The Comprehensive Aramaic Lexicon

23:01	ܘܩܡܘ ܟܠܗ ܟܢܫܐ܂ ܘܐܝܬܝܘܗܝ ܠܘܬ ܦܝܠܛܘܣ܂
23:02	ܘܫܪܝܘ ܐܟܠܝܢ ܩܪ̈ܨܘܗܝ ܘܐܡܪܝܢ ܗܘܘ܂ ܐܫܟܚܢ ܠܗܢܐ ܕܡܗܦܟ ܥܡܢ܂ ܘܟܠܐ ܠܢ ܕܟܣܦ ܪܫܐ ܠܩܣܪ ܠܐ ܢܬܠ܂ ܘܐܡܪ ܥܠ ܢܦܫܗ ܕܗܘܝܘ ܡܠܟܐ ܡܫܝܚܐ܂
23:03	ܐܡܪ ܠܗ ܦܝܠܛܘܣ ܐܢܬ ܗܘ ܡܠܟܐ ܕܝܗ̈ܘܕܝܐ܂ ܐܡܪ ܠܗ ܐܢܬ ܐܡܪܬ܂
23:04	ܐܡܪ ܦܝܠܛܘܣ ܠܪ̈ܒܝ ܟܗ̈ܢܐ ܘܠܟܢܫܐ ܗܘ܂ ܐܢܐ ܡܕܡ ܥܠܬܐ ܠܐ ܡܫܟܚ ܐܢܐ ܥܠ ܓܒܪܐ ܗܢܐ܂
23:05	ܗܢܘܢ ܕܝܢ ܡܙܥܩܝܢ ܘܐܡܪܝܢ ܐܙܝܥܗ ܥܡܐ܂ ܟܕ ܡܠܦ ܒܟܘܠܗ݀ ܝܗܘܕ܂ ܘܫܪܝ ܡܢ ܓܠܝܠܐ ܥܕܡܐ ܠܗܪܟܐ܂
23:06	ܦܝܠܛܘܣ ܕܝܢ ܟܕ ܫܡܥ ܕܐܡܪܝܢ ܕܡܢ ܓܠܝܠܐ܂ ܫܐܠ ܕܐܢ ܡܢ ܓܠܝܠܐ ܗܘ܂
23:07	ܘܟܕ ܫܡܥ ܕܡܢ ܬܚܝܬ ܫܘܠܛܢܐ ܗܘ ܕܗܪܘܕܣ ܫܕܪܗ ܠܘܬܗ܂ ܡܛܠ ܕܐܦ ܗܘ ܕܝܢ ܗܪܘܕܣ ܒܐܘܪܫܠܡ ܗܘܐ ܒܗܢܘܢ ܝܘ̈ܡܬܐ ܕ̈ܦܛܝܪܐ܂
23:08	ܗܪܘܕܣ ܕܝܢ ܟܕ ܚܙܐ ܠܝܫܘܥ ܣܓܝ ܚܕܝ܂ ܛܒ ܨܒܐ ܗܘܐ ܓܝܪ ܠܡܚܙܝܗ ܡܢ ܙܒܢܐ ܣܓܝܐܐ܂ ܡܛܠ ܕܫܡܥ ܗܘܐ ܥܠܘܗܝ ܘܣܒܪ ܗܘܐ ܕܡܕܡ ܐܬܐ ܢܚܙܐ ܡܢܗ ܕܗܘܝܐ܂
23:09	ܘܒܡ̈ܠܐ ܚ̈ܟܝܡܬܐ ܡܫܐܠ ܗܘܐ ܠܗ܂ ܝܫܘܥ ܕܝܢ ܡܕܡ ܦܬܓܡܐ ܠܐ ܐܬܝܒܗ܂ ܐܝܟ ܗܘ ܕܠܐ ܗܘܐ ܬܡܢ ܗܘܐ܂
23:10	ܪ̈ܒܝ ܟܗ̈ܢܐ ܕܝܢ ܘܐܪ̈ܟܘܢܐ ܩܝܡܝܢ ܗܘܘ ܘܐܟܠܝܢ ܩܪ̈ܨܘܗܝ ܡܠܝܐܝܬ܂
