The Comprehensive Aramaic Lexicon

20:01	ܘܗܘܐ ܒܚܕ ܡܢ ܝܘܡ̈ܬܐ܂ ܟܕ ܡܠܦ ܗܘܐ ܒܗܝܟܠܐ ܠܥܡܐ܂ ܘܡܣܒܪ ܗܘܐ܂ ܩܡܘ ܥܠܘܗܝ ܪܒ̈ܝ ܟܗ̈ܢܐ ܘܣ̈ܦܪܐ ܕܥܡܐ ܥܡ ܩܫ̈ܝܫܐ
20:02	ܘܐܡܪܝܢ ܠܗ܂ ܐܡܪ ܠܢ ܒܐܝܢܐ ܫܘܠܛܢ ܗܠܝܢ ܥܒܕ ܐܢܬ܂ ܐܘ ܡܢܘ ܝܗܒ ܠܟ ܫܘܠܛܢܐ ܗܢܐ܂
20:03	ܐܡܪ ܠܗܘܢ ܐܦ ܐܢܐ ܐܫܐܠܟܘܢ ܐܡܪܘ ܠܝ܂
20:04	ܡܥܡܘܕܝܬܗ ܕܝܘܚܢܢ ܡܢ ܫܡܝܐ ܗܘܬ ܐܘ ܡܢ ܒ̈ܢܝ ܐܢܫܐ܂
20:05	ܗܢܘܢ ܕܝܢ ܡܬܚܫܒܝܢ ܗܘܘ ܒܝܢܬܗܘܢ ܘܐܡܪܝܢ܂ ܐܢ ܢܐܡܪ ܕܡܢ ܫܡܝܐ ܗܝ ܢܐܡܪ ܠܢ܂ ܘܐܝܟܘ ܠܐ ܗܝܡܢܬܘܢܝܗܝ܂
20:06	ܘܐܢ ܢܐܡܪ ܕܡܢ ܒ̈ܢܝ ܐܢܫܐ ܗܝ܂ ܪܓܡܝܢ ܠܢ ܟܘܠܗ ܥܡܐ܂ ܡܦܣܝܢ ܗܘܘ ܓܝܪ ܥܠ ܝܘܚܢܢ ܕܢܒܝܐ ܗܘ܂
20:07	ܐܡܪܝܢ ܠܗ ܠܐ ܝܕܥܝܢ ܐܢܚܢܢ ܡܢ ܐܝܡܟܐ ܗܝ܂
20:08	ܐܡܪ ܠܗܘܢ ܝܫܘܥ܂ ܘܐܦܠܐ ܐܢܐ ܐܡܪܢܐ ܠܟܘܢ ܒܐܝܢܐ ܫܘܠܛܢܐ ܥܒܕ ܐܢܐ ܗܠܝܢ܀

20:09	ܘܫܪܝ ܕܢܐܡܪ ܠܗܘܢ ܡܬܠܐ ܗܢܐ܂ ܓܒܪܐ ܚܕ ܢܨܒ ܟܪܡܐ܂ ܘܐܘܚܕܗ ܠܦܠ̈ܚܐ ܘܥܢܕ ܙܒܢܐ ܣܓܝܐܐ܂

20:10	ܘܒܚܕ ܡܢ ܙܒ̈ܢܐ܂ ܫܕܪ ܥܒܕܗ ܠܘܬ ܦܠܚ̈ܐ ܕܢܬܠܘܢ ܠܗ ܡܢ ܦܐܪ̈ܘܗܝ ܕܟܪܡܐ܂ ܘܡܚܐܘܗܝ ܘܫܕܪܘܗܝ ܟܕ ܣܪܝܩ܂
20:11	ܘܐܘܣܦ ܘܫܕܪ ܠܥܒܕܗ ܐܚܪܢܐ܂ ܘܐܦ ܠܗܢܐ ܨܠܦܘܗܝ
20:12	ܘܐܦܩܘܗܝ܂
