The Comprehensive Aramaic Lexicon

16:01	ܘܐܡܪ ܗܘܐ ܬܘܒ ܝܫܘܥ ܠܬܠܡ̈ܝܕܘܗܝ܂ ܓܒܪܐ ܚܕ ܥܬܝܪܐ ܐܝܬ ܗܘܐ܂ ܘܐܝܬ ܗܘܐ ܠܗ ܪܒܝܬܐ܂ ܘܐܬܐܟܠܘ ܩܪ̈ܨܘܗܝ ܩܕܡܘܗܝ܂ ܐܝܟܢܐ ܕܩܢܝܢܗ ܫܚܛ܂
16:02	ܘܩܪܝܗܝ ܡܪܗ ܘܐܡܪ ܠܗ܂ ܡܢܘ ܗܢܐ ܕܫܡܥ ܐܢܐ ܥܠܝܟ܂ ܬܐ ܗܒ ܚܘܫܒܢܐ ܕܫܘܠܛܢܟ܂ ܠܐ ܓܝܪ ܡܫܟܚ ܐܢܬ ܕܬܘܒ ܪܒܝܬܐ ܬܗܘܐ ܠܝ܂
16:03	ܐܡܪ ܗܘ ܪܒ ܒܝܬܐ ܒܢܦܫܗ܂ ܡܢܐ ܐܥܒܕ ܕܡܪܝ ܫܩܠ ܠܗ݀ ܪܒܬ ܒܝܬܘܬܐ ܡܢܝ܂ ܕܐܦܠܚ ܠܐ ܡܫܟܚܢܐ܂ ܘܠܡܚܕܪ ܒܗܬܢܐ܂
16:04	ܝܕܥܬ ܡܢܐ ܐܥܒܕ܂ ܕܡܐ ܕܢܦܩܬ ܡܢ ܪܒܬ ܒܝܬܘܬܐ ܢܩܒܠܘܢܢܝ ܒܒ̈ܬܝܗܘܢ܂
16:05	ܘܫܕܪ ܩܪܐ ܠܚܕ ܡܢ ܚܝ̈ܒܐ ܕܡܪܗ܂ ܘܐܡܪ ܠܩܕܡܝܐ ܟܡܐ ܚܝܒܬ ܠܡܪܝ܂
16:06	ܐܡܪ ܠܗ ܡܐܐ ܡ̈ܬܪܝܢ ܡܫܚܐ܂ ܐܡܪ ܠܗ ܣܒ ܟܬܒܟ ܘܬܒ ܒܥܓܠ ܟܬܘܒ ܐܢܝܢ ܚܡܫܝܢ܂
16:07	ܘܡܢ ܒܬܪܟܢ ܐܡܪ ܠܐܚܪܢܐ܂ ܘܐܢܬ ܟܡܐ ܚܝܒ ܐܢܬ ܠܡܪܝ܂ ܐܡܪ ܠܗ ܡ̈ܐܐ ܟܘܪ̈ܝܢ ܚܛ̈ܐ܂ ܐܡܪ ܠܗ ܩܒܠ ܟܬܒܟ ܘܟܬܘܒ ܐܢܘܢ ܬܡܢܐܝܢ ܟܘܪ̈ܝܢ܂
16:08	ܘܫܒܚ ܡܪܐ ܠܪܒ ܒܝܬܐ ܕܥܘܠܐ ܕܚܟܝܡܐܝܬ ܥܒܕ܂ ܒ̈ܢܘܗܝ ܓܝܪ ܕܥܠܡܐ ܗܢܐ ܚܟܝܡܝܢ ܐܢܘܢ ܒܫܪܒܬܗܘܢ ܗܕܐ ܡܢ ܒܢ̈ܘܗܝ ܕܢܘܗܪܐ܂
16:09	ܘܐܢܐ ܐܡܪܢܐ ܠܟܘܢ ܥܒܕܘ ܠܟܘܢ ܪ̈ܚܡܐ ܡܢ ܡܡܘܢܐ ܗܢܐ ܕܥܘܠܐ܂ ܕܡܐ ܕܓܡܪ ܢܩܒܠܘܢܟܘܢ ܒܡ̈ܛܠܝܗܘܢ ܕܠܥܠܡ܂