23:11	ܘܒܙܚ ܒܗ ܗܪܘܕܣ ܘ̈ܦܠܚܘܗܝ܂ ܘܐܠܒܫܗ ܢܚ̈ܬܐ ܫ̈ܦܝܪܐ ܒܒܘܙܚܐ܂ ܘܫܕܪܗ ܠܘܬ ܦܝܠܛܘܣ܂

23:12	ܘܒܗ ܒܗ݀ܘ ܝܘܡܐ ܗܘܬ ܬܪܥܘܬܐ ܒܝܢܝ ܗܪܘܕܣ ܠܦܝܠܛܘܣ܂ ܡܛܠ ܕܒ̈ܥܠܕܒܒܐ ܗܘܘ܂

23:13	ܦܝܠܛܘܣ ܕܝܢ ܩܪܐ ܠܪ̈ܒܝ ܟܗ̈ܢܐ ܘܠܐܪ̈ܟܘܢܐ ܘܠܥܡܐ ܟܠܗ
23:14	ܘܐܡܪ ܠܗܘܢ܂ ܩܪܒܬܘܢ ܠܝ ܓܒܪܐ ܗܢܐ܂ ܕܐܡܪܬܘܢ ܠܝ ܕܐܙܝܥܗ ܥܡܟܘܢ܂ ܘܗܐ ܐܢܐ ܥܩܒܬܗ ܠܥ̈ܢܝܟܘܢ ܘܡܕܡ ܠܐ ܐܫܟܚܬ ܒܬܪܗ܂ ܡܢ ܐܝܠܝܢ ܕܡܪܫܝܢ ܐܢܬܘܢ ܒܗ܂
23:15	ܘܐܦܠܐ ܗܪܘܕܣ܂ ܫܕܪܬܗ ܓܝܪ ܠܘܬܗ ܘܡܕܡ ܕܫܘܐ ܠܡܘܬܐ ܠܐ ܐܫܟܚ ܒܬܪܗ܂ ܘܐܦܠܐ ܣܥܝܪ ܠܗ ܡܕܡ ܕܡܘܬܐ܂
23:16	ܐܪܕܝܘܗܝ ܗܟܝܠ ܘܐܫܒܩܝܘܗܝ܂
23:18	ܘܝܗܒܘ ܩܠܐ ܟܘܠܗ ܥܡܐ ܘܐܡܪܝܢ܂ ܫܩܘܠܝܗܝ ܠܗܢܐ ܘܫܪܝ ܠܢ ܠܒܪ ܐܒܐ܂
23:19	ܗܘ ܕܡܛܠ ܗܛܪ̈ܘܬܐ ܘܩ̈ܛܠܐ ܪܡܐ ܗܘܐ ܒܝܬ ܐܣ̈ܝܪܐ܂
23:17	ܘܡܥܕ ܗܘܐ ܦܝܠܛܘܣ ܕܢܗܘܐ ܫܪܐ ܠܗܘܢ ܚܕ ܐܢܫ ܒܥܕܥܕܐ܂
23:20	ܘܬܘܒ ܩܪܐ ܐܢܘܢ ܦܝܠܛܘܣ ܘܐܡܪ ܠܗܘܢ܂ ܡܛܘܠ ܕܨܒܐ ܗܘܐ ܕܢܫܪܝܘܗܝ ܠܝܫܘܥ܂
23:21	ܗܢܘܢ ܕܝܢ ܩܥܝܢ ܗܘܘ ܘܐܡܪܝܢ ܙܩܘܦܝܗܝ ܙܩܘܦܝܗܝ܂
23:22	ܗܘ ܕܝܢ ܕܬܠܬ ܙܒ̈ܢܝܢ ܐܡܪ ܠܗܘܢ܂ ܡܢܐ ܓܝܪ ܕܒܝܫ ܥܒܕ ܗܢܐ܂ ܡܕܡ ܓܝܪ ܕܫܘܐ ܠܡܘܬܐ ܠܐ ܡܫܟܚܢܐ ܒܗ܂ ܐܪܕܝܘܗܝ ܗܟܝܠ ܘܐܫܒܩܝܘܗܝ܂
