The Comprehensive Aramaic Lexicon

22:01	ܘܩܪܒ ܗܘܐ ܥܕܥܕܐ ܕ̈ܦܛܝܪܐ ܕܡܬܩܪܐ ܦܨܚܐ܂
22:02	ܘܒܥܝܢ ܗܘܘ ܪܒ̈ܝ ܟܗ̈ܢܐ ܘܣ̈ܦܪܐ ܐܝܟܢܐ ܢܩܛܠܘܢܗܝ܂ ܕܚܠܝܢ ܗܘܘ ܓܝܪ ܡܢ ܥܡܐ܂
22:03	ܥܠ ܗܘܐ ܕܝܢ ܣܛܢܐ ܒܝܗܘܕܐ ܕܡܬܩܪܐ ܐܣܩܪܝܘܛܐ܂ ܕܐܝܬܘܗܝ ܗܘܐ ܡܢ ܡܢܝܢܐ ܕܬܪܥ̈ܣܪ܂
22:04	ܘܐܙܠ ܡܠܠ ܥܡ ܪܒ̈ܝ ܟܗ̈ܢܐ ܘܣ̈ܦܪܐ ܐܝܟ ܕܢܫܠܡܝܘܗܝ ܠܗܘܢ܂
22:05	ܘܚܕܝܘ ܘܐܫܬܘܕܝܘ ܗܘܘ ܕܢܬܠܘܢ ܠܗ ܟܣܦܐ܂
22:06	ܘܐܫܬܘܕܝ ܠܗܘܢ܂ ܘܒܥܐ ܗܘܐ ܠܗ ܦܠܥܐ ܐܝܟܢܐ ܕܢܫܠܡܝܘܗܝ ܠܗܘܢ܂ ܒܠܥܕܝ ܡܢ ܟܢܫܐ܀
22:07	ܘܟܕ ܡܛܝ ܝܘܡܐ ܕܦܨܚܐ ܕܒܗ ܐܝܬ ܗܘܐ ܥܝܕܐ ܕܢܬܢܟܣ ܦܨܚܐ܂
22:08	ܫܕܪ ܠܟܐܦܐ ܘܠܝܘܚܢܢ ܘܐܡܪ ܠܗܘܢ܂ ܙܠܘ ܛܝܒܘ ܠܢ ܦܨܚܐ ܕܢܠܥܣ܂
22:09	ܐܡܪܝܢ ܠܗ ܗܢܘܢ ܐܝܟܐ ܨܒܐ ܐܢܬ ܕܢܛܝܒ܂
22:10	ܐܡܪ ܠܗܘܢ ܗܐ ܡܐ ܕܥܠܝܢ ܐܢܬܘܢ ܠܡܕܝܢܬܐ܂ ܦܓܥ ܒܟܘܢ ܓܒܪܐ ܕܫܩܝܠ ܓܪܒܐ ܕ̈ܡܝܐ܂ ܙܠܘ ܒܬܪܗ
22:11	ܠܒܝܬܐ ܐܝܢܐ ܕܥܐܠ܂ ܐܡܪܘ ܠܡܪܗ ܕܒܝܬܐ܂ ܪܒܢ ܐܡܪ ܐܝܟܐ ܗܘ ܒܝܬ ܡܫܪܝܐ܂ ܐܝܟܐ ܕܐܟܘܠ ܦܨܚܐ ܥܡ ܬܠܡ̈ܝܕܝ܂
22:12	ܗܐ ܡܚܘܐ ܠܟܘܢ ܥܠܝܬܐ ܚܕܐ ܪܒܬܐ ܕܡܫܘܝܐ܂ ܬܡܢ ܛܝܒܘ܂
22:13	ܘܐܙܠܘ ܐܫܟܚܘ ܐܝܟ ܡܐ ܕܐܡܪ ܠܗܘܢ܂ ܘܛܝܒܘ ܦܨܚܐ܀