20:13	ܐܡܪ ܡܪܐ ܟܪܡܐ ܡܢܐ ܐܥܒܕ܂ ܐܫܕܪ ܠܒܪܝ ܚܒܝܒܐ܂ ܟܒܪ ܢܬܟܚܕܘܢ ܡܢܗ܂
20:14	ܟܕ ܚܙܘܘܗܝ ܕܝܢ ܦܠ̈ܚܐ܂ ܡܬܚܫܒܝܢ ܗܘܘ ܘܐܡܪܝܢ܂ ܗܢܘ ܝܪܬܐ܂ ܬܘ ܢܩܛܠܝܘܗܝ ܘܬܗܘܐ ܝܪܬܘܬܐ ܕܝܠܢ܂
20:15	ܘܐܦܩܘܗܝ ܠܒܪ ܡܢ ܟܪܡܐ ܘܩܛܠܘܗܝ܂ ܡܢܐ ܢܥܒܕ ܠܗܘܢ ܡܪܐ ܟܪܡܐ܂
20:16	ܢܐܬܐ ܘܢܘܒܕ ܠܦܠ̈ܚܐ ܗܢܘܢ܂ ܘܢܬܠ ܟܪܡܐ ܠܐܚ̈ܪܢܐ܂ ܟܕ ܫܡܥܘ ܕܝܢ ܗܠܝܢ܂ ܐܡܪܝܢ ܚܣ ܘܠܐ ܢܗܘܐ܂
20:17	ܗܘ ܕܝܢ ܚܪ ܒܗܘܢ ܘܐܡܪ܂ ܘܡܢܘ ܥܘܕ ܗܢܐ ܕܟܬܝܒ܂ ܕܟܐܦܐ ܕܐܣܠܝܘ ܒ̈ܢܝܐ܂ ܗܝ ܗܘܬ ܠܪܫܗ ܕܒܢܝܢܐ܂
20:18	ܟܠ ܐܢܫ ܓܝܪ ܕܢܦܠ ܥܠ ܗܝ ܟܐܦܐ ܢܬܪܥܥ܂ ܘܟܘܠ ܡܢ ܕܬܦܠ ܥܠܘܗܝ ܬܫܚܩܝܘܗܝ܂
20:19	ܘܒܥܘ ܗܘܘ ܪܒ̈ܝ ܟܗ̈ܢܐ ܘܣ̈ܦܪܐ ܕܢܪܡܘܢ ܥܠܘܗܝ ܐܝ̈ܕܝܐ܂ ܒܗ݀ ܒܗܝ ܫܥܬܐ܂ ܝܕܥܘ ܗܘܘ ܓܝܪ ܕܥܠܝܗܘܢ ܐܡܪ܂ ܘܕܚܠܘ ܡܢ ܥܡܐ܂
20:20	ܘܒܬܪܟܢ ܫܕܪܘ ܓܫܘ̈ܫܐ ܕܢܬܕܡܘܢ ܒܙܕܝ̈ܩܐ܂ ܕܢܐܚܕܘܢܗ ܒܡܠܬܐ ܘܢܫܠܡܘܢܗ ܠܗܓܡܘܢܐ܂
20:21	ܘܫܐܠܘܗܝ ܘܐܡܪܝܢ ܠܗ܂ ܡܠܦܢܐ܂ ܝܕܥܝܢ ܚܢܢ ܕܬܪܝܨܐܝܬ ܡܡܠܠ ܐܢܬ ܘܡܠܦ ܐܢܬ܂ ܘܠܐ ܢܣܒ ܐܢܬ ܒܐ̈ܦܐ ܕܐܢܫ܂ ܐܠܐ ܒܩܘܫܬܐ ܡܠܬܐ ܕܐܠܗܐ ܡܠܦ ܐܢܬ܂
20:22	ܫܠܝܛ ܠܢ ܠܡܬܠ ܟܣܦ ܪܫܐ ܠܩܣܪ ܐܘ ܠܐ܂
