The Comprehensive Aramaic Lexicon

18:01	ܐܡܪ ܠܗܘܢ ܬܘܒ ܐܦ ܡܬܠܐ ܗܢܐ܂ ܕܢܗܘܘܢ ܡܨܠܝܢ ܒܟܠܥܕܢ ܘܠܐ ܗܘܬ ܡܐܢܐ ܠܗܘܢ܂
18:02	ܕܝܢܐ ܚܕ ܐܝܬ ܗܘܐ ܒܡܕܝܢܬܐ ܚܕܐ܂ ܕܡܢ ܐܠܗܐ ܠܐ ܕܚܠ ܗܘܐ܂ ܘܡܢ ܒ̈ܢܝ ܐܢܫܐ ܠܐ ܡܬܟܚܕ ܗܘܐ܂
18:03	ܘܐܪܡܠܬܐ ܚܕܐ ܐܝܬ ܗܘܬ ܒܗ݀ ܒܗܝ ܡܕܝܢܬܐ܂ ܘܐܬܝܐ ܗܘܬ ܠܘܬܗ ܢܘܓܪܐ ܣܓܝܐܐ܂ ܘܐܡܪܐ ܠܗ ܬܒܥܝܢܝ ܡܢ ܒܥܠܕܝܢܝ܂
18:04	ܘܠܐ ܨܒܐ ܗܘܐ܂ ܘܒܬܪܟܢ ܐܡܪ ܒܢܦܫܗ ܗܘ ܕܝܢܐ܂ ܐܢ ܡܢ ܐܠܗܐ ܠܐ ܕܚܠ ܐܢܐ܂ ܘܡܢ ܒ̈ܢܝܢܫܐ ܠܐ ܡܬܟܚܕ ܐܢܐ܂
18:05	ܘܗܕܐ ܐܪܡܠܬܐ ܒܟܠܙܒܢ ܡܠܐܝܐ ܠܝ܂ ܐܬܒܥܝܗ ܕܠܐ ܒܟܠܙܒܢ ܬܗܘܐ ܐܬܝܐ ܡܗܪܐ ܠܝ܂
18:06	ܘܐܡܪ ܡܪܢ ܫܡܥܘ ܡܢܐ ܐܡܪ ܕܝܢܐ ܥܘܠܐ܂
18:07	ܐܠܗܐ ܗܟܝܠ ܠܐ ܝܬܝܪܐܝܬ ܢܥܒܕ ܬܒܥܬܐ ܠܓܒ̈ܘܗܝ܂ ܕܩܪܝܢ ܠܗ ܒܐܝܡܡܐ ܘܒܠܠܝܐ܂ ܘܢܓܪ ܪܘܚܗ ܥܡܗܘܢ܂
18:08	ܐܡܪܢܐ ܠܟܘܢ ܕܢܥܒܕ ܬܒܥܬܗܘܢ ܒܥܓܠ܂ ܒܪܡ ܢܐܬܐ ܟܝ ܒܪܗ ܕܐܢܫܐ ܘܢܫܟܚ ܗܝܡܢܘܬܐ ܥܠ ܐܪܥܐ܀
18:09	ܘܐܡܪ ܗܘܐ ܡܬܠܐ ܗܢܐ܂ ܠܘܩܒܠ ܐܢܫܐ ܕܬܟܝܠܝܢ ܥܠ ܢܦܫܗܘܢ ܕܙܕܝ̈ܩܐ ܐܢܘܢ܂ ܘܒܣܝܢ ܗܘܘ ܥܠ ܣܓ̈ܝܐܐ܂
18:10	ܬܪ̈ܝܢ ܐ̈ܢܫܝܢ ܣܠܩܘ ܠܗܝܟܠܐ ܠܡܨܠܝܘ܂ ܚܕ ܦܪܝܫܐ ܘܐܚܪܢܐ ܡܟܣܐ܂