23:23	ܘܗܢܘܢ ܬܟܒܝܢ ܗܘܘ ܒܩܠܐ ܪܡܐ܂ ܘܐܡܪܝܢ ܠܗ ܕܢܙܕܩܦ܂ ܘܚܣܝܢ ܗܘܐ ܩܠܗܘܢ܂ ܘܕܪ̈ܒܝ ܟܗ̈ܢܐ ܥܡܗܘܢ܂
23:24	ܘܦܩܕ ܦܝܠܛܘܣ ܕܬܗܘܐ ܫܐܠܬܗܘܢ܂
23:25	ܘܫܪܐ ܠܗܘܢ ܠܗܘ ܕܡܛܠ ܩܛ̈ܠܐ ܘܗܪ̈ܣܣ ܗܘܐ ܒܝܬ ܐ̈ܣܝܪܐ ܐܝܟ ܕܫܐܠܘ܂ ܘܠܝܫܘܥ ܐܫܠܡ ܠܨܒܝܢܗܘܢ܀
23:26	ܘܟܕ ܡܘܒܠܝܢ ܠܗ܂ ܐܚܕܘ ܠܫܡܥܘܢ ܩܝܪܝܢܝܐ܂ ܕܐܬܐ ܗܘܐ ܡܢ ܩܪܝܬܐ܂ ܕܢܫܩܘܠ ܙܩܝܦܐ ܘܢܐܬܐ ܒܬܪ ܝܫܘܥ܂
23:27	ܘܐܬܐ ܗܘܐ ܒܬܪܗ ܣܘܓܐܐ ܕܥܡܐ܂ ܘܢܫ̈ܐ ܕܡܪܩܕܢ ܗܘܝ ܥܠܘܗܝ ܘܐܠܝܢ܂
23:28	ܘܐܬܦܢܝ ܝܫܘܥ ܠܘܬܗܝܢ ܘܐܡܪ ܠܗܝܢ܂ ܒ̈ܢܬ ܐܘܪܫܠܡ ܠܐ ܬܒܟܝܢ ܥܠܝ܂ ܐܠܐ ܒܟܝܝܢ ܥܠ ܢܦܫܟܝܢ ܘܥܠ ܒ̈ܢܝܟܝܢ܂
23:29	ܢܐܬܘܢ ܓܝܪ ܝܘ̈ܡܬܐ ܕܒܗܘܢ ܬܐ̈ܡܪܢ܂ ܛܘܒܝܗܝܢ ܠܥܩܪ̈ܬܐ܂ ܘܠܟܪ̈ܣܬܐ ܕܠܐ ܝܠܕ ܘܠܬܕ̈ܝܐ ܕܠܐ ܐܝܢܩܘ܂
23:30	ܘܗܝܕܝܢ ܬܫܪܘܢ ܠܡܐܡܪ ܠܛܘܪ̈ܐ ܕܦܠܘ ܥܠܝܢ܂ ܘܠܪܡ̈ܬܐ ܕܟܣܝܢܢ܂
23:31	ܕܒܩܝܣܐ ܪܛܝܒܐ ܗܠܝܢ ܥܒܕܝܢ ܒܝܒܝܫܐ ܡܢܐ ܢܗܘܐ܂
23:32	ܘܐܬܝܢ ܗܘܘ ܥܡܗ ܬܪ̈ܝܢ ܐ̈ܚܪܢܝܢ ܥܒ̈ܕܝ ܒܝ̈ܫܬܐ ܕܢܬܩܛܠܘܢ܂
23:33	ܘܟܕ ܐܬܘ ܠܕܘܟܬܐ ܕܡܬܩܪܝܐ ܩܪܩܦܬܐ܂ ܙܩܦܘܗܝ ܬܡܢ܂ ܘܠܗܢܘܢ ܥܒ̈ܕܝ ܒܝܫ̈ܬܐ ܚܕ ܡܢ ܝܡܝܢܗ ܘܚܕ ܡܢ ܣܡܠܗ܂
