The Comprehensive Aramaic Lexicon

21:01	ܘܐܪܝܡ ܥܝ̈ܢܘܗܝ ܘܚܙܐ ܠܥܬ̈ܝܪܐ ܕܪܡܝܢ ܗܘܘ ܩܘܪ̈ܒܢܝܗܘܢ ܒܝܬ ܓܙܐ܂
21:02	ܘܚܙܐ ܘܐܦ ܐܪܡܠܬܐ ܡܣܟܢܬܐ ܕܐܪܡܝܬ ܫܡ̈ܘܢܐ ܬܪ̈ܝܢ܂
21:03	ܐܡܪ ܩܘܫܬܐ ܐܡܪܢܐ ܠܟܘܢ܂ ܕܗܕܐ ܐܪܡܠܬܐ ܡܣܟܢܬܐ ܐܪܡܝܬ܂ ܝܬܝܪ ܡܢ ܟܠܗܘܢ܂
21:04	ܗܠܝܢ ܓܝܪ ܡܢ ܡܐ ܕܝܬܝܪ ܗܘܐ ܠܗܘܢ ܐܪܡܝܘ ܒܝܬ ܓܙܐ ܩܘܪܒܢܐ܂ ܗܕܐ ܕܝܢ ܡܢ ܡܐ ܕܚܣܝܪ ܠܗ݀ ܟܠ ܕܩܢܝܐ ܗܘܬ ܐܪܡܝܬܗ܀
21:05	ܘܟܕ ܐܡܪܘ ܐ̈ܢܫܝܢ ܥܠ ܗܝܟܠܐ ܕܒ̈ܟܐܦܐ ܫܦܝܪ̈ܬܐ ܘܒܩ̈ܘܪܒܢܐ ܡܨܒܬ܂ ܐܡܪ
21:06	ܚܙܝܢ ܐܢܬܘܢ ܗܠܝܢ܂ ܢܐܬܘܢ ܝܘ̈ܡܬܐ ܕܠܐ ܬܫܬܒܩ ܗܪܟܐ ܟܐܦ ܥܠ ܟܐܦ ܕܠܐ ܬܣܬܬܪ܀
21:07	ܘܫܐܠܘܗܝ ܗܘܘ ܘܐܡܪܝܢ ܠܗ܂ ܡܠܦܢܐ ܐܡܬܝ ܗܠܝܢ ܢܗܘܝܢ܂ ܘܡܢܐ ܐܬܐ ܡܐ ܕܡܫܪܝܢ ܗܠܝܢ ܕܢܗܘܝܢ܂
21:08	ܗܘ ܕܝܢ ܐܡܪ ܠܗܘܢ܂ ܚܙܘ ܕܠܡܐ ܬܛܥܘܢ܂ ܣ̈ܓܝܐܐ ܓܝܪ ܢܐܬܘܢ ܒܫܡܝ ܘܢܐܡܪܘܢ ܕܐܢܐ ܐܢܐ܂ ܘܙܒܢܐ ܩܪܒ܂ ܠܐ ܬܐܙܠܘܢ ܒܬܪܗܘܢ܂
21:09	ܘܡܐ ܕܫܡܥܝܢ ܐܢܬܘܢ ܩܪܒܐ ܘܫܓܘܫܝܐ ܠܐ ܬܕܚܠܘܢ܂ ܥܬܝܕܢ ܐܢܝܢ ܓܝܪ ܠܘܩܕܡ ܗܠܝܢ ܠܡܗܘܐ܂ ܐܠܐ ܠܐ ܥܕܟܝܠ ܡܛܬ ܚܪܬܐ܂
21:10	ܢܩܘܡ ܓܝܪ ܥܡܐ ܥܠ ܥܡܐ ܘܡܠܟܘ ܥܠ ܡܠܟܘ܂
21:11	ܘܙܘ̈ܥܐ ܪܘܪ̈ܒܐ ܒܕܘܟܐ ܕܘܟܐ܂ ܘܡ̈ܘܬܢܐ ܘ̈ܟܦܢܐ܂ ܘܢܗܘܝܢ ܕܚ̈ܠܬܐ ܡܢ ܫܡܝܐ܂ ܘܢܬܚܙܝܢ ܐܬ̈ܘܬܐ ܪ̈ܘܪܒܬܐ܂ ܘܣܬ̈ܘܐ ܪܘܪ̈ܒܐ܂