20:23	ܘܗܘ ܐܣܬܟܠ ܒܝܫܘܬܗܘܢ ܘܐܡܪ ܠܗܘܢ܂ ܡܢܐ ܡܢܣܝܢ ܐܢܬܘܢ ܠܝ܂
20:24	ܚܘܐܘܢܝ ܕܝܢܪܐ܂ ܨܠܡܐ ܘܟܬ̈ܝܒܬܐ ܕܡܢ ܐܝܬ ܥܠܘܗܝ܂ ܘܚܘܝܘܗܝ ܘܐܡܪܝܢ ܠܗ ܕܩܣܪ܂
20:25	ܐܡܪ ܠܗܘܢ ܗܒܘ ܕܩܣܪ ܠܩܣܪ܂ ܘܕܐܠܗܐ ܠܐܠܗܐ܂
20:26	ܘܠܐ ܐܫܟܚܘ ܠܡܐܚܕ ܡܠܬܗ ܩܕܡ ܥܡܐ܂ ܘܐܬܕܡܪܘ ܥܠ ܦܬܓܡܗ ܘܫܬܩܘ ܠܗܘܢ܀
20:27	ܘܩܪܒܘ ܐܢ̈ܫܝܢ ܡܢ ܙܕܘܩ̈ܝܐ܂ ܗܢܘܢ ܕܐܡܪܝܢ ܕܠܝܬ ܩܝܡܬܐ܂ ܘܫܐܠܘܗܝ
20:28	ܘܐܡܪܝܢ ܠܗ܂ ܡܠܦܢܐ ܡܘܫܐ ܟܬܒ ܠܢ܂ ܕܐܢ ܢܡܘܬ ܐܚܘܗܝ ܕܐܢܫ ܟܕ ܠܝܬ ܠܗ ܒ̈ܢܝܐ܂ ܘܢܫܒܘܩ ܐܢܬܬܐ܂ ܢܣܒ ܐܢܬܬܗ ܐܚܘܗܝ܂ ܕܢܩܝܡ ܙܪܥܐ ܠܐܚܘܗܝ܂
20:29	ܫ̈ܒܥܐ ܐ̈ܚܝܢ ܐܝܬ ܗܘܘ܂ ܩܕܡܝܐ ܢܣܒ ܐܢܬܬܐ ܘܡܝܬ ܕܠܐ ܒ̈ܢܝܢ܂
20:30	ܘܢܣܒܗ݀ ܐܚܘܗܝ ܠܐܢܬܬܐ ܗܝ܂ ܐܦ ܗܘ ܡܝܬ ܕܠܐ ܒ̈ܢܝܢ܂
20:31	ܐܦ ܗܘ ܕܬܠܬܐ ܢܣܒܗ݀܂ ܘܐܦ ܫܒ̈ܥܬܝܗܘܢ ܢܣܒܘܗ݀܂ ܘܡܝܬܘ ܟܕ ܠܐ ܫܒܩܘ ܒ̈ܢܝܐ܂
20:32	ܘܡܝܬܬ ܐܦ ܗܝ ܐܢܬܬܐ܂
20:33	ܒܩܝܡܬܐ ܕܐܝܢܐ ܡܢܗܘܢ ܬܗܘܐ܂ ܗܐ ܓܝܪ ܠܫܒ̈ܥܬܝܗܘܢ ܗܘܬ܂
20:34	ܐܡܪ ܠܗܘܢ ܝܫܘܥ܂ ܒܢ̈ܘܗܝ ܕܥܠܡܐ ܗܢܐ ܝܠܕܝܢ ܘܡܘܠܕܝܢ܂ ܘܢܣܒܝܢ ܢܫ̈ܐ ܘܗܘܝܢ ܢܫ̈ܐ ܠܓܒ̈ܪܐ܂
20:35	ܐܝܠܝܢ ܕܝܢ ܕܠܗܘ ܥܠܡܐ ܫܘܘ ܠܡܩܒܠܘ܂ ܘܠܗܝ ܩܝܡܬܐ ܕܡܢ ܒܝܬ ܡܝ̈ܬܐ܂ ܠܐ ܓܒܪ̈ܐ ܢܣܒܝܢ ܢܫ̈ܐ܂ ܘܐܦܠܐ ܢܫ̈ܐ ܗܘܝܢ ܠܓܒ̈ܪܐ܂
