← Back
The Comprehensive Aramaic Lexicon
← Return to the Text Browser
click on the file description for more information

60043: OS Jn

Click on a word for lexical analysis
Click on a red-colored coordinate for comments and/or translations of the line

previous chapter


03:05 ܠܡܠܟܘܬܐ ܕܐܠܗܐ܂
03:06 ܡܕܡ ܕܝܠܝܕ ܡܢ ܒܣܪܐ ܒܣܪܐ ܗܘ܂ ܡܛܠ ܕܡܢ ܒܣܪܐ ܝܠܝܕ܂ ܘܡܕܡ ܕܝܠܝܕ ܡܢ ܪܘܚܐ ܪܘܚܐ ܗܘ܂ ܡܛܘܠ ܕܐܠܗܐ ܪܘܚܐ ܗܘ܂ ܘܡܢ ܐܠܗܐ ܐܬܝܠܕ܂
03:07 ܘܠܐ ܬܬܕܡܪ ܕܐܡܪܬ܂ ܠܟ܂ ܕܘܠܐ ܗܘ ܠܟܘܢ ܠܡܬܝܠܕܘ ܡܢ ܠܥܠ܂
03:08 ܪܘܚܐ ܐܬܪ ܕܨܒܝܐ ܢܫܒܐ܂ ܘܩܠܗ݀ ܗܘ ܒܠܚܘܕ ܫܡܥ ܐܢܬ܂ ܐܠܐ ܠܐ ܡܢ ܐܝܡܟܐ ܐܬܬ ܝܕܥ ܐܢܬ܂ ܘܠܐ ܠܐܝܟܐ ܐܙܠܐ܂ ܗܟܢܐ ܐܝܬܘܗܝ ܟܘܠ ܐܢܫ ܕܡܬܝܠܕ ܡܢ ܡ̈ܝܐ ܘܡܢ ܪܘܚܐ܂
03:09 ܥܢܐ ܢܝܩܕܡܘܣ ܘܐܡܪ ܠܗ܂ ܐܝܟܢܐ ܡܫܟܚܐ ܗܕܐ ܠܡܗܘܐ܂
03:10 ܥܢܐ ܝܫܘܥ ܘܐܡܪ ܠܗ܂ ܐܢܬ ܗܘ ܡܠܦܢܗ ܕܐܝܣܪܝܠ ܘܗܠܝܢ ܠܐ ܝܕܥ ܐܢܬ܂
03:11 ܐܡܝܢ ܐܡܝܢ ܐܡܪܢܐ ܠܟ܂ ܕܡܕܡ ܕܝܕܥܝܢ ܐܢܚܢܢ ܡܡܠܠܝܢ ܐܢܚܢܢ܂ ܘܡܕܡ ܕܚܙܝܢ ܐܢܚܢܢ ܡܣܗܕܝܢ ܐܢܚܢܢ܂ ܘܣܗܕܘܬܢ ܠܐ ܡܩܒܠܝܢ ܐܢܬܘܢ܂
03:12 ܐܢ ܥܠ ܐܝܠܝܢ ܕܒܐܪܥܐ ܐܢܝܢ ܐܡܪܬ ܠܟܘܢ ܘܠܐ ܡܗܝܡܢܝܢ ܐܢܬܘܢ܂ ܐܝܟܢܐ ܐܢ ܥܠ ܐܝܠܝܢ ܕܒܫܡܝܐ ܐܢܝܢ ܐܡܪ ܠܟܘܢ ܬܗܝܡܢܘܢܢܝ܂
03:13 ܠܐ ܐܢܫ ܣܠܩ ܠܫܡܝܐ ܐܠܐ ܗܘ ܕܢܚܬ ܡܢ ܫܡܝܐ܂ ܒܪܗ ܕܐܢܫܐ ܗܘ ܕܐܝܬܘܗܝ ܗܘܐ ܒܫܡܝܐ܂
03:14 ܘܐܝܟܢܐ ܕܐܪܝܡ ܡܘܫܐ ܚܘܝܐ ܒܡܕܒܪܐ܂ ܗܟܢܐ ܘܠܐ ܠܡܬܬܪܡܘ ܠܒܪܗ ܕܐܢܫܐ܂