22:14	ܘܟܕ ܗܘܐ ܕܝܢ ܥܕܢܐ܂ ܐܣܬܡܟ ܗܘ ܘܫ̈ܠܝܚܘܗܝ ܥܡܗ܂
22:15	ܐܡܪ ܠܗܘܢ܂ ܡܪܓ ܪܓܬܢܝ ܕܐܟܘܠ ܥܡܟܘܢ ܦܨܚܐ ܥܕ ܠܐ ܐܚܫ܂
22:16	ܐܡܪܢܐ ܠܟܘܢ ܓܝܪ ܕܡܟܝܠ ܠܐ ܐܟܠܝܘܗܝ ܥܕܡܐ ܕܢܫܬܠܡ ܒܡܠܟܘܬܗ ܕܐܠܗܐ܀
22:19	ܘܢܣܒ ܠܚܡܐ ܘܐܘܕܝ ܥܠܘܗܝ܂ ܘܩܨܐ ܘܝܗܒ ܠܗܘܢ܂ ܘܐܡܪ ܗܢܘ ܦܓܪܝ ܕܥܠ ܐܦ̈ܝܟܘܢ܂ ܗܟܢܐ ܗܘܝܬܘܢ ܥܒܕܝܢ ܠܕܘܟܪܢܝ܂
22:17	ܘܢܣܒ ܟܣܐ ܘܐܘܕܝ ܥܠܘܗܝ܂ ܘܐܡܪ ܣܒܘ ܗܢܐ ܦܠܓܘ ܒܝܢܬܟܘܢ܂
22:18	ܐܡܪܢܐ ܠܟܘܢ ܕܡܢ ܗܫܐ ܠܐ ܐܫܬܐ ܡܢ ܐܕܫܐ ܗܢܐ ܕܓܦܬܐ܂ ܥܕܡܐ ܕܬܐܬܐ ܡܠܟܘܬܗ ܕܐܠܗܐ܂
22:21	ܒܪܡ ܕܝܢ ܗܐ ܐܝܕܗ ܕܡܫܠܡܢܝ ܥܡܝ ܥܠ ܦܬܘܪܐ܂
22:22	ܘܒܪܗ ܕܐܢܫܐ ܐܙܠ ܐܝܟܢܐ ܕܣܝܡ ܗܘܐ ܥܠܘܗܝ܂ ܒܪܡ ܕܝܢ ܘܝ ܠܗ ܠܗ݀ܘ ܕܒܐܝܕܗ ܡܫܬܠܡ܂
22:23	ܘܫܪܝܘ ܗܘܘ ܕܢܥܩܒܘܢ ܒܝܢܬܗܘܢ܂ ܕܡܢܘ ܟܝ ܗܘ ܕܗܕܐ ܥܬܝܕ ܠܡܣܥܪ܀
22:24	ܘܗܘܐ ܚܪܝܢܐ ܒܝܢܬܗܘܢ ܕܡܢ ܐܝܬ ܒܗܘܢ ܕܪܒ܂
22:25	ܐܡܪ ܠܗܘܢ ܡܪܢ܂ ܡ̈ܠܟܝܗܘܢ ܕܥܡ̈ܡܐ ܡܪܝ̈ܗܘܢ ܐܢܘܢ܂ ܘܐܝܠܝܢ ܕܫ̈ܠܝܛܐ ܐܢܘܢ ܘܕܫܦܝܪ ܥܒܕܝܢ܂ ܥ̈ܒܕܝ ܛܒ̈ܬܐ ܡܬܩܪܝܢ܂
22:26	ܐܢܬܘܢ ܕܝܢ ܠܐ ܗܟܢܐ܂ ܐܠܐ ܐܝܢܐ ܕܪܒ ܒܟܘܢ ܢܗܘܐ ܐܝܟ ܙܥܘܪܐ܂ ܘܐܝܢܐ ܕܪܫܐ ܗܘ ܐܝܟ ܡܫܡܫܢܐ ܘܠܐ ܐܝܟ ܣܡܝܟܐ܂