18:11	ܘܗܘ ܦܪܝܫܐ ܩܐܡ ܗܘܐ ܒܝܢܘܗܝ ܠܢܦܫܗ ܘܗܠܝܢ ܡܨܠܐ ܗܘܐ܂ ܡܘܕܐ ܐܢܐ ܠܟ ܐܠܗܐ ܕܠܐ ܗܘܝܬ ܐܝܟ ܫܪܟܐ ܕܐܢܫܐ ܚܛܘ̈ܦܐ ܘ̈ܥܘܠܐ ܘܓ̈ܝܪܐ܂ ܘܠܐ ܐܝܟ ܗܢܐ ܡܟܣܐ܂

18:12	ܐܠܐ ܨܐܡ ܐܢܐ ܬܪ̈ܝܢ ܒܫܒܬܐ܂ ܘܡܥܣܪ ܐܢܐ ܟܠܡܕܡ ܕܩܢܐ ܐܢܐ܂
18:13	ܗܘ ܕܝܢ ܡܟܣܐ ܩܐܡ ܗܘܐ ܡܢ ܪܘܚܩܐ܂ ܘܠܐ ܡܡܪܚ ܗܘܐ ܐܦܠܐ ܥܝ̈ܢܘܗܝ ܢܪܝܡ ܠܫܡܝܐ܂ ܐܠܐ ܛܪܦ ܗܘܐ ܥܠ ܚܕܝܗ ܘܐܡܪ܂ ܐܠܗܐ ܐܬܪܚܡ ܥܠ ܚܛܝܐ܂
18:14	ܐܡܪ ܐܢܐ ܠܟܘܢ ܕܢܚܬ ܠܒܝܬܗ ܗܢܐ ܡܙܕܩ ܝܬܝܪ ܡܢ ܗ݀ܘ܂ ܟܠ ܐܢܫ ܓܝܪ ܕܢܪܝܡ ܢܦܫܗ ܢܬܡܟܟ܂ ܘܟܠ ܕܢܡܟ ܢܦܫܗ ܢܬܬܪܝܡ܀
18:15	ܘܩܪܒܘ ܗܘܘ ܠܗ ܐܦ ܝܠܘ̈ܕܐ ܕܢܒܪܟ ܐܢܘܢ܂ ܘܟܕ ܚܙܘ ܬܠܡ̈ܝܕܘܗܝ ܟܐܝܢ ܗܘܘ ܒܗܘܢ܂
18:16	ܘܗܘ ܝܫܘܥ ܐܡܪ ܠܗܘܢ܂ ܫܒܘܩܘ ܛ̈ܠܝܐ ܕܢܐܬܘܢ ܠܘܬܝ ܘܠܐ ܬܟܠܘܢ ܐܢܘܢ܂ ܐܝܠܝܢ ܓܝܪ ܕܐܝܟ ܗܠܝܢ ܐܢܘܢ ܕܝܠܗܘܢ ܗܝ ܡܠܟܘܬܐ ܕܫܡܝܐ܂
18:17	ܐܡܝܢ ܐܡܪܐܢܐ ܠܟܘܢ܂ ܕܡܢ ܕܠܐ ܢܩܒܠ ܡܠܟܘܬܐ ܕܐܠܗܐ ܐܝܟ ܗܢܐ ܛܠܝܐ܂ ܠܐ ܢܥܘܠ ܠܗ݀܀
18:18	ܘܫܐܠܗ ܗܘܐ ܚܕ ܡܢ ܪ̈ܫܐ ܕܦܪ̈ܝܫܐ ܘܐܡܪ ܠܗ܂ ܡܠܦܢܐ ܛܒܐ ܡܢܐ ܐܥܒܕ ܕܐܪܬ ܚܝ̈ܐ ܕܠܥܠܡ܂
18:19	ܐܡܪ ܠܗ ܝܫܘܥ܂ ܡܢܐ ܩܪܐ ܐܢܬ ܠܝ ܛܒܐ܂ ܘܡܢܐ ܡܫܐܠ ܐܢܬ ܠܝ ܥܠ ܛܒܐ܂ ܠܝܬ ܛܒܐ ܐܠܐ ܐܢ ܚܕ ܐܠܗܐ܂