16:10	ܡܢ ܕܒܩܠܝܠ ܓܝܪ ܡܗܝܡܢ ܐܦ ܒܣܓܝ ܡܗܝܡܢ ܗܘ܂ ܘܡܢ ܕܒܩܠܝܠ ܥܘܠ ܐܦ ܒܣܓܝ ܥܘܠ ܗܘ܂

16:11	ܐܢ ܥܘܕ ܒܡܡܘܢܐ ܕܥܘܠܐ ܠܐ ܡܗܝܡܢܝܢ ܐܢܬܘܢ܂ ܫܪܪܐ ܡܢܘ ܡܗܝܡܢ ܠܟܘܢ܂
16:12	ܘܐܢ ܒܕܠܐ ܕܝܠܟܘܢ ܠܐ ܡܗܝܡܢܝܢ ܐܢܬܘܢ܂ ܕܝܠܟܘܢ ܡܢ ܢܬܠ ܠܟܘܢ܀
16:13	ܠܝܬ ܓܝܪ ܥܒܕܐ ܕܡܫܟܚ ܡܦܠܚ ܠܬܪܝܢ ܡܪ̈ܘܢ ܕܠܐ ܠܚܕ ܢܪܚܡ ܘܠܐܚܪܢܐ ܢܣܢܐ܂ ܐܘ ܠܚܕ ܢܣܝܒܪ ܘܠܐܚܪܢܐ ܢܫܘܛ܂ ܠܐ ܡܫܟܚܝܢ ܐܢܬܘܢ ܠܐܠܗܐ ܠܡܦܠܚ ܘܠܡܡܘܢܐ܀
16:14	ܘܦܪ̈ܝܫܐ ܟܕ ܫܡܥܘ ܗܘܘ ܗܠܝܢ ܟܠܗܝܢ ܡܡܝܩܝܢ ܗܘܘ ܒܗ܂ ܡܛܠ ܕܪܚܡܝܢ ܗܘܘ ܟܣܦܐ܂
16:15	ܐܡܪ ܠܗܘܢ ܐܢܬܘܢ ܐܢܘܢ ܕܡܙܕܩܝܢ ܢܦܫܗܘܢ ܒ̈ܥܝܢܝ ܒ̈ܢܝܢܫܐ܂ ܐܠܗܐ ܕܝܢ ܝܕܥ ܠܒ̈ܘܬܟܘܢ܂ ܕܡܕܡ ܕܪܡ ܒܝܬ ܒܢ̈ܝ ܐܢܫܐ ܩܕܡ ܐܠܗܐ ܢܕܝܕ ܗܘ܀
16:16	ܢܡܘܣܐ ܘܢܒ̈ܝܐ ܥܕܡܐ ܠܝܘܚܢܢ ܐܬܢܒܝܘ܂ ܡܟܝܠ ܡܠܟܘܬܗ ܕܐܠܗܐ ܡܣܬܒܪܐ܂ ܘܟܠ ܕܒܗ݀ ܚܒܨ ܗܘ܂
16:17	ܦܫܝܩ ܗܘ ܕܝܢ ܕܫܡܝܐ ܘܐܪܥܐ ܢܥܒܪܘܢ ܐܘ ܐܬܘܬܐ ܚܕܐ ܡܢ ܢܡܘܣܐ܂ ܬܥܒܪ܀
16:18	ܟܠ ܐܢܫ ܕܝܢ ܕܫܪܐ ܐܢܬܬܗ ܘܢܣܒ ܐܚܪܬܐ ܡܓܪ ܓܐܪ܂ ܘܗܘ ܕܢܣܒ ܫܒܝܩܬܐ ܡܓܪ ܓܐܪ܂
16:19	ܘܐܡܪ ܗܘܐ ܬܘܒ܂ ܓܒܪܐ ܚܕ ܥܬܝܪܐ ܐܝܬ ܗܘܐ܂ ܘܠܒܝܫ ܗܘܐ ܒܘܨܐ ܘܐܪܓܘܢܐ܂ ܘܡܬܒܣܡ ܗܘܐ ܟܠܝܘܡ ܓܐܝܐܝܬ܂
16:20	ܘܡܣܟܢܐ ܚܕ ܐܝܬ ܗܘܐ ܕܫܡܗ ܠܥܙܪ܂ ܪܡܐ ܗܘܐ ܠܘܬ ܬܪܥܗ ܘܡܫܚܢ ܗܘܐ܂