22:27	ܡܢܘ ܓܝܪ ܪܒ ܕܣܡܝܟ ܐܘ ܕܡܫܡܫ܂ ܠܐ ܗܐ ܐܢܐ ܐܝܟ ܡܫܡܫܢܐ ܐܝܬܝ ܒܝܢܬܟܘܢ܂
22:28	ܐܢܬܘܢ ܕܝܢ ܕܟܬܪܬܘܢ ܥܡܝ ܒܢܣ̈ܝܘܢܝ܂
22:29	ܘܐܢܐ ܡܫܬܘܕܐ ܐܢܐ ܠܟܘܢ ܐܝܟܢܐ ܕܐܫܬܘܕܝ ܠܝ ܐܒܝ ܡܠܟܘܬܐ܂
22:30	ܕܬܐܟܠܘܢ ܘܬܫܬܘܢ ܥܡܝ ܥܠ ܦܬܘܪܝ ܒܡܠܟܘܬܐ܂ ܘܬܬܒܘܢ ܥܠ ܬܪܥ̈ܣܪ ܟܘܪ̈ܣܘܢ܂ ܘܬܕܘܢܘܢ ܬܪ̈ܥܣܪ ܫܒ̈ܛܐ ܕܒܝܬ ܐܝܣܪܝܠ܂
22:31	ܘܐܡܪ ܡܪܢ ܠܫܡܥܘܢ܂ ܫܡܥܘܢ܂ ܗܐ ܣܛܢܐ ܒܥܐ ܕܢܥܪܘܒܟܘܢ ܐܝܟ ܕܠܚܛ̈ܐ܂
22:32	ܐܢܐ ܕܝܢ ܒܥܝܬ ܥܠܝܟ ܕܠܐ ܬܚܣܪ ܗܝܡܢܘܬܟ܂ ܘܐܦ ܐܢܬ ܒܙܒܢ ܐܬܦܢܝ ܘܫܪܪ ܠܐ̈ܚܝܟ܂
22:33	ܐܡܪ ܠܗ ܗܘ܂ ܡܪܝ ܥܡܟ ܡܛܝܒ ܐܢܐ ܘܐܦ ܠܒܝܬ ܐ̈ܣܝܪܐ ܘܐܦ ܠܡܘܬܐ ܠܡܐܙܠ܂
22:34	ܐܡܪ ܠܗ ܝܫܘܥ܂ ܐܡܪܢܐ ܠܟ ܕܥܕܠܐ ܢܩܪܐ ܬܪܢܓܠܐ ܝܘܡܢܐ ܬܪ̈ܬܝܢ ܙܒ̈ܢܝܢ܂ ܬܠܬ ܙܒ̈ܢܝܢ ܬܟܦܘܪ ܒܝ ܕܠܐ ܝܕܥ ܐܢܬ ܠܝ܀
22:35	ܐܡܪ ܠܗܘܢ ܟܕ ܫܕܪܬܟܘܢ ܕܠܐ ܟܝ̈ܣܐ ܘܕܠܐ ܬܪ̈ܡܠܐ ܘܕܠܐ ܡ̈ܣܢܐ܂ ܕܠܡܐ ܡܕܡ ܚܣܪ ܠܟܘܢ܂ ܐܡܪܝܢ ܠܗ ܐܦ ܠܐ ܡܕܡ܂
22:36	ܐܡܪ ܠܗܘܢ ܡܢ ܗܫܐ ܡܢ ܕܐܝܬ ܠܗ ܟܝܣܐ ܐܘ ܬܪܡܠܐ ܢܫܩܘܠ܂ ܘܡܢ ܕܠܝܬ ܠܗ ܣܝܦܐ ܢܙܒܢ ܢܚܬܗ ܘܢܙܒܢ ܠܗ ܣܝܦܐ܂
