The Comprehensive Aramaic Lexicon

04:01	ܟܕ ܝܕܥ ܕܝܢ ܝܫܘܥ ܕܫܡܥܘ ܦܪ̈ܝܫܐ ܕܣܓܝܘ ܬܠܡ̈ܝܕܘܗܝ܂ ܘܡܥܡܕ ܗܘܐ ܣܓܝ ܡܢ ܝܘܚܢܢ܂
04:02	ܘܠܐ ܗܘܐ ܗܘ ܝܫܘܥ ܡܥܡܕ ܗܘܐ ܐܠܐ ܬܠܡ̈ܝܕܘܗܝ
04:03	ܘܫܒܩܗ݀ ܠܝܗܘܕ ܘܐܙܠ ܠܗ ܬܘܒ ܠܓܠܝܠܐ܂
04:04	ܡܥܒܕܐ ܗܘܬ ܠܗ ܕܝܢ ܕܢܥܒܪ ܥܠ ܒܝܬ ܫܡܪ̈ܝܐ܂

04:05	ܘܐܬܐ ܠܡܕܝܢܬܐ ܚܕܐ ܕܫ̈ܡܪܝܐ ܕܡܬܩܪܝܐ ܗܘܬ ܫܟܝܡ܂ ܩܪܝܒܬ ܩܪܝܬܐ ܗܝ ܕܝܗܒ ܗܘܐ ܝܥܩܘܒ ܠܝܘܣܦ ܒܪܗ܂

04:06	ܐܝܬ ܗܘܐ ܕܝܢ ܬܡܢ ܡܥܝܢܐ ܕܡ̈ܝܐ ܕܝܥܩܘܒ܂ ܘܐܬܐ ܝܫܘܥ ܝܬܒ ܠܥܠ ܡܢܗ ܕܡܥܝܢܐ܂ ܐܝܟ ܕܢܬܢܝܚ ܡܢ ܥܡܠܐ ܕܐܘܪܚܐ܂ ܘܟܕ ܗܘ ܝܫܘܥ ܝܬܒ ܐܝܬ ܗܘܝ ܐܝܟ ܫ̈ܥܐ ܫܬ܂
04:08	ܘܬ̈ܠܡܝܕܘܝ ܥܠܘ ܗܘܘ ܠܟܪܟܐ ܗܘ ܕܢܙܒܢܘܢ ܠܗܘܢ ܣܝܒܪܬܐ܂
04:07	ܘܐܬܬ ܗܘܬ ܐܢܬܬܐ ܚܕܐ ܡܢ ܫܡܪܝܢ ܕܬܡܠܐ ܡ̈ܝܐ ܐܡܪ ܠܗ݀ ܝܫܘܥ ܗܒ ܠܝ ܡ̈ܝܐ ܐܫܬܐ܂
04:09	ܐܡܪܐ ܠܗ ܗܝ ܐܢܬܬܐ ܫܡܪܝܬܐ܂ ܗܐ ܝܗܘܕܝܐ ܐܢܬ܂ ܐܝܟܢܐ ܫܐܠ ܐܢܬ ܠܝ ܡ̈ܝܐ ܠܡܫܬܐ܂ ܕܗܐ ܐܢܐ ܫܡܪܝܬܐ ܐܢܐ܂ ܝܗ̈ܘܕܝܐ ܓܝܪ ܠܐ ܡܬܚܫܚܝܢ ܥܡ ܫܡ̈ܪܝܐ܂
04:10	ܐܡܪ ܠܗ݀ ܝܫܘܥ܂ ܐܠܘ ܝܕܥܐ ܗܘܝܬ ܡܘܗܒܬܗ ܕܐܠܗܐ܂ ܘܡܢܘ ܗܢܐ ܕܐܡܪ ܠܟܝ ܗܒܝ ܠܝ ܐܫܬܐ܂ ܐܢܬܝ ܫܐܠܐ ܗܘܝܬ ܠܗ܂ ܘܝܗܒ ܗܘܐ ܠܟܝ ܡ̈ܝܐ ܚ̈ܝܐ܂