23:34	ܘܥܢܐ ܝܫܘܥ ܘܐܡܪ ܐܒܝ ܫܒܘܩ ܠܗܘܢ܂ ܠܐ ܓܝܪ ܝܕܥܝܢ ܡܢܐ ܥܒܕܝܢ܂ ܘܦܠܓܘ ܢܚ̈ܬܘܗܝ ܘܢܦܣܘ ܥܠܝܗܘܢ܂
23:35	ܘܩܐܡ ܗܘܐ ܥܡܐ ܘܚܙܐ܂ ܘܡܡܝܩܝܢ ܗܘܘ ܒܗ ܥܡܗܘܢ ܘܐܦ ܐܪ̈ܟܘܢܐ ܘܐܡܪܝܢ܂ ܠܐܚ̈ܪܢܐ ܐܚܝ܂ ܢܚܐ ܢܦܫܗ ܐܢ ܗܘܝܘ ܡܫܝܚܐ ܓܒܝܗ ܕܐܠܗܐ܂
23:36	ܘܡܒܙܚܝܢ ܗܘܘ ܒܗ܂ ܘܐܦ ܣܛܪ̈ܛܝܘܛܐ ܡܬܩܪܒܝܢ ܗܘܘ ܠܗ
23:37	ܘܐܡܪܝܢ܂ ܫܠܡ ܠܟ܂ ܐܢ ܐܢܬ ܗܘ ܡܠܟܐ ܕܝܗ̈ܘܕܝܐ ܐܚܐ ܢܦܫܟ܂ ܘܣܡܘ ܗܘܘ ܒܪܫܗ ܟܠܝܠܐ ܕܥܘ̈ܙܢܝܐ܂
23:38	ܘܟܬܝܒ ܗܘܐ ܐܦ ܦܛܩܐ ܘܣܝܡ ܠܥܠ ܡܢܗ܂ ܗܢܘ ܡܠܟܐ ܕܝܗ̈ܘܕܝܐ܀
23:39	ܚܕ ܡܢ ܗܢܘܢ ܕܝܢ ܥܒ̈ܕܝ ܒ̈ܝܫܬܐ ܕܨܠܝܒܝܢ ܗܘܘ ܥܡܗ܂ ܡܓܕܦ ܗܘܐ ܥܠܘܗܝ ܘܐܡܪ܂ ܠܐ ܗܘܝܬ ܡܫܝܚܐ܂ ܐܚܐ ܢܦܫܟ ܘܐܚܢ ܐܦ ܠܢ܂
23:40	ܘܟܐܐ ܒܗ ܚܒܪܗ ܗܘ ܐܚܪܢܐ ܘܐܡܪ ܠܗ܂ ܐܦܠܐ ܡܢ ܐܠܗܐ ܕܚܠ ܐܢܬ܂ ܕܗܐ ܐܦ ܚܢܢ ܒܗ ܚܢܢ ܒܕܝܢܐ܂
23:41	ܘܗܐ ܐܢܚܢܢ ܐܝܟ ܕܫܘܝܢ ܗܘܝܢ ܗܘܢ܂ ܘܐܝܟ ܕܥܒܕܢ ܐܬܦܪܥܢ܂ ܗܢܐ ܕܝܢ ܐܦ ܠܐ ܡܕܡ ܕܣܢܐ ܥܒܝܕ ܠܗ܂
23:42	ܘܐܡܪ ܠܝܫܘܥ ܡܪܝ ܐܬܕܟܪܝܢܝ ܡܐ ܕܐܬܐ ܐܢܬ ܒܡܠܟܘܬܟ܂
23:43	ܐܡܪ ܠܗ ܝܫܘܥ܂ ܐܡܝܢ ܐܡܪ ܐܢܐ ܠܟ ܝܘܡܢܐ ܕܥܡܝ ܬܗܘܐ ܒܓܢܬ ܥܕܢ܂
23:44	ܘܐܝܬ ܗܘܝ ܐܝܟ ܫܥ̈ܐ ܫ̈ܬ܂ ܘܗܘܐ ܚܫܘܟܐ ܥܠ ܟܘܠܗ݀ ܐܪܥܐ ܥܕܡܐ ܠܬܫܥ ܫ̈ܥܝܢ܂