21:12	ܩܕܡ ܗܠܝܢ ܕܝܢ ܟܠܗܝܢ܂ ܢܪܡܘܢ ܥܠܝܟܘܢ ܐܝ̈ܕܝܐ ܘܢܪܕܦܘܢܟܘܢ܂ ܘܢܫܠܡܘܢܟܘܢ ܠܟܢ̈ܘܫܬܐ܂ ܘܠܒܝܬ ܐ̈ܣܝܪܐ܂ ܘܢܩܪܒܘܢܟܘܢ ܩܕܡ ܡ̈ܠܟܐ ܘ̈ܗܓܡܘܢܐ ܡܛܠ ܫܡܝ܂
21:13	ܬܗܘܐ ܠܟܘܢ ܕܝܢ ܣܗܕܘܬܐ ܗܕܐ܂
21:14	ܘܣܝܡܘ ܒ̈ܠܒܝܟܘܢ܂ ܕܠܐ ܗܘܝܬܘܢ ܡܬܝܠܦܝܢ ܠܡܦܩ ܪܘܚܐ܂
21:15	ܐܢܐ ܓܝܪ ܐܬܠ ܠܟܘܢ ܦܘܡܐ ܘܚܟܡܬܐ܂ ܐܝܕܐ ܕܠܐ ܡܫܟܚܝܢ ܕܢܩܘܡܘܢ ܠܩܘܒܠܗ݀ ܟܠܗܘܢ ܒܥܠܕܒ̈ܒܝܟܘܢ܂
21:16	ܢܫܠܡܘܢܟܘܢ ܐܢ̈ܫܝܟܘܢ ܘܐ̈ܚܝܟܘܢ ܘܐܚ̈ܝܢܝܟܘܢ ܘܪܚ̈ܡܝܟܘܢ܂ ܘܢܡܝܬܘܢ ܡܢܟܘܢ܂
21:17	ܘܬܗܘܘܢ ܣܢܝܐܝܢ ܡܢ ܟܠ ܐܢܫ ܡܛܠ ܫܡܝ܂
21:19	ܒܡܣܝܒܪܢܘܬܐ ܕܝܢ ܬܩܢܘܢ ܢܦܫܟܘܢ܂
21:20	ܡܐ ܕܚܙܝܬܘܢ ܕܝܢ ܠܐܘܪܫܠܡ ܕܚܕܝܪ ܠܗ݀ ܚܝܠܐ܂ ܕܥܘ ܕܩܪܒ ܠܗ ܚܘܪܒܗ݀܂
21:21	ܘܐܝܠܝܢ ܕܒܝܗܘܕ ܐܢܘܢ ܢܥܪܩܘܢ ܠܛܘܪܐ܂ ܘܕܒܓܘܗ݀ ܢܦܩܘܢ ܡܢܗ݀܂ ܘܐܝܠܝܢ ܕ̈ܒܩܘܪܝܐ ܠܐ ܢܥܠܘܢ ܠܗ݀܂
21:22	ܡܛܠ ܕܝ̈ܘܡܬܐ ܐܢܘܢ ܕܬܒܥܬܐ܂ ܕܢܫܠܡ ܟܠ ܡܐ ܕܟܬܝܒ܂
21:23	ܘܝ ܕܝܢ ܠܐܝܠܝܢ ܕܒ̈ܛܢܢ ܘܠܐܝܠܝܢ ܕܡ̈ܝܢܩܢ ܒܗܢܘܢ ܝܘܡ̈ܬܐ܂ ܢܗܘܐ ܓܝܪ ܐܘܠܨܢܐ ܪܒܐ ܒܐܪܥܐ܂ ܘܪܘܓܙܐ ܚܣܝܢܐ ܥܠ ܥܡܐ ܗܢܐ܂
21:24	ܘܢܦܠܘܢ ܒܦܘܡܐ ܕܚܪܒܐ܂ ܘܢܫܬܒܘܢ ܠܟܠܗܘܢ ܥܡ̈ܡܐ܂ ܘܐܪܫܠܡ ܬܗܘܐ ܡܬܕܝܫܐ ܡܢ ܟܠܗܘܢ ܥܡ̈ܡܐ܂ ܥܕܡܐ ܕܢܫܬܠܡܘܢ ܙܒ̈ܢܐ ܕ̈ܥܡܡܐ܂
21:25	ܢܗܘܝܢ ܕܝܢ ܐܬ̈ܘܬܐ ܒܫܡܫܐ ܘܒܣܗܪܐ ܘܒ̈ܟܘܟܒܐ܂ ܘܐܘܠܨܢܐ ܒܐܪܥܐ ܘܦܘܫܟ ܐ̈ܝܕܝܐ ܕܥܡ̈ܡܐ܂ ܘܩܠܐ ܕܕܡܐ ܠܕܝܡܐ܂