04:11	ܐܡܪܐ ܠܗ ܗܝ ܐܢܬܬܐ܂ ܡܪܝ ܐܦܠܐ ܕܘܠܐ ܐܝܬ ܠܟ܂ ܘܒܪܐ ܥܡܝܩܐ ܗܝ܂ ܐܝܡܟܐ ܐܝܬ ܠܟ ܡ̈ܝܐ ܚ̈ܝܐ܂
04:12	ܕܠܡܐ ܐܢܬ ܪܒ ܐܢܬ ܡܢ ܐܒܘܢ ܝܥܩܘܒ܂ ܕܗܘ ܝܗܒ ܠܢ ܒܪܐ ܗܕܐ܂ ܘܐܦ ܗܘ ܡܢܗ݀܂ ܐܫܬܝ ܘܒ̈ܢܘܗܝ ܘܥܢܗ܂
04:13	ܐܡܪ ܠܗ݀ ܝܫܘܥ ܟܘܠ ܕܢܫܬܐ ܡܢ ܗܠܝܢ ܡ̈ܝܐ ܬܘܒ ܢܨܗܐ܂
04:14	ܘܟܠ ܕܢܫܬܐ ܡܢ ܡ̈ܝܐ ܐܝܠܝܢ ܕܐܢܐ ܐܬܠ ܠܗ ܬܘܒ ܠܐ ܢܨܗܐ ܠܥܠܡ܂ ܐܠܐ ܡ̈ܝܐ ܗܢܘܢ ܕܐܬܠ ܠܗ ܢܗܘܘܢ ܒܗ ܡܥܝܢܐ ܕ̈ܡܝܐ ܠܚ̈ܝܐ ܕܠܥܠܡ܂
04:15	ܐܡܪܐ ܠܗ ܐܢܬܬܐ ܗܝ܂ ܡܪܝ ܗܒ ܠܝ ܡܢ ܗܠܝܢ ܡ̈ܝܐ܂ ܕܠܐ ܗܘܝܬ ܨܗܝܐ ܘܐܬܝܐ ܕܠܝܐ ܡܢ ܗܡܟܐ܂
04:16	ܐܡܪ ܠܗ݀ ܝܫܘܥ ܙܠܝ ܩܪܝ ܠܝ ܠܒܥܠܟܝ܂ ܘܬܝ ܠܗܪܟܐ܂
04:17	ܐܡܪܐ ܠܗ ܠܝܬ ܠܝ ܒܥܠܐ܂ ܐܡܪ ܠܗ݀ ܝܫܘܥ ܫܦܝܪ ܐܡܪܬܝ ܕܠܝܬ ܠܝ ܒܥܠܐ܂
04:18	ܚ̈ܡܫܐ ܓܝܪ ܒ̈ܥܠܝܢ ܗܘܘ ܠܟܝ܂ ܘܗܢܐ ܕܐܝܬ ܠܟܝ ܗܫܐ ܠܐ ܗܘܐ ܒܥܠܟܝ܂ ܗܕܐ ܫܪܝܪܬܐ ܐܡܪܬܝ܂
04:19	ܐܡܪܐ ܠܗ ܗܝ ܐܢܬܬܐ܂ ܡܪܝ ܚܙܝܐ ܐܢܐ ܢܒܝܐ ܐܢܬ܂
04:20	ܐ̈ܒܗܝܢ ܒܗܢܐ ܛܘܪܐ ܣܓܕܘ܂ ܘܐܢܬܘܢ ܕܝܢ ܐܡܪܝܢ ܐܢܬܘܢ ܕܒܐܘܪܫܠܡ ܗܘ ܒܝܬ ܣܓܕܬܐ܂
04:21	ܐܡܪ ܠܗ݀ ܝܫܘܥ ܐܢܬܬܐ ܗܝܡܢܝܢܝ܂ ܕܐܬܝܐ ܫܥܬܐ܂ ܕܠܐ ܒܗܢܐ ܛܘܪܐ܂ ܐܦܠܐ ܒܐܘܪܫܠܡ ܬܣܓܕܘܢ ܠܐܒܐ܂