22:37	ܐܡܪ ܐܢܐ ܠܟܘܢ ܓܝܪ ܕܐܦ ܗܕܐ ܕܟܬܝܒܐ ܥܬܝܕܐ ܕܬܬܡܠܐ ܒܝ܂ ܕܥܡ ܥ̈ܘܠܐ ܐܬܡܢܝ܂ ܘܡܕܡ ܕܥܠܝ ܗܘ ܠܡܬܡܠܝܘ ܠܗ܂
22:38	ܘܗܢܘܢ ܐܡܪܝܢ ܠܗ܂ ܡܪܢ ܗܐ ܐܝܬ ܠܢ ܗܪܟܐ ܬܪ̈ܝܢ ܣܝ̈ܦܝܢ܂ ܐܡܪ ܠܗܘܢ ܣܦܩܝܢ ܩܘܡܘ ܢܐܙܠ܀
22:39	ܘܢܦܩ ܗܘܐ ܘܐܙܠ ܐܝܟ ܕܡܥܕ ܗܘܐ ܠܛܘܪܐ ܕܡܬܩܪܐ ܕܒܝܬ ܙܝܬ̈ܐ܂ ܘܐܙܠܘ ܥܡܗ ܘܐܦ ܬܠܡ̈ܝܕܘܗܝ܂
22:40	ܘܟܕ ܡܛܝ ܠܗ݀ ܠܕܘܟܬܐ܂ ܐܡܪ ܠܗܘܢ ܨܠܘ ܕܠܐ ܬܥܠܘܢ ܠܒܝܬ ܢܣܝܘܢܐ܂
22:41	ܘܗܘ ܦܪܩ ܡܢܗܘܢ ܐܝܟ ܡܫܕܐ ܒܟܐܦܐ܂ ܘܣܡ ܒܘܪ̈ܟܘܗܝ ܘܡܨܠܐ ܗܘܐ
22:42	ܘܐܡܪ܂ ܐܒܝ ܐܢ ܡܫܟܚܐ ܢܥܒܪܢܝ ܟܣܐ ܗܢܐ܂ ܐܠܐ ܠܐ ܨܒܝܢܝ ܢܗܘܐ ܐܠܐ ܕܝܠܟ܂

22:43	ܘܐܬܚܙܝ ܠܗ ܡܠܐܟܐ ܟܕ ܡܚܝܠ ܠܗ܂

22:44	ܘܗܘܐ ܒܪܢܝܐ ܪܒܐ܂ ܘܚܦܝܛܐܝܬ ܡܨܠܐ ܗܘܐ܂ ܘܗܘܬ ܕܘܥܬܗ ܐܝܟ ܫ̈ܠܬܐ ܕܕܡܐ܂ ܘܢܦܠܐ ܗܘܬ ܥܠ ܐܪܥܐ܂
22:45	ܘܩܡ ܡܢ ܨܠܘܬܗ܂ ܘܐܬܐ ܠܘܬ ܬܠܡ̈ܝܕܘܗܝ ܘܐܫܟܚ ܐܢܘܢ ܟܕ ܕܡܟܝܢ ܡܢ ܥܩܬܗܘܢ܂
22:46	ܐܡܪ ܠܗܘܢ ܡܢܐ ܕܡܟܝܢ ܐܢܬܘܢ܂ ܩܘܡܘ ܘܨܠܘ ܕܠܐ ܬܥܠܘܢ ܠܢܣܝܘܢܐ܀
22:47	ܘܟܕ ܗܘ ܡܡܠܠ ܗܘܐ܂ ܐܬܚܙܝ ܟܢܫܐ ܣܓܝܐܐ܂ ܘܗܘ ܕܡܬܩܪܐ ܗܘܐ ܝܗܘܕܐ ܚܕ ܡܢ ܬܪܥ̈ܣܪ܂ ܐܬܐ ܗܘܐ ܩܕܡܝܗܘܢ܂ ܘܩܪܒ ܢܫܩܗ ܠܝܫܘܥ܂
