The Comprehensive Aramaic Lexicon

19:01	ܘܟܕ ܥܠ ܘܥܒܪ ܒܐܝܪܝܚܘ܂
19:02	ܓܒܪܐ ܚܕ ܕܫܡܗ ܙܟܝ܂ ܘܪܒ ܡ̈ܟܣܐ ܗܘܐ܂ ܘܥܬܝܪ ܗܘܐ܂
19:03	ܘܨܒܐ ܗܘܐ ܠܡܚܙܝܗ ܠܝܫܘܥ܂ ܘܠܐ ܡܫܟܚ ܗܘܐ܂ ܡܛܠ ܕܒܩܘܡܬܗ ܙܥܘܪ ܗܘܐ ܙܟܝ܂
19:04	ܘܪܗܛ ܩܕܡܗ܂ ܘܣܠܩ ܠܬܬܐ ܦܟܝܗܬܐ ܕܢܚܙܝܘܗܝ܂ ܡܛܠ ܕܗܟܘܬ ܥܒܪ ܗܘܐ ܝܫܘܥ܂
19:05	ܘܟܕ ܥܒܪ ܝܫܘܥ ܚܙܝܗܝ܂ ܐܡܪ ܐܣܬܪܗܒ ܚܘܬ ܙܟܝ܂ ܝܘܡܢܐ ܓܝܪ ܒܒܝܬܟ ܘܠܐ ܠܝ ܕܐܗܘܐ܂
19:06	ܘܐܣܬܪܗܒ ܢܚܬ ܘܩܒܠܗ ܚܕܝܐܝܬ܂
19:07	ܘܟܕ ܚܙܘ ܗܠܝܢ ܟܠܗܘܢ ܪܛܢܝܢ ܗܘܘ܂ ܕܠܘܬ ܓܒܪܐ ܚܛܝܐ ܥܠ ܕܢܫܪܐ܂
19:08	ܘܩܡ ܙܟܝ ܘܐܡܪ ܠܡܪܢ܂ ܗܐ ܡܪܝ ܦܠܓܘܬ ܢܟܣ̈ܝ ܝܗܒ ܐܢܐ ܠܡܣ̈ܟܢܐ܂ ܘܟܠ ܕܓܠܙܬ ܚܕ ܒܐܪܒ̈ܥܐ ܦܪܥ ܐܢܐ܂
19:09	ܐܡܪ ܠܗ ܝܫܘܥ ܝܘܡܢܐ ܗܘܘ ܚܝ̈ܐ ܒܒܝܬܐ ܗܢܐ܂ ܘܐܦ ܗܢܐ ܒܪܗ ܗܘ ܕܐܒܪܗܡ܂
19:10	ܘܕܐܬܐ ܒܪܗ ܕܐܢܫܐ ܕܢܒܥܐ ܘܢܚܐ ܠܡܕܡ ܕܐܒܝܕ ܗܘܐ܀
19:11	ܘܟܕ ܫܡܥܝܢ ܗܘܘ ܗܠܝܢ܂ ܐܘܣܦ ܠܡܐܡܪ ܡܬܠܐ܂ ܡܛܠ ܕܩܪܝܒ ܗܘܐ ܠܡܥܠ ܠܐܘܪܫܠܡ܂ ܘܣܒܪܝܢ ܗܘܘ ܕܒܗܝ ܫܥܬܐ ܥܬܝܕܐ ܗܘܬ ܕܬܬܓܠܐ ܡܠܟܘܬܗ ܕܐܠܗܐ܂
19:12	ܐܡܪ ܠܗܘܢ ܓܒܪܐ ܚܕ ܒܪ ܛܘܗܡܐ ܪܒܐ܂ ܐܙܠ ܠܐܬܪܐ ܪܚܝܩܐ ܠܡܣܒ ܡܠܟܘܬܐ ܘܠܡܗܦܟ܂