21:26	ܘܙܘܥܐ ܕܡܦܩ ܢܦܫ̈ܬܐ ܕܒ̈ܢܝ ܐܢܫܐ ܡܢ ܕܚܠܬܐ ܕܡܕܡ ܕܥܬܝܕ ܠܡܐܬܐ ܥܠ ܐܪܥܐ܂ ܘܢܬܙܝܥܘܢ ܚܝ̈ܠܐ ܕܫܡܝܐ܂
21:27	ܘܗܝܕܝܢ ܢܚܙܘܢܝܗܝ ܠܒܪܗ ܕܐܢܫܐ ܟܕ ܐܬܐ ܒܥ̈ܢܢܐ܂ ܒܚܝܠܐ ܣܓܝܐܐ ܘܒܫܘܒܚܐ܂
21:28	ܡܐ ܕܫܪܝ ܕܝܢ ܗܠܝܢ ܕܢܗܘܝܢ܂ ܐܕܝܩܘ ܘܐܪܝܡܘ ܪ̈ܫܝܟܘܢ܂ ܡܛܠ ܕܩܪܒ ܠܗ ܦܘܪܩܢܟܘܢ܀
21:29	ܘܐܡܪ ܗܘܐ ܠܗܘܢ ܡܬܠܐ ܗܢܐ܂ ܚܙܘ ܠܬܬܐ ܘܠܟܠܗܘܢ ܐ̈ܝܠܢܐ܂
21:30	ܕܡܐ ܕܫܪܝܘ ܡܦܪܥܝܢ ܘܝܗܒܝܢ ܦܐ̈ܪܝܗܘܢ܂ ܡܣܬܟܠܝܢ ܐܢܬܘܢ ܕܩܪܒ ܠܗ ܩܝܛܐ܂
21:31	ܗܟܢܐ ܐܦ ܐܢܬܘܢ ܡܐ ܕܚܙܝܬܘܢ ܗܠܝܢ ܕܗܘܝܢ܂ ܕܥܘ ܕܩܪܝܒܐ ܗܝ ܡܠܟܘܬܐ ܕܫܡܝܐ܀
21:32	ܐܡܝܢ ܐܡܪܢܐ ܠܟܘܢ ܕܠܐ ܬܥܒܪ ܫܪܒܬܐ ܗܕܐ܂ ܥܕܡܐ ܕܗܠܝܢ ܟܠܗܝܢ ܢܗܘܝܢ܂
21:33	ܫܡܝܐ ܘܐܪܥܐ ܢܥܒܪܘܢ܂ ܘܡ̈ܠܝ ܠܐ ܢܥ̈ܒܪܢ܂
21:34	ܐܙܕܗܪܘ ܕܝܢ ܒܢ̈ܦܫܬܟܘܢ܂ ܕܠܐ ܢܐܩܪܘܢ ܠܒ̈ܘܬܟܘܢ ܒܡܟܘܠܬܐ ܕܒܣܪܐ܂ ܘܒܪܘܝܘܬܐ ܕܚܡܪܐ܂ ܘܒܨܦܬܐ ܕܥܠܡܐ܂ ܘܢܩܘܡ ܥܠܝܟܘܢ ܝܘܡܐ ܗܘ ܡܢ ܬܚܝܬ ܫܠܝܐ܂

21:35	ܐܝܟ ܦܚܐ ܓܝܪ ܢܐܬܐ ܥܠ ܟܠܗܘܢ ܐܝܠܝܢ ܕܝܬܒܝܢ ܥܠ ܦܘܡܗ݀ ܕܐܪܥܐ܂

21:36	ܫܗܪܘ ܗܟܝܠ ܒܟܠܙܒܢ܂ ܘܬܗܘܘܢ ܒܥܝܢ ܕܬܫܘܘܢ ܠܡܥܪܩ ܡܢ ܗܠܝܢ ܕܥ̈ܬܝܕܢ ܠܡܗܘܐ܂ ܘܕܬܩܘܡܘܢ ܩܕܡ ܒܪܗ ܕܐܢܫܐ܀
21:37	ܘܒܐܝܡܡܐ ܡܠܦ ܗܘܐ ܒܗܝܟܠܐ܂ ܘܒ̈ܠܝܠܘܬܐ ܢܦܩ ܗܘܐ ܒܐܬ ܒܛܘܪܐ ܕܡܬܩܪܐ ܕܒܝܬ ܙ̈ܝܬܐ܂
21:38	ܘܟܠܗ ܥܡܐ ܡܩܕܡܝܢ ܗܘܘ ܠܘܬܗ ܠܗܝܟܠܐ ܕܢܫܡܥܘܢܗ܀