22:48	ܐܡܪ ܠܗ ܝܫܘܥ ܝܗܘܕܐ܂ ܒܢܘܫܩܬܐ ܡܫܠܡ ܐܢܬ ܠܗ ܠܒܪܗ ܕܓܒܪܐ܂
22:49	ܟܕ ܚܙܘ ܕܝܢ ܐܝܠܝܢ ܕܥܡܗ ܡܕܡ ܕܥܬܝܕ ܠܡܗܘܐ܂ ܐܡܪܝܢ ܠܗ ܡܪܢ ܢܡܚܐ ܐܢܘܢ ܒ̈ܣܝܦܐ܂
22:50	ܘܡܚܐ ܚܕ ܡܢܗܘܢ ܠܥܒܕܗ ܕܪܒ ܟܗ̈ܢܐ ܘܢܣܒܗ݀ ܐܕܢܗ ܕܝܡܝܢܐ܂
22:51	ܥܢܐ ܝܫܘܥ ܘܐܡܪ ܟܕܘ ܥܕܡܐ ܠܗܢܐ܂ ܘܩܪܒ ܠܐܕܢܗ ܘܐܣܝܗ݀܂
22:52	ܘܐܡܪ ܘܐܦ ܠܗܢܘܢ ܪܒ̈ܝ ܟܗ̈ܢܐ ܘܐ̈ܣܛܪܛܝܘܛܐ ܕܗܝܟܠܐ ܘܩ̈ܫܝܫܐ܂ ܐܝܟ ܕܥܠ ܓܝܣܐ ܢܦܩܬܘܢ ܥܠܝ ܒܣ̈ܝܦܐ ܘܒܚ̈ܘܛܪܐ܂
22:53	ܟܠܝܘܡ ܕܥܡܟܘܢ ܗܘܝܬ ܒܗܝܟܠܐ܂ ܠܐ ܡܘܫܛܝܢ ܗܘܝܬܘܢ ܥܠܝ ܐ̈ܝܕܝܐ܂ ܐܠܐ ܗܕܐ ܗܝ ܫܥܬܟܘܢ ܘܫܘܠܛܢܟܘܢ ܕܚܫܘܟܐ܂
22:54	ܘܐܚܕܘܗܝ ܘܐܝܬܝܘܗܝ ܠܒܝܬܗ ܕܪܒ ܟܗ̈ܢܐ܀ ܫܡܥܘܢ ܕܝܢ ܟܐܦܐ ܐܬܐ ܗܘܐ ܒܬܪܗ ܡܢ ܪܘܚܩܐ܂
22:55	ܘܢܘܪܐ ܣܝܡܐ ܗܘܬ ܡܨܥܬ ܕܪܬܐ܂ ܘܝܬܒܝܢ ܗܘܘ ܚܕܪ̈ܝܗ܂ ܘܝܬܒ ܗܘܐ ܟܐܦܐ ܒܝܢܬܗܘܢ܂
22:56	ܘܚܙܬܗ ܐܡܬܐ ܚܕܐ ܕܝܬܒ ܠܘܬ ܢܘܪܐ܂ ܘܚܪܬ ܒܗ ܘܐܡܪܐ ܘܐܦ ܗܢܐ ܥܡܗ ܗܘܐ܂
22:57	ܘܗܘ ܟܦܪ ܘܐܡܪ ܐܢܬܬܐ ܠܐ ܝܕܥܢܐ ܠܗ܂
22:58	ܘܒܬܪ ܩܠܝܠ ܚܙܝܗܝ ܘܐܦ ܐܚܪܢܐ ܘܗܟܘܬ ܐܡܪ܂ ܘܐܡܪ ܟܐܦܐ ܠܐ ܗܘܝܬ ܡܢܗܘܢ܂
22:59	ܘܒܬܪ ܚܕܐ ܫܥܐ ܡܬܥܙܙ ܗܘܐ ܐܚܪܢܐ ܘܐܡܪ܂ ܫܪܝܪܐܝܬ ܘܐܦ ܗܢܐ ܥܡܗ ܗܘܐ܂ ܐܦ ܓܠܝܠܝܐ ܗܘ ܓܝܪ܂