04:22	ܐܢܬܘܢ ܣܓܕܝܢ ܐܢܬܘܢ ܠܡܕܡ ܕܠܐ ܝܕܥܝܢ ܐܢܬܘܢ܂ ܘܐܢܚܢܢ ܣܓܕܝܢ ܐܢܚܢܢ ܠܡܕܡ ܕܝܕܥܝܢ ܐܢܚܢܢ܂ ܕܚ̈ܝܐ ܡܢ ܝܗܘܕܐ ܐܢܘܢ܂
04:23	ܐܠܐ ܐܬܝܐ ܫܥܬܐ ܘܗܫܐ ܐܝܬܝܗ܂ ܕܣ̈ܓܘܕܐ ܫܪ̈ܝܪܐ ܢܣܓܕܘܢ ܠܐܒܐ ܒܪܘܚܐ ܘܒܫܪܪܐ܂ ܘܐܦ ܐܒܐ ܓܝܪ ܐܝܟ ܗܠܝܢ ܗܘ ܣܓ̈ܘܕܐ ܒܥܐ܂
04:24	ܐܠܗܐ ܓܝܪ ܪܘܚܐ ܗܘ܂ ܘܐܝܠܝܢ ܕܣܓܕܝܢ ܠܗ ܒܪܘܚܐ܂ ܘܠܡܣܓܕ ܠܗܘܢ ܘܠܐ ܠܐܝܠܝܢ ܕܒܪܘܚܐ ܘܒܫܪܪܐ ܣܓܕܝܢ ܠܗ܂
04:25	ܐܡܪܐ ܠܗ ܗܝ ܐܢܬܬܐ܂ ܝܕܥܐ ܐܢܐ ܕܡܫܝܚܐ ܐܬܐ܂ ܘܡܐ ܕܐܬܐ ܗܘ ܡܒܕܩ ܠܢ ܟܘܠ ܡܕܡ܂
04:26	ܐܡܪ ܠܗ݀ ܝܫܘܥ ܐܢܐ ܐܢܐ ܕܡܡܠܠ ܐܢܐ ܥܡܟܝ܂
04:27	ܘܟܕ ܗܢܘܢ ܡܡܠܠܝܢ܂ ܐܬܘ ܬܠܡ̈ܝܕܘܗܝ ܘܡܬܕܡܪܝܢ ܗܘܘ ܕܥܡ ܐܢܬܬܐ܂ ܡܡܠܠ ܗܘܐ ܡܐܡܪ ܕܝܢ ܠܐ ܐܡܪܘ ܠܗ ܕܐܘ ܡܢܐ ܒܥܬ ܐܘ ܡܢܐ ܐܡܪ ܗܘܝܬ ܠܗ݀܂
04:28	ܘܗܝ ܐܢܬܬܐ ܫܒܩܬܗ݀ ܩܘܠܬܗ݀ ܘܐܙܠܬ ܗܘܬ ܠܡܕܝܢܬܐ܂ ܘܐܡܪܐ ܠܐܢܫܐ
04:29	ܬܘ ܚܙܘ ܓܒܪܐ ܕܐܡܪ ܠܝ ܟܠ ܡܕܡ ܕܥܒܕܬ܂ ܕܠܡܐ ܗܘܝܘ ܡܫܝܚܐ܂
04:30	ܘܢܦܩܘ ܡܢ ܡܕܝܢܬܐ܂ ܘܐܬܝܢ ܗܘܘ ܠܘܬܗ܂
04:31	ܬܠܡ̈ܝܕܘܗܝ ܕܝܢ ܒܥܝܢ ܗܘܘ ܡܢܗ ܕܢܐܟܘܠ ܥܡܗܘܢ ܠܚܡܐ܂
04:32	ܐܡܪ ܠܗܘܢ܂ ܐܝܬ ܠܝ ܡܐܟܘܠܬܐ ܕܐܟܘܠ ܐܝܕܐ ܕܐܢܬܘܢ ܠܐ ܝܕܥܝܢ ܠܗ݀܂