03:15 ܕܟܘܠ ܐܢܫ ܕܡܗܝܡܢ ܒܗ ܢܗܘܘܢ ܠܗ ܚ̈ܝܐ ܕܠܥܠܡ܂
03:16 ܗܟܢܐ ܓܝܪ ܐܚܒ ܐܠܗܐ ܠܥܠܡܐ܂ ܐܝܟܢܐ ܕܠܒܪܗ ܝܚܝܕܐ ܝܗܒ܂ ܕܟܠ ܐܢܫ ܕܡܗܝܡܢ ܒܗ ܢܗܘܘܢ ܠܗ ܚܝ̈ܐ ܕܠܥܠܡ܂
03:17 ܠܐ ܓܝܪ ܫܕܪ ܐܠܗܐ ܒܪܗ ܠܥܠܡܐ ܕܢܕܘܢܝܘܗܝ ܠܥܠܡܐ܂ ܐܠܐ ܕܥܠܡܐ ܒܗ ܢܚܐ܂
03:18 ܡܢ ܕܡܗܝܡܢ ܒܗ ܠܐ ܡܬܕܝܢ܂ ܘܡܢ ܕܠܐ ܡܗܝܡܢ ܡܚܝܒ ܗܘ܂ ܕܠܐ ܗܝܡܢ ܒܫܡܗ ܕܒܪܗ ܕܐܠܗܐ ܝܚܝܕܐ܂
03:19 ܗܢܐ ܗܘ ܕܝܢ ܕܝܢܐ ܕܢܘܗܪܐ ܐܬܐ ܠܥܠܡܐ܂ ܘܥܠܡܐ ܝܬܝܪܐܝܬ ܪܚܡ ܠܚܫܘܟܐ܂ ܝܬܝܪ ܡܢ ܕܠܢܗܝܪܐ܂ ܡܛܠ ܕܒܝܫܝܢ ܗܘܘ ܥܒ̈ܕܘܗܝ܂
03:20 ܡܢ ܕܣ̈ܢܝܬܐ ܓܝܪ ܥܒܕ ܣܢܐ ܠܢܘܗܪܐ܂ ܘܠܐ ܐܬܐ ܠܢܘܗܪܐ܂ ܕܠܐ ܬܗܘܐ ܡܟܣܢܘܬܐ ܠܥܒ̈ܕܘܗܝ܂
03:21 ܗܘ ܕܝܢ ܕܥܒܕ ܩܘܫܬܐ܂ ܐܬܐ ܠܘܬ ܢܗܝܪܐ܂ ܕܢܬܚܙܘܢ ܥܒ̈ܕܘܗܝ ܕܒܐܠܗܐ ܥܒܝܕܝܢ܀
03:22 ܒܬܪ ܗܠܝܢ ܢܦܩ ܝܫܘܥ ܘܬܠܡ̈ܝܕܘܗܝ ܠܐܪܥܐ ܕܝܗܘܕ܂ ܘܬܡܢ ܡܬܗܦܟ ܗܘܐ ܥܡܗܘܢ܂ ܘܡܥܡܕ ܗܘܐ܂
03:23 ܐܦ ܝܘܚܢܢ ܡܥܡܕ ܗܘܐ ܒܥܝܢ ܝܘܢ ܕܥܠ ܓܢܒ ܫܠܝܡ܂ ܡܛܠ ܕܡ̈ܝܐ ܣܓ̈ܝܐܐ ܗܘܘ ܬܡܢ܂ ܘܐܬܝܢ ܗܘܘ ܐܢܫܐ ܘܥܡܕܝܢ܂
03:24 ܠܐ ܓܝܪ ܥܕܡܐ ܠܗܫܐ ܢܦܠ ܗܘܐ ܝܘܚܢܢ ܒܝܬ ܐ̈ܣܝܪܐ܀
03:25 ܗܘܬ ܗܘܬ ܕܝܢ ܒܥܬܐ ܒܝܢܬ ܬܠܡ̈ܝܕܘܗܝ ܕܝܘܚܢܢ܂ ܥܡ ܝܗܘ̈ܕܝܐ ܥܠ ܬܕܟܝܬܐ܂
03:26 ܘܐܬܘ ܠܘܬ ܝܘܚܢܢ ܘܐܡܪܝܢ ܠܗ܂ ܪܒܢ܂ ܗܘ ܕܥܡܟ ܗܘܐ ܒܥܒܪܐ ܕܝܘܪܕܢܢ܂ ܘܐܢܬ ܣܗܕܬ ܥܠܘܗܝ܂ ܗܐ ܐܦ ܗܘ ܡܥܡܕ܂ ܘܟܠܗܘܢ ܐܢܫܐ ܠܘܬܗ ܐܬܝܢ܂
03:27 ܐܡܪ ܠܗܘܢ ܝܘܚܢܢ܂ ܠܐ ܡܫܟܚ ܒܪ ܐܢܫܐ ܠܡܣܒ ܐܦܠܐ ܡܕܡ܂ ܐܠܐ ܐܢ ܝܗܝܒ ܠܗ ܡܢ ܫܡܝܐ܂
03:28 ܐܢܬܘܢ ܕܝܢ ܣܗܕܘ ܠܝ ܕܐܢܐ ܐܡܪܬ ܕܠܐ ܗܘܝܬ ܡܫܝܚܐ܂ ܐܠܐ ܫܠܝܚܐ ܐܢܐ ܩܕܡܘܗܝ܂