23:45	ܘܫܡܫܐ ܚܫܟ܂ ܘܐܨܛܪܝ ܐ̈ܦܝ ܬܪܥܐ ܕܗܝܟܠܐ ܡܢ ܡܨܥܬܗ܂
23:46	ܘܩܪܐ ܝܫܘܥ ܒܩܠܐ ܪܡܐ ܘܐܡܪ܂ ܐܒܐ ܒܐ̈ܝܕܝܟ ܣܐܡ ܐܢܐ ܠܗ݀ ܠܪܘܚܝ ܘܐܫܠܡ܀
23:47	ܟܕ ܚܙܐ ܕܝܢ ܩܢܛܪܘܢܐ ܡܕܡ ܕܗܘܐ܂ ܫܒܚ ܠܐܠܗܐ܂ ܘܐܡܪ ܫܪܝܪܝܝܬ ܗܢܐ ܓܒܪܐ ܙܕܝܩܐ ܗܘ܂
23:48	ܘܟܠܗܘܢ ܐܝܠܝܢ ܕܐܫܬܘܪܝܘ ܬܡܢ ܘܚܙܘ ܡܕܡ ܕܗܘܐ܂ ܛܪܦܝܢ ܗܘܘ ܥܠ ܚܕܝܗܘܢ ܘܐܡܪܝܢ܂ ܘܝ ܠܢ ܡܢܐ ܗܘܢ܂ ܘܝ ܠܢ ܡܢ ܚܛ̈ܗܝܢ܂
23:49	ܘܩܝܡܝܢ ܗܘܘ ܡܢ ܪܘܚܩܐ ܟܠܗܘܢ ܡܚܟܘܡܬܗ ܕܝܫܘܥ܂ ܘܢ̈ܫܐ ܐܝܠܝܢ ܕܐܬܝ ܥܡܗ ܡܢ ܓܠܝܠܐ܂ ܘܚܙܝܢ ܗܠܝܢ܀
23:50	ܘܓܒܪܐ ܚܕ ܕܫܡܗ ܗܘܐ ܝܘܣܦ܂ ܒܘܠܘܛܐ ܗܘܐ܂ ܓܒܪܐ ܙܕܝܩܐ ܘܛܒܐ܂ ܡܢ ܪܡܬܐ ܟܪܟܐ ܕܝܗܘܕ܂
23:51	ܘܚܐܪ ܗܘܐ ܠܡܠܟܘܬܐ ܕܫܡܝܐ܂ ܗܢܐ ܓܒܪܐ ܕܠܐ ܐܫܘܝ ܪܥܝܢܗ ܥܡ ܐ̈ܟܠܝ ܩܪܨܐ܂
23:52	ܗܘ ܗܢܐ ܩܪܒ ܘܫܐܠ ܦܓܪܗ ܕܝܫܘܥ܂
23:53	ܘܐܚܬܗ ܘܟܪܟܗ ܒܚܝܨܐ܂ ܘܣܡܗ ܒܝܬ ܩܒܘܪܐ ܢܩܝܪܐ܂ ܐܝܢܐ ܕܥܕܟܝܠ ܐܢܫ ܠܐ ܐܬܩܒܪ ܒܗ܂
23:54	ܘܗܘ ܗܘ ܝܘܡܐ ܥܪܘܒܬܐ ܗܘܬ܂ ܘܫܒܬܐ ܢܓܗܐ ܗܘܬ܂
23:55	ܘܗܠܝܢ ܢܫ̈ܐ ܕܐܬܝ ܥܡܗ ܡܢ ܓܠܝܠܐ܂ ܐܬܝ ܠܒܝܬ ܩܒܘܪܐ ܒܥܩܒܬܗܘܢ܂ ܘܚܙܝ ܠܫܠܕܐ ܟܕ ܐܥܠܘܗ݀ ܠܬܡܢ܂
23:56	ܘܗܦܟ ܛܝܒ ܗܪ̈ܘܡܐ ܘܡܫܚܐ ܕܒܣܝܡܐ܂ ܘܒܫܒܬܐ ܫܠܝ ܐܝܟ ܕܦܩܝܕ܂