04:33	ܐܡܪܝܢ ܗܢܘܢ ܚܕ ܠܚܕ܂ ܠܡܐ ܟܝ ܐܢܫ ܐܝܬܝ ܠܗ ܡܕܡ ܠܡܐܟܠ܂
04:34	ܐܡܪ ܠܗܘܢ ܗܘ ܝܫܘܥ܂ ܡܟܘܠܬܝ ܕܝܠܝ ܕܐܥܒܕ ܗܘ ܨܒܝܢܗ ܕܡܢ ܕܫܕܪܢܝ܂ ܘܐܫܠܡܝܘܗܝ ܠܥܒܕܐ܂
04:35	ܠܐ ܐܢܬܘܢ ܐܡܪܝܢ ܐܢܬܘܢ܂ ܕܐܪ̈ܒܥܐ ܐܢܘܢ ܝܪ̈ܚܝܢ ܘܐܬܐ ܚܨܕܐ܂ ܗܐ ܐܡܪܢܐ ܠܟܘܢ ܕܐܪܝܡܘ ܥ̈ܝܢܝܟܘܢ ܘܚܙܘ ܕܐܪ̈ܥܬܐ ܚܘܪ ܘܡܛܝ ܠܚܨܕܐ܂
04:36	ܘܡܢ ܟܕܘ ܚܨܘܕܐ ܐܓܪܐ ܢܣܒ܂ ܘܟܢܫ ܦܐܪ̈ܐ ܠܚ̈ܝܐ ܕܠܥܠܡ܂ ܘܙܪܘܥܐ ܘܚܨܘܕܐ ܐܟܚܕܐ ܢܚܕܘܢ܂
04:37	ܒܗܕܐ ܓܝܪ ܐܝܬܝܗ ܡܠܬܐ ܕܫܪܪܐ܂ ܕܐܚܪܢ ܗܘ ܙܪܥ ܘܐܚܪܝܢ ܗܘ ܚܨܕ܂
04:38	ܘܐܢܐ ܫܕܪܬܟܘܢ ܠܡܚܨܕ ܡܕܡ ܕܠܐ ܗܘܐ ܐܢܬܘܢ ܠܐܝܬܘܢ ܒܗ܂ ܐܠܐ ܐܝܠܝܢ ܕܠܐܝܘ܂ ܘܐܢܬܘܢ ܥܠܬܘܢ ܥܠ ܥܡܠܗܘܢ ܕܗܠܘܟ܂
04:39	ܘܡܢ ܡܕܢܬܐ ܗܝ ܣܓ̈ܝܐܐ ܗܝܡܢܘ ܒܗ ܡܢ ܫ̈ܡܪܝܐ܂ ܡܛܠ ܣܗܕܘܬܗ݀ ܕܗܝ ܐܢܬܬܐ܂ ܕܐܡܪܐ ܗܘܬ ܟܘܠ ܡܕܡ ܕܥܒܕܬ ܐܡܪ ܠܝ܂
04:40	ܘܟܕ ܐܬܘ ܠܘܬܗ ܗܢܘܢ ܫ̈ܡܪܝܐ܂ ܒܥܝܢ ܗܘܘ ܡܢܗ ܕܢܗܘܐ ܠܘܬܗܘܢ܂ ܘܗܘܐ ܠܘܬܗܘܢ ܬܪ̈ܝܢ ܝܘ̈ܡܝܢ܂
04:41	ܘܣܓ̈ܝܐܐ ܗܝܡܢܘ ܒܗ܂ ܡܛܘܠ ܡܠܬܗ܂
04:42	ܘܐܡܪܝܢ ܗܘܘ ܠܐܢܬܬܐ ܗܝ܂ ܡܟܝܠ ܠܐ ܗܘܐ ܡܛܠ ܡܠܬܟܝ ܡܗܝܡܢܝܢ ܐܢܚܢܢ ܒܗ܂ ܐܢܚܢܢ ܓܝܪ ܫܡܥܢ ܡܢܗ܂ ܘܝܕܥܢ ܕܫܪܝܪܐܝܬ ܗܘܝܘ ܡܚܝܢܗ ܕܥܠܡܐ܀