20:36	ܐܦܠܐ ܠܡܡܬ ܡܫܟܚܝܢ܂ ܐܫܬܘܝܘ ܠܗܘܢ ܓܝܪ ܥܡ ܡ̈ܠܐܟܐ܂ ܐܝܟ ܒ̈ܢܝܐ ܕܐܠܗܐ ܒ̈ܢܝܐ ܕܩܝܡܬܐ܂
20:37	ܥܠ ܡ̈ܝܬܐ ܕܝܢ ܕܢܩܘܡܘܢ܂ ܘܐܦ ܡܘܫܐ ܒܕܩ܂ ܟܕ ܡܠܠ ܥܡܗ ܐܠܗܐ ܡܢ ܣܢܝܐ ܘܐܡܪ܂ ܡܪܝܐ ܐܠܗܗ ܕܐܒܪܗܡ܂ ܘܐܠܗܗ ܕܐܝܣܚܩ܂ ܘܐܠܗܗ ܕܝܥܩܘܒ܂
20:38	ܘܗܐ ܐܠܗܐ ܠܐ ܗܘܐ ܕܡ̈ܝܬܐ܂ ܐܠܐ ܕܚ̈ܝܐ܂ ܟܠܗܘܢ ܓܝܪ ܚܝ̈ܝܢ ܐܢܘܢ ܠܗ܀
20:39	ܐܡܪܝܢ ܠܗ ܐ̈ܢܫܝܢ ܡܢ ܣ̈ܦܪܐ܂ ܡܠܦܢܐ ܫܦܝܪ ܐܡܪ ܐܢܬ܂
20:40	ܘܬܘܒ ܠܐ ܐܡܪܚܘ ܠܡܫܐܠܘܬܗ ܡܕܡ܀
20:41	ܘܐܡܪ ܗܘܐ ܠܗܘܢ܂ ܐܝܟܢܐ ܐܡܪܝܢ ܣܦ̈ܪܐ ܥܠ ܡܫܝܚܐ ܕܒܪܗ ܗܘ ܕܕܘܝܕ܂
20:42	ܘܗܘ ܕܘܝܕ ܐܡܪ ܒܟܬܒܐ ܕܡ̈ܙܡܘܪܐ܂ ܕܐܡܪ ܡܪܝܐ ܠܡܪܝ ܕܬܒ ܠܟ ܡܢ ܝܡܝܢܝ܂
20:43	ܥܕܡܐ ܕܐܣܝܡ ܒܥܠܕ̈ܒܒܝܟ ܬܚܝܬ ܪ̈ܓܠܝܟ܂
20:44	ܐܢ ܗܟܝܠ ܕܘܝܕ ܡܪܝ ܩܪܐ ܠܗ܂ ܐܝܟܢܐ ܒܪܗ ܗܘ܀
20:45	ܘܟܕ ܫܡܥ ܗܘܐ ܟܠܗ ܥܡܐ ܐܡܪ ܠܬܠܡܝ̈ܕܘܗܝ܂
20:46	ܐܙܕܗܪܘ ܡܢ ܣܦ̈ܪܐ ܕܨܒܝܢ ܠܡܗܠܟܘ ܒܐܣ̈ܛܘܐ܂ ܘܪܚܡܝܢ ܫܠܡܐ ܒܫܘ̈ܩܐ܂ ܘܡ̈ܘܬܒܐ ܡܝ̈ܩܪܐ ܒܟܢ̈ܘܫܬܐ܂ ܘܪܝܫ ܣ̈ܡܟܐ ܒܚܫ̈ܡܝܬܐ܂
20:47	ܘܐܟܠܝܢ ܒܬ̈ܐ ܕܐܪ̈ܡܠܬܐ܂ ܒܥܠܬܐ ܕܡܘܪܟܝܢ ܨ̈ܠܘܬܗܘܢ܂ ܘܗܢܘܢ ܢܩܒܠܘܢ ܕܝܢܐ ܝܬܝܪܐ܀