03:29 ܡܢ ܕܐܝܬ ܠܗ ܓܝܪ ܟܠܬܐ ܗܘܝܘ ܚܬܢܐ܂ ܘܪܚܡܗ ܕܚܬܢܐ ܗܘ ܡܢ ܕܩܐܡ ܘܨܐܬ ܠܗ܂ ܘܚܕܘܬܐ ܪܒܬܐ ܚܕܐ܂ ܡܛܠ ܩܠܗ ܕܚܬܢܐ܂ ܗܕܐ ܗܟܝܠ ܚܕܘܬܝ ܗܐ ܡܛܠܩܐ ܗܝ܂

03:30 ܠܗ ܗܘ ܓܝܪ ܘܠܐ ܠܡܪܒܐ ܘܠܝ ܠܡܒܨܪ܂
03:31 ܗܘ ܓܝܪ ܕܡܢ ܠܥܠ ܐܬܐ ܠܥܠ ܡܢ ܟܠ ܗܘ܂ ܘܗܘ ܕܡܢ ܐܪܥܐ ܗܘ ܡܢ ܐܪܥܐ ܗܘ ܘܡܢ ܐܪܥܐ ܗܘ ܡܡܠܠ܂ ܘܗܘ ܕܡܢ ܫܡܝܐ ܐܬܐ܂
03:32 ܡܕܡ ܕܚܙܐ ܘܫܡܥ ܡܣܗܕ ܘܣܗܕܘܬܗ ܠܐ ܟܠ ܐܢܫ ܡܩܒܠ܂
03:33 ܐܝܢܐ ܕܩܒܠ ܕܝܢ ܕܩܒܠ ܣܗܕܘܬܗ ܚܬܡ ܕܐܠܗܐ ܫܪܝܪܐ ܗܘ܂
03:34 ܐܝܢܐ ܓܝܪ ܕܐܠܗܐ ܫܕܪܗ ܡ̈ܠܐ ܕܐܠܗܐ ܡܡܠܠ܂ ܠܐ ܗܘܐ ܓܝܪ ܒܟܝܠܬܐ ܝܗܒ ܪܘܚܐ ܐܒܐ ܠܒܪܗ܂
03:35 ܐܠܐ ܪܚܡ ܗܘ ܠܗ ܘܟܠ ܡܕܡ ܝܗܒ ܒܐ̈ܝܕܘܗܝ܂
03:36 ܡܢ ܕܡܗܝܡܢ ܒܒܪܐ ܐܝܬ ܠܗ ܚ̈ܝܐ ܕܠܥܠܡ܂ ܘܡܢ ܕܠܐ ܡܗܝܡܢ ܠܒܪܐ ܠܐ ܢܚܙܐ ܚ̈ܝܐ ܐܠܐ ܪܘܓܙܗ ܕܐܠܗܐ ܢܩܘܐ ܥܠܘܗܝ܀

next chapter