܡܒܣܡ ܕܝܢ ܘܠܡܚܕܐ ܘܠܐ ܗܘܐ ܠܟ܂ ܕܗܢܐ ܐܚܘܟ ܡܝܬܐ ܗܘܐ ܘܚܝܐ܂ ܘܐܒܝܕܐ ܗܘܐ ܘܐܫܬܟܚ܀

next chapter