18:20	ܦܘܩ̈ܕܢܐ ܕܝܢ ܝܕܥ ܐܢܬ ܠܗܘܢ܂ ܐܢ ܨܒܐ ܐܢܬ ܠܚ̈ܝܐ ܠܡܥܠ܂ ܠܐ ܬܩܛܘܠ܂ ܘܠܐ ܬܓܘܪ܂ ܘܠܐ ܬܓܢܘܒ܂ ܘܠܐ ܬܣܗܕ ܣܗܕܘܬܐ ܕܫܘܩܪܐ܂ ܝܩܪ ܠܐܒܘܟ ܘܠܐܡܟ܂
18:21	ܐܡܪ ܠܗ ܗܠܝܢ ܟܠܗܝܢ ܢܛܪܬ ܐܢܝܢ ܗܐ ܡܢ ܕܛܠܐ ܐܢܐ܂
18:22	ܟܕ ܫܡܥ ܝܫܘܥ ܐܡܪ ܠܗ ܚܕܐ ܬܘܒ ܚܣܝܪܐ ܠܟ܂ ܙܒܢ ܟܘܠ ܡܕܡ ܕܐܝܬ ܠܟ ܘܗܒ ܠܡ̈ܣܟܢܐ܂ ܘܬܗܘܐ ܠܟ ܣܝܡܬܐ ܒܫܡܝܐ܂ ܘܬܐ ܒܬܪܝ܂
18:23	ܗܘ ܕܝܢ ܟܕ ܫܡܥ ܗܠܝܢ ܟܪܝܬ ܠܗ܂ ܛܒ ܥܬܝܪ ܗܘܐ ܓܝܪ܂
18:24	ܟܕ ܚܙܐ ܝܫܘܥ ܕܟܪܝܬ ܠܗ܂ ܐܡܪ܂ ܐܝܟܢܐ ܥܛܠܐ ܗܝ ܠܐܝܠܝܢ ܕܐܝܬ ܠܗܘܢ ܢܟ̈ܣܐ ܕܢܥܠܘܢ ܠܡܠܟܘܬܐ ܕܐܠܗܐ܂
18:25	ܕܠܝܠܐ ܗܝ ܓܝܪ ܠܓܡܠܐ ܕܢܥܒܪ ܒܚܪܘܪܐ ܕܡܚܛܐ܂ ܐܘ ܥܬܝܪܐ ܕܢܥܘܠ ܠܡܠܟܘܬܗ ܕܐܠܗܐ܂
18:26	ܘܐܡܪܝܢ ܗܘܘ ܐܝܠܝܢ ܕܫܡܥܘ܂ ܡܢܘ ܡܫܟܚ ܠܡܚܐ܂
18:27	ܐܡܪ ܠܗܘܢ܂ ܐܝܠܝܢ ܕܠܘܬ ܒ̈ܢܝ ܐ̈ܢܫܐ ܠܐ ܡܫܟܚܢ ܠܡܗܘܐ܂ ܠܘܬ ܐܠܗܐ ܕܝܢ ܡܫܟܚܢ܂
18:28	ܐܡܪ ܠܗ ܟܐܦܐ܂ ܗܐ ܐܢܚܢܢ ܫܒܩܢ ܟܠ ܡܕܡ ܕܐܝܬ ܠܢ ܘܐܬܝܢ ܒܬܪܟ܂
18:29	ܐܡܪ ܠܗ ܝܫܘܥ܂ ܐܡܝܢ ܐܡܪ ܐܢܐ ܠܟܘܢ܂ ܕܡܢ ܕܫܒܩ ܒܝܬܐ܂ ܐܘ ܐ̈ܒܗܐ܂ ܐܘ ܐ̈ܚܐ܂ ܐܘ ܐܢܬܬܐ܂ ܐܘ ܒ̈ܢܝܐ܂ ܡܛܠ ܡܠܟܘܬܐ ܕܐܠܗܐ܂
18:30	ܢܣܒ ܚܕ ܒܡܐܐ ܒܗܢܐ ܙܒܢܐ܂ ܘܒܥܠܡܐ ܕܐܬܐ ܢܐܪܬ ܚ̈ܝܐ ܕܠܥܠܡ܀