19:13	ܘܩܪܐ ܠܥܣܪܐ ܥܒ̈ܕܘܗܝ܂ ܘܝܗܒ ܠܗܘܢ ܥ̈ܣܪܐ ܡ̈ܢܝܢ܂ ܘܐܡܪ ܠܗܘܢ ܐܬܗܦܟܘ ܒܗܘܢ ܥܕ ܐܬܐ ܐܢܐ܂
19:14	ܘܒ̈ܢܝ ܡܕܝܢܬܗ ܣܢܝܢ ܗܘܘ ܠܗ܂ ܘܫܕܪܘ ܐܝ̈ܙܓܕܐ ܒܬܪܗ ܘܐܡܪܝܢ ܠܗ܂ ܠܐ ܨܒܝܢ ܚܢܢ ܕܢܡܠܟ ܥܠܝܢ ܗܢܐ܂
19:15	ܘܟܕ ܢܣܒ ܡܠܟܘܬܐ ܘܗܦܟ܂ ܐܡܪ ܕܢܩܪܘܢ ܠܗ ܠܗܢܘܢ ܥܒ̈ܕܘܗܝ ܕܝܗܒ ܗܘܐ ܠܗܘܢ ܟܣܦܐ܂ ܕܢܕܥ ܡܢܐ ܐܬܬܓܪܘ܂
19:16	ܘܐܬܐ ܩܕܡܝܐ ܘܐܡܪ܂ ܡܪܝ ܡܢܝܟ ܥ̈ܣܪܐ ܡ̈ܢܝܢ ܐܘܬܪ܂
19:17	ܐܡܪ ܠܗ ܐܝܘ ܥܒܕܐ ܛܒܐ ܕܒܩܠܝܠ ܐܫܬܟܚܬ ܡܗܝܡܢ܂ ܬܗܘܐ ܫܠܝܛ ܥܠ ܥ̈ܣܪܐ ܟܪ̈ܟܝܢ܂
19:18	ܘܐܬܐ ܕܬ̈ܪܝܢ ܐܡܪ ܠܗ܂ ܡܪܝ ܡܢܝܟ ܚܡ̈ܫܐ ܡ̈ܢܝܢ ܥܒܕ܂
19:19	ܐܡܪ ܠܗ ܐܦ ܠܗܘ ܘܐܦ ܐܢܬ ܬܗܘܐ ܫܠܝܛ ܥܠ ܚܡ̈ܫܐ ܟܪ̈ܟܝܢ܂
19:20	ܘܐܬܐ ܐܚܪܢܐ ܘܐܡܪ܂ ܗܐ ܡܢܝܟ ܗܘ ܕܐܝܬ ܗܘܐ ܠܘܬܝ܂ ܟܕ ܣܝܡ ܒܣܕܘܢܐ܂
19:21	ܕܚܠܬ ܓܝܪ ܡܢܟ ܕܓܒܪܐ ܐܢܬ ܩܫܝܐ܂ ܕܫܩܠ ܐܢܬ ܡܕܡ ܕܠܐ ܣܡܬ܂ ܘܚܨܕ ܐܢܬ ܡܕܡ ܕܠܐ ܙܪܥܬ܂
19:22	ܐܡܪ ܠܗ ܡܪܗ ܡܢ ܦܘܡܟ ܐܕܘܢܟ ܥܒܕܐ ܒܝܫܐ ܕܠܐ ܡܗܝܡܢ܂ ܝܕܥ ܗܘܝܬ ܠܝ ܕܓܒܪܐ ܐܢܐ ܩܫܝܐ܂ ܘܫܩܠ ܐܢܐ ܡܕܡ ܕܠܐ ܣܡܬ܂ ܘܚܨܕ ܐܢܐ ܡܕܡ ܕܠܐ ܙܪܥܬ܂
19:23	ܐܝܟܘ ܠܐ ܐܪܡܝܬ ܟܣܦܝ ܥܠ ܦܬܘܪܐ܂ ܘܐܢܐ ܕܝܢ ܐܬܝܬ ܬܒܥܬ ܕܝܠܝ ܒܪܒ̈ܝܬܗ܂