16:21	ܘܡܬܝܐܒ ܗܘܐ ܕܢܡܠܐ ܟܪܣܗ ܡܢ ܡܕܡ ܕܢܦܠ ܗܘܐ ܡܢ ܦܬܘܪܗ ܕܗܘ ܥܬܝܪܐ܂ ܐܦ ܟ̈ܠܒܐ ܐܬܝܢ ܗܘܘ ܘܠܚܟܝܢ ܫܘܚ̈ܢܘܗܝ܂
16:22	ܘܡܝܬ ܗܘ ܡܣܟܢܐ ܘܐܘܒܠܘܗܝ ܡܠܐ̈ܟܐ ܠܥܘܒܗ ܕܐܒܪܗܡ܂ ܘܡܝܬ ܘܐܦ ܗܘ ܥܬܝܪܐ ܘܐܬܩܒܪ܂
16:23	ܘܪܡܐ ܗܘܐ ܒܫܝܘܠ ܒܬܫܢܝܩܐ܂ ܘܐܪܝܡ ܗܘܐ ܥ̈ܝܢܘܗܝ ܟܕ ܡܫܬܢܩ܂ ܘܚܙܐ ܠܐܒܪܗܡ ܡܢ ܪܘܚܩܐ ܘܠܠܥܙܪ ܒܥܘܒܗ܂
16:24	ܘܩܪܐ ܘܐܡܪ ܐܒܝ ܐܒܪܗܡ ܐܬܪܚܡ ܥܠܝ܂ ܘܫܕܪ ܠܠܥܙܪ ܕܢܨܒܘܥ ܪܝܫ ܨܒܥܗ ܒ̈ܡܝܐ ܘܢܐܬܐ ܢܪܛܒ ܠܝ ܠܫܢܝ ܕܗܐ ܐܠܝܨ ܐܢܐ ܒܫܠܗܒܝܬܐ ܗܕܐ܂
16:25	ܐܡܪ ܠܗ ܐܒܪܗܡ ܒܪܝ ܐܬܕܟܪ ܕܩܒܠܬ ܛܒ̈ܬܟ ܒ̈ܚܝܝܟ ܘܠܥܙܪ ܩܒܠ ܒܝ̈ܫܬܗ܂ ܘܗܫܐ ܗܪܟܐ ܡܬܢܝܚ ܘܐܢܬ ܡܫܬܢܩ ܐܢܬ܂
16:26	ܘܥܡܗܝܢ ܥܡ ܗܠܝܢ ܟܘܠܗܝܢ ܗܘܬܐ ܪܒܬܐ ܣܝܡܐ ܒܝܢܝܢ ܘܠܟܘܢ ܕܐܝܠܝܢ ܕܨܒܝܢ ܕܢܥܒܪܘܢ ܡܟܐ ܠܘܬܟܘܢ ܠܐ ܢܫܟܚܘܢ܂ ܘܐܦܠܐ ܕܡܢ ܬܡܢ ܢܥܒܪܘܢ ܠܘܬܢ܂
16:27	ܐܡܪ ܡܕܝܢ ܒܥܐ ܐܢܐ ܡܢܟ ܐܒܝ ܐܒܪܗܡ ܕܬܫܕܪܝܗܝ ܠܒܝܬ ܐܒܝ܂
16:28	ܚܡܫܐ ܓܝܪ ܐ̈ܚܝܢ ܐܝܬ ܠܝ ܕܢܣܗܕ ܐܢܘܢ ܕܕܠܡܐ ܐܦ ܗܢܘܢ ܢܐܬܘܢ ܠܕܘܟܬܐ ܗܕܐ ܕܬܫܢܝܩܐ܂
16:29	ܐܡܪ ܠܗ ܐܒܪܗܡ ܐܝܬ ܠܗܘܢ ܡܘܫܐ ܘܢ̈ܒܝܐ ܢܫܡܥܘܢ ܐܢܘܢ܂
16:30	ܐܡܪ ܠܗ ܠܐ ܐܒܝ ܐܒܪܗܡ܂ ܐܠܐ ܐܢ ܐܢܫ ܡܢ ܡ̈ܝܬܐ ܢܐܙܠ ܠܘܬܗܘܢ ܬܝܒܝܢ܂
16:31	ܐܡܪ ܠܗ ܐܒܪܗܡ ܐܢ ܠܡܘܫܐ ܘܠܢ̈ܒܝܐ ܠܐ ܫܡܥܝܢ ܘܐܦ ܠܐ ܐܢ ܐܢܫ ܡܢ ܡܝܬ̈ܐ ܢܐܙܠ ܡܗܝܡܢܝܢ ܠܗ܀