04:43	ܡܢ ܒܬܪ ܗܠܘܟ ܬܪܝ̈ܢ ܝܘܡܝ̈ܢ܂ ܢܦܩ ܡܢ ܬܡܢ ܝܫܘܥ ܠܓܠܝܠܐ܂
04:44	ܗܘ ܓܝܪ ܝܫܘܥ ܣܗܕ ܗܘܐ ܕܢܒܝܐ ܒܡܕܝܢܬܗ ܠܐ ܡܬܝܩܪ܂
04:45	ܘܟܕ ܐܬܐ ܩܒܠܘܗܝ ܓ̈ܠܝܠܝܐ܂ ܟܕ ܚܙܘ ܡܕܡ ܕܥܒܕ ܒܐܘܪܫܠܡ ܒܥܕܥܕܐ܂ ܘܐܦ ܗܢܘܢ ܓܝܪ ܐܬܘ ܗܘܘ ܠܥܕܥܕܐ܂
04:46	ܘܐܬܐ ܗܘܐ ܬܘܒ ܠܩܛܢܐ ܕܓܠܝܠܐ܂ ܐܬܪ ܕܥܒܕ ܗܘܐ ܡ̈ܝܐ ܗܢܘܢ ܚܡܪܐ܀ ܘܐܝܬ ܗܘܐ ܒܟܦܪܢܚܘܡ ܥܒܕ ܡܠܟܐ ܚܕ ܕܒܪܗ ܟܪܝܗ ܗܘܐ܂
04:47	ܟܕ ܫܡܥ ܕܝܫܘܥ ܐܬܐ ܡܢ ܓܠܝܠܐ ܠܝܗܘܕ܂ ܐܬܐ ܠܘܬܗ܂ ܘܒܥܐ ܗܘܐ ܡܢܗ ܕܢܚܘܬ ܘܢܚܙܐ ܠܒܪܗ܂ ܡܛܠ ܕܩܪܝܒ ܗܘܐ ܠܡܡܬ܂
04:48	ܐܡܪ ܠܗ ܝܫܘܥ܂ ܐܢ ܢܝ̈ܣܐ ܘܐ̈ܬܘܬܐ ܠܐ ܬܚܙܘܢ ܠܐ ܬܗܝܡܢܘܢ܂
04:49	ܐܡܪ ܠܗ ܥܒܕ ܡܠܟܐ ܡܪܝ ܚܘܬ ܥܕܠܐ ܡܐܬ ܠܗ ܛܠܝܐ܂
04:50	ܐܡܪ ܠܗ ܝܫܘܥ܂ ܙܠ ܠܒܝܬܟ ܗܐ ܒܪܟ ܚܝܐ܂ ܘܗܝܡܢ ܗܘ ܓܒܪܐ ܒܡܠܬܗ ܕܝܫܘܥ܂
04:51	ܘܟܕ ܐܙܠ ܐܪܥܘܗܝ ܥܒ̈ܕܘܗܝ ܘܣܒܪܘܗܝ܂ ܘܐܡܪܘ ܠܗ ܕܒܪܟ ܚܝܐ܂
04:52	ܘܫܐܠ ܐܢܘܢ ܕܒܐܝܕܐ ܫܥܬܐ ܗܘܐ ܫܦܝܪ܂ ܐܡܪܝܢ ܠܗ ܐܬܡܠܝ ܒܬܫܥ ܫ̈ܥܝܢ ܫܒܩܬܗ ܐܫܬܐ܂
04:53	ܘܝܕܥ ܐܒܘܗܝ ܕܒܗܝ ܫܥܬܐ ܕܐܡܪ ܠܗ ܝܫܘܥ ܕܒܪܟ ܚܝܐ܂ ܘܗܝܡܢ ܗܘ ܘܟܘܠܗ ܒܝܬܗ܂
04:54	ܗܕܐ ܗܝ ܐܬܐ ܕܬܪ̈ܬܝܢ ܕܥܒܕ ܝܫܘܥ܂ ܟܕ ܐܬܐ ܡܢ ܝܗܘܕ ܠܓܠܝܠܐ܀