19:24	ܘܐܡܪ ܠܗܢܘܢ ܕܩܝܡܝܢ ܠܘܬܗ܂ ܣܒܘ ܡܢܗ ܡܢܝܐ܂ ܘܗܒܘܗܝ ܠܗ݀ܘ ܕܐܝܬ ܠܘܬܗ ܥ̈ܣܪܐ ܡ̈ܢܝܢ܂
19:26	ܐܡܪܢܐ ܠܟܘܢ ܓܝܪ ܕܟܠ ܐܢܫ ܕܐܝܬ ܠܗ ܢܬܝܗܒ ܠܗ ܘܢܬܬܘܣܦ ܠܗ܂ ܘܡܢ ܕܠܝܬ ܠܗ ܐܦ ܗܘ ܕܣܒܪ ܕܐܝܬ ܠܗ ܢܬܢܣܒ ܡܢܗ܂
19:27	ܒܪܡ ܕܝܢ ܐܝܬܘ ܠܗܪܟܐ ܠܗܢܘܢ ܒ̈ܥܠܕܒܒܝ܂ ܐܝܠܝܢ ܕܠܐ ܨܒܘ ܕܐܗܘܐ ܥܠܝܗܘܢ ܡܠܟܐ܂ ܘܩܛܠܘ ܐܢܘܢ ܩܕܡܝ܂
19:28	ܘܟܕ ܐܡܪ ܗܠܝܢ ܢܦܩܘ ܡܢ ܬܡܢ܀ ܘܟܕ ܣܠܩ ܗܘܐ ܠܐܘܪܫܠܡ܂
19:29	ܘܡܛܝ ܠܒܝܬ ܦ̈ܓܐ ܘܠܒܝܬ ܥܢܝܐ܂ ܘܡܛܝ ܠܘܬ ܛܘܪܐ ܕܡܬܩܪܐ ܕܒܝܬ ܙܝ̈ܬܐ܂ ܫܕܪ ܠܬܪ̈ܝܢ ܡܢ ܬܠܡ̈ܝܕܘܗܝ܂
19:30	ܘܐܡܪ ܠܗܘܢ ܙܠܘ ܠܩܪܝܬܐ ܗܝ ܕܠܩܘܒܠܢ܂ ܘܟܕ ܥܠܝܢ ܐܢܬܘܢ܂ ܗܐ ܡܫܟܚܝܢ ܐܢܬܘܢ ܥܝܠܐ ܟܕ ܐܣܝܪ܂ ܕܐܢܫ ܠܐ ܪܟܒ ܥܠܘܗܝ܂ ܫܪܘ ܐܝܬܐܘܗܝ܂
19:31	ܘܐܢ ܐܢܫ ܡܫܐܠ ܠܟܘܢ ܠܡܢܐ ܫܪܝܢ ܐܢܬܘܢ ܠܗ܂ ܐܡܪܘ ܠܗ ܠܡܪܗ ܡܬܒܥܐ܂
19:32	ܘܐܙܠܘ ܘܐܫܟܚܘ ܗܟܢܐ܂
19:33	ܘܟܕ ܫܐܠܘ ܐܢܘܢ܂

19:34	ܐܬܝܒܘ ܐܢܘܢ ܦܬܓܡܐ ܕܠܡܪܗ ܡܬܒܥܐ܂

19:35	ܘܐܝܬܝܘܗܝ ܠܥܝܠܐ ܠܘܬ ܝܫܘܥ܂ ܘܐܪܡܝܘ ܥܠܘܗܝ ܡܪ̈ܛܘܛܝܗܘܢ܂ ܘܐܪܟܒܘܗܝ ܠܝܫܘܥ܂
19:36	ܘܟܕ ܪܕܐ ܗܘܐ܂ ܦܪܣܝܢ ܗܘܘ ܡܪܛ̈ܘܛܝܗܘܢ ܒܐܘܪܚܐ܂