18:31	ܘܕܒܪ ܠܬܪ̈ܥܣܪܬܗ ܘܐܡܪ ܠܗܘܢ܂ ܗܐ ܣܠܩܝܢ ܚܢܢ ܠܐܘܪܫܠܡ܂ ܘܡܫܬܠܡܢ ܟܠܗܝܢ ܐܝܠܝܢ ܕ̈ܟܬܝܒܢ ܒܢܒ̈ܝܐ ܥܠ ܒܪܗ ܕܐܢܫܐ܂
18:32	ܡܫܬܠܡ ܓܝܪ ܠܥܡ̈ܡܐ ܘܢܒܙܚܘܢ ܒܗ ܘܢܨܥܪܘܢܗ܂ ܘܢܪܩܘܢ ܒܐ̈ܦܘܗܝ܂
18:33	ܘܢܢܓܕܘܢܗ ܘܢܩܛܠܘܢܗ܂ ܘܠܝܘܡܐ ܕܬܠܬܐ ܢܩܘܡ܂
18:34	ܘܗܢܘܢ ܚܕܐ ܡܢ ܗܠܝܢ ܠܐ ܐܣܬܟܠܘ܂ ܐܠܐ ܡܟܣܝܐ ܗܘܬ ܡܢܗܘܢ ܡܠܬܐ܂ ܘܠܐ ܐܫܬܘܕܥܘ ܐܝܠܝܢ ܕܐܬܡܠܠ ܥܡܗܘܢ܀
18:35	ܘܟܕ ܩܪܝܒ ܗܘܐ ܠܡܥܠ ܠܐܝܪܝܚܘ܂ ܓܒܪܐ ܚܕ ܣܡܝܐ ܝܬܒ ܗܘܐ ܥܠ ܝܕ ܐܘܪܚܐ ܘܚܕܪ܂
18:36	ܘܟܕ ܫܡܥ ܩܠ ܟܢܫܐ ܕܥܒܪ܂ ܡܫܐܠ ܗܘܐ ܕܡܢܘ ܗܢܐ܂
18:37	ܐܡܪܝܢ ܠܗ ܝܫܘܥ ܢܨܪܝܐ ܥܒܪ܂
18:38	ܘܩܥܐ ܘܐܡܪ ܝܫܘܥ ܒܪܗ ܕܕܘܝܕ ܐܬܪܚܡ ܥܠܝ܂
18:39	ܘܐܝܠܝܢ ܕܐܙܠܝܢ ܗܘܘ ܩܕܡܘܗܝ ܕܝܫܘܥ ܟܐܝܢ ܗܘܘ ܒܗ ܕܢܫܬܘܩ ܠܗ܂ ܘܗܘ ܝܬܝܪܐܝܬ ܩܥܐ ܗܘܐ܂ ܒܪܗ ܕܕܘܝܕ ܐܬܪܚܡ ܥܠܝ܂
18:40	ܘܩܡ ܗܘ ܝܫܘܥ܂ ܘܦܩܕ ܗܘܐ ܕܢܝܬܘܢܝܗܝ܂ ܘܟܕ ܩܪܒ ܠܘܬܗ܂ ܫܐܠܗ
18:41	ܘܐܡܪ ܠܗ܂ ܡܢܐ ܨܒܐ ܐܢܬ ܐܥܒܕ ܠܟ܂ ܐܡܪ ܠܗ ܡܪܝ ܕܢܬܦܬܚܢ ܥ̈ܝܢܝ ܘܐܚܙܝܟ܂
18:42	ܐܡܪ ܠܗ ܚܙܝ ܗܝܡܢܘܬܟ ܐܚܝܬܟ܂
18:43	ܘܒܪܫܥܬܗ ܚܙܐ܂ ܘܐܬܐ ܗܘܐ ܒܬܪܗ ܘܡܫܒܚ ܗܘܐ ܠܐܠܗܐ܂ ܘܟܠܗ ܥܡܐ ܕܚܙܐ ܫܒܚܘ ܠܐܠܗܐ܀