22:60	ܘܐܡܪ ܟܦܐ ܓܒܪܐ ܠܐ ܝܕܥ ܐܢܐ ܡܢܐ ܐܡܪ ܐܢܬ܂ ܘܒܗ݀ ܒܫܥܬܐ ܩܪܐ ܬܪܢܓܠܐ܂
22:61	ܘܐܬܦܢܝ ܡܪܢ ܚܪ ܒܗ ܒܟܐܦܐ܂ ܘܐܬܕܟܪ ܟܐܦܐ ܡܠܬܗ ܕܡܪܢ ܕܐܡܪ ܠܗ܂ ܕܥܕ ܠܐ ܢܩܪܐ ܬܪܢܓܠܐ ܬܪ̈ܬܝܢ ܙܒ̈ܢܝܢ܂ ܬܠܬ ܙܒ̈ܢܝܢ ܬܟܦܘܪ ܒܝ܂
22:62	ܘܢܦܩ ܒܟܐ ܡܪܝܪܝܝܬ܀
22:63	ܘܓ̈ܒܪܐ ܕܐܚܝܕܝܢ ܗܘܘ ܠܗ ܠܝܫܘܥ ܡܒܙܚܝܢ ܗܘܘ ܒܗ܂ ܘܡܚܝܢ ܗܘܘ ܠܗ܂
22:64	ܘܚܦܝܘ ܐ̈ܦܘܗܝ ܘܐܡܪܝܢ ܠܗ ܐܬܢܒܐ ܡܢܘ ܡܚܟ܂
22:65	ܘܬܘܒ ܐܚܪ̈ܢܝܬܐ ܣܓ̈ܝܐܬܐ܂ ܡܓܕܦܝܢ ܗܘܘ ܘܐܡܪܝܢ ܥܠܘܗܝ܂
22:66	ܘܟܕ ܢܓܗܬ܂ ܐܬܟܢܫܘ ܩ̈ܫܝܫܐ ܘܪ̈ܒܝ ܟܗ̈ܢܐ ܘܣ̈ܦܪܐ܂ ܘܐܣܩܘܗܝ ܠܒܝܬ ܟܢܘܫ̈ܬܗܘܢ܂
22:67	ܘܐܡܪܝܢ ܐܢ ܐܢܬ ܗܘ ܡܫܝܚܐ ܐܡܪ ܠܢ܂ ܐܡܪ ܠܗܘܢ ܐܢ ܐܡܪ ܠܟܘܢ ܠܐ ܬܗܝܡܢܘܢ܂
22:68	ܘܐܢ ܐܫܐܠܟܘܢ ܠܐ ܝܗܒܝܢ ܐܢܬܘܢ ܠܝ ܦܬܓܡܐ܂ ܘܐܦܠܐ ܫܪܝܢ ܐܢܬܘܢ ܠܝ܂
22:69	ܡܢ ܗܫܐ ܓܝܪ ܢܗܘܐ ܒܪܗ ܕܐܢܫܐ ܝܬܒ ܡܢ ܝܡܝܢܐ ܕܚܝܠܐ ܕܐܠܗܐ܂
22:70	ܐܡܪܝܢ ܟܠܗܘܢ ܐܢܬ ܗܘ ܥܘܕ ܒܪܗ ܕܐܠܗܐ܂ ܐܡܪ ܠܗܘܢ ܐܢܬܘܢ ܐܡܪܝܢ ܐܢܬܘܢ ܕܐܢܐ ܐܢܐ܂
22:71	ܐܡܪܝܢ ܡܢܐ ܬܘܒ ܡܬܒܥܝܐ ܠܢ ܣܗܕܘܬܐ܂ ܗܐ ܓܝܪ ܐܢܚܢܢ ܫܡܥܢ ܡܢ ܦܘܡܗ܂