19:37	ܘܟܕ ܩܪܒܘ ܠܡܚܬܬܐ ܕܛܘܪܐ ܕܒܝܬ ܙܝ̈ܬܐ܂ ܫܪܝܘ ܟܠܗ ܟܢܫܐ ܚܕܝܢ ܗܘܘ ܘܡܫܒܚܝܢ ܠܐܠܗܐ܂ ܒܩܠܐ ܪܡܐ ܥܠ ܟܠ ܡܕܡ ܕܚܙܘ܂
19:38	ܘܐܡܪܝܢ ܗܘܘ ܒܪܝܟ ܗܘ ܡܠܟܐ ܕܐܬܐ ܒܫܡܗ ܕܡܪܝܐ܂ ܫܠܡܐ ܒܫܡܝܐ ܘܬܫܒܘܚܬܐ ܒܡܪܘܡܐ܂
19:39	ܐܡܪܝܢ ܠܗ ܐܢܫܐ ܡܢ ܦܪܝ̈ܫܐ ܡܢ ܒܝܢܝ ܗܘ ܟܢܫܐ܂ ܪܒܢ ܟܐܝ ܒܗܘܢ ܕܠܐ ܢܩܥܘܢ܂
19:40	ܐܡܪ ܠܗܘܢ ܐܡܝܢ ܐܡܪ ܐܢܐ ܠܟܘܢ܂ ܕܐܢ ܗܠܝܢ ܢܫܬܩܘܢ ܟܐ̈ܦܐ ܗܠܝܢ ܢܩܥܝܢ܂
19:41	ܘܟܕ ܩܪܒ ܘܚܙܐ ܠܡܕܝܢܬܐ ܒܟܐ ܥܠܝܗ
19:42	ܘܐܡܪ܂ ܕܐܦܢ ܒܗܢܐ ܝܘܡܐ ܝܕܥܬܝ ܕܝܢ ܫܠܡܟܝ܂ ܐܠܐ ܫܠܡܐ ܐܬܟܣܝ ܠܗ ܡܢ ܥ̈ܝܢܝܟܝ܂
19:43	ܢܐܬܘܢ ܕܝܢ ܝܘܡܬܐ ܕܢܚܕܪܘܢܟܝ ܒܥܠܕ̈ܒܒܝܟܝ܂ ܘܢܐܠܨܘܢܟܝ ܡܢ ܟܘܠ ܕܘܟܐ܂
19:44	ܘܢܣܚܦܘܢܟܝ ܥܠ ܐܪܥܐ܂ ܘܠܒ̈ܢܝܟܝ ܒܓܘܟܝ܂ ܘܠܐ ܢܫܒܩܘܢ ܒܟܝ ܟܐܦ ܥܠ ܟܐܦ܂ ܚܠܦ ܕܠܐ ܝܕܥܬܝ ܝܘܡܐ ܕܪܒܘܬܟܝ܀
19:45	ܘܟܕ ܥܠ ܠܗܝܟܠܐ܂ ܫܪܝ ܠܡܦܩܘ ܠܐܝܠܝܢ ܕܡܙܒܢܝܢ ܒܗ ܙܒܢܐ܂
19:46	ܘܐܡܪ ܟܬܝܒ ܗܘ ܕܒܝܬܝ ܒܝܬ ܨܠܘܬܐ ܗܘ ܠܟܠܗܘܢ ܥ̈ܡܡܐ܂ ܐܢܬܘܢ ܕܝܢ ܥܒܕܬܘܢܝܗܝ ܡܥܪܬܐ ܕܓ̈ܝܣܐ܂
19:47	ܘܡܠܦ ܗܘܐ ܟܠܝܘܡ ܒܗܝܟܠܐ܂ ܘܪ̈ܒܝ ܟܗ̈ܢܐ ܘܣ̈ܦܪܐ ܘܪ̈ܫܐ ܕܥܡܐ ܒܥܝܢ ܗܘܘ ܠܡܘܒܕܘܬܗ܂
19:48	ܘܠܐ ܡܫܟܚܝܢ ܗܘܘ ܡܢܐ ܢܥܒܕܘܢ ܠܗ܂ ܟܠܗ ܓܝܪ ܥܡܐ ܬܠܐ ܗܘܐ ܒܗ ܠܡܫܡܥܗ܀