The Comprehensive Aramaic Lexicon

17:01	ܘܐܡܪ ܗܘܐ ܝܫܘܥ ܠܬܠܡ̈ܝܕܘܗܝ ܠܐ ܡܫܟܚܐ ܕܠܐ ܢܐܬܘܢ ܡܟܫ̈ܘܠܐ ܒܪܡ ܘܝ ܠܗܘ ܕܒܐܝܕܗ ܢܐܬܘܢ ܡܟ̈ܫܘܠܐ܂
17:02	ܦܩܚ ܗܘܐ ܠܗ ܐܠܘ ܪܚܝܐ ܕܚܡܪܐ ܬܠܝܐ ܒܨܘܪܗ ܘܡܛܒܥ ܒܝܡܐ܂ ܐܘ ܕܢܟܫܠ ܠܚܕ ܡܢ ܗܠܝܢ ܙܥ̈ܘܪܐ܂
17:03	ܐܙܕܗܪܘ ܒܢܦܫܟܘܢ܂ ܐܢ ܚܛܐ ܐܚܘܟ ܟܐܝ ܒܗ܂ ܐܢ ܬܒ ܫܒܘܩ ܠܗ܂
17:04	ܘܐܢ ܫܒܥ ܙܒ̈ܢܝܢ ܒܝܘܡܐ ܢܚܛܐ ܒܟ܂ ܘܫܒܥ ܙܒ̈ܢܝܢ ܢܬܦܢܐ ܠܘܬܟ ܘܢܐܡܪ ܠܟ ܕܬܐܒ ܐܢܐ܂ ܫܒܘܩ ܠܗ܀
17:05	ܐܡܪܝܢ ܠܗ ܫ̈ܠܝܚܐ ܠܡܪܢ܂ ܐܘܣܦ ܠܢ ܗܝܡܢܘܬܐ܂
17:06	ܐܡܪ ܠܗܘܢ ܐܠܘ ܐܝܬ ܗܘܐ ܒܟܘܢ ܗܝܡܢܘܬܐ ܐܝܟ ܦܪܕܬܐ ܕܚܪܕܠܐ܂ ܐܡܪܝܢ ܗܘܝܬܘܢ ܠܛܘܪܐ ܕܢܫܢܐ ܡܢ ܗܡܟܐ ܘܡܫܢܐ ܗܘܐ܂ ܘܠܬܘܬܐ ܕܐܬܥܩܪ ܘܐܬܢܨܒ ܒܝܡܐ ܘܡܫܬܡܥ ܗܘܐ ܠܟܘܢ܂
17:07	ܡܢܘ ܡܢܟܘܢ ܕܐܝܬ ܠܗ ܥܒܕܐ ܕܕܒܪ ܦܕܢܐ ܐܘ ܕܪܥܐ ܥܢܐ܂ ܘܡܐ ܕܥܠ ܡܢ ܩܪܝܬܐ܂ ܠܡܐ ܐܡܪ ܠܗ ܒܪܫܥܬܗ ܥܒܪ ܐܣܬܡܟ܂
17:08	ܐܠܐ ܐܡܪ ܠܗ ܛܝܒ ܠܝ ܡܕܡ ܕܐܚܫܡ܂ ܘܐܣܘܪ ܚܨ̈ܝܟ ܫܡܫܝܢܝ܂ ܥܕܡܐ ܕܐܠܥܣ ܘܐܫܬܐ܂ ܘܒܬܪ ܟܢ ܘܐܦ ܐܢܬ ܬܠܥܣ ܘܬܫܬܐ܂
17:09	ܠܡܐ ܛܝܒܘܬܐ ܕܢܦܫܗ ܐܚܝܕ ܥܒܕܐ ܗܘ܂ ܕܥܒܕ ܐܝܠܝܢ ܕܦܩܕ ܠܗ܂

17:10	ܗܟܢܐ ܐܦ ܐܢܬܘܢ ܡܐ ܕܥܒܕܬܘܢ ܐܝܠܝܢ ܕܦ̈ܩܝܕܢ ܠܟܘܢ܂ ܐܡܪܝܢ ܐܢܬܘܢ ܐܢܚܢܢ ܥܒ̈ܕܐ ܡ̈ܫܝܐ܂ ܡܕܡ ܕܚܝܒܝܢ ܗܘܝܢ ܠܡܥܒܕ ܥܒܕܢ܀

17:11	ܘܟܕ ܐܙܠ ܗܘܐ ܠܐܘܪܫܠܡ܂ ܘܥܒܪ ܗܘܐ ܒܝܬ ܫܡ̈ܪܝܐ ܠ̈ܓܠܝܠܝܐ ܠܐܝܪܝܚܘ܂
17:12	ܘܟܕ ܥܐܠ ܗܘܐ ܠܩܪܝܬܐ ܚܕܐ܂ ܘܗܐ ܥ̈ܣܪܐ ܐܢ̈ܫܝܢ ܓܪ̈ܒܐ ܩܡܘ ܡܢ ܪܘܚܩܐ܂
17:13	ܘܐܪܝܡܘ ܩܠܗܘܢ ܘܐܡܪܝܢ ܠܗ܂ ܝܫܘܥ ܪܒܢ ܐܬܪܚܡ ܥܠܝܢ܂
17:14	ܟܕ ܚܙܐ ܐܢܘܢ ܐܡܪ ܠܗܘܢ܂ ܙܠܘ ܚܘܘ ܢܦܫܟܘܢ ܠܟܗ̈ܢܐ܂ ܘܟܕ ܐܙܠܝܢ ܐܬܕܟܝܘ܂
17:15	ܚܕ ܡܢܗܘܢ ܕܝܢ ܟܕ ܚܙܐ ܕܐܬܕܟܝ܂ ܗܦܟ ܠܗ ܘܒܩܠܐ ܪܡܐ ܡܫܒܚ ܗܘܐ ܠܐܠܗܐ܂
17:16	ܘܢܦܠ ܥܠ ܐ̈ܦܘܗܝ ܩܕܡ ܪ̈ܓܠܘܗܝ ܕܝܫܘܥ ܘܡܘܕܐ ܗܘܐ ܠܗ܂ ܘܗܘ ܗܢܐ ܓܪܒܐ ܫܡܪܝܐ ܗܘܐ܂
17:17	ܐܡܪ ܝܫܘܥ ܗܠܝܢ ܥ̈ܣܪܐ ܗܘܝܢ ܗܘܘ ܕܐܬܕܟܝܘ܂ ܬܫܥܐ ܐܝܟܐ ܐܢܘܢ܂
17:18	ܚܕ ܡܢܗܘܢ ܕܝܢ ܠܐ ܐܫܬܟܚ ܕܗܦܟ ܠܡܬܠ ܬܫܒܘܚܬܐ ܠܐܠܗܐ܂ ܐܠܐ ܗܢܐ ܕܡܢ ܥܡܐ ܗܘ ܢܘܟܪܝܐ܂
17:19	ܐܡܪ ܠܗ ܙܠ ܗܝܡܢܘܬܟ ܐܚܝܬܟ܀
17:20	ܘܫܐܠܘܗܝ ܦܪ̈ܝܫܐ ܘܐܡܪܝܢ ܠܗ܂ ܐܡܬܝ ܐܬܝܐ ܡܠܟܘܬܗ ܕܐܠܗܐ܂ ܐܡܪ ܠܗܘܢ ܠܐ ܐܬܝܐ ܡܠܟܘܬܗ ܕܐܠܗܐ ܒܢ̈ܛܘܪܬܐ܂
17:21	ܘܠܐ ܢܐܡܪܘܢ ܗܐ ܗܪܟܐ ܗܝ ܐܘ ܗܐ ܗܪܬܡܢ ܗܝ܂ ܗܐ ܓܝܪ ܡܠܟܘܬܗ ܕܐܠܗܐ ܒܝܢܬܟܘܢ܀
17:22	ܘܐܡܪ ܗܘܐ ܠܬܠܡ̈ܝܕܘܗܝ܂ ܢܐܬܘܢ ܝܘܡ̈ܬܐ ܕܬܬܪܓܪܓܘܢ ܕܬܚܙܘܢ ܠܚܕ ܡܢ ܝܘܡ̈ܬܐ ܕܒܪܗ ܕܐܢܫܐ ܘܠܐ ܬܚܙܘܢ܂
17:23	ܘܐܢ ܢܐܡܪܘܢ ܠܟܘܢ ܕܗܐ ܗܪܬܡܢ ܗܘ ܘܗܐ ܗܪܟܐ ܗܘ܂ ܠܐ ܢܛܥܘܢܟܘܢ ܘܠܐ ܬܐܙܠܘܢ܂
17:24	ܐܟܙܢܐ ܓܝܪ ܕܒܪܩܐ ܒܪܩ ܡܢ ܪܫܐ ܕܫܡܝܐ ܘܥܕܡܐ ܠܣܘ̈ܦܝܗ܂ ܗܟܢܐ ܢܗܘܐ ܝܘܡܗ ܕܒܪܗ ܕܐܢܫܐ܂
17:25	ܠܘܩܕܡ ܕܝܢ ܥܬܝܕ ܗܘ ܕܢܚܫ ܒܣ̈ܓܝܐܬܐ܂ ܘܕܢܣܬܠܐ ܡܢ ܫܪܒܬܐ ܗܕܐ܂
17:26	ܘܐܝܟܢܐ ܕܗܘܐ ܒܝ̈ܘܡܝ ܢܘܚ܂ ܗܟܢܐ ܢܗܘܐ ܒܝ̈ܘܡܬܗ ܕܒܪܗ ܕܐܢܫܐ܂
17:27	ܕܐܟܠܝܢ ܗܘܘ ܘܫܬܝܢ܂ ܘܢܣܒܝܢ ܗܘܘ ܢܫ̈ܐ ܘܝܗܒܝܢ ܗܘܘ ܠܓܒ̈ܪܐ܂ ܥܕܡܐ ܠܝܘܡܐ ܕܥܠ ܢܘܚ ܠܟܘܝܠܐ܂ ܘܐܬܐ ܛܘܦܢܐ ܘܫܩܠ ܐܢܘܢ ܠܟܠܗܘܢ܂
17:28	ܗܟܢܐ ܐܝܟܢܐ ܕܗܘܐ ܒܝ̈ܘܡܝ ܠܘܛ܂ ܕܐܟܠܝܢ ܗܘܘ ܘܫܬܝܢ܂ ܘܙܒܢܝܢ ܗܘܘ ܘܡܙܒܢܝܢ܂ ܘܢܨܒܝܢ ܗܘܘ ܘܒܢܝܢ܂
17:29	ܘܒܝܘܡܐ ܕܢܦܩ ܠܘܛ ܡܢ ܣܕܘܡ܂ ܐܡܛܪ ܢܘܪܐ ܡܢ ܫܡܝܐ ܘܐܘܒܕ ܐܢܘܢ ܠܟܠܗܘܢ܂
17:30	ܗܟܢܐ ܢܗܘܐ ܒܝܘܡܐ ܕܡܬܓܠܐ ܒܪܗ ܕܐܢܫܐ܂
17:31	ܒܗܝ ܕܝܢ ܫܥܬܐ ܡܢ ܕܥܠ ܐܓܪܐ ܗܘ ܠܐ ܢܚܘܬ ܕܢܫܩܘܠ ܡܐ̈ܢܘܗܝ ܡܢ ܒܝܬܐ܂ ܘܡܢ ܕܒܩܪܝܬܐ ܗܘ ܠܐ ܢܬܗܦܟ ܠܒܣܬܪܗ܂
17:32	ܘܐܬܕܟܪܘ ܠܐܢܬܬܗ ܕܠܘܛ܂
17:33	ܡܢ ܕܨܒܐ ܕܢܚܐ ܢܦܫܗ ܢܘܒܕܝܗ܂ ܘܡܢ ܕܢܘܒܕ ܢܦܫܗ ܢܫܟܚܝܗ܂
17:34	ܐܡܪܢܐ ܠܟܘܢ ܕܝܢ ܕܒܗܘ ܠܠܝܐ ܢܗܘܘܢ ܬܪ̈ܝܢ ܒܚܕܐ ܥܪܣܐ܂ ܚܕ ܢܬܕܒܪ ܘܚܕ ܢܫܬܒܩ܂
17:35	ܘܢܗܘܝܢ ܬܪ̈ܬܝܢ ܛ̈ܚܢܢ ܒܚܕܐ ܪܚܝܐ ܐܟܚܕܐ܂ ܚܕܐ ܬܬܕܒܪ ܘܚܕܐ ܬܫܬܒܩ܂
17:36	ܘܢܗܘܘܢ ܬܪ̈ܝܢ ܒܩܪܝܬܐ܂ ܚܕ ܢܬܕܒܪ ܘܚܕ ܢܫܬܒܩ܂
17:37	ܐܡܪܝܢ ܠܗ ܠܐܝܟܐ ܡܪܢ܂ ܐܡܪ ܠܗܘܢ ܐܝܟܐ ܕܦܓܪܐ ܬܡܢ ܢܬܟܢܫܘܢ ܢܫܪ